| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
2. сан̇гхаад̣̇исзсаган̣д̣о
2. Saṅghādisesakaṇḍo
1. суггависсадтисигкаабад̣̇аван̣н̣анаа
1. Sukkavissaṭṭhisikkhāpadavaṇṇanā
235. ‘‘оггаманд̇аана’’нд̇и баато. зд̇т̇ааха – ‘‘яо бана бхигкуу’’д̇и гаараго ид̇ха гасмаа на нид̣̇д̣̇идтод̇и? абхи-нид̣̇д̣̇зсзна имасса саабзгкаабхаавад̣̇ассанад̇т̇ам̣. гат̇ам̣? ган̣д̣уванаад̣̇иад̇хиббааяажзд̇анаавасзна жзд̇знд̇асса ган̣д̣уванаад̣̇иубаггамзна убаггаманд̇асса, мзт̇унарааг̇авасзна ууруаад̣̇ийсу д̣̇уггадавад̇т̇уусу, ван̣аад̣̇ийсу т̇уллажжаяавад̇т̇уусу жа убаггаманд̇асса суггависсадтияаа сад̇иби на сан̇гхаад̣̇исзсо. можанассаад̣̇асан̇каад̇аад̇хиббааяаабзгкаава суггависсадти сад̇и убаггамз, на ан̃н̃ат̇аа ‘‘анаабад̇д̇и на можанаад̇хиббааяассаа’’д̇и важанад̇о. д̇асмаа д̇ад̣̇ад̇т̇ад̣̇ассанад̇т̇ам̣ ид̇ха гаараго на нид̣̇д̣̇идто, ан̃н̃ат̇аа ‘‘яо бана бхигку сан̃жзд̇анигам̣ суггависсадтим̣ аабаж̇ж̇зяяаа’’д̇и гаарагз нид̣̇д̣̇идтз ‘‘жзд̇зд̇и на убаггамад̇и мужжад̇и, анаабад̇д̇ий’’д̇и вуд̇д̇аважанавирод̇хо. ‘‘сан̃жзд̇анигааяа суггависсадтияаа ан̃н̃ад̇ра субинанд̇аа’’д̇и бхуммз нид̣̇д̣̇идтзби сова вирод̇хо аабаж̇ж̇ад̇и, д̇асмаа д̇ад̣̇убхаяаважанаггамам̣ авад̇ваа ‘‘сан̃жзд̇анигаа суггависсадти ан̃н̃ад̇ра субинанд̇аа’’д̇и вуд̇д̇ам̣. д̇ад̇т̇а нимид̇д̇ад̇т̇з бхуммаважанаабхаавад̇о хзд̇уд̇т̇анияамо на гад̇о ход̇и. д̇асмим̣ агад̇з сан̃жзд̇анигаа суггависсадти ан̃н̃ад̇ра субинанд̇аа сан̇гхаад̣̇исзсаабад̇д̇и, убаггамз асад̇и анаабад̇д̇ийд̇и аяамад̇т̇о д̣̇ийбид̇од̇и взд̣̇ид̇аб̣б̣ам̣.
235. ‘‘Okkamantāna’’nti pāṭho. Etthāha – ‘‘yo pana bhikkhū’’ti kārako idha kasmā na niddiṭṭhoti? Abhi-niddesena imassa sāpekkhābhāvadassanatthaṃ. Kathaṃ? Kaṇḍuvanādiadhippāyacetanāvasena cetentassa kaṇḍuvanādiupakkamena upakkamantassa, methunarāgavasena ūruādīsu dukkaṭavatthūsu, vaṇādīsu thullaccayavatthūsu ca upakkamantassa sukkavissaṭṭhiyā satipi na saṅghādiseso. Mocanassādasaṅkhātādhippāyāpekkhāva sukkavissaṭṭhi sati upakkame, na aññathā ‘‘anāpatti na mocanādhippāyassā’’ti vacanato. Tasmā tadatthadassanatthaṃ idha kārako na niddiṭṭho, aññathā ‘‘yo pana bhikkhu sañcetanikaṃ sukkavissaṭṭhiṃ āpajjeyyā’’ti kārake niddiṭṭhe ‘‘ceteti na upakkamati muccati, anāpattī’’ti vuttavacanavirodho. ‘‘Sañcetanikāya sukkavissaṭṭhiyā aññatra supinantā’’ti bhumme niddiṭṭhepi sova virodho āpajjati, tasmā tadubhayavacanakkamaṃ avatvā ‘‘sañcetanikā sukkavissaṭṭhi aññatra supinantā’’ti vuttaṃ. Tattha nimittatthe bhummavacanābhāvato hetutthaniyamo na kato hoti. Tasmiṃ akate sañcetanikā sukkavissaṭṭhi aññatra supinantā saṅghādisesāpatti, upakkame asati anāpattīti ayamattho dīpitoti veditabbaṃ.
236-7. сан̃жзд̇анигаад̇и зд̇т̇а батамавиг̇г̇ахзна убасаг̇г̇асса саад̇т̇агад̇аа д̣̇ассид̇аа, д̣̇уд̇иязна игабажжаяасса. ваад̇абид̇д̇асзмхарухираад̣̇иаасаяабхзд̣̇ад̇од̇и ад̇т̇о. д̇хаад̇ууд̇и зд̇т̇а ‘‘бат̇авийд̇хаад̇уаад̣̇аяо жад̇ассо, жагкуд̇хаад̇уаад̣̇аяо ваа адтаарасаа’’д̇и г̇ан̣тибад̣̇з ликид̇ам̣. вад̇т̇исийсанд̇и вад̇т̇ибудасса сийсам̣. ‘‘ан̇г̇аж̇аад̇асса муулам̣ ад̇хиббзд̇ам̣, на аг̇г̇асийса’’нд̇и вад̣̇анд̇и. д̇ат̇зваад̇и ‘‘нимид̇д̇з убаггамад̇о’’д̇иаад̣̇им̣ г̇ан̣хаад̇и. д̇ад̇о мужжид̇ваад̇и ‘‘на сагалагааяад̇о, д̇асмаа бана таанаа жуд̇амад̇д̇з ход̇уу’’д̇и г̇ан̣тибад̣̇з ликид̇ам̣. ‘‘д̣̇агасод̇ам̣ од̇ин̣н̣амад̇д̇з’’д̇и иминаа на самзд̇ийд̇и жз ? д̇ад̇о д̣̇агасод̇орохан̣ан̃жзд̇т̇аад̇иаад̣̇и вужжад̇и. д̇ассад̇т̇о – нимид̇д̇з убаггамам̣ гад̇ваа суггам̣ таанаа жаавзд̇ваа буна виббадисааравасзна д̣̇агасод̇орохан̣ам̣ ниваарзд̇ум̣ ад̇хиваасзмийд̇и. д̇ад̇о б̣ахи нигкаманд̇з ад̇хиваасзд̇ум̣ на саггаа, д̇ат̇ааби ад̇хиваасанаад̇хиббааязна ад̇хиваасзд̇ваа анд̇араа д̣̇агасод̇ад̇о уд̣̇д̇хам̣ ниваарзд̇ум̣ асаггун̣зяяад̇ааяа ‘‘анигканд̇з ваа’’д̇и вуд̇д̇ам̣. гасмаа? таанаа жуд̇ан̃хи авассам̣ д̣̇агасод̇ам̣ од̇арад̇ийд̇и адтагат̇аад̇хиббааяо г̇ан̣тибад̣̇аад̇хиббааязна самзд̇и. д̇ад̇о мужжид̇ваад̇и сагадтаанад̇о. сагасарийрад̇о хи б̣ахи нигканд̇амзва ход̇и, д̇ад̇о ‘‘б̣ахи нигканд̇з ваа анигканд̇з ваа’’д̇и важанам̣ вируж̇жхзяяа. яасмаа бана д̇амхаа д̇амхаа сарийрабад̣̇зсаа жуд̇ам̣ авассам̣ д̣̇агасод̇ам̣ од̇арад̇и, д̇асмаа вуд̇д̇ам̣ ‘‘д̣̇агасод̇ам̣ од̇ин̣н̣амад̇д̇з’’д̇и, иминаа жа аабад̇д̇ияаа баагадагаалам̣ д̣̇ассзд̇и, гим̣ вуд̇д̇ам̣ ход̇и? можанассаад̣̇зна нимид̇д̇з убаггамад̇о суггам̣ б̣ахуд̇арамби сарийрабад̣̇зсаа жуд̇ам̣ д̇ад̇т̇а д̇ад̇т̇а лаг̇г̇аавасзсам̣ яад̇д̇агам̣ згаа куд̣̇д̣̇агамагкигаа бивзяяа, д̇ад̇д̇агз д̣̇агасод̇ам̣ од̇ин̣н̣амад̇д̇з сан̇гхаад̣̇исзсаабад̇д̇и. вуд̇д̇ан̃хи ган̇каавид̇аран̣ияам̣ (ган̇каа. адта. суггависсадтисигкаабад̣̇аван̣н̣анаа) ‘‘д̣̇агасод̇ам̣ анод̇ин̣н̣зби сан̇гхаад̣̇исзсо’’д̇иаад̣̇и. д̇ад̇д̇агасса б̣ахи нигкаманам̣ асаллагкзнд̇о ‘‘жзд̇зд̇и убаггамад̇и на мужжад̇и, аабад̇д̇и т̇уллажжаяассаа’’д̇и важанад̇о т̇уллажжаяанд̇и сан̃н̃ааяа д̣̇зсзнд̇оби на мужжад̇и, бассаавамби ван̣н̣ад̇ам̣ бассид̇ваа вад̇т̇игосаг̇ад̇асса бижчилад̇ааяа ваа н̃ад̇ваа сан̇гхаад̣̇исзсад̇о вудтаад̇аб̣б̣ам̣. аяамзд̇т̇а д̇ад̇ияад̇т̇зраваад̣̇з яуд̇д̇и. саб̣б̣аажарияаа имз зва д̇аяо т̇зраа, д̇зсамби д̣̇агасод̇орохан̣ам̣ нимид̇д̇з убаггамананд̇и аяам̣ д̣̇уд̇ияо винижчаяо саад̇хааран̣ад̇о зд̇т̇а, звам̣ убад̇иссад̇т̇зро вад̣̇ад̇и гира.
236-7.Sañcetanikāti ettha paṭhamaviggahena upasaggassa sātthakatā dassitā, dutiyena ikapaccayassa. Vātapittasemharuhirādiāsayabhedatoti attho. Dhātūti ettha ‘‘pathavīdhātuādayo catasso, cakkhudhātuādayo vā aṭṭhārasā’’ti gaṇṭhipade likhitaṃ. Vatthisīsanti vatthipuṭassa sīsaṃ. ‘‘Aṅgajātassa mūlaṃ adhippetaṃ, na aggasīsa’’nti vadanti. Tathevāti ‘‘nimitte upakkamato’’tiādiṃ gaṇhāti. Tato muccitvāti ‘‘na sakalakāyato, tasmā pana ṭhānā cutamatte hotū’’ti gaṇṭhipade likhitaṃ. ‘‘Dakasotaṃ otiṇṇamatte’’ti iminā na sametīti ce ? Tato dakasotorohaṇañcetthātiādi vuccati. Tassattho – nimitte upakkamaṃ katvā sukkaṃ ṭhānā cāvetvā puna vippaṭisāravasena dakasotorohaṇaṃ nivāretuṃ adhivāsemīti. Tato bahi nikkhamante adhivāsetuṃ na sakkā, tathāpi adhivāsanādhippāyena adhivāsetvā antarā dakasotato uddhaṃ nivāretuṃ asakkuṇeyyatāya ‘‘anikkhante vā’’ti vuttaṃ. Kasmā? Ṭhānā cutañhi avassaṃ dakasotaṃ otaratīti aṭṭhakathādhippāyo gaṇṭhipadādhippāyena sameti. Tato muccitvāti sakaṭṭhānato. Sakasarīrato hi bahi nikkhantameva hoti, tato ‘‘bahi nikkhante vā anikkhante vā’’ti vacanaṃ virujjheyya. Yasmā pana tamhā tamhā sarīrapadesā cutaṃ avassaṃ dakasotaṃ otarati, tasmā vuttaṃ ‘‘dakasotaṃ otiṇṇamatte’’ti, iminā ca āpattiyā pākaṭakālaṃ dasseti, kiṃ vuttaṃ hoti? Mocanassādena nimitte upakkamato sukkaṃ bahutarampi sarīrapadesā cutaṃ tattha tattha laggāvasesaṃ yattakaṃ ekā khuddakamakkhikā piveyya, tattake dakasotaṃ otiṇṇamatte saṅghādisesāpatti. Vuttañhi kaṅkhāvitaraṇiyaṃ (kaṅkhā. aṭṭha. sukkavissaṭṭhisikkhāpadavaṇṇanā) ‘‘dakasotaṃ anotiṇṇepi saṅghādiseso’’tiādi. Tattakassa bahi nikkhamanaṃ asallakkhento ‘‘ceteti upakkamati na muccati, āpatti thullaccayassā’’ti vacanato thullaccayanti saññāya desentopi na muccati, passāvampi vaṇṇataṃ passitvā vatthikosagatassa picchilatāya vā ñatvā saṅghādisesato vuṭṭhātabbaṃ. Ayamettha tatiyattheravāde yutti. Sabbācariyā ime eva tayo therā, tesampi dakasotorohaṇaṃ nimitte upakkamananti ayaṃ dutiyo vinicchayo sādhāraṇato ettha, evaṃ upatissatthero vadati kira.
таанаа жуд̇ан̃хи авассам̣ д̣̇агасод̇ам̣ од̇арад̇ийд̇и гад̇ваа ‘‘таанаа жааванамад̇д̇знзвзд̇т̇а аабад̇д̇и взд̣̇ид̇аб̣б̣аа’’д̇и вуд̇д̇ам̣. д̣̇агасод̇ам̣ од̇ин̣н̣з зва аабад̇д̇и. суггасса хи сагалам̣ сарийрам̣ таанам̣, анод̇ин̣н̣з таанаа жуд̇ам̣ наама на ход̇ийд̇и виймам̣сид̇аб̣б̣ам̣. аабхид̇хаммигад̇д̇аа т̇зрасса ‘‘суггависсадти наама рааг̇асамудтаанаа ход̇ий’’д̇и (гат̇аа. адта. 307) гат̇аавад̇т̇удтагат̇ааяам̣ вуд̇д̇ад̇д̇аа самбхаво жид̇д̇асамудтаано, ‘‘д̇ам̣ асужим̣ згад̣̇зсам̣ мукзна аг̇г̇ахзси, згад̣̇зсам̣ ан̇г̇аж̇аад̇з багкибий’’д̇и (баараа. 503) важанад̇о уд̇усамудтаано жа д̣̇иссад̇и, со жа ко авийд̇арааг̇ассзва ‘‘адтаанамзд̇ам̣, бхигкавз, анавагаасо яам̣ арахад̇о асужи мужжзяяаа’’д̇и (махаава. 353; гат̇аа. 313) важанад̇о. баруубаахаарадтагат̇ааяам̣ ‘‘ад̇т̇и д̇асса аасаяод̇и д̇асса суггасса ужжаарабассааваанам̣ вияа бад̇идтааногаасо ад̇т̇ий’’д̇и (гат̇аа. адта. 309) жанад̇о д̇асса аасаяод̇и сид̣̇д̇хам̣. баагад̇игажид̇д̇асамудтаанаруубам̣ вияа асам̣садтад̇д̇аа, нигкаманад̇о жа ‘‘вад̇т̇исийсам̣, гади, гааяо’’д̇и д̇ид̇хаа суггасса таанам̣ багаббзнд̇и аажарияаа. саббависам̣ вияа д̇ам̣ д̣̇адтаб̣б̣ам̣, на жа висасса таананияамо, год̇хавасзна пусанд̇асса ход̇и, звамасса на жа таананияамо, рааг̇авасзна убаггаманд̇асса ход̇ийд̇и д̇агго.
Ṭhānā cutañhi avassaṃ dakasotaṃ otaratīti katvā ‘‘ṭhānā cāvanamattenevettha āpatti veditabbā’’ti vuttaṃ. Dakasotaṃ otiṇṇe eva āpatti. Sukkassa hi sakalaṃ sarīraṃ ṭhānaṃ, anotiṇṇe ṭhānā cutaṃ nāma na hotīti vīmaṃsitabbaṃ. Ābhidhammikattā therassa ‘‘sukkavissaṭṭhi nāma rāgasamuṭṭhānā hotī’’ti (kathā. aṭṭha. 307) kathāvatthuṭṭhakathāyaṃ vuttattā sambhavo cittasamuṭṭhāno, ‘‘taṃ asuciṃ ekadesaṃ mukhena aggahesi, ekadesaṃ aṅgajāte pakkhipī’’ti (pārā. 503) vacanato utusamuṭṭhāno ca dissati, so ca kho avītarāgasseva ‘‘aṭṭhānametaṃ, bhikkhave, anavakāso yaṃ arahato asuci mucceyyā’’ti (mahāva. 353; kathā. 313) vacanato. Parūpāhāraṭṭhakathāyaṃ ‘‘atthi tassa āsayoti tassa sukkassa uccārapassāvānaṃ viya patiṭṭhānokāso atthī’’ti (kathā. aṭṭha. 309) canato tassa āsayoti siddhaṃ. Pākatikacittasamuṭṭhānarūpaṃ viya asaṃsaṭṭhattā, nikkhamanato ca ‘‘vatthisīsaṃ, kaṭi, kāyo’’ti tidhā sukkassa ṭhānaṃ pakappenti ācariyā. Sappavisaṃ viya taṃ daṭṭhabbaṃ, na ca visassa ṭhānaniyamo, kodhavasena phusantassa hoti, evamassa na ca ṭhānaniyamo, rāgavasena upakkamantassa hotīti takko.
кобхагаран̣абажжаяо наама бхзсаж̇ж̇асзнаасанаахаараад̣̇ибажжаяо. сам̣саг̇г̇абхзд̣̇ад̇обийд̇и зд̇зсу д̣̇вийхиби д̇ийхиби. бахийнавибаллаасад̇д̇аад̇и зд̇т̇а яам̣ гин̃жи субинанд̇зна сзгкабут̇уж̇ж̇анаа бассанд̇и, д̇ам̣ саб̣б̣ам̣ вибаллад̇т̇ам̣ абхууд̇амзваад̇и аабаж̇ж̇ад̇и. д̇ад̇о ‘‘яам̣ бана буб̣б̣анимид̇д̇ад̇о бассад̇и. д̇ам̣ зганд̇асажжамзва ход̇ий’’д̇и ид̣̇ам̣ вируж̇жхад̇и, д̇асмаа на висаяам̣ санд̇хааяа вуд̇д̇ам̣. со хи сажжо ваа ход̇и, алиго ваад̇и гад̇ваа д̇ан̃жз санд̇хааяа вуд̇д̇ам̣ сияаа, ‘‘асзгкаа бахийнавибаллаасад̇д̇аа сажжамзва бассанд̇и, наасажжа’’нд̇и вад̇д̇аб̣б̣ам̣ сияаа. гинд̇у д̣̇ассанам̣ санд̇хааяа вуд̇д̇ам̣. д̇ан̃хи абхууд̇ам̣, абассанд̇оби хи бассанд̇о вияа асун̣анд̇оби сун̣анд̇о вияа амунанд̇оби мунанд̇о вияа ход̇и. сажжамби вибассад̇ийд̇и но д̇аггод̇и аажарияо. д̇ам̣ руубанимид̇д̇аад̣̇иаарамман̣ам̣ на ход̇и, ааг̇анд̇угабажжуббаннам̣ руубанимид̇д̇аад̣̇иаарамман̣ам̣ санд̇хааяа вуд̇д̇ам̣. гамманимид̇д̇аг̇ад̇инимид̇д̇абхууд̇аани хи руубанимид̇д̇аад̣̇ийни бхаван̇г̇асса аарамман̣аани хонд̇и зва. д̇ад̇т̇а гамманимид̇д̇амад̇ийд̇амзва, г̇ад̇инимид̇д̇ам̣ т̇огам̣ гаалам̣ бажжуббаннам̣ сияаа.
Khobhakaraṇapaccayo nāma bhesajjasenāsanāhārādipaccayo. Saṃsaggabhedatopīti etesu dvīhipi tīhipi. Pahīnavipallāsattāti ettha yaṃ kiñci supinantena sekkhaputhujjanā passanti, taṃ sabbaṃ vipallatthaṃ abhūtamevāti āpajjati. Tato ‘‘yaṃ pana pubbanimittato passati. Taṃ ekantasaccameva hotī’’ti idaṃ virujjhati, tasmā na visayaṃ sandhāya vuttaṃ. So hi sacco vā hoti, aliko vāti katvā tañce sandhāya vuttaṃ siyā, ‘‘asekkhā pahīnavipallāsattā saccameva passanti, nāsacca’’nti vattabbaṃ siyā. Kintu dassanaṃ sandhāya vuttaṃ. Tañhi abhūtaṃ, apassantopi hi passanto viya asuṇantopi suṇanto viya amunantopi munanto viya hoti. Saccampi vipassatīti no takkoti ācariyo. Taṃ rūpanimittādiārammaṇaṃ na hoti, āgantukapaccuppannaṃ rūpanimittādiārammaṇaṃ sandhāya vuttaṃ. Kammanimittagatinimittabhūtāni hi rūpanimittādīni bhavaṅgassa ārammaṇāni honti eva. Tattha kammanimittamatītameva, gatinimittaṃ thokaṃ kālaṃ paccuppannaṃ siyā.
ийд̣̇исаанийд̇и бажжагкад̇о анубхууд̇абуб̣б̣абаригаббид̇ааг̇анд̇угабажжуббаннаруубанимид̇д̇аад̣̇иаарамман̣аани, рааг̇аад̣̇исамбаяуд̇д̇аани жаад̇и ад̇т̇о. маггадасса нид̣̇д̣̇аа лахубаривад̇д̇аа ход̇и. со хи ругкасаакад̇о бад̇анабхаяаа абхигкан̣ам̣ уммийлад̇и жа субад̇и жа. мануссаа гин̃жааби бунаббунам̣ уммийланд̇и суб̣яад̇д̇ад̇арам̣ бадиб̣уд̣̇д̇хаа вияа бассанд̇и, ат̇а ко бадиб̣уд̣̇д̇хаанам̣ бунаббунам̣ бхаван̇г̇од̇аран̣ам̣ вияа субинагаалзби д̇зсам̣ бхаван̇г̇од̇аран̣ам̣ ход̇и, язна ‘‘субад̇ий’’д̇и вужжад̇и. ‘‘бхаван̇г̇ажид̇д̇зна хи субад̇ий’’д̇и важанад̇о бхаван̇г̇од̇аран̣ам̣ гараж̇агааяасса нируссаахасанд̇абхаавуубаниссаяад̇д̇аа ‘‘нид̣̇д̣̇аа’’д̇и вужжад̇и. саа гараж̇агааяасса д̣̇уб̣б̣алабхаавзна субинад̣̇ассанагаалз бхаван̇г̇ад̇о уд̇д̇аран̣з сад̇иби нируссаахасанд̇абхааваббад̇д̇ияаа ‘‘бавад̇д̇ад̇ий’’д̇и жа вужжад̇и, яад̇о сад̇д̇аа ‘‘бадиб̣уд̣̇д̇хаа’’д̇и на вужжанд̇и, гараж̇агааяасса нируссаахасанд̇асабхааваббад̇д̇ид̇о жа д̇анниссид̇ам̣ хад̣̇аяавад̇т̇у на суббасаннам̣ ход̇и, д̇ад̇о д̇анниссид̇ааби жид̇д̇аббавад̇д̇и асуббасаннаваддиниссид̇ад̣̇ийбаббабхаа вияа. д̇знзва адтагат̇ааяам̣ ‘‘свааяам̣ д̣̇уб̣б̣алавад̇т̇угад̇д̇аа жзд̇анааяа бадисанд̇хим̣ аагад̣дхид̇ум̣ асамад̇т̇о’’д̇иаад̣̇и вуд̇д̇ам̣.
Īdisānīti paccakkhato anubhūtapubbaparikappitāgantukapaccuppannarūpanimittādiārammaṇāni, rāgādisampayuttāni cāti attho. Makkaṭassa niddā lahuparivattā hoti. So hi rukkhasākhato patanabhayā abhikkhaṇaṃ ummīlati ca supati ca. Manussā kiñcāpi punappunaṃ ummīlanti subyattataraṃ paṭibuddhā viya passanti, atha kho paṭibuddhānaṃ punappunaṃ bhavaṅgotaraṇaṃ viya supinakālepi tesaṃ bhavaṅgotaraṇaṃ hoti, yena ‘‘supatī’’ti vuccati. ‘‘Bhavaṅgacittena hi supatī’’ti vacanato bhavaṅgotaraṇaṃ karajakāyassa nirussāhasantabhāvūpanissayattā ‘‘niddā’’ti vuccati. Sā karajakāyassa dubbalabhāvena supinadassanakāle bhavaṅgato uttaraṇe satipi nirussāhasantabhāvappattiyā ‘‘pavattatī’’ti ca vuccati, yato sattā ‘‘paṭibuddhā’’ti na vuccanti, karajakāyassa nirussāhasantasabhāvappattito ca tannissitaṃ hadayavatthu na suppasannaṃ hoti, tato tannissitāpi cittappavatti asuppasannavaṭṭinissitadīpappabhā viya. Teneva aṭṭhakathāyaṃ ‘‘svāyaṃ dubbalavatthukattā cetanāya paṭisandhiṃ ākaḍḍhituṃ asamattho’’tiādi vuttaṃ.
г̇ан̣тибад̣̇з бана ‘‘д̣̇уб̣б̣алавад̇т̇угад̇д̇аад̇и субинз убадтид̇ам̣ нимид̇д̇амби д̣̇уб̣б̣ала’’нд̇и ликид̇ам̣. д̇ам̣ анзгад̇т̇ам̣ саб̣б̣амби нимид̇д̇ам̣ ход̇и, на жа д̣̇уб̣б̣алаарамман̣авад̇т̇угад̇д̇аа жзд̇анаа, д̇ааяа жид̇д̇аббавад̇д̇и д̣̇уб̣б̣алаа ад̇ийд̇аанааг̇ад̇аарамман̣ааяа, бан̃н̃ад̇д̇аарамман̣ааяа ваа ад̣̇уб̣б̣алад̇д̇аа, авад̇т̇угааяа д̣̇уб̣б̣алабхааво на яуж̇ж̇ад̇и жзд̇анааяа авад̇т̇угааяа бхааванаабабхаавааяаад̇ирзгаб̣аласаб̣бхаавад̇о. бхааванааб̣аласамаббид̇ан̃хи жид̇д̇ам̣ аруубамби самаанам̣ ад̇ибхаарияамби гараж̇агааяам̣ г̇ахзд̇ваа згажид̇д̇агкан̣знзва б̣рахмалогам̣ баабзд̇ваа табзд̇и. д̇аббадибхааг̇ам̣ анаббид̇амби гаамааважаражид̇д̇ам̣ гараж̇агааяам̣ аагаасз лан̇гханасамад̇т̇ам̣ гарод̇и, баг̇звзд̇арам̣. гим̣ банзд̇т̇а д̇ам̣ анумаанагааран̣ам̣, язна жид̇д̇ассзва аанубхаавод̇и бан̃н̃ааязяяа жид̇д̇аанубхаавзна ваа лад̣̇д̇хаасзванаад̣̇игирияаависзсаниб̣б̣ад̇д̇ид̣̇ассанад̇о, д̇асмаа д̣̇уб̣б̣алавад̇т̇угад̇д̇аад̇и д̣̇уб̣б̣алахад̣̇аяавад̇т̇угад̇д̇аад̇и аажарияасса д̇агго. ад̇д̇ано манд̣̇ад̇игкаагаарзна д̇анниссид̇асса жид̇д̇асса манд̣̇ад̇игкабхааванибпаад̣̇анасамад̇т̇ан̃жз, хад̣̇аяавад̇т̇у жагкусод̇аад̣̇ивад̇т̇у вияа инд̣̇рияам̣ бхавзяяа, на жзд̇ам̣ инд̣̇рияам̣. яад̇о д̇хаммасан̇г̇ахз убаад̣̇ааяаруубабаал̣ияам̣ уд̣̇д̣̇зсаарахам̣ на ж̇аад̇ам̣. анинд̣̇рияад̇д̇аа хи д̇ам̣ гааяинд̣̇рияасса ананд̇арам̣ на уд̣̇д̣̇идтам̣, вад̇т̇уруубад̇д̇аа жа авад̇т̇уруубасса ж̇ийвид̇инд̣̇рияасса ананд̇арамби на уд̣̇д̣̇идтам̣, д̇асмаа яам̣ вуд̇д̇ам̣ ‘‘д̇асса асуббасаннад̇д̇аа д̇анниссид̇аа жа жид̇д̇аббавад̇д̇и асуббасаннаа ход̇ий’’д̇и, д̇ам̣ на сид̣̇д̇ханд̇и жз? сид̣̇д̇хамзва анинд̣̇рияаанамби саббааяаасаббааяауд̇уаахаараад̣̇ийнам̣ бажжаяаанам̣ самааяог̇ад̇о, жид̇д̇аббавад̇д̇ияаа вигаарад̣̇ассанад̇о, бажжагкад̇д̇аа жа. яасмаа аббадиб̣уд̣̇д̇хоби бадиб̣уд̣̇д̇хам̣ вияа ад̇д̇аанам̣ ман̃н̃ад̇ийд̇и. зд̇д̇аавад̇аа гараж̇агааяасса нируссаахасанд̇абхааваагаарависзсо нид̣̇д̣̇аа наама. саа жид̇д̇асса бхаван̇г̇од̇аран̣аагаарависзсзна ход̇и, д̇ааяа саманнааг̇ад̇о сад̇д̇о бхаван̇г̇ад̇о уд̇д̇ин̣н̣о субинам̣ бассад̇и, со ‘‘габимид̣̇д̇хабарзд̇о’’д̇и вужжад̇и, со суд̇д̇о аббадиб̣уд̣̇д̇хо ход̇ийд̇и аяамад̇т̇о саад̇хид̇о ход̇и.
Gaṇṭhipade pana ‘‘dubbalavatthukattāti supine upaṭṭhitaṃ nimittampi dubbala’’nti likhitaṃ. Taṃ anekatthaṃ sabbampi nimittaṃ hoti, na ca dubbalārammaṇavatthukattā cetanā, tāya cittappavatti dubbalā atītānāgatārammaṇāya, paññattārammaṇāya vā adubbalattā, avatthukāya dubbalabhāvo na yujjati cetanāya avatthukāya bhāvanāpabhāvāyātirekabalasabbhāvato. Bhāvanābalasamappitañhi cittaṃ arūpampi samānaṃ atibhāriyampi karajakāyaṃ gahetvā ekacittakkhaṇeneva brahmalokaṃ pāpetvā ṭhapeti. Tappaṭibhāgaṃ anappitampi kāmāvacaracittaṃ karajakāyaṃ ākāse laṅghanasamatthaṃ karoti, pagevetaraṃ. Kiṃ panettha taṃ anumānakāraṇaṃ, yena cittasseva ānubhāvoti paññāyeyya cittānubhāvena vā laddhāsevanādikiriyāvisesanibbattidassanato, tasmā dubbalavatthukattāti dubbalahadayavatthukattāti ācariyassa takko. Attano mandatikkhākārena tannissitassa cittassa mandatikkhabhāvanipphādanasamatthañce, hadayavatthu cakkhusotādivatthu viya indriyaṃ bhaveyya, na cetaṃ indriyaṃ. Yato dhammasaṅgahe upādāyarūpapāḷiyaṃ uddesārahaṃ na jātaṃ. Anindriyattā hi taṃ kāyindriyassa anantaraṃ na uddiṭṭhaṃ, vatthurūpattā ca avatthurūpassa jīvitindriyassa anantarampi na uddiṭṭhaṃ, tasmā yaṃ vuttaṃ ‘‘tassa asuppasannattā tannissitā ca cittappavatti asuppasannā hotī’’ti, taṃ na siddhanti ce? Siddhameva anindriyānampi sappāyāsappāyautuāhārādīnaṃ paccayānaṃ samāyogato, cittappavattiyā vikāradassanato, paccakkhattā ca. Yasmā appaṭibuddhopi paṭibuddhaṃ viya attānaṃ maññatīti. Ettāvatā karajakāyassa nirussāhasantabhāvākāraviseso niddā nāma. Sā cittassa bhavaṅgotaraṇākāravisesena hoti, tāya samannāgato satto bhavaṅgato uttiṇṇo supinaṃ passati, so ‘‘kapimiddhapareto’’ti vuccati, so sutto appaṭibuddho hotīti ayamattho sādhito hoti.
яасмаа бхаван̇г̇аваараниранд̇арад̇ааяа ажжанд̇асуд̇д̇о наама ход̇и, д̇асмаа ‘‘яад̣̇и д̇аава суд̇д̇о бассад̇и, абхид̇хаммавирод̇хо аабаж̇ж̇ад̇ий’’д̇иаад̣̇и вуд̇д̇ам̣. яасмаа бана нид̣̇д̣̇аагкан̣з на бадиб̣уд̣̇д̇хо наама ход̇и, д̇асмаа ‘‘ат̇а бадиб̣уд̣̇д̇хо бассад̇и, винаяавирод̇хо’’д̇иаад̣̇и вуд̇д̇ам̣, яасмаа жа акийн̣анид̣̇д̣̇о, анод̇ин̣н̣абхаван̇г̇о жа ад̇т̇и, д̇асмаа ‘‘габимид̣̇д̇хабарзд̇о бассад̇ий’’д̇и вуд̇д̇ам̣. ан̃н̃ат̇аа аяам̣ нзва суд̇д̇о на бадиб̣уд̣̇д̇хо, ад̇д̇анаа д̇ам̣ нид̣̇д̣̇ам̣ аногганд̇о аабаж̇ж̇зяяа. зд̇д̇аавад̇аа жа абхид̇хаммо, винаяо, нааг̇асзнад̇т̇зраважанам̣ яуд̇д̇и жаад̇и саб̣б̣ам̣ ан̃н̃аман̃н̃асам̣санд̣̇ид̇ам̣ ход̇и. д̇ад̇т̇а габимид̣̇д̇хабарзд̇од̇и бхаван̇г̇ад̇о уд̇д̇ин̣н̣анид̣̇д̣̇аабарзд̇о. саа хи ид̇ха габимид̣̇д̇хам̣ наама. ‘‘д̇ад̇т̇а гад̇амам̣ мид̣̇д̇хам̣? яаа гааяасса агаляад̇аа агамман̃н̃ад̇аа…бз… субанам̣, ид̣̇ам̣ вужжад̇и мид̣̇д̇ха’’нд̇и (д̇ха. са. 1163) звамааг̇ад̇ам̣. ид̣̇ан̃хи аруубам̣, имасса палабхууд̇о гараж̇агааяасса агаляад̇аа’бажалааяигаасуби нид̣̇д̣̇аависзсо гааран̣обажаарзна ‘‘габимид̣̇д̇ха’’нд̇и бавужжад̇и. яан̃жзва ‘‘габимид̣̇д̇хабарзд̇о ко, махаарааж̇а, субинам̣ бассад̇ий’’д̇и (ми. ба. 5.3.5 т̇огам̣ висад̣̇исам̣) вуд̇д̇анд̇и.
Yasmā bhavaṅgavāranirantaratāya accantasutto nāma hoti, tasmā ‘‘yadi tāva sutto passati, abhidhammavirodho āpajjatī’’tiādi vuttaṃ. Yasmā pana niddākkhaṇe na paṭibuddho nāma hoti, tasmā ‘‘atha paṭibuddho passati, vinayavirodho’’tiādi vuttaṃ, yasmā ca akhīṇaniddo, anotiṇṇabhavaṅgo ca atthi, tasmā ‘‘kapimiddhapareto passatī’’ti vuttaṃ. Aññathā ayaṃ neva sutto na paṭibuddho, attanā taṃ niddaṃ anokkanto āpajjeyya. Ettāvatā ca abhidhammo, vinayo, nāgasenattheravacanaṃ yutti cāti sabbaṃ aññamaññasaṃsanditaṃ hoti. Tattha kapimiddhaparetoti bhavaṅgato uttiṇṇaniddāpareto. Sā hi idha kapimiddhaṃ nāma. ‘‘Tattha katamaṃ middhaṃ? Yā kāyassa akalyatā akammaññatā…pe… supanaṃ, idaṃ vuccati middha’’nti (dha. sa. 1163) evamāgataṃ. Idañhi arūpaṃ, imassa phalabhūto karajakāyassa akalyatā’pacalāyikāsupi niddāviseso kāraṇopacārena ‘‘kapimiddha’’nti pavuccati. Yañceva ‘‘kapimiddhapareto kho, mahārāja, supinaṃ passatī’’ti (mi. pa. 5.3.5 thokaṃ visadisaṃ) vuttanti.
яам̣ д̇ам̣ аабад̇д̇ивудтаананд̇и зд̇т̇а язна винаяагаммзна д̇ад̇о вудтаанам̣ ход̇и, д̇ам̣ ид̇ха аабад̇д̇ивудтаанам̣ наама. аваяавз самуухавохаарзна ваад̇и зд̇т̇а саакажчзд̣̇аго ругкажчзд̣̇агод̇и вужжад̇ийд̇иаад̣̇и нид̣̇ассанам̣, взд̣̇анаагканд̇хаад̣̇и рул̣хийсад̣̇д̣̇асса нид̣̇ассанам̣. на жа маяаад̇и виймам̣санабад̣̇асса д̇асса гирияам̣ санд̇хааяа, можанз жа саннидтаанам̣ санд̇хааяа мужжанабагад̇ияаа жаад̇и вуд̇д̇ам̣.
Yaṃtaṃ āpattivuṭṭhānanti ettha yena vinayakammena tato vuṭṭhānaṃ hoti, taṃ idha āpattivuṭṭhānaṃ nāma. Avayave samūhavohārena vāti ettha sākhacchedako rukkhacchedakoti vuccatītiādi nidassanaṃ, vedanākkhandhādi ruḷhīsaddassa nidassanaṃ. Na ca mayāti vīmaṃsanapadassa tassa kiriyaṃ sandhāya, mocane ca sanniṭṭhānaṃ sandhāya muccanapakatiyā cāti vuttaṃ.
240. г̇зханд̇и бан̃жагаамаг̇ун̣аа. ванабхан̇г̇ияанд̇и баабхад̇игам̣. самбаяуд̇д̇асукавзд̣̇анаамукзна рааг̇ова ‘‘ассаад̣̇о’’д̇и вуд̇д̇о. субанд̇асса жаад̇и ид̣̇ам̣ габимид̣̇д̇хабарзд̇о вияа бхаван̇г̇асанд̇ад̇им̣ авижчинд̣̇ид̇ваа субанд̇ам̣ санд̇хааяа вуд̇д̇анд̇и, виймам̣сид̇аб̣б̣ам̣. ж̇аг̇г̇анад̇т̇ааяаад̇и сод̇ханад̇т̇ааяа.
240.Gehanti pañcakāmaguṇā. Vanabhaṅgiyanti pābhatikaṃ. Sampayuttasukhavedanāmukhena rāgova ‘‘assādo’’ti vutto. Supantassa cāti idaṃ kapimiddhapareto viya bhavaṅgasantatiṃ avicchinditvā supantaṃ sandhāya vuttanti, vīmaṃsitabbaṃ. Jagganatthāyāti sodhanatthāya.
266. ‘‘д̣̇ааруд̇хийд̇алигалзбажид̇д̇аанам̣ ан̇г̇аж̇аад̇абадиниж̇жхаанзби д̣̇уггада’’нд̇и вад̣̇анд̇и. ‘‘уббаннз барил̣аахз можанарааг̇аж̇о’’д̇и ликанд̇и. ваалигааяа ваа ‘‘хад̇т̇игаамам̣ нассад̇ий’’д̇и зд̇т̇а вияа ‘‘аабад̇д̇и д̇ва’’нд̇и саб̣б̣ад̇т̇а баато. ‘‘зхи мз д̇вам̣, аавусо сааман̣зра, ан̇г̇аж̇аад̇ам̣ г̇ан̣хаахий’’д̇и ааг̇ад̇ад̇д̇аа ‘‘важийгамма’’нд̇иби вад̇д̇ум̣ яуд̇д̇ам̣ вияа д̣̇иссад̇и. звам̣ санд̇з ан̃н̃ам̣ ‘‘звам̣ гарохий’’д̇и аан̣ад̇д̇ияааби аабад̇д̇и сияаад̇и сан̇гарам̣ ход̇и. д̇асмаа на вуд̇д̇анд̇и г̇ахзд̇аб̣б̣анд̇и гзжи.
266. ‘‘Dārudhītalikalepacittānaṃ aṅgajātapaṭinijjhānepi dukkaṭa’’nti vadanti. ‘‘Uppanne pariḷāhe mocanarāgajo’’ti likhanti. Vālikāya vā ‘‘hatthikāmaṃ nassatī’’ti ettha viya ‘‘āpatti tva’’nti sabbattha pāṭho. ‘‘Ehi me tvaṃ, āvuso sāmaṇera, aṅgajātaṃ gaṇhāhī’’ti āgatattā ‘‘vacīkamma’’ntipi vattuṃ yuttaṃ viya dissati. Evaṃ sante aññaṃ ‘‘evaṃ karohī’’ti āṇattiyāpi āpatti siyāti saṅkaraṃ hoti. Tasmā na vuttanti gahetabbanti keci.
267. ‘‘бубпаавалияам̣ саасавал̣ияа’’нд̇и д̣̇увид̇хо гира.
267. ‘‘Pupphāvaliyaṃ sāsavaḷiya’’nti duvidho kira.
суггависсадтисигкаабад̣̇аван̣н̣анаа нидтид̇аа.
Sukkavissaṭṭhisikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 1. суггависсадтисигкаабад̣̇ам̣ • 1. Sukkavissaṭṭhisikkhāpadaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. суггависсадтисигкаабад̣̇аван̣н̣анаа • 1. Sukkavissaṭṭhisikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 1. суггависсадтисигкаабад̣̇аван̣н̣анаа • 1. Sukkavissaṭṭhisikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 1. суггависсадтисигкаабад̣̇аван̣н̣анаа • 1. Sukkavissaṭṭhisikkhāpadavaṇṇanā
