Library / Tipiṭaka / തിപിടക • Tipiṭaka / ഇതിവുത്തകപാളി • Itivuttakapāḷi

    ൨. സുലഭസുത്തം

    2. Sulabhasuttaṃ

    ൧൦൧. വുത്തഞ്ഹേതം ഭഗവതാ, വുത്തമരഹതാതി മേ സുതം –

    101. Vuttañhetaṃ bhagavatā, vuttamarahatāti me sutaṃ –

    ‘‘ചത്താരിമാനി, ഭിക്ഖവേ, അപ്പാനി ചേവ സുലഭാനി ച, താനി ച അനവജ്ജാനി. കതമാനി ചത്താരി? പംസുകൂലം, ഭിക്ഖവേ, ചീവരാനം അപ്പഞ്ച സുലഭഞ്ച, തഞ്ച അനവജ്ജം. പിണ്ഡിയാലോപോ , ഭിക്ഖവേ, ഭോജനാനം അപ്പഞ്ച സുലഭഞ്ച, തഞ്ച അനവജ്ജം. രുക്ഖമൂലം, ഭിക്ഖവേ , സേനാസനാനം അപ്പഞ്ച സുലഭഞ്ച, തഞ്ച അനവജ്ജം. പൂതിമുത്തം, ഭിക്ഖവേ, ഭേസജ്ജാനം അപ്പഞ്ച സുലഭഞ്ച തഞ്ച അനവജ്ജം. ഇമാനി ഖോ, ഭിക്ഖവേ, ചത്താരി അപ്പാനി ചേവ സുലഭാനി ച, താനി ച അനവജ്ജാനി. യതോ ഖോ, ഭിക്ഖവേ, ഭിക്ഖു അപ്പേന ച തുട്ഠോ ഹോതി സുലഭേന ച (അനവജ്ജേന ച) 1, ഇമസ്സാഹം അഞ്ഞതരം സാമഞ്ഞങ്ഗന്തി വദാമീ’’തി. ഏതമത്ഥം ഭഗവാ അവോച. തത്ഥേതം ഇതി വുച്ചതി –

    ‘‘Cattārimāni, bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo , bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave , senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca (anavajjena ca) 2, imassāhaṃ aññataraṃ sāmaññaṅganti vadāmī’’ti. Etamatthaṃ bhagavā avoca. Tatthetaṃ iti vuccati –

    ‘‘അനവജ്ജേന തുട്ഠസ്സ, അപ്പേന സുലഭേന ച;

    ‘‘Anavajjena tuṭṭhassa, appena sulabhena ca;

    ന സേനാസനമാരബ്ഭ, ചീവരം പാനഭോജനം;

    Na senāsanamārabbha, cīvaraṃ pānabhojanaṃ;

    വിഘാതോ ഹോതി ചിത്തസ്സ, ദിസാ നപ്പടിഹഞ്ഞതി.

    Vighāto hoti cittassa, disā nappaṭihaññati.

    ‘‘യേ ചസ്സ 3 ധമ്മാ അക്ഖാതാ, സാമഞ്ഞസ്സാനുലോമികാ;

    ‘‘Ye cassa 4 dhammā akkhātā, sāmaññassānulomikā;

    അധിഗ്ഗഹിതാ തുട്ഠസ്സ, അപ്പമത്തസ്സ ഭിക്ഖുനോ’’തി 5.

    Adhiggahitā tuṭṭhassa, appamattassa bhikkhuno’’ti 6.

    അയമ്പി അത്ഥോ വുത്തോ ഭഗവതാ, ഇതി മേ സുതന്തി. ദുതിയം.

    Ayampi attho vutto bhagavatā, iti me sutanti. Dutiyaṃ.




    Next: ൩. ആസവക്ഖയസുത്തം • 3. Āsavakkhayasuttaṃ




    Footnotes:
    1. (…) നത്ഥി സീ॰ പീ॰ ക॰ പോത്ഥകേസു ച അങ്ഗുത്തരേ ച
    2. (…) natthi sī. pī. ka. potthakesu ca aṅguttare ca
    3. യേപസ്സ (സ്യാ॰)
    4. yepassa (syā.)
    5. സിക്ഖതോതി (സീ॰ ക॰)
    6. sikkhatoti (sī. ka.)



    Related texts:



    അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / ഇതിവുത്തക-അട്ഠകഥാ • Itivuttaka-aṭṭhakathā / ൨. സുലഭസുത്തവണ്ണനാ • 2. Sulabhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact