| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
2. сан̇гхаад̣̇исзсаган̣д̣о
2. Saṅghādisesakaṇḍo
1. суггависсадтисигкаабад̣̇аван̣н̣анаа
1. Sukkavissaṭṭhisikkhāpadavaṇṇanā
234. д̇зрасагассаад̇и д̇зраса сигкаабад̣̇аани баримаан̣аани ассаад̇и д̇зрасаго, ган̣д̣о, д̇асса. самат̇з вибассанааяа ваа абхирад̇ирахид̇о ид̇ха анабхирад̇о, на баб̣б̣аж̇ж̇ааяаад̇и ааха ‘‘вигкид̇д̇ажид̇д̇о’’д̇и. вигкид̇д̇ад̇ааяа гааран̣амааха гаамарааг̇ааижжаад̣̇и.
234.Terasakassāti terasa sikkhāpadāni parimāṇāni assāti terasako, kaṇḍo, tassa. Samathe vipassanāya vā abhiratirahito idha anabhirato, na pabbajjāyāti āha ‘‘vikkhittacitto’’ti. Vikkhittatāya kāraṇamāha kāmarāgāiccādi.
235. аб̣б̣охааригаад̇и сийлавибад̇д̇ивохаарам̣ наарахад̇ийд̇и гад̇ваа вуд̇д̇ам̣. агусалабхаавз банассаа аб̣б̣охаарад̇аа над̇т̇и.
235.Abbohārikāti sīlavipattivohāraṃ nārahatīti katvā vuttaṃ. Akusalabhāve panassā abbohāratā natthi.
236-7. жзд̇анаа-сад̣̇д̣̇ад̇о висум̣ сам̣-сад̣̇д̣̇асса ад̇т̇аабхаавам̣ ига-бажжаяасса жа ад̇т̇аванд̇ад̇ам̣ д̣̇ассзд̇ум̣ сан̃жзд̇анаа ваад̇иаад̣̇и д̣̇уд̇ияавигаббо вуд̇д̇о. сикааббад̇д̇о ад̇т̇од̇и ад̇хиббзд̇ад̇т̇ам̣ санд̇хааяа вуд̇д̇ам̣. аасаяабхзд̣̇ад̇од̇и бид̇д̇асзмхабуб̣б̣алохид̇аанам̣ жад̇уннам̣ аасаяаанам̣ бхзд̣̇зна. д̇хаад̇унаанад̇д̇ад̇од̇и расарухираад̣̇ийнам̣ сад̇д̇аннам̣, бат̇аваад̣̇ийнам̣ ваа жад̇уннам̣ д̇хаад̇уунам̣ наанад̇д̇зна. вад̇т̇исийсанд̇и муд̇д̇авад̇т̇ид̇о мад̇т̇агабассам̣. хад̇т̇имад̣̇ажаланам̣ нааман̃жа самбхавод̇и ааха ‘‘самбхаво нигкамад̇ий’’д̇и. самбхававзг̇анд̇и самбхавасса таанад̇о жавид̇ваа д̣̇агасод̇аабхимукам̣ од̇аран̣зна сан̃ж̇аад̇асарийрагкобхавзг̇ам̣. б̣аахусийсанд̇и канд̇хаббад̣̇зсам̣. д̣̇ассзсийд̇и зд̇т̇а ид̇и-сад̣̇д̣̇о хзд̇уд̇т̇о, д̇зна яасмаа ган̣н̣ажуул̣игаахи самбхаво нигкамад̇и…бз… самбхаван̃жа д̣̇ассзси, д̇асмаа д̇ад̇ияасса бхаасид̇ам̣ субхаасид̇анд̇и звам̣ яож̇анаа взд̣̇ид̇аб̣б̣аа. д̣̇агасод̇анд̇и муд̇д̇асса вад̇т̇ид̇о нигкаманамаг̇г̇ам̣, ан̇г̇аж̇аад̇аббад̣̇зсанд̇и вуд̇д̇ам̣ ход̇и. сугган̃жа наамзд̇ам̣ расарухираад̣̇исад̇д̇ад̣̇зхад̇хаад̇уусу маж̇жхимад̇хаад̇ужад̇уж̇ам̣ адтимин̃ж̇аад̣̇и вияа бат̇авийд̇хаад̇усан̇г̇ахид̇ам̣ аахааруубаж̇ийвийнам̣ сагалагааяаг̇ад̇ам̣ ад̇ид̣̇ахарад̣̇аарагаанамби ад̇т̇зва, д̇ам̣ бана баннарасасол̣асавассуд̣̇д̣̇зсад̇о бадтааяа сад̇д̇аанам̣ самуббаж̇ж̇анагагаамарааг̇зхзва таанад̇о жалад̇и, жалид̇ан̃жа аабод̇хаад̇убхаавзна жид̇д̇аж̇амзва худ̇ваа д̣̇агасод̇ам̣ од̇арад̇и, д̣̇агасод̇ад̇о бана бадтааяа жид̇д̇абажжаяауд̇уж̇ам̣ ход̇и мад̇т̇алун̇г̇ад̇о жалид̇асин̇гхаан̣игаа вияа. язсам̣ бана самужчзд̣̇анавигкамбханаад̣̇ийхи рааг̇абарияудтаанам̣ над̇т̇и , д̇зсам̣ суггависсадти на сияаа. ид̇и яат̇аатаанад̇о суггасса виссадтиязва рааг̇ажид̇д̇асамудтаанаа, на багад̇ируубам̣, д̇знзва гат̇аавад̇т̇уадтагат̇ааяам̣ (гат̇аа. адта. 307) ‘‘суггависсадти наама рааг̇асамудтаанаа ход̇ий’’д̇и суггасса виссадти зва рааг̇асамудтаанаа вуд̇д̇аа, на багад̇ируубам̣. чаннам̣ бана гаамааважарад̣̇зваанам̣ виж̇ж̇амаанааби суггад̇хаад̇у д̣̇ваяам̣д̣̇ваяасамаабад̇д̇ивасзна барияудтид̇арааг̇знааби таанад̇о на г̇ал̣ад̇и, яат̇аатаанз зва тад̇ваа гин̃жи вигаарам̣ аабаж̇ж̇амаанаа д̇ан̇кан̣игабарил̣аахавуубасамаавахаа мзт̇унагижжанидтаабид̇аа ход̇ийд̇и взд̣̇ид̇аб̣б̣ам̣. гзжи бана ‘‘гааяасампассасукамзва д̇зсам̣ гаамагижжа’’нд̇и вад̣̇анд̇и. кийн̣аасаваанам̣ бана анааг̇аамийнан̃жа саб̣б̣асо гаамарааг̇аабхаавзна суггад̇хаад̇увигаарамби наабаж̇ж̇ад̇ийд̇и взд̣̇ид̇аб̣б̣ам̣. руубийб̣рахмаанам̣ бана вигкамбхид̇агаамарааг̇зна ж̇анид̇ад̇д̇аа анаахааруубаж̇ийвид̇ад̇д̇аа жа саб̣б̣ат̇аа суггад̇хаад̇уби над̇т̇зва. д̇ат̇зваад̇и можанассаад̣̇зна нимид̇д̇з убаггамад̇од̇иаад̣̇им̣ ад̇ид̣̇исад̇и. ‘‘виссадтийд̇и таанаажааванаа вужжад̇ий’’д̇и бад̣̇абхааж̇анз (баараа. 237) вуд̇д̇ад̇д̇аа ‘‘д̣̇агасод̇ам̣ од̇ин̣н̣амад̇д̇з’’д̇и гасмаа вуд̇д̇анд̇и ааха д̣̇агасод̇орохан̣ан̃жзд̇т̇аад̇иаад̣̇и. зд̇т̇аад̇и д̇ийсуби ваад̣̇зсу. ад̇хиваасзд̇ваад̇и нимид̇д̇з убаггамид̇ваа буна виббадисаарз уббаннз можанассаад̣̇ам̣ винод̣̇зд̇ваа. анд̇араа ниваарзд̇унд̇и ад̇д̇ано нимид̇д̇з гад̇уубаггамзна таанаа жуд̇ам̣ д̣̇агасод̇ам̣ од̇арид̇ум̣ ад̣̇ад̇ваа анд̇араа ниваарзд̇ум̣. можанассаад̣̇зна хад̇т̇абаригаммаад̣̇им̣ гаронд̇асса муд̇д̇зби д̣̇уггадамзва, нимид̇д̇з убаггамаабхаавад̇о бана сан̇гхаад̣̇исзсо на ход̇ийд̇и ааха ‘‘хад̇т̇а…бз… анаабад̇д̇ий’’д̇и. д̣̇агасод̇орохан̣ан̃жзд̇т̇аад̇иаад̣̇инаа вуд̇д̇авинижчаяам̣ санд̇хааяа ‘‘аяам̣ саб̣б̣аажарияасаад̇хааран̣авинижчаяо’’д̇и вуд̇д̇ам̣.
236-7. Cetanā-saddato visuṃ saṃ-saddassa atthābhāvaṃ ika-paccayassa ca atthavantataṃ dassetuṃ sañcetanā vātiādi dutiyavikappo vutto. Sikhāppatto atthoti adhippetatthaṃ sandhāya vuttaṃ. Āsayabhedatoti pittasemhapubbalohitānaṃ catunnaṃ āsayānaṃ bhedena. Dhātunānattatoti rasaruhirādīnaṃ sattannaṃ, pathavādīnaṃ vā catunnaṃ dhātūnaṃ nānattena. Vatthisīsanti muttavatthito matthakapassaṃ. Hatthimadacalanaṃ nāmañca sambhavoti āha ‘‘sambhavo nikkhamatī’’ti. Sambhavaveganti sambhavassa ṭhānato cavitvā dakasotābhimukhaṃ otaraṇena sañjātasarīrakkhobhavegaṃ. Bāhusīsanti khandhappadesaṃ. Dassesīti ettha iti-saddo hetuttho, tena yasmā kaṇṇacūḷikāhi sambhavo nikkhamati…pe… sambhavañca dassesi, tasmā tatiyassa bhāsitaṃ subhāsitanti evaṃ yojanā veditabbā. Dakasotanti muttassa vatthito nikkhamanamaggaṃ, aṅgajātappadesanti vuttaṃ hoti. Sukkañca nāmetaṃ rasaruhirādisattadehadhātūsu majjhimadhātucatujaṃ aṭṭhimiñjādi viya pathavīdhātusaṅgahitaṃ āhārūpajīvīnaṃ sakalakāyagataṃ atidaharadārakānampi attheva, taṃ pana pannarasasoḷasavassuddesato paṭṭhāya sattānaṃ samuppajjanakakāmarāgeheva ṭhānato calati, calitañca āpodhātubhāvena cittajameva hutvā dakasotaṃ otarati, dakasotato pana paṭṭhāya cittapaccayautujaṃ hoti matthaluṅgato calitasiṅghāṇikā viya. Yesaṃ pana samucchedanavikkhambhanādīhi rāgapariyuṭṭhānaṃ natthi , tesaṃ sukkavissaṭṭhi na siyā. Iti yathāṭhānato sukkassa vissaṭṭhiyeva rāgacittasamuṭṭhānā, na pakatirūpaṃ, teneva kathāvatthuaṭṭhakathāyaṃ (kathā. aṭṭha. 307) ‘‘sukkavissaṭṭhi nāma rāgasamuṭṭhānā hotī’’ti sukkassa vissaṭṭhi eva rāgasamuṭṭhānā vuttā, na pakatirūpaṃ. Channaṃ pana kāmāvacaradevānaṃ vijjamānāpi sukkadhātu dvayaṃdvayasamāpattivasena pariyuṭṭhitarāgenāpi ṭhānato na gaḷati, yathāṭhāne eva ṭhatvā kiñci vikāraṃ āpajjamānā taṅkhaṇikapariḷāhavūpasamāvahā methunakiccaniṭṭhāpitā hotīti veditabbaṃ. Keci pana ‘‘kāyasamphassasukhameva tesaṃ kāmakicca’’nti vadanti. Khīṇāsavānaṃ pana anāgāmīnañca sabbaso kāmarāgābhāvena sukkadhātuvikārampi nāpajjatīti veditabbaṃ. Rūpībrahmānaṃ pana vikkhambhitakāmarāgena janitattā anāhārūpajīvitattā ca sabbathā sukkadhātupi nattheva. Tathevāti mocanassādena nimitte upakkamatotiādiṃ atidisati. ‘‘Vissaṭṭhīti ṭhānācāvanā vuccatī’’ti padabhājane (pārā. 237) vuttattā ‘‘dakasotaṃ otiṇṇamatte’’ti kasmā vuttanti āha dakasotorohaṇañcetthātiādi. Etthāti tīsupi vādesu. Adhivāsetvāti nimitte upakkamitvā puna vippaṭisāre uppanne mocanassādaṃ vinodetvā. Antarā nivāretunti attano nimitte katūpakkamena ṭhānā cutaṃ dakasotaṃ otarituṃ adatvā antarā nivāretuṃ. Mocanassādena hatthaparikammādiṃ karontassa muttepi dukkaṭameva, nimitte upakkamābhāvato pana saṅghādiseso na hotīti āha ‘‘hattha…pe… anāpattī’’ti. Dakasotorohaṇañcetthātiādinā vuttavinicchayaṃ sandhāya ‘‘ayaṃ sabbācariyasādhāraṇavinicchayo’’ti vuttaṃ.
кобхагаран̣абажжаяо наама висабхааг̇абхзсаж̇ж̇асзнаасанаахаараад̣̇ибажжаяо. наанаавид̇хам̣ субинанд̇и кубхид̇аваад̇аад̣̇ид̇хаад̇уунам̣ ануг̇ун̣ам̣. анубхууд̇абуб̣б̣анд̇и буб̣б̣з бхууд̇абуб̣б̣ам̣ манасаа баригаббид̇абуб̣б̣ан̃жа. саг̇г̇анарагад̣̇зсанд̇араад̣̇ийнамби хи сан̇г̇ахзд̇ваа вуд̇д̇ам̣. ад̇т̇агаамад̇ааяа ваа анад̇т̇агаамад̇ааяа ваад̇и ид̣̇ам̣ д̣̇звад̇аанам̣ хид̇аахид̇аад̇хиббааяад̇ам̣ д̣̇ассзд̇ум̣ вуд̇д̇ам̣. ад̇т̇ааяа ваа анад̇т̇ааяа ваад̇и сабхаавад̇о бхавид̇аб̣б̣ам̣ хид̇аахид̇ам̣ санд̇хааяа вуд̇д̇ам̣. нану д̣̇звад̇аахи убасам̣харияамаанаани аарамман̣аани барамад̇т̇ад̇о над̇т̇и, гат̇ам̣ д̇аани бурисо бассад̇и, д̣̇звад̇аа ваа д̇аани авиж̇ж̇амаанаани убасам̣харанд̇ийд̇и жод̣̇анам̣ манаси гад̇ваа ааха со д̇аасанд̇иаад̣̇и. д̇зна ‘‘звамзсо баригаббад̇уу’’д̇и д̣̇звад̇аахи жинд̇ид̇амад̇д̇зна субанд̇асса жид̇д̇ам̣ бхаван̇г̇асанд̇ад̇ид̇о нибад̇ид̇ваа д̣̇звад̇аахи жинд̇ид̇анияаамзнзва баригаббамаанам̣ бавад̇д̇ад̇и, звам̣ д̇зна баригаббамаанаани аарамман̣аани д̣̇звад̇аахи убасам̣хадаани наама хонд̇и, д̇аани жа со д̣̇звад̇аанубхаавзна бассад̇и наамаад̇и д̣̇ассзд̇и. б̣од̇хисад̇д̇амаад̇аа вияа буд̇д̇абадилаабханимид̇д̇анд̇иаад̣̇ийсу б̣од̇хисад̇д̇асса г̇аб̣бхогганд̇ид̣̇ивасз махаамааяаад̣̇звияаа ад̇д̇ано д̣̇агкин̣абассзна згасса сзд̇аваравааран̣асса анд̇огужчибавидтабхаавад̣̇ассанам̣ буд̇д̇абадилаабханимид̇д̇ам̣ субинам̣ наама. амхаагам̣ бана б̣од̇хисад̇д̇асса ‘‘свз б̣уд̣̇д̇хо бхависсад̇ий’’д̇и жаад̇уд̣̇д̣̇асияам̣ багкасса рад̇д̇ивибхааяанагаалз химаванд̇ам̣ б̣иб̣б̣оханам̣ гад̇ваа бурад̇т̇имабажчимасамуд̣̇д̣̇зсу ваамад̣̇агкин̣ахад̇т̇з д̣̇агкин̣асамуд̣̇д̣̇з баад̣̇з жа од̣̇ахид̇ваа махаабат̇авияаа саяанам̣ зго, д̣̇аб̣б̣ад̇ин̣асан̇каад̇ааяа д̇ирияаа наама д̇ин̣аж̇аад̇ияаа нан̇г̇аламад̇д̇арад̇д̇ад̣̇ан̣д̣ааяа наабхид̇о уг̇г̇ад̇ааяа кан̣зна анзгаяож̇анасахассам̣ набхам̣ аахажжа таанам̣ зго, сзд̇аанам̣ ган̣хасийсаанам̣ гимийнам̣ баад̣̇зхи уссаггид̇ваа яаава ж̇аан̣уман̣д̣алам̣ аахажжа таанам̣ зго, наанааван̣н̣аанам̣ жад̇уннам̣ сагун̣аанам̣ жад̇уухи д̣̇исаахи ааг̇анд̇ваа баад̣̇амуулз сзд̇аван̣н̣ад̇аабаж̇ж̇анам̣ зго, б̣од̇хисад̇д̇асса махад̇о мийл̣хабаб̣б̣ад̇асса убари алимбамаанасса жан̇гаманам̣ згод̇и имз бан̃жа махаасубинаа наама, имз жа яат̇ааггамам̣ самб̣од̇хияаа, д̣̇звамануссзсу арияамаг̇г̇аббагаасанасса, г̇ихийнан̃жа саран̣уубаг̇аманасса, кад̇д̇ияаад̣̇ижад̇уван̣н̣аанам̣ баб̣б̣аж̇ид̇ваа арахад̇д̇абадилаабхасса, жад̇уннам̣ бажжаяаанам̣ лаабхз алид̇д̇абхаавасса жа буб̣б̣анимид̇д̇аанийд̇и взд̣̇ид̇аб̣б̣ам̣. сол̣аса субинаа баагадаа зва. зганд̇асажжамзваад̇и паланияамуббад̇д̇ид̇о вуд̇д̇ам̣. д̣̇ассанам̣ бана саб̣б̣ад̇т̇а вибаллад̇т̇амзва. д̇хаад̇угкобхаад̣̇ийсу жад̇уусу муулагааран̣зсу д̣̇вийхи д̇ийхиби гааран̣зхи гад̣̇аажи субинам̣ бассанд̇ийд̇и ааха ‘‘сам̣саг̇г̇абхзд̣̇ад̇о’’д̇и. субинабхзд̣̇од̇и сажжаасажжад̇т̇ад̇аабхзд̣̇о.
Khobhakaraṇapaccayo nāma visabhāgabhesajjasenāsanāhārādipaccayo. Nānāvidhaṃ supinanti khubhitavātādidhātūnaṃ anuguṇaṃ. Anubhūtapubbanti pubbe bhūtapubbaṃ manasā parikappitapubbañca. Sagganarakadesantarādīnampi hi saṅgahetvā vuttaṃ. Atthakāmatāya vā anatthakāmatāya vāti idaṃ devatānaṃ hitāhitādhippāyataṃ dassetuṃ vuttaṃ. Atthāya vā anatthāya vāti sabhāvato bhavitabbaṃ hitāhitaṃ sandhāya vuttaṃ. Nanu devatāhi upasaṃhariyamānāni ārammaṇāni paramatthato natthi, kathaṃ tāni puriso passati, devatā vā tāni avijjamānāni upasaṃharantīti codanaṃ manasi katvā āha so tāsantiādi. Tena ‘‘evameso parikappatū’’ti devatāhi cintitamattena supantassa cittaṃ bhavaṅgasantatito nipatitvā devatāhi cintitaniyāmeneva parikappamānaṃ pavattati, evaṃ tena parikappamānāni ārammaṇāni devatāhi upasaṃhaṭāni nāma honti, tāni ca so devatānubhāvena passati nāmāti dasseti. Bodhisattamātā viya puttapaṭilābhanimittantiādīsu bodhisattassa gabbhokkantidivase mahāmāyādeviyā attano dakkhiṇapassena ekassa setavaravāraṇassa antokucchipaviṭṭhabhāvadassanaṃ puttapaṭilābhanimittaṃ supinaṃ nāma. Amhākaṃ pana bodhisattassa ‘‘sve buddho bhavissatī’’ti cātuddasiyaṃ pakkhassa rattivibhāyanakāle himavantaṃ bibbohanaṃ katvā puratthimapacchimasamuddesu vāmadakkhiṇahatthe dakkhiṇasamudde pāde ca odahitvā mahāpathaviyā sayanaṃ eko, dabbatiṇasaṅkhātāya tiriyā nāma tiṇajātiyā naṅgalamattarattadaṇḍāya nābhito uggatāya khaṇena anekayojanasahassaṃ nabhaṃ āhacca ṭhānaṃ eko, setānaṃ kaṇhasīsānaṃ kimīnaṃ pādehi ussakkitvā yāva jāṇumaṇḍalaṃ āhacca ṭhānaṃ eko, nānāvaṇṇānaṃ catunnaṃ sakuṇānaṃ catūhi disāhi āgantvā pādamūle setavaṇṇatāpajjanaṃ eko, bodhisattassa mahato mīḷhapabbatassa upari alimpamānassa caṅkamanaṃ ekoti ime pañca mahāsupinā nāma, ime ca yathākkamaṃ sambodhiyā, devamanussesu ariyamaggappakāsanassa, gihīnañca saraṇūpagamanassa, khattiyādicatuvaṇṇānaṃ pabbajitvā arahattapaṭilābhassa, catunnaṃ paccayānaṃ lābhe alittabhāvassa ca pubbanimittānīti veditabbaṃ. Soḷasa supinā pākaṭā eva. Ekantasaccamevāti phalaniyamuppattito vuttaṃ. Dassanaṃ pana sabbattha vipallatthameva. Dhātukkhobhādīsu catūsu mūlakāraṇesu dvīhi tīhipi kāraṇehi kadāci supinaṃ passantīti āha ‘‘saṃsaggabhedato’’ti. Supinabhedoti saccāsaccatthatābhedo.
руубанимид̇д̇аад̣̇иаарамман̣анд̇и зд̇т̇а гамманимид̇д̇аг̇ад̇инимид̇д̇ад̇о ан̃н̃аруубамзва вин̃н̃аан̣асса нимид̇д̇анд̇и руубанимид̇д̇ам̣, д̇ам̣ аад̣̇и язсам̣ сад̇д̇анимид̇д̇аад̣̇ийнам̣ д̇аани руубанимид̇д̇аад̣̇ийни аарамман̣аани яасса бхаван̇г̇ажид̇д̇асса д̇ам̣ руубанимид̇д̇аад̣̇иаарамман̣ам̣. ийд̣̇исаанийд̇и руубанимид̇д̇аад̣̇иаарамман̣аани рааг̇аад̣̇исамбаяуд̇д̇аани жа. саб̣б̣охааригажид̇д̇знаад̇и бадиб̣уд̣̇д̇хасса багад̇ивийт̇ижид̇д̇зна. го наама бассад̇ийд̇и суд̇д̇абадиб̣уд̣̇д̇хабхаававияуд̇д̇ааяа жид̇д̇аббавад̇д̇ияаа абхаавад̇о субинам̣ бассанд̇о наама на сияаад̇и ад̇хиббааяо, д̇знааха ‘‘субинасса абхаавова аабаж̇ж̇ад̇ий’’д̇и. габимид̣̇д̇хабарзд̇од̇и иминаа нид̣̇д̣̇аавасзна бавад̇д̇амаанабхаван̇г̇асанд̇ад̇иб̣яавахид̇ааяа гусалаагусалааяа манод̣̇вааравийт̇ияаа жа бассад̇ийд̇и д̣̇ассзд̇и, д̇знааха яаа нид̣̇д̣̇аад̇иаад̣̇и. д̣̇вийхи анд̇зхи муд̇д̇од̇и гусалаагусаласан̇каад̇зхи д̣̇вийхи анд̇зхи муд̇д̇о. ааваж̇ж̇анад̇ад̣̇аарамман̣агкан̣зд̇и субинз бан̃жад̣̇вааравийт̇ияаа абхаавад̇о манод̣̇ваарз уббаж̇ж̇анаарахам̣ г̇ахзд̇ваа вуд̇д̇ам̣.
Rūpanimittādiārammaṇanti ettha kammanimittagatinimittato aññarūpameva viññāṇassa nimittanti rūpanimittaṃ, taṃ ādi yesaṃ sattanimittādīnaṃ tāni rūpanimittādīni ārammaṇāni yassa bhavaṅgacittassa taṃ rūpanimittādiārammaṇaṃ. Īdisānīti rūpanimittādiārammaṇāni rāgādisampayuttāni ca. Sabbohārikacittenāti paṭibuddhassa pakativīthicittena. Ko nāma passatīti suttapaṭibuddhabhāvaviyuttāya cittappavattiyā abhāvato supinaṃ passanto nāma na siyāti adhippāyo, tenāha ‘‘supinassa abhāvova āpajjatī’’ti. Kapimiddhaparetoti iminā niddāvasena pavattamānabhavaṅgasantatibyavahitāya kusalākusalāya manodvāravīthiyā ca passatīti dasseti, tenāha yā niddātiādi. Dvīhi antehi muttoti kusalākusalasaṅkhātehi dvīhi antehi mutto. Āvajjanatadārammaṇakkhaṇeti supine pañcadvāravīthiyā abhāvato manodvāre uppajjanārahaṃ gahetvā vuttaṃ.
зд̇т̇а жа субинанд̇зби д̇ад̣̇аарамман̣аважанад̇о анубхууд̇зсу суд̇абуб̣б̣зсу ваа руубаад̣̇ийсу бураабад̇д̇ибхаавзна баригаббзд̇ваа вибаллаасад̇о бавад̇д̇амаанааби гаамааважаравибаагад̇хаммаа барид̇д̇ад̇хаммз ниссааяа баригаббзд̇ваа бавад̇д̇ад̇д̇аа барид̇д̇аарамман̣аа вуд̇д̇аа, на бана саруубад̇о барид̇д̇ад̇хаммз г̇ахзд̇ваа бавад̇д̇ад̇д̇аа зваад̇и г̇ахзд̇аб̣б̣ам̣. зван̃жа ид̇т̇ибурисаад̣̇иаагаарам̣ ааробзд̇ваа бавад̇д̇амаанаанам̣ рааг̇аад̣̇исавибаагад̇хаммаанамби д̇зсам̣ аарамман̣ам̣ г̇ахзд̇ваа уббаннаанам̣ бадисанд̇хаад̣̇ивибаагаанамби барид̇д̇аарамман̣ад̇аа гамманимид̇д̇аарамман̣ад̇аа жа убабаннаа зва ход̇и. вад̇т̇уд̇хаммавинимуд̇д̇ам̣ бана саммуд̇ибхууд̇ам̣ гасин̣аад̣̇ибадибхааг̇аарамман̣ам̣ г̇ахзд̇ваа уббаннаа убажаараббанаад̣̇ивасаббавад̇д̇аа жид̇д̇ажзд̇асигад̇хаммаа зва барид̇д̇ад̇д̇игз (д̇ха. са. д̇игамаад̇игаа 12) на вад̇д̇аб̣б̣аарамман̣аад̇и г̇ахзд̇аб̣б̣аа.
Ettha ca supinantepi tadārammaṇavacanato anubhūtesu sutapubbesu vā rūpādīsu purāpattibhāvena parikappetvā vipallāsato pavattamānāpi kāmāvacaravipākadhammā parittadhamme nissāya parikappetvā pavattattā parittārammaṇā vuttā, na pana sarūpato parittadhamme gahetvā pavattattā evāti gahetabbaṃ. Evañca itthipurisādiākāraṃ āropetvā pavattamānānaṃ rāgādisavipākadhammānampi tesaṃ ārammaṇaṃ gahetvā uppannānaṃ paṭisandhādivipākānampi parittārammaṇatā kammanimittārammaṇatā ca upapannā eva hoti. Vatthudhammavinimuttaṃ pana sammutibhūtaṃ kasiṇādipaṭibhāgārammaṇaṃ gahetvā uppannā upacārappanādivasappavattā cittacetasikadhammā eva parittattike (dha. sa. tikamātikā 12) na vattabbārammaṇāti gahetabbā.
свааяанд̇и субино. вибаллаасзна баригаббид̇абарид̇д̇аарамман̣ад̇д̇аа ‘‘д̣̇уб̣б̣алавад̇т̇угад̇д̇аа’’д̇и вуд̇д̇ам̣, авиж̇ж̇амаанаарамман̣з авасавад̇д̇ид̇од̇и ад̇хиббааяо, д̇знааха ависаяз уббаннад̇д̇аад̇иаад̣̇и.
Svāyanti supino. Vipallāsena parikappitaparittārammaṇattā ‘‘dubbalavatthukattā’’ti vuttaṃ, avijjamānārammaṇe avasavattitoti adhippāyo, tenāha avisaye uppannattātiādi.
аабад̇д̇инигааяассаад̇и ид̣̇ам̣ сан̇гхаад̣̇исзсод̇и буллин̇г̇а-сад̣̇д̣̇асса ануруубавасзна вуд̇д̇ам̣. ассаад̇и асса аабад̇д̇инигааяасса, вудтаабзд̇ум̣ ижчид̇ассаад̇и ад̇т̇о, д̇знааха гим̣ вуд̇д̇анд̇иаад̣̇и. рул̣хисад̣̇д̣̇знаад̇и зд̇т̇а самуд̣̇ааяз нибпаннассааби сад̣̇д̣̇асса д̇ад̣̇згад̣̇зсзби басид̣̇д̇хи ид̇ха рул̣хий наама, д̇ааяа рул̣хияаа яуд̇д̇о сад̣̇д̣̇о рул̣хийсад̣̇д̣̇о, д̇зна. рул̣хияаа гааран̣амааха аваяавзижжаад̣̇инаа.
Āpattinikāyassāti idaṃ saṅghādisesoti pulliṅga-saddassa anurūpavasena vuttaṃ. Assāti assa āpattinikāyassa, vuṭṭhāpetuṃ icchitassāti attho, tenāha kiṃ vuttantiādi. Ruḷhisaddenāti ettha samudāye nipphannassāpi saddassa tadekadesepi pasiddhi idha ruḷhī nāma, tāya ruḷhiyā yutto saddo ruḷhīsaddo, tena. Ruḷhiyā kāraṇamāha avayaveiccādinā.
гаалан̃жаад̇и ‘‘рааг̇уубад̇т̇амбхз’’д̇иаад̣̇инаа д̣̇ассид̇агаалан̃жа, ‘‘рааг̇уубад̇т̇амбхз’’д̇и вуд̇д̇з рааг̇уубад̇т̇амбхз ж̇аад̇з д̇асмим̣ гаалз можзд̇ийд̇и ад̇т̇ад̇о гаало г̇аммад̇и. навамасса ад̇хиббааяассаад̇и виймам̣саад̇хиббааяасса. вад̇т̇ууд̇и висаяам̣.
Kālañcāti ‘‘rāgūpatthambhe’’tiādinā dassitakālañca, ‘‘rāgūpatthambhe’’ti vutte rāgūpatthambhe jāte tasmiṃ kāle mocetīti atthato kālo gammati. Navamassa adhippāyassāti vīmaṃsādhippāyassa. Vatthūti visayaṃ.
238. ломаа зд̇зсам̣ санд̇ийд̇и ломасаа, б̣ахуломабаан̣агаа.
238. Lomā etesaṃ santīti lomasā, bahulomapāṇakā.
239. можанзнаад̇и можанаббаяог̇зна. можанассаад̣̇асамбаяуд̇д̇ааяаад̇и зд̇т̇а можанижчаава можанассаад̣̇о, д̇зна самбаяуд̇д̇аа жзд̇анаа можанассаад̣̇ажзд̇анаад̇и ад̇т̇о, на бана можанз ассаад̣̇ам̣ сукам̣ бад̇т̇знд̇ияаа жзд̇анааяаад̇и звам̣ ад̇т̇о г̇ахзд̇аб̣б̣о, ид̇арат̇аа сукад̇т̇ааяа можзнд̇ассзва аабад̇д̇и, на аарог̇яаад̣̇иад̇т̇ааяаад̇и аабаж̇ж̇ад̇и. д̇асмаа аарог̇яаад̣̇ийсу язна гзнажи ад̇хиббааязна можанижчааяа жзд̇анааяаад̇и ад̇т̇ова г̇ахзд̇аб̣б̣о.
239.Mocanenāti mocanappayogena. Mocanassādasampayuttāyāti ettha mocanicchāva mocanassādo, tena sampayuttā cetanā mocanassādacetanāti attho, na pana mocane assādaṃ sukhaṃ patthentiyā cetanāyāti evaṃ attho gahetabbo, itarathā sukhatthāya mocentasseva āpatti, na ārogyādiatthāyāti āpajjati. Tasmā ārogyādīsu yena kenaci adhippāyena mocanicchāya cetanāyāti atthova gahetabbo.
240. вааяамад̇од̇и ан̇г̇аж̇аад̇з гааязна убаггамад̇о. д̣̇вз аабад̇д̇исахассаанийд̇и кан̣д̣ажаггаад̣̇ийни анаамасид̇ваава вуд̇д̇ам̣, ижчанд̇зна бана кан̣д̣ажаггаад̣̇ибхзд̣̇знааби г̇ан̣анаа гаад̇аб̣б̣аа. згзна бад̣̇знаад̇и г̇зхасид̇абзмабад̣̇зна. д̇ат̇зваад̇и можанассаад̣̇ажзд̇анааяа зва г̇аал̣хам̣ бийл̣анаад̣̇иббаяог̇ам̣ авиж̇ахид̇ваа субанзна сан̇гхаад̣̇исзсод̇и вуд̇д̇ам̣. суд̣̇д̇хажид̇д̇од̇и можанассаад̣̇асса нимид̇д̇з ууруаад̣̇ийхи гад̇аубаггамасса виж̇аханам̣ санд̇хааяа вуд̇д̇ам̣. д̇зна асубхаманасигаараабхаавзби баяог̇аабхаавзнзва можанзби анаабад̇д̇и д̣̇ийбид̇аад̇и взд̣̇ид̇аб̣б̣аа.
240.Vāyamatoti aṅgajāte kāyena upakkamato. Dve āpattisahassānīti khaṇḍacakkādīni anāmasitvāva vuttaṃ, icchantena pana khaṇḍacakkādibhedenāpi gaṇanā kātabbā. Ekena padenāti gehasitapemapadena. Tathevāti mocanassādacetanāya eva gāḷhaṃ pīḷanādippayogaṃ avijahitvā supanena saṅghādisesoti vuttaṃ. Suddhacittoti mocanassādassa nimitte ūruādīhi kataupakkamassa vijahanaṃ sandhāya vuttaṃ. Tena asubhamanasikārābhāvepi payogābhāveneva mocanepi anāpatti dīpitāti veditabbā.
д̇зна убаггамзна муд̇д̇зд̇и мужжамаанам̣ винаа ан̃н̃асмимби суггз таанад̇о муд̇д̇з. яад̣̇и бана убаггамз гад̇зби мужжамаанамзва д̣̇агасод̇ам̣ од̇арад̇и, т̇уллажжаяамзва баяог̇зна муд̇д̇асса абхааваа. ж̇аг̇г̇анад̇т̇ааяаад̇и жийвараад̣̇ийсу лимбанабарихаарааяа хад̇т̇зна ан̇г̇аж̇аад̇аг̇г̇ахан̣ам̣ ваддад̇и, д̇аббаяог̇о на ход̇ийд̇и ад̇хиббааяо. аногаасанд̇и ан̇г̇аж̇аад̇аббад̣̇зсам̣.
Tena upakkamena mutteti muccamānaṃ vinā aññasmimpi sukke ṭhānato mutte. Yadi pana upakkame katepi muccamānameva dakasotaṃ otarati, thullaccayameva payogena muttassa abhāvā. Jagganatthāyāti cīvarādīsu limpanaparihārāya hatthena aṅgajātaggahaṇaṃ vaṭṭati, tappayogo na hotīti adhippāyo. Anokāsanti aṅgajātappadesaṃ.
262. субинанд̇зна гааран̣знаад̇и субинанд̇з бавад̇д̇аубаггамахзд̇унаа. аабад̇д̇идтаанзязва хи аяам̣ анаабад̇д̇и ависаяад̇д̇аа вуд̇д̇аа. д̇знааха ‘‘сажасса висаяо ход̇и нижжалзна бхавид̇аб̣б̣а’’нд̇иаад̣̇и.
262.Supinantena kāraṇenāti supinante pavattaupakkamahetunā. Āpattiṭṭhāneyeva hi ayaṃ anāpatti avisayattā vuttā. Tenāha ‘‘sacassa visayo hoti niccalena bhavitabba’’ntiādi.
263. винийд̇авад̇т̇убаал̣ияам̣ ан̣д̣аган̣д̣уванавад̇т̇усмим̣ можанаад̇хиббааязна ан̣д̣ажаланзна ан̇г̇аж̇аад̇ассааби жаланад̇о нимид̇д̇з убаггамо ход̇ийд̇и сан̇гхаад̣̇исзсо вуд̇д̇о. яат̇аа бана ан̇г̇аж̇аад̇ам̣ на жалад̇и, звам̣ ан̣д̣амзва ган̣д̣уванзна пусанд̇асса муд̇д̇зби анаабад̇д̇и ан̣д̣асса анан̇г̇аж̇аад̇ад̇д̇аа.
263. Vinītavatthupāḷiyaṃ aṇḍakaṇḍuvanavatthusmiṃ mocanādhippāyena aṇḍacalanena aṅgajātassāpi calanato nimitte upakkamo hotīti saṅghādiseso vutto. Yathā pana aṅgajātaṃ na calati, evaṃ aṇḍameva kaṇḍuvanena phusantassa muttepi anāpatti aṇḍassa anaṅgajātattā.
264. вад̇т̇инд̇и ан̇г̇аж̇аад̇асийсажчаад̣̇агажаммам̣. уд̣̇арам̣ д̇аабзнд̇асса…бз… анаабад̇д̇иязваад̇и уд̣̇арад̇аабанзна ан̇г̇аж̇аад̇зби д̇ад̇д̇з д̇аавад̇д̇агзна нимид̇д̇з убаггамо гад̇о наама на ход̇ийд̇и вуд̇д̇ам̣.
264.Vatthinti aṅgajātasīsacchādakacammaṃ. Udaraṃ tāpentassa…pe… anāpattiyevāti udaratāpanena aṅgajātepi tatte tāvattakena nimitte upakkamo kato nāma na hotīti vuttaṃ.
265. зхи мз д̇вам̣, аавусо, сааман̣зраад̇и вад̇т̇усмим̣ ан̃н̃ам̣ аан̣аабзд̇у, д̇зна гарияамаанасса ан̇г̇аж̇аад̇ажаланасса можанассаад̣̇зна саад̣̇ияанад̇о д̇ам̣ жаланам̣ бхигкусса саад̣̇ияанажид̇д̇асамудтид̇амби ход̇ийд̇и суггависсадтибажжаяасса ан̇г̇аж̇аад̇ажаланасса хзд̇убхууд̇аа ассаад̣̇ажзд̇анаава аабад̇д̇ияаа ан̇г̇ам̣ ход̇и, на аан̣аабанаваажаа д̇ассаа бавад̇д̇игкан̣з сан̇гхаад̣̇исзсасса асиж̇жханад̇о. звам̣ аан̣аабзд̇вааби яонисоманасигаарзна можанассаад̣̇ам̣ бадивинод̣̇знд̇асса аабад̇д̇иасамбхавад̇о ид̣̇ам̣ сигкаабад̣̇ам̣ анаан̣ад̇д̇игам̣, гааяагаммам̣, гирияасамудтаанан̃жа ж̇аад̇анд̇и г̇ахзд̇аб̣б̣ам̣, аан̣аабанаваажааяа бана д̣̇уггадам̣ аабаж̇ж̇ад̇и. яо бана барзна анаан̣ад̇д̇зна б̣алаггаарзнааби гарияамаанаббаяог̇ам̣ можанассаад̣̇зна саад̣̇ияад̇и, д̇ассааби муд̇д̇з батамабаарааж̇игз вияа сан̇гхаад̣̇исзсова, амуд̇д̇з т̇уллажжаяам̣. можанассаад̣̇з жзд̇анааяа бана асад̇и гааяасам̣саг̇г̇арааг̇зна саад̣̇ияанд̇ассааби муд̇д̇зби сан̇гхаад̣̇исзсзна анаабад̇д̇ийд̇и аажарияаа вад̣̇анд̇и, д̇ан̃жа яуд̇д̇амзва.
265.Ehi me tvaṃ, āvuso, sāmaṇerāti vatthusmiṃ aññaṃ āṇāpetu, tena kariyamānassa aṅgajātacalanassa mocanassādena sādiyanato taṃ calanaṃ bhikkhussa sādiyanacittasamuṭṭhitampi hotīti sukkavissaṭṭhipaccayassa aṅgajātacalanassa hetubhūtā assādacetanāva āpattiyā aṅgaṃ hoti, na āṇāpanavācā tassā pavattikkhaṇe saṅghādisesassa asijjhanato. Evaṃ āṇāpetvāpi yonisomanasikārena mocanassādaṃ paṭivinodentassa āpattiasambhavato idaṃ sikkhāpadaṃ anāṇattikaṃ, kāyakammaṃ, kiriyasamuṭṭhānañca jātanti gahetabbaṃ, āṇāpanavācāya pana dukkaṭaṃ āpajjati. Yo pana parena anāṇattena balakkārenāpi kariyamānappayogaṃ mocanassādena sādiyati, tassāpi mutte paṭhamapārājike viya saṅghādisesova, amutte thullaccayaṃ. Mocanassāde cetanāya pana asati kāyasaṃsaggarāgena sādiyantassāpi muttepi saṅghādisesena anāpattīti ācariyā vadanti, tañca yuttameva.
266. гааяад̇т̇амбханавад̇т̇усмим̣ жаланавасзна яат̇аа ан̇г̇аж̇аад̇з убаггамо самбхавад̇и, д̇ат̇аа виж̇амбхид̇ад̇д̇аа аабад̇д̇и вуд̇д̇аа.
266.Kāyatthambhanavatthusmiṃ calanavasena yathā aṅgajāte upakkamo sambhavati, tathā vijambhitattā āpatti vuttā.
убаниж̇жхааяанавад̇т̇усмим̣ ан̇г̇аж̇аад̇анд̇и ж̇ийвамаанаид̇т̇ийнам̣ бассаавамаг̇г̇ова ад̇хиббзд̇о, нзд̇аро.
Upanijjhāyanavatthusmiṃ aṅgajātanti jīvamānaitthīnaṃ passāvamaggova adhippeto, netaro.
267. бубпаавалийд̇и гийл̣аависзсо. д̇ам̣ гира гийл̣анд̇аа над̣̇ийаад̣̇ийсу чиннад̇адам̣ уд̣̇агзна жигкаллам̣ гад̇ваа д̇ад̇т̇а убхо баад̣̇з басаарзд̇ваа нисиннаа бад̇анд̇и , ‘‘бубпаавалияа’’нд̇иби баато. бавзсзнд̇ассаад̇и баяож̇агад̇д̇зна д̣̇вигаммигад̇д̇аа ‘‘ваалигам̣ ан̇г̇аж̇аад̇а’’нд̇и убхаяад̇т̇ааби убаяог̇аважанам̣ гад̇ам̣. жзд̇анаа, убаггамо, мужжананд̇и имаанзд̇т̇а д̇ийн̣и ан̇г̇аани взд̣̇ид̇аб̣б̣аани.
267.Pupphāvalīti kīḷāviseso. Taṃ kira kīḷantā nadīādīsu chinnataṭaṃ udakena cikkhallaṃ katvā tattha ubho pāde pasāretvā nisinnā patanti , ‘‘pupphāvaliya’’ntipi pāṭho. Pavesentassāti payojakattena dvikammikattā ‘‘vālikaṃ aṅgajāta’’nti ubhayatthāpi upayogavacanaṃ kataṃ. Cetanā, upakkamo, muccananti imānettha tīṇi aṅgāni veditabbāni.
суггависсадтисигкаабад̣̇аван̣н̣анаа нидтид̇аа.
Sukkavissaṭṭhisikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 1. суггависсадтисигкаабад̣̇ам̣ • 1. Sukkavissaṭṭhisikkhāpadaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. суггависсадтисигкаабад̣̇аван̣н̣анаа • 1. Sukkavissaṭṭhisikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 1. суггависсадтисигкаабад̣̇аван̣н̣анаа • 1. Sukkavissaṭṭhisikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 1. суггависсадтисигкаабад̣̇аван̣н̣анаа • 1. Sukkavissaṭṭhisikkhāpadavaṇṇanā
