Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀཔཱལི༹ • Itivuttakapāḷi

    ༢. སུལབྷསུཏྟཾ

    2. Sulabhasuttaṃ

    ༡༠༡. ཝུཏྟཉྷེཏཾ བྷགཝཏཱ, ཝུཏྟམརཧཏཱཏི མེ སུཏཾ –

    101. Vuttañhetaṃ bhagavatā, vuttamarahatāti me sutaṃ –

    ‘‘ཙཏྟཱརིམཱནི, བྷིཀྑཝེ, ཨཔྤཱནི ཙེཝ སུལབྷཱནི ཙ, ཏཱནི ཙ ཨནཝཛྫཱནི། ཀཏམཱནི ཙཏྟཱརི? པཾསུཀཱུལཾ, བྷིཀྑཝེ, ཙཱིཝརཱནཾ ཨཔྤཉྩ སུལབྷཉྩ, ཏཉྩ ཨནཝཛྫཾ། པིཎྜིཡཱལོཔོ , བྷིཀྑཝེ, བྷོཛནཱནཾ ཨཔྤཉྩ སུལབྷཉྩ, ཏཉྩ ཨནཝཛྫཾ། རུཀྑམཱུལཾ, བྷིཀྑཝེ , སེནཱསནཱནཾ ཨཔྤཉྩ སུལབྷཉྩ, ཏཉྩ ཨནཝཛྫཾ། པཱུཏིམུཏྟཾ, བྷིཀྑཝེ, བྷེསཛྫཱནཾ ཨཔྤཉྩ སུལབྷཉྩ ཏཉྩ ཨནཝཛྫཾ། ཨིམཱནི ཁོ, བྷིཀྑཝེ, ཙཏྟཱརི ཨཔྤཱནི ཙེཝ སུལབྷཱནི ཙ, ཏཱནི ཙ ཨནཝཛྫཱནི། ཡཏོ ཁོ, བྷིཀྑཝེ, བྷིཀྑུ ཨཔྤེན ཙ ཏུཊྛོ ཧོཏི སུལབྷེན ཙ (ཨནཝཛྫེན ཙ) 1, ཨིམསྶཱཧཾ ཨཉྙཏརཾ སཱམཉྙངྒནྟི ཝདཱམཱི’’ཏི། ཨེཏམཏྠཾ བྷགཝཱ ཨཝོཙ། ཏཏྠེཏཾ ཨིཏི ཝུཙྩཏི –

    ‘‘Cattārimāni, bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo , bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave , senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca (anavajjena ca) 2, imassāhaṃ aññataraṃ sāmaññaṅganti vadāmī’’ti. Etamatthaṃ bhagavā avoca. Tatthetaṃ iti vuccati –

    ‘‘ཨནཝཛྫེན ཏུཊྛསྶ, ཨཔྤེན སུལབྷེན ཙ།

    ‘‘Anavajjena tuṭṭhassa, appena sulabhena ca;

    ན སེནཱསནམཱརབྦྷ, ཙཱིཝརཾ པཱནབྷོཛནཾ།

    Na senāsanamārabbha, cīvaraṃ pānabhojanaṃ;

    ཝིགྷཱཏོ ཧོཏི ཙིཏྟསྶ, དིསཱ ནཔྤཊིཧཉྙཏི༎

    Vighāto hoti cittassa, disā nappaṭihaññati.

    ‘‘ཡེ ཙསྶ 3 དྷམྨཱ ཨཀྑཱཏཱ, སཱམཉྙསྶཱནུལོམིཀཱ།

    ‘‘Ye cassa 4 dhammā akkhātā, sāmaññassānulomikā;

    ཨདྷིགྒཧིཏཱ ཏུཊྛསྶ, ཨཔྤམཏྟསྶ བྷིཀྑུནོ’’ཏི 5༎

    Adhiggahitā tuṭṭhassa, appamattassa bhikkhuno’’ti 6.

    ཨཡམྤི ཨཏྠོ ཝུཏྟོ བྷགཝཏཱ, ཨིཏི མེ སུཏནྟི། དུཏིཡཾ།

    Ayampi attho vutto bhagavatā, iti me sutanti. Dutiyaṃ.




    Next: ༣. ཨཱསཝཀྑཡསུཏྟཾ • 3. Āsavakkhayasuttaṃ




    Footnotes:
    1. (…) ནཏྠི སཱི॰ པཱི॰ ཀ॰ པོཏྠཀེསུ ཙ ཨངྒུཏྟརེ ཙ
    2. (…) natthi sī. pī. ka. potthakesu ca aṅguttare ca
    3. ཡེཔསྶ (སྱཱ॰)
    4. yepassa (syā.)
    5. སིཀྑཏོཏི (སཱི॰ ཀ॰)
    6. sikkhatoti (sī. ka.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā / ༢. སུལབྷསུཏྟཝཎྞནཱ • 2. Sulabhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact