| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. ஸங்கா⁴தி³ஸேஸகண்டோ³
2. Saṅghādisesakaṇḍo
1. ஸுக்கவிஸ்ஸட்டி²ஸிக்கா²பத³வண்ணனா
1. Sukkavissaṭṭhisikkhāpadavaṇṇanā
234. தேரஸகஸ்ஸாதி தேரஸ ஸிக்கா²பதா³னி பரிமாணானி அஸ்ஸாதி தேரஸகோ, கண்டோ³, தஸ்ஸ. ஸமதே² விபஸ்ஸனாய வா அபி⁴ரதிரஹிதோ இத⁴ அனபி⁴ரதோ, ந பப்³ப³ஜ்ஜாயாதி ஆஹ ‘‘விக்கி²த்தசித்தோ’’தி. விக்கி²த்ததாய காரணமாஹ காமராகா³இச்சாதி³.
234.Terasakassāti terasa sikkhāpadāni parimāṇāni assāti terasako, kaṇḍo, tassa. Samathe vipassanāya vā abhiratirahito idha anabhirato, na pabbajjāyāti āha ‘‘vikkhittacitto’’ti. Vikkhittatāya kāraṇamāha kāmarāgāiccādi.
235. அப்³போ³ஹாரிகாதி ஸீலவிபத்திவோஹாரங் நாரஹதீதி கத்வா வுத்தங். அகுஸலபா⁴வே பனஸ்ஸா அப்³போ³ஹாரதா நத்தி².
235.Abbohārikāti sīlavipattivohāraṃ nārahatīti katvā vuttaṃ. Akusalabhāve panassā abbohāratā natthi.
236-7. சேதனா-ஸத்³த³தோ விஸுங் ஸங்-ஸத்³த³ஸ்ஸ அத்தா²பா⁴வங் இக-பச்சயஸ்ஸ ச அத்த²வந்ததங் த³ஸ்ஸேதுங் ஸஞ்சேதனா வாதிஆதி³ து³தியவிகப்போ வுத்தோ. ஸிகா²ப்பத்தோ அத்தோ²தி அதி⁴ப்பேதத்த²ங் ஸந்தா⁴ய வுத்தங். ஆஸயபே⁴த³தோதி பித்தஸெம்ஹபுப்³ப³லோஹிதானங் சதுன்னங் ஆஸயானங் பே⁴தே³ன. தா⁴துனானத்ததோதி ரஸருஹிராதீ³னங் ஸத்தன்னங், பத²வாதீ³னங் வா சதுன்னங் தா⁴தூனங் நானத்தேன. வத்தி²ஸீஸந்தி முத்தவத்தி²தோ மத்த²கபஸ்ஸங். ஹத்தி²மத³சலனங் நாமஞ்ச ஸம்ப⁴வோதி ஆஹ ‘‘ஸம்ப⁴வோ நிக்க²மதீ’’தி. ஸம்ப⁴வவேக³ந்தி ஸம்ப⁴வஸ்ஸ டா²னதோ சவித்வா த³கஸோதாபி⁴முக²ங் ஓதரணேன ஸஞ்ஜாதஸரீரக்கோ²ப⁴வேக³ங். பா³ஹுஸீஸந்தி க²ந்த⁴ப்பதே³ஸங். த³ஸ்ஸேஸீதி எத்த² இதி-ஸத்³தோ³ ஹேதுத்தோ², தேன யஸ்மா கண்ணசூளிகாஹி ஸம்ப⁴வோ நிக்க²மதி…பே॰… ஸம்ப⁴வஞ்ச த³ஸ்ஸேஸி, தஸ்மா ததியஸ்ஸ பா⁴ஸிதங் ஸுபா⁴ஸிதந்தி ஏவங் யோஜனா வேதி³தப்³பா³. த³கஸோதந்தி முத்தஸ்ஸ வத்தி²தோ நிக்க²மனமக்³க³ங், அங்க³ஜாதப்பதே³ஸந்தி வுத்தங் ஹோதி. ஸுக்கஞ்ச நாமேதங் ரஸருஹிராதி³ஸத்ததே³ஹதா⁴தூஸு மஜ்ஜி²மதா⁴துசதுஜங் அட்டி²மிஞ்ஜாதி³ விய பத²வீதா⁴துஸங்க³ஹிதங் ஆஹாரூபஜீவீனங் ஸகலகாயக³தங் அதித³ஹரதா³ரகானம்பி அத்தே²வ, தங் பன பன்னரஸஸோளஸவஸ்ஸுத்³தே³ஸதோ பட்டா²ய ஸத்தானங் ஸமுப்பஜ்ஜனககாமராகே³ஹேவ டா²னதோ சலதி, சலிதஞ்ச ஆபோதா⁴துபா⁴வேன சித்தஜமேவ ஹுத்வா த³கஸோதங் ஓதரதி, த³கஸோததோ பன பட்டா²ய சித்தபச்சயஉதுஜங் ஹோதி மத்த²லுங்க³தோ சலிதஸிங்கா⁴ணிகா விய. யேஸங் பன ஸமுச்சே²த³னவிக்க²ம்ப⁴னாதீ³ஹி ராக³பரியுட்டா²னங் நத்தி² , தேஸங் ஸுக்கவிஸ்ஸட்டி² ந ஸியா. இதி யதா²டா²னதோ ஸுக்கஸ்ஸ விஸ்ஸட்டி²யேவ ராக³சித்தஸமுட்டா²னா, ந பகதிரூபங், தேனேவ கதா²வத்து²அட்ட²கதா²யங் (கதா²॰ அட்ட²॰ 307) ‘‘ஸுக்கவிஸ்ஸட்டி² நாம ராக³ஸமுட்டா²னா ஹோதீ’’தி ஸுக்கஸ்ஸ விஸ்ஸட்டி² ஏவ ராக³ஸமுட்டா²னா வுத்தா, ந பகதிரூபங். ச²ன்னங் பன காமாவசரதே³வானங் விஜ்ஜமானாபி ஸுக்கதா⁴து த்³வயங்த்³வயஸமாபத்திவஸேன பரியுட்டி²தராகே³னாபி டா²னதோ ந க³ளதி, யதா²டா²னே ஏவ ட²த்வா கிஞ்சி விகாரங் ஆபஜ்ஜமானா தங்க²ணிகபரிளாஹவூபஸமாவஹா மேது²னகிச்சனிட்டா²பிதா ஹோதீதி வேதி³தப்³ப³ங். கேசி பன ‘‘காயஸம்ப²ஸ்ஸஸுக²மேவ தேஸங் காமகிச்ச’’ந்தி வத³ந்தி. கீ²ணாஸவானங் பன அனாகா³மீனஞ்ச ஸப்³ப³ஸோ காமராகா³பா⁴வேன ஸுக்கதா⁴துவிகாரம்பி நாபஜ்ஜதீதி வேதி³தப்³ப³ங். ரூபீப்³ரஹ்மானங் பன விக்க²ம்பி⁴தகாமராகே³ன ஜனிதத்தா அனாஹாரூபஜீவிதத்தா ச ஸப்³ப³தா² ஸுக்கதா⁴துபி நத்தே²வ. ததே²வாதி மோசனஸ்ஸாதே³ன நிமித்தே உபக்கமதோதிஆதி³ங் அதிதி³ஸதி. ‘‘விஸ்ஸட்டீ²தி டா²னாசாவனா வுச்சதீ’’தி பத³பா⁴ஜனே (பாரா॰ 237) வுத்தத்தா ‘‘த³கஸோதங் ஓதிண்ணமத்தே’’தி கஸ்மா வுத்தந்தி ஆஹ த³கஸோதோரோஹணஞ்செத்தா²திஆதி³. எத்தா²தி தீஸுபி வாதே³ஸு. அதி⁴வாஸெத்வாதி நிமித்தே உபக்கமித்வா புன விப்படிஸாரே உப்பன்னே மோசனஸ்ஸாத³ங் வினோதெ³த்வா. அந்தரா நிவாரேதுந்தி அத்தனோ நிமித்தே கதூபக்கமேன டா²னா சுதங் த³கஸோதங் ஓதரிதுங் அத³த்வா அந்தரா நிவாரேதுங். மோசனஸ்ஸாதே³ன ஹத்த²பரிகம்மாதி³ங் கரொந்தஸ்ஸ முத்தேபி து³க்கடமேவ, நிமித்தே உபக்கமாபா⁴வதோ பன ஸங்கா⁴தி³ஸேஸோ ந ஹோதீதி ஆஹ ‘‘ஹத்த²…பே॰… அனாபத்தீ’’தி. த³கஸோதோரோஹணஞ்செத்தா²திஆதி³னா வுத்தவினிச்ச²யங் ஸந்தா⁴ய ‘‘அயங் ஸப்³பா³சரியஸாதா⁴ரணவினிச்ச²யோ’’தி வுத்தங்.
236-7. Cetanā-saddato visuṃ saṃ-saddassa atthābhāvaṃ ika-paccayassa ca atthavantataṃ dassetuṃ sañcetanā vātiādi dutiyavikappo vutto. Sikhāppatto atthoti adhippetatthaṃ sandhāya vuttaṃ. Āsayabhedatoti pittasemhapubbalohitānaṃ catunnaṃ āsayānaṃ bhedena. Dhātunānattatoti rasaruhirādīnaṃ sattannaṃ, pathavādīnaṃ vā catunnaṃ dhātūnaṃ nānattena. Vatthisīsanti muttavatthito matthakapassaṃ. Hatthimadacalanaṃ nāmañca sambhavoti āha ‘‘sambhavo nikkhamatī’’ti. Sambhavaveganti sambhavassa ṭhānato cavitvā dakasotābhimukhaṃ otaraṇena sañjātasarīrakkhobhavegaṃ. Bāhusīsanti khandhappadesaṃ. Dassesīti ettha iti-saddo hetuttho, tena yasmā kaṇṇacūḷikāhi sambhavo nikkhamati…pe… sambhavañca dassesi, tasmā tatiyassa bhāsitaṃ subhāsitanti evaṃ yojanā veditabbā. Dakasotanti muttassa vatthito nikkhamanamaggaṃ, aṅgajātappadesanti vuttaṃ hoti. Sukkañca nāmetaṃ rasaruhirādisattadehadhātūsu majjhimadhātucatujaṃ aṭṭhimiñjādi viya pathavīdhātusaṅgahitaṃ āhārūpajīvīnaṃ sakalakāyagataṃ atidaharadārakānampi attheva, taṃ pana pannarasasoḷasavassuddesato paṭṭhāya sattānaṃ samuppajjanakakāmarāgeheva ṭhānato calati, calitañca āpodhātubhāvena cittajameva hutvā dakasotaṃ otarati, dakasotato pana paṭṭhāya cittapaccayautujaṃ hoti matthaluṅgato calitasiṅghāṇikā viya. Yesaṃ pana samucchedanavikkhambhanādīhi rāgapariyuṭṭhānaṃ natthi , tesaṃ sukkavissaṭṭhi na siyā. Iti yathāṭhānato sukkassa vissaṭṭhiyeva rāgacittasamuṭṭhānā, na pakatirūpaṃ, teneva kathāvatthuaṭṭhakathāyaṃ (kathā. aṭṭha. 307) ‘‘sukkavissaṭṭhi nāma rāgasamuṭṭhānā hotī’’ti sukkassa vissaṭṭhi eva rāgasamuṭṭhānā vuttā, na pakatirūpaṃ. Channaṃ pana kāmāvacaradevānaṃ vijjamānāpi sukkadhātu dvayaṃdvayasamāpattivasena pariyuṭṭhitarāgenāpi ṭhānato na gaḷati, yathāṭhāne eva ṭhatvā kiñci vikāraṃ āpajjamānā taṅkhaṇikapariḷāhavūpasamāvahā methunakiccaniṭṭhāpitā hotīti veditabbaṃ. Keci pana ‘‘kāyasamphassasukhameva tesaṃ kāmakicca’’nti vadanti. Khīṇāsavānaṃ pana anāgāmīnañca sabbaso kāmarāgābhāvena sukkadhātuvikārampi nāpajjatīti veditabbaṃ. Rūpībrahmānaṃ pana vikkhambhitakāmarāgena janitattā anāhārūpajīvitattā ca sabbathā sukkadhātupi nattheva. Tathevāti mocanassādena nimitte upakkamatotiādiṃ atidisati. ‘‘Vissaṭṭhīti ṭhānācāvanā vuccatī’’ti padabhājane (pārā. 237) vuttattā ‘‘dakasotaṃ otiṇṇamatte’’ti kasmā vuttanti āha dakasotorohaṇañcetthātiādi. Etthāti tīsupi vādesu. Adhivāsetvāti nimitte upakkamitvā puna vippaṭisāre uppanne mocanassādaṃ vinodetvā. Antarā nivāretunti attano nimitte katūpakkamena ṭhānā cutaṃ dakasotaṃ otarituṃ adatvā antarā nivāretuṃ. Mocanassādena hatthaparikammādiṃ karontassa muttepi dukkaṭameva, nimitte upakkamābhāvato pana saṅghādiseso na hotīti āha ‘‘hattha…pe… anāpattī’’ti. Dakasotorohaṇañcetthātiādinā vuttavinicchayaṃ sandhāya ‘‘ayaṃ sabbācariyasādhāraṇavinicchayo’’ti vuttaṃ.
கோ²ப⁴கரணபச்சயோ நாம விஸபா⁴க³பே⁴ஸஜ்ஜஸேனாஸனாஹாராதி³பச்சயோ. நானாவித⁴ங் ஸுபினந்தி கு²பி⁴தவாதாதி³தா⁴தூனங் அனுகு³ணங். அனுபூ⁴தபுப்³ப³ந்தி புப்³பே³ பூ⁴தபுப்³ப³ங் மனஸா பரிகப்பிதபுப்³ப³ஞ்ச. ஸக்³க³னரகதே³ஸந்தராதீ³னம்பி ஹி ஸங்க³ஹெத்வா வுத்தங். அத்த²காமதாய வா அனத்த²காமதாய வாதி இத³ங் தே³வதானங் ஹிதாஹிதாதி⁴ப்பாயதங் த³ஸ்ஸேதுங் வுத்தங். அத்தா²ய வா அனத்தா²ய வாதி ஸபா⁴வதோ ப⁴விதப்³ப³ங் ஹிதாஹிதங் ஸந்தா⁴ய வுத்தங். நனு தே³வதாஹி உபஸங்ஹரியமானானி ஆரம்மணானி பரமத்த²தோ நத்தி², கத²ங் தானி புரிஸோ பஸ்ஸதி, தே³வதா வா தானி அவிஜ்ஜமானானி உபஸங்ஹரந்தீதி சோத³னங் மனஸி கத்வா ஆஹ ஸோ தாஸந்திஆதி³. தேன ‘‘ஏவமேஸோ பரிகப்பதூ’’தி தே³வதாஹி சிந்திதமத்தேன ஸுபந்தஸ்ஸ சித்தங் ப⁴வங்க³ஸந்ததிதோ நிபதித்வா தே³வதாஹி சிந்திதனியாமேனேவ பரிகப்பமானங் பவத்ததி, ஏவங் தேன பரிகப்பமானானி ஆரம்மணானி தே³வதாஹி உபஸங்ஹடானி நாம ஹொந்தி, தானி ச ஸோ தே³வதானுபா⁴வேன பஸ்ஸதி நாமாதி த³ஸ்ஸேதி. போ³தி⁴ஸத்தமாதா விய புத்தபடிலாப⁴னிமித்தந்திஆதீ³ஸு போ³தி⁴ஸத்தஸ்ஸ க³ப்³போ⁴க்கந்திதி³வஸே மஹாமாயாதே³வியா அத்தனோ த³க்கி²ணபஸ்ஸேன ஏகஸ்ஸ ஸேதவரவாரணஸ்ஸ அந்தோகுச்சி²பவிட்ட²பா⁴வத³ஸ்ஸனங் புத்தபடிலாப⁴னிமித்தங் ஸுபினங் நாம. அம்ஹாகங் பன போ³தி⁴ஸத்தஸ்ஸ ‘‘ஸ்வே பு³த்³தோ⁴ ப⁴விஸ்ஸதீ’’தி சாதுத்³த³ஸியங் பக்க²ஸ்ஸ ரத்திவிபா⁴யனகாலே ஹிமவந்தங் பி³ப்³போ³ஹனங் கத்வா புரத்தி²மபச்சி²மஸமுத்³தே³ஸு வாமத³க்கி²ணஹத்தே² த³க்கி²ணஸமுத்³தே³ பாதே³ ச ஓத³ஹித்வா மஹாபத²வியா ஸயனங் ஏகோ, த³ப்³ப³திணஸங்கா²தாய திரியா நாம திணஜாதியா நங்க³லமத்தரத்தத³ண்டா³ய நாபி⁴தோ உக்³க³தாய க²ணேன அனேகயோஜனஸஹஸ்ஸங் நப⁴ங் ஆஹச்ச டா²னங் ஏகோ, ஸேதானங் கண்ஹஸீஸானங் கிமீனங் பாதே³ஹி உஸ்ஸக்கித்வா யாவ ஜாணுமண்ட³லங் ஆஹச்ச டா²னங் ஏகோ, நானாவண்ணானங் சதுன்னங் ஸகுணானங் சதூஹி தி³ஸாஹி ஆக³ந்த்வா பாத³மூலே ஸேதவண்ணதாபஜ்ஜனங் ஏகோ, போ³தி⁴ஸத்தஸ்ஸ மஹதோ மீள்ஹபப்³ப³தஸ்ஸ உபரி அலிம்பமானஸ்ஸ சங்கமனங் ஏகோதி இமே பஞ்ச மஹாஸுபினா நாம, இமே ச யதா²க்கமங் ஸம்போ³தி⁴யா, தே³வமனுஸ்ஸேஸு அரியமக்³க³ப்பகாஸனஸ்ஸ, கி³ஹீனஞ்ச ஸரணூபக³மனஸ்ஸ, க²த்தியாதி³சதுவண்ணானங் பப்³ப³ஜித்வா அரஹத்தபடிலாப⁴ஸ்ஸ, சதுன்னங் பச்சயானங் லாபே⁴ அலித்தபா⁴வஸ்ஸ ச புப்³ப³னிமித்தானீதி வேதி³தப்³ப³ங். ஸோளஸ ஸுபினா பாகடா ஏவ. ஏகந்தஸச்சமேவாதி ப²லனியமுப்பத்திதோ வுத்தங். த³ஸ்ஸனங் பன ஸப்³ப³த்த² விபல்லத்த²மேவ. தா⁴துக்கோ²பா⁴தீ³ஸு சதூஸு மூலகாரணேஸு த்³வீஹி தீஹிபி காரணேஹி கதா³சி ஸுபினங் பஸ்ஸந்தீதி ஆஹ ‘‘ஸங்ஸக்³க³பே⁴த³தோ’’தி. ஸுபினபே⁴தோ³தி ஸச்சாஸச்சத்த²தாபே⁴தோ³.
Khobhakaraṇapaccayo nāma visabhāgabhesajjasenāsanāhārādipaccayo. Nānāvidhaṃ supinanti khubhitavātādidhātūnaṃ anuguṇaṃ. Anubhūtapubbanti pubbe bhūtapubbaṃ manasā parikappitapubbañca. Sagganarakadesantarādīnampi hi saṅgahetvā vuttaṃ. Atthakāmatāya vā anatthakāmatāya vāti idaṃ devatānaṃ hitāhitādhippāyataṃ dassetuṃ vuttaṃ. Atthāya vā anatthāya vāti sabhāvato bhavitabbaṃ hitāhitaṃ sandhāya vuttaṃ. Nanu devatāhi upasaṃhariyamānāni ārammaṇāni paramatthato natthi, kathaṃ tāni puriso passati, devatā vā tāni avijjamānāni upasaṃharantīti codanaṃ manasi katvā āha so tāsantiādi. Tena ‘‘evameso parikappatū’’ti devatāhi cintitamattena supantassa cittaṃ bhavaṅgasantatito nipatitvā devatāhi cintitaniyāmeneva parikappamānaṃ pavattati, evaṃ tena parikappamānāni ārammaṇāni devatāhi upasaṃhaṭāni nāma honti, tāni ca so devatānubhāvena passati nāmāti dasseti. Bodhisattamātā viya puttapaṭilābhanimittantiādīsu bodhisattassa gabbhokkantidivase mahāmāyādeviyā attano dakkhiṇapassena ekassa setavaravāraṇassa antokucchipaviṭṭhabhāvadassanaṃ puttapaṭilābhanimittaṃ supinaṃ nāma. Amhākaṃ pana bodhisattassa ‘‘sve buddho bhavissatī’’ti cātuddasiyaṃ pakkhassa rattivibhāyanakāle himavantaṃ bibbohanaṃ katvā puratthimapacchimasamuddesu vāmadakkhiṇahatthe dakkhiṇasamudde pāde ca odahitvā mahāpathaviyā sayanaṃ eko, dabbatiṇasaṅkhātāya tiriyā nāma tiṇajātiyā naṅgalamattarattadaṇḍāya nābhito uggatāya khaṇena anekayojanasahassaṃ nabhaṃ āhacca ṭhānaṃ eko, setānaṃ kaṇhasīsānaṃ kimīnaṃ pādehi ussakkitvā yāva jāṇumaṇḍalaṃ āhacca ṭhānaṃ eko, nānāvaṇṇānaṃ catunnaṃ sakuṇānaṃ catūhi disāhi āgantvā pādamūle setavaṇṇatāpajjanaṃ eko, bodhisattassa mahato mīḷhapabbatassa upari alimpamānassa caṅkamanaṃ ekoti ime pañca mahāsupinā nāma, ime ca yathākkamaṃ sambodhiyā, devamanussesu ariyamaggappakāsanassa, gihīnañca saraṇūpagamanassa, khattiyādicatuvaṇṇānaṃ pabbajitvā arahattapaṭilābhassa, catunnaṃ paccayānaṃ lābhe alittabhāvassa ca pubbanimittānīti veditabbaṃ. Soḷasa supinā pākaṭā eva. Ekantasaccamevāti phalaniyamuppattito vuttaṃ. Dassanaṃ pana sabbattha vipallatthameva. Dhātukkhobhādīsu catūsu mūlakāraṇesu dvīhi tīhipi kāraṇehi kadāci supinaṃ passantīti āha ‘‘saṃsaggabhedato’’ti. Supinabhedoti saccāsaccatthatābhedo.
ரூபனிமித்தாதி³ஆரம்மணந்தி எத்த² கம்மனிமித்தக³தினிமித்ததோ அஞ்ஞரூபமேவ விஞ்ஞாணஸ்ஸ நிமித்தந்தி ரூபனிமித்தங், தங் ஆதி³ யேஸங் ஸத்தனிமித்தாதீ³னங் தானி ரூபனிமித்தாதீ³னி ஆரம்மணானி யஸ்ஸ ப⁴வங்க³சித்தஸ்ஸ தங் ரூபனிமித்தாதி³ஆரம்மணங். ஈதி³ஸானீதி ரூபனிமித்தாதி³ஆரம்மணானி ராகா³தி³ஸம்பயுத்தானி ச. ஸப்³போ³ஹாரிகசித்தேனாதி படிபு³த்³த⁴ஸ்ஸ பகதிவீதி²சித்தேன. கோ நாம பஸ்ஸதீதி ஸுத்தபடிபு³த்³த⁴பா⁴வவியுத்தாய சித்தப்பவத்தியா அபா⁴வதோ ஸுபினங் பஸ்ஸந்தோ நாம ந ஸியாதி அதி⁴ப்பாயோ, தேனாஹ ‘‘ஸுபினஸ்ஸ அபா⁴வோவ ஆபஜ்ஜதீ’’தி. கபிமித்³த⁴பரேதோதி இமினா நித்³தா³வஸேன பவத்தமானப⁴வங்க³ஸந்ததிப்³யவஹிதாய குஸலாகுஸலாய மனொத்³வாரவீதி²யா ச பஸ்ஸதீதி த³ஸ்ஸேதி, தேனாஹ யா நித்³தா³திஆதி³. த்³வீஹி அந்தேஹி முத்தோதி குஸலாகுஸலஸங்கா²தேஹி த்³வீஹி அந்தேஹி முத்தோ. ஆவஜ்ஜனததா³ரம்மணக்க²ணேதி ஸுபினே பஞ்சத்³வாரவீதி²யா அபா⁴வதோ மனொத்³வாரே உப்பஜ்ஜனாரஹங் க³ஹெத்வா வுத்தங்.
Rūpanimittādiārammaṇanti ettha kammanimittagatinimittato aññarūpameva viññāṇassa nimittanti rūpanimittaṃ, taṃ ādi yesaṃ sattanimittādīnaṃ tāni rūpanimittādīni ārammaṇāni yassa bhavaṅgacittassa taṃ rūpanimittādiārammaṇaṃ. Īdisānīti rūpanimittādiārammaṇāni rāgādisampayuttāni ca. Sabbohārikacittenāti paṭibuddhassa pakativīthicittena. Ko nāma passatīti suttapaṭibuddhabhāvaviyuttāya cittappavattiyā abhāvato supinaṃ passanto nāma na siyāti adhippāyo, tenāha ‘‘supinassa abhāvova āpajjatī’’ti. Kapimiddhaparetoti iminā niddāvasena pavattamānabhavaṅgasantatibyavahitāya kusalākusalāya manodvāravīthiyā ca passatīti dasseti, tenāha yā niddātiādi. Dvīhi antehi muttoti kusalākusalasaṅkhātehi dvīhi antehi mutto. Āvajjanatadārammaṇakkhaṇeti supine pañcadvāravīthiyā abhāvato manodvāre uppajjanārahaṃ gahetvā vuttaṃ.
எத்த² ச ஸுபினந்தேபி ததா³ரம்மணவசனதோ அனுபூ⁴தேஸு ஸுதபுப்³பே³ஸு வா ரூபாதீ³ஸு புராபத்திபா⁴வேன பரிகப்பெத்வா விபல்லாஸதோ பவத்தமானாபி காமாவசரவிபாகத⁴ம்மா பரித்தத⁴ம்மே நிஸ்ஸாய பரிகப்பெத்வா பவத்தத்தா பரித்தாரம்மணா வுத்தா, ந பன ஸரூபதோ பரித்தத⁴ம்மே க³ஹெத்வா பவத்தத்தா ஏவாதி க³ஹேதப்³ப³ங். ஏவஞ்ச இத்தி²புரிஸாதி³ஆகாரங் ஆரோபெத்வா பவத்தமானானங் ராகா³தி³ஸவிபாகத⁴ம்மானம்பி தேஸங் ஆரம்மணங் க³ஹெத்வா உப்பன்னானங் படிஸந்தா⁴தி³விபாகானம்பி பரித்தாரம்மணதா கம்மனிமித்தாரம்மணதா ச உபபன்னா ஏவ ஹோதி. வத்து²த⁴ம்மவினிமுத்தங் பன ஸம்முதிபூ⁴தங் கஸிணாதி³படிபா⁴கா³ரம்மணங் க³ஹெத்வா உப்பன்னா உபசாரப்பனாதி³வஸப்பவத்தா சித்தசேதஸிகத⁴ம்மா ஏவ பரித்தத்திகே (த⁴॰ ஸ॰ திகமாதிகா 12) ந வத்தப்³பா³ரம்மணாதி க³ஹேதப்³பா³.
Ettha ca supinantepi tadārammaṇavacanato anubhūtesu sutapubbesu vā rūpādīsu purāpattibhāvena parikappetvā vipallāsato pavattamānāpi kāmāvacaravipākadhammā parittadhamme nissāya parikappetvā pavattattā parittārammaṇā vuttā, na pana sarūpato parittadhamme gahetvā pavattattā evāti gahetabbaṃ. Evañca itthipurisādiākāraṃ āropetvā pavattamānānaṃ rāgādisavipākadhammānampi tesaṃ ārammaṇaṃ gahetvā uppannānaṃ paṭisandhādivipākānampi parittārammaṇatā kammanimittārammaṇatā ca upapannā eva hoti. Vatthudhammavinimuttaṃ pana sammutibhūtaṃ kasiṇādipaṭibhāgārammaṇaṃ gahetvā uppannā upacārappanādivasappavattā cittacetasikadhammā eva parittattike (dha. sa. tikamātikā 12) na vattabbārammaṇāti gahetabbā.
ஸ்வாயந்தி ஸுபினோ. விபல்லாஸேன பரிகப்பிதபரித்தாரம்மணத்தா ‘‘து³ப்³ப³லவத்து²கத்தா’’தி வுத்தங், அவிஜ்ஜமானாரம்மணே அவஸவத்திதோதி அதி⁴ப்பாயோ, தேனாஹ அவிஸயே உப்பன்னத்தாதிஆதி³.
Svāyanti supino. Vipallāsena parikappitaparittārammaṇattā ‘‘dubbalavatthukattā’’ti vuttaṃ, avijjamānārammaṇe avasavattitoti adhippāyo, tenāha avisaye uppannattātiādi.
ஆபத்தினிகாயஸ்ஸாதி இத³ங் ஸங்கா⁴தி³ஸேஸோதி புல்லிங்க³-ஸத்³த³ஸ்ஸ அனுரூபவஸேன வுத்தங். அஸ்ஸாதி அஸ்ஸ ஆபத்தினிகாயஸ்ஸ, வுட்டா²பேதுங் இச்சி²தஸ்ஸாதி அத்தோ², தேனாஹ கிங் வுத்தந்திஆதி³. ருள்ஹிஸத்³தே³னாதி எத்த² ஸமுதா³யே நிப்ப²ன்னஸ்ஸாபி ஸத்³த³ஸ்ஸ ததே³கதே³ஸேபி பஸித்³தி⁴ இத⁴ ருள்ஹீ நாம, தாய ருள்ஹியா யுத்தோ ஸத்³தோ³ ருள்ஹீஸத்³தோ³, தேன. ருள்ஹியா காரணமாஹ அவயவேஇச்சாதி³னா.
Āpattinikāyassāti idaṃ saṅghādisesoti pulliṅga-saddassa anurūpavasena vuttaṃ. Assāti assa āpattinikāyassa, vuṭṭhāpetuṃ icchitassāti attho, tenāha kiṃ vuttantiādi. Ruḷhisaddenāti ettha samudāye nipphannassāpi saddassa tadekadesepi pasiddhi idha ruḷhī nāma, tāya ruḷhiyā yutto saddo ruḷhīsaddo, tena. Ruḷhiyā kāraṇamāha avayaveiccādinā.
காலஞ்சாதி ‘‘ராகூ³பத்த²ம்பே⁴’’திஆதி³னா த³ஸ்ஸிதகாலஞ்ச, ‘‘ராகூ³பத்த²ம்பே⁴’’தி வுத்தே ராகூ³பத்த²ம்பே⁴ ஜாதே தஸ்மிங் காலே மோசேதீதி அத்த²தோ காலோ க³ம்மதி. நவமஸ்ஸ அதி⁴ப்பாயஸ்ஸாதி வீமங்ஸாதி⁴ப்பாயஸ்ஸ. வத்தூ²தி விஸயங்.
Kālañcāti ‘‘rāgūpatthambhe’’tiādinā dassitakālañca, ‘‘rāgūpatthambhe’’ti vutte rāgūpatthambhe jāte tasmiṃ kāle mocetīti atthato kālo gammati. Navamassa adhippāyassāti vīmaṃsādhippāyassa. Vatthūti visayaṃ.
238. லோமா ஏதேஸங் ஸந்தீதி லோமஸா, ப³ஹுலோமபாணகா.
238. Lomā etesaṃ santīti lomasā, bahulomapāṇakā.
239. மோசனேனாதி மோசனப்பயோகே³ன. மோசனஸ்ஸாத³ஸம்பயுத்தாயாதி எத்த² மோசனிச்சா²வ மோசனஸ்ஸாதோ³, தேன ஸம்பயுத்தா சேதனா மோசனஸ்ஸாத³சேதனாதி அத்தோ², ந பன மோசனே அஸ்ஸாத³ங் ஸுக²ங் பத்தெ²ந்தியா சேதனாயாதி ஏவங் அத்தோ² க³ஹேதப்³போ³, இதரதா² ஸுக²த்தா²ய மோசெந்தஸ்ஸேவ ஆபத்தி, ந ஆரொக்³யாதி³அத்தா²யாதி ஆபஜ்ஜதி. தஸ்மா ஆரொக்³யாதீ³ஸு யேன கேனசி அதி⁴ப்பாயேன மோசனிச்சா²ய சேதனாயாதி அத்தோ²வ க³ஹேதப்³போ³.
239.Mocanenāti mocanappayogena. Mocanassādasampayuttāyāti ettha mocanicchāva mocanassādo, tena sampayuttā cetanā mocanassādacetanāti attho, na pana mocane assādaṃ sukhaṃ patthentiyā cetanāyāti evaṃ attho gahetabbo, itarathā sukhatthāya mocentasseva āpatti, na ārogyādiatthāyāti āpajjati. Tasmā ārogyādīsu yena kenaci adhippāyena mocanicchāya cetanāyāti atthova gahetabbo.
240. வாயமதோதி அங்க³ஜாதே காயேன உபக்கமதோ. த்³வே ஆபத்திஸஹஸ்ஸானீதி க²ண்ட³சக்காதீ³னி அனாமஸித்வாவ வுத்தங், இச்ச²ந்தேன பன க²ண்ட³சக்காதி³பே⁴தே³னாபி க³ணனா காதப்³பா³. ஏகேன பதே³னாதி கே³ஹஸிதபேமபதே³ன. ததே²வாதி மோசனஸ்ஸாத³சேதனாய ஏவ கா³ள்ஹங் பீளனாதி³ப்பயோக³ங் அவிஜஹித்வா ஸுபனேன ஸங்கா⁴தி³ஸேஸோதி வுத்தங். ஸுத்³த⁴சித்தோதி மோசனஸ்ஸாத³ஸ்ஸ நிமித்தே ஊருஆதீ³ஹி கதஉபக்கமஸ்ஸ விஜஹனங் ஸந்தா⁴ய வுத்தங். தேன அஸுப⁴மனஸிகாராபா⁴வேபி பயோகா³பா⁴வேனேவ மோசனேபி அனாபத்தி தீ³பிதாதி வேதி³தப்³பா³.
240.Vāyamatoti aṅgajāte kāyena upakkamato. Dve āpattisahassānīti khaṇḍacakkādīni anāmasitvāva vuttaṃ, icchantena pana khaṇḍacakkādibhedenāpi gaṇanā kātabbā. Ekena padenāti gehasitapemapadena. Tathevāti mocanassādacetanāya eva gāḷhaṃ pīḷanādippayogaṃ avijahitvā supanena saṅghādisesoti vuttaṃ. Suddhacittoti mocanassādassa nimitte ūruādīhi kataupakkamassa vijahanaṃ sandhāya vuttaṃ. Tena asubhamanasikārābhāvepi payogābhāveneva mocanepi anāpatti dīpitāti veditabbā.
தேன உபக்கமேன முத்தேதி முச்சமானங் வினா அஞ்ஞஸ்மிம்பி ஸுக்கே டா²னதோ முத்தே. யதி³ பன உபக்கமே கதேபி முச்சமானமேவ த³கஸோதங் ஓதரதி, து²ல்லச்சயமேவ பயோகே³ன முத்தஸ்ஸ அபா⁴வா. ஜக்³க³னத்தா²யாதி சீவராதீ³ஸு லிம்பனபரிஹாராய ஹத்தே²ன அங்க³ஜாதக்³க³ஹணங் வட்டதி, தப்பயோகோ³ ந ஹோதீதி அதி⁴ப்பாயோ. அனோகாஸந்தி அங்க³ஜாதப்பதே³ஸங்.
Tena upakkamena mutteti muccamānaṃ vinā aññasmimpi sukke ṭhānato mutte. Yadi pana upakkame katepi muccamānameva dakasotaṃ otarati, thullaccayameva payogena muttassa abhāvā. Jagganatthāyāti cīvarādīsu limpanaparihārāya hatthena aṅgajātaggahaṇaṃ vaṭṭati, tappayogo na hotīti adhippāyo. Anokāsanti aṅgajātappadesaṃ.
262. ஸுபினந்தேன காரணேனாதி ஸுபினந்தே பவத்தஉபக்கமஹேதுனா. ஆபத்திட்டா²னேயேவ ஹி அயங் அனாபத்தி அவிஸயத்தா வுத்தா. தேனாஹ ‘‘ஸசஸ்ஸ விஸயோ ஹோதி நிச்சலேன ப⁴விதப்³ப³’’ந்திஆதி³.
262.Supinantena kāraṇenāti supinante pavattaupakkamahetunā. Āpattiṭṭhāneyeva hi ayaṃ anāpatti avisayattā vuttā. Tenāha ‘‘sacassa visayo hoti niccalena bhavitabba’’ntiādi.
263. வினீதவத்து²பாளியங் அண்ட³கண்டு³வனவத்து²ஸ்மிங் மோசனாதி⁴ப்பாயேன அண்ட³சலனேன அங்க³ஜாதஸ்ஸாபி சலனதோ நிமித்தே உபக்கமோ ஹோதீதி ஸங்கா⁴தி³ஸேஸோ வுத்தோ. யதா² பன அங்க³ஜாதங் ந சலதி, ஏவங் அண்ட³மேவ கண்டு³வனேன பு²ஸந்தஸ்ஸ முத்தேபி அனாபத்தி அண்ட³ஸ்ஸ அனங்க³ஜாதத்தா.
263. Vinītavatthupāḷiyaṃ aṇḍakaṇḍuvanavatthusmiṃ mocanādhippāyena aṇḍacalanena aṅgajātassāpi calanato nimitte upakkamo hotīti saṅghādiseso vutto. Yathā pana aṅgajātaṃ na calati, evaṃ aṇḍameva kaṇḍuvanena phusantassa muttepi anāpatti aṇḍassa anaṅgajātattā.
264. வத்தி²ந்தி அங்க³ஜாதஸீஸச்சா²த³கசம்மங். உத³ரங் தாபெந்தஸ்ஸ…பே॰… அனாபத்தியேவாதி உத³ரதாபனேன அங்க³ஜாதேபி தத்தே தாவத்தகேன நிமித்தே உபக்கமோ கதோ நாம ந ஹோதீதி வுத்தங்.
264.Vatthinti aṅgajātasīsacchādakacammaṃ. Udaraṃ tāpentassa…pe… anāpattiyevāti udaratāpanena aṅgajātepi tatte tāvattakena nimitte upakkamo kato nāma na hotīti vuttaṃ.
265. ஏஹி மே த்வங், ஆவுஸோ, ஸாமணேராதி வத்து²ஸ்மிங் அஞ்ஞங் ஆணாபேது, தேன கரியமானஸ்ஸ அங்க³ஜாதசலனஸ்ஸ மோசனஸ்ஸாதே³ன ஸாதி³யனதோ தங் சலனங் பி⁴க்கு²ஸ்ஸ ஸாதி³யனசித்தஸமுட்டி²தம்பி ஹோதீதி ஸுக்கவிஸ்ஸட்டி²பச்சயஸ்ஸ அங்க³ஜாதசலனஸ்ஸ ஹேதுபூ⁴தா அஸ்ஸாத³சேதனாவ ஆபத்தியா அங்க³ங் ஹோதி, ந ஆணாபனவாசா தஸ்ஸா பவத்திக்க²ணே ஸங்கா⁴தி³ஸேஸஸ்ஸ அஸிஜ்ஜ²னதோ. ஏவங் ஆணாபெத்வாபி யோனிஸோமனஸிகாரேன மோசனஸ்ஸாத³ங் படிவினோதெ³ந்தஸ்ஸ ஆபத்திஅஸம்ப⁴வதோ இத³ங் ஸிக்கா²பத³ங் அனாணத்திகங், காயகம்மங், கிரியஸமுட்டா²னஞ்ச ஜாதந்தி க³ஹேதப்³ப³ங், ஆணாபனவாசாய பன து³க்கடங் ஆபஜ்ஜதி. யோ பன பரேன அனாணத்தேன ப³லக்காரேனாபி கரியமானப்பயோக³ங் மோசனஸ்ஸாதே³ன ஸாதி³யதி, தஸ்ஸாபி முத்தே பட²மபாராஜிகே விய ஸங்கா⁴தி³ஸேஸோவ, அமுத்தே து²ல்லச்சயங். மோசனஸ்ஸாதே³ சேதனாய பன அஸதி காயஸங்ஸக்³க³ராகே³ன ஸாதி³யந்தஸ்ஸாபி முத்தேபி ஸங்கா⁴தி³ஸேஸேன அனாபத்தீதி ஆசரியா வத³ந்தி, தஞ்ச யுத்தமேவ.
265.Ehi me tvaṃ, āvuso, sāmaṇerāti vatthusmiṃ aññaṃ āṇāpetu, tena kariyamānassa aṅgajātacalanassa mocanassādena sādiyanato taṃ calanaṃ bhikkhussa sādiyanacittasamuṭṭhitampi hotīti sukkavissaṭṭhipaccayassa aṅgajātacalanassa hetubhūtā assādacetanāva āpattiyā aṅgaṃ hoti, na āṇāpanavācā tassā pavattikkhaṇe saṅghādisesassa asijjhanato. Evaṃ āṇāpetvāpi yonisomanasikārena mocanassādaṃ paṭivinodentassa āpattiasambhavato idaṃ sikkhāpadaṃ anāṇattikaṃ, kāyakammaṃ, kiriyasamuṭṭhānañca jātanti gahetabbaṃ, āṇāpanavācāya pana dukkaṭaṃ āpajjati. Yo pana parena anāṇattena balakkārenāpi kariyamānappayogaṃ mocanassādena sādiyati, tassāpi mutte paṭhamapārājike viya saṅghādisesova, amutte thullaccayaṃ. Mocanassāde cetanāya pana asati kāyasaṃsaggarāgena sādiyantassāpi muttepi saṅghādisesena anāpattīti ācariyā vadanti, tañca yuttameva.
266. காயத்த²ம்ப⁴னவத்து²ஸ்மிங் சலனவஸேன யதா² அங்க³ஜாதே உபக்கமோ ஸம்ப⁴வதி, ததா² விஜம்பி⁴தத்தா ஆபத்தி வுத்தா.
266.Kāyatthambhanavatthusmiṃ calanavasena yathā aṅgajāte upakkamo sambhavati, tathā vijambhitattā āpatti vuttā.
உபனிஜ்ஜா²யனவத்து²ஸ்மிங் அங்க³ஜாதந்தி ஜீவமானஇத்தீ²னங் பஸ்ஸாவமக்³கோ³வ அதி⁴ப்பேதோ, நேதரோ.
Upanijjhāyanavatthusmiṃ aṅgajātanti jīvamānaitthīnaṃ passāvamaggova adhippeto, netaro.
267. புப்பா²வலீதி கீளாவிஸேஸோ. தங் கிர கீளந்தா நதீ³ஆதீ³ஸு சி²ன்னதடங் உத³கேன சிக்க²ல்லங் கத்வா தத்த² உபோ⁴ பாதே³ பஸாரெத்வா நிஸின்னா பதந்தி , ‘‘புப்பா²வலிய’’ந்திபி பாடோ². பவேஸெந்தஸ்ஸாதி பயோஜகத்தேன த்³விகம்மிகத்தா ‘‘வாலிகங் அங்க³ஜாத’’ந்தி உப⁴யத்தா²பி உபயோக³வசனங் கதங். சேதனா, உபக்கமோ, முச்சனந்தி இமானெத்த² தீணி அங்கா³னி வேதி³தப்³பா³னி.
267.Pupphāvalīti kīḷāviseso. Taṃ kira kīḷantā nadīādīsu chinnataṭaṃ udakena cikkhallaṃ katvā tattha ubho pāde pasāretvā nisinnā patanti , ‘‘pupphāvaliya’’ntipi pāṭho. Pavesentassāti payojakattena dvikammikattā ‘‘vālikaṃ aṅgajāta’’nti ubhayatthāpi upayogavacanaṃ kataṃ. Cetanā, upakkamo, muccananti imānettha tīṇi aṅgāni veditabbāni.
ஸுக்கவிஸ்ஸட்டி²ஸிக்கா²பத³வண்ணனா நிட்டி²தா.
Sukkavissaṭṭhisikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. ஸுக்கவிஸ்ஸட்டி²ஸிக்கா²பத³ங் • 1. Sukkavissaṭṭhisikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. ஸுக்கவிஸ்ஸட்டி²ஸிக்கா²பத³வண்ணனா • 1. Sukkavissaṭṭhisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. ஸுக்கவிஸ்ஸட்டி²ஸிக்கா²பத³வண்ணனா • 1. Sukkavissaṭṭhisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. ஸுக்கவிஸ்ஸட்டி²ஸிக்கா²பத³வண்ணனா • 1. Sukkavissaṭṭhisikkhāpadavaṇṇanā
