Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi

    ២. សុលភសុត្តំ

    2. Sulabhasuttaṃ

    ១០១. វុត្តញ្ហេតំ ភគវតា, វុត្តមរហតាតិ មេ សុតំ –

    101. Vuttañhetaṃ bhagavatā, vuttamarahatāti me sutaṃ –

    ‘‘ចត្តារិមានិ, ភិក្ខវេ, អប្បានិ ចេវ សុលភានិ ច, តានិ ច អនវជ្ជានិ។ កតមានិ ចត្តារិ? បំសុកូលំ, ភិក្ខវេ, ចីវរានំ អប្បញ្ច សុលភញ្ច, តញ្ច អនវជ្ជំ។ បិណ្ឌិយាលោបោ , ភិក្ខវេ, ភោជនានំ អប្បញ្ច សុលភញ្ច, តញ្ច អនវជ្ជំ។ រុក្ខមូលំ, ភិក្ខវេ , សេនាសនានំ អប្បញ្ច សុលភញ្ច, តញ្ច អនវជ្ជំ។ បូតិមុត្តំ, ភិក្ខវេ, ភេសជ្ជានំ អប្បញ្ច សុលភញ្ច តញ្ច អនវជ្ជំ។ ឥមានិ ខោ, ភិក្ខវេ, ចត្តារិ អប្បានិ ចេវ សុលភានិ ច, តានិ ច អនវជ្ជានិ។ យតោ ខោ, ភិក្ខវេ, ភិក្ខុ អប្បេន ច តុដ្ឋោ ហោតិ សុលភេន ច (អនវជ្ជេន ច) 1, ឥមស្សាហំ អញ្ញតរំ សាមញ្ញង្គន្តិ វទាមី’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –

    ‘‘Cattārimāni, bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo , bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave , senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca (anavajjena ca) 2, imassāhaṃ aññataraṃ sāmaññaṅganti vadāmī’’ti. Etamatthaṃ bhagavā avoca. Tatthetaṃ iti vuccati –

    ‘‘អនវជ្ជេន តុដ្ឋស្ស, អប្បេន សុលភេន ច;

    ‘‘Anavajjena tuṭṭhassa, appena sulabhena ca;

    ន សេនាសនមារព្ភ, ចីវរំ បានភោជនំ;

    Na senāsanamārabbha, cīvaraṃ pānabhojanaṃ;

    វិឃាតោ ហោតិ ចិត្តស្ស, ទិសា នប្បដិហញ្ញតិ។

    Vighāto hoti cittassa, disā nappaṭihaññati.

    ‘‘យេ ចស្ស 3 ធម្មា អក្ខាតា, សាមញ្ញស្សានុលោមិកា;

    ‘‘Ye cassa 4 dhammā akkhātā, sāmaññassānulomikā;

    អធិគ្គហិតា តុដ្ឋស្ស, អប្បមត្តស្ស ភិក្ខុនោ’’តិ 5។

    Adhiggahitā tuṭṭhassa, appamattassa bhikkhuno’’ti 6.

    អយម្បិ អត្ថោ វុត្តោ ភគវតា, ឥតិ មេ សុតន្តិ។ ទុតិយំ។

    Ayampi attho vutto bhagavatā, iti me sutanti. Dutiyaṃ.




    Next: ៣. អាសវក្ខយសុត្តំ • 3. Āsavakkhayasuttaṃ




    Footnotes:
    1. (…) នត្ថិ សី. បី. ក. បោត្ថកេសុ ច អង្គុត្តរេ ច
    2. (…) natthi sī. pī. ka. potthakesu ca aṅguttare ca
    3. យេបស្ស (ស្យា.)
    4. yepassa (syā.)
    5. សិក្ខតោតិ (សី. ក.)
    6. sikkhatoti (sī. ka.)



    Related texts:



    អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ២. សុលភសុត្តវណ្ណនា • 2. Sulabhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact