Library / Tipiṭaka / တိပိဋက • Tipiṭaka / ဣတိဝုတ္တကပာဠိ • Itivuttakapāḷi

    ၂. သုလဘသုတ္တံ

    2. Sulabhasuttaṃ

    ၁၀၁. ဝုတ္တဉ္ဟေတံ ဘဂဝတာ, ဝုတ္တမရဟတာတိ မေ သုတံ –

    101. Vuttañhetaṃ bhagavatā, vuttamarahatāti me sutaṃ –

    ‘‘စတ္တာရိမာနိ, ဘိက္ခဝေ, အပ္ပာနိ စေဝ သုလဘာနိ စ, တာနိ စ အနဝဇ္ဇာနိ။ ကတမာနိ စတ္တာရိ? ပံသုကူလံ, ဘိက္ခဝေ, စီဝရာနံ အပ္ပဉ္စ သုလဘဉ္စ, တဉ္စ အနဝဇ္ဇံ။ ပိဏ္ဍိယာလောပော , ဘိက္ခဝေ, ဘောဇနာနံ အပ္ပဉ္စ သုလဘဉ္စ, တဉ္စ အနဝဇ္ဇံ။ ရုက္ခမူလံ, ဘိက္ခဝေ , သေနာသနာနံ အပ္ပဉ္စ သုလဘဉ္စ, တဉ္စ အနဝဇ္ဇံ။ ပူတိမုတ္တံ, ဘိက္ခဝေ, ဘေသဇ္ဇာနံ အပ္ပဉ္စ သုလဘဉ္စ တဉ္စ အနဝဇ္ဇံ။ ဣမာနိ ခော, ဘိက္ခဝေ, စတ္တာရိ အပ္ပာနိ စေဝ သုလဘာနိ စ, တာနိ စ အနဝဇ္ဇာနိ။ ယတော ခော, ဘိက္ခဝေ, ဘိက္ခု အပ္ပေန စ တုဋ္ဌော ဟောတိ သုလဘေန စ (အနဝဇ္ဇေန စ) 1, ဣမသ္သာဟံ အညတရံ သာမညင္ဂန္တိ ဝဒာမီ’’တိ။ ဧတမတ္ထံ ဘဂဝာ အဝောစ။ တတ္ထေတံ ဣတိ ဝုစ္စတိ –

    ‘‘Cattārimāni, bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo , bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave , senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca (anavajjena ca) 2, imassāhaṃ aññataraṃ sāmaññaṅganti vadāmī’’ti. Etamatthaṃ bhagavā avoca. Tatthetaṃ iti vuccati –

    ‘‘အနဝဇ္ဇေန တုဋ္ဌသ္သ၊ အပ္ပေန သုလဘေန စ။

    ‘‘Anavajjena tuṭṭhassa, appena sulabhena ca;

    န သေနာသနမာရဗ္ဘ၊ စီဝရံ ပာနဘောဇနံ။

    Na senāsanamārabbha, cīvaraṃ pānabhojanaṃ;

    ဝိဃာတော ဟောတိ စိတ္တသ္သ၊ ဒိသာ နပ္ပဋိဟညတိ။

    Vighāto hoti cittassa, disā nappaṭihaññati.

    ‘‘ယေ စသ္သ 3 ဓမ္မာ အက္ခာတာ၊ သာမညသ္သာနုလောမိကာ။

    ‘‘Ye cassa 4 dhammā akkhātā, sāmaññassānulomikā;

    အဓိဂ္ဂဟိတာ တုဋ္ဌသ္သ၊ အပ္ပမတ္တသ္သ ဘိက္ခုနော’’တိ 5။

    Adhiggahitā tuṭṭhassa, appamattassa bhikkhuno’’ti 6.

    အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ။ ဒုတိယံ။

    Ayampi attho vutto bhagavatā, iti me sutanti. Dutiyaṃ.




    Next: ၃. အာသဝက္ခယသုတ္တံ • 3. Āsavakkhayasuttaṃ




    Footnotes:
    1. (။) နတ္ထိ သီ. ပီ. က. ပောတ္ထကေသု စ အင္ဂုတ္တရေ စ
    2. (…) natthi sī. pī. ka. potthakesu ca aṅguttare ca
    3. ယေပသ္သ (သ္ယာ.)
    4. yepassa (syā.)
    5. သိက္ခတောတိ (သီ. က.)
    6. sikkhatoti (sī. ka.)



    Related texts:



    အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ဣတိဝုတ္တက-အဋ္ဌကထာ • Itivuttaka-aṭṭhakathā / ၂. သုလဘသုတ္တဝဏ္ဏနာ • 2. Sulabhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact