Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi

    ২. সুলভসুত্তং

    2. Sulabhasuttaṃ

    ১০১. ৰুত্তঞ্হেতং ভগৰতা, ৰুত্তমরহতাতি মে সুতং –

    101. Vuttañhetaṃ bhagavatā, vuttamarahatāti me sutaṃ –

    ‘‘চত্তারিমানি, ভিক্খৰে, অপ্পানি চেৰ সুলভানি চ, তানি চ অনৰজ্জানি। কতমানি চত্তারি? পংসুকূলং, ভিক্খৰে, চীৰরানং অপ্পঞ্চ সুলভঞ্চ, তঞ্চ অনৰজ্জং। পিণ্ডিযালোপো , ভিক্খৰে, ভোজনানং অপ্পঞ্চ সুলভঞ্চ, তঞ্চ অনৰজ্জং। রুক্খমূলং, ভিক্খৰে , সেনাসনানং অপ্পঞ্চ সুলভঞ্চ, তঞ্চ অনৰজ্জং। পূতিমুত্তং, ভিক্খৰে, ভেসজ্জানং অপ্পঞ্চ সুলভঞ্চ তঞ্চ অনৰজ্জং। ইমানি খো, ভিক্খৰে, চত্তারি অপ্পানি চেৰ সুলভানি চ, তানি চ অনৰজ্জানি। যতো খো, ভিক্খৰে, ভিক্খু অপ্পেন চ তুট্ঠো হোতি সুলভেন চ (অনৰজ্জেন চ) 1, ইমস্সাহং অঞ্ঞতরং সামঞ্ঞঙ্গন্তি ৰদামী’’তি। এতমত্থং ভগৰা অৰোচ। তত্থেতং ইতি ৰুচ্চতি –

    ‘‘Cattārimāni, bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo , bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave , senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca (anavajjena ca) 2, imassāhaṃ aññataraṃ sāmaññaṅganti vadāmī’’ti. Etamatthaṃ bhagavā avoca. Tatthetaṃ iti vuccati –

    ‘‘অনৰজ্জেন তুট্ঠস্স, অপ্পেন সুলভেন চ।

    ‘‘Anavajjena tuṭṭhassa, appena sulabhena ca;

    ন সেনাসনমারব্ভ, চীৰরং পানভোজনং।

    Na senāsanamārabbha, cīvaraṃ pānabhojanaṃ;

    ৰিঘাতো হোতি চিত্তস্স, দিসা নপ্পটিহঞ্ঞতি॥

    Vighāto hoti cittassa, disā nappaṭihaññati.

    ‘‘যে চস্স 3 ধম্মা অক্খাতা, সামঞ্ঞস্সানুলোমিকা।

    ‘‘Ye cassa 4 dhammā akkhātā, sāmaññassānulomikā;

    অধিগ্গহিতা তুট্ঠস্স, অপ্পমত্তস্স ভিক্খুনো’’তি 5॥

    Adhiggahitā tuṭṭhassa, appamattassa bhikkhuno’’ti 6.

    অযম্পি অত্থো ৰুত্তো ভগৰতা, ইতি মে সুতন্তি। দুতিযং।

    Ayampi attho vutto bhagavatā, iti me sutanti. Dutiyaṃ.




    Next: ৩. আসৰক্খযসুত্তং • 3. Āsavakkhayasuttaṃ




    Footnotes:
    1. (…) নত্থি সী॰ পী॰ ক॰ পোত্থকেসু চ অঙ্গুত্তরে চ
    2. (…) natthi sī. pī. ka. potthakesu ca aṅguttare ca
    3. যেপস্স (স্যা॰)
    4. yepassa (syā.)
    5. সিক্খতোতি (সী॰ ক॰)
    6. sikkhatoti (sī. ka.)



    Related texts:



    অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ২. সুলভসুত্তৰণ্ণনা • 2. Sulabhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact