| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā |
༢. སུལབྷསུཏྟཝཎྞནཱ
2. Sulabhasuttavaṇṇanā
༡༠༡. དུཏིཡེ ཨཔྤཱནཱིཏི པརིཏྟཱནི། སུལབྷཱནཱིཏི སུཁེན ལདྡྷབྦཱནི, ཡཏྠ ཀཏྠཙི ཝཱ སཀྐཱ ཧོཏི ལདྡྷུཾ། ཨནཝཛྫཱནཱིཏི ཝཛྫརཧིཏཱནི ནིདྡོསཱནི ཨཱགམནསུདྡྷིཏོ ཀཱཡམཎྜནཱདིཀིལེསཝཏྠུབྷཱཝཱབྷཱཝཏོ ཙ། ཏཏྠ སུལབྷཏཱཡ པརིཡེསནདུཀྑསྶ ཨབྷཱཝོ དསྶིཏོ, ཨཔྤཏཱཡ པརིཧརཎདུཀྑསྶཔི ཨབྷཱཝོ དསྶིཏོ, ཨནཝཛྫཏཱཡ ཨགརཧིཏབྦཏཱཡ བྷིཀྑུསཱརུཔྤབྷཱཝོ དསྶིཏོ ཧོཏི། ཨཔྤཏཱཡ ཝཱ པརིཏྟཱསསྶ ཨཝཏྠུཏཱ, སུལབྷཏཱཡ གེདྷཱཡ ཨཝཏྠུཏཱ, ཨནཝཛྫཏཱཡ ཨཱདཱིནཝཝསེན ནིསྶརཎཔཉྙཱཡ ཝཏྠུཏཱ དསྶིཏཱ ཧོཏི། ཨཔྤཏཱཡ ཝཱ ལཱབྷེན ན སོམནསྶཾ ཛནཡནྟི, སུལབྷཏཱཡ ཨལཱབྷེན ན དོམནསྶཾ ཛནཡནྟི, ཨནཝཛྫཏཱཡ ཝིཔྤཊིསཱརནིམིཏྟཾ ཨཉྙཱཎུཔེཀྑཾ ན ཛནཡནྟི ཨཝིཔྤཊིསཱརཝཏྠུབྷཱཝཏོ།
101. Dutiye appānīti parittāni. Sulabhānīti sukhena laddhabbāni, yattha katthaci vā sakkā hoti laddhuṃ. Anavajjānīti vajjarahitāni niddosāni āgamanasuddhito kāyamaṇḍanādikilesavatthubhāvābhāvato ca. Tattha sulabhatāya pariyesanadukkhassa abhāvo dassito, appatāya pariharaṇadukkhassapi abhāvo dassito, anavajjatāya agarahitabbatāya bhikkhusāruppabhāvo dassito hoti. Appatāya vā parittāsassa avatthutā, sulabhatāya gedhāya avatthutā, anavajjatāya ādīnavavasena nissaraṇapaññāya vatthutā dassitā hoti. Appatāya vā lābhena na somanassaṃ janayanti, sulabhatāya alābhena na domanassaṃ janayanti, anavajjatāya vippaṭisāranimittaṃ aññāṇupekkhaṃ na janayanti avippaṭisāravatthubhāvato.
པཾསུཀཱུལནྟི རཐིཀཱསུསཱནསངྐཱརཀཱུཊཱདཱིསུ ཡཏྠ ཀཏྠཙི པཾསཱུནཾ ཨུཔརི ཋིཏཏྟཱ ཨབྦྷུགྒཏཊྛེན པཾསུཀཱུལཾ ཝིཡཱཏི པཾསུཀཱུལཾ, པཾསུ ཝིཡ ཀུཙྪིཏབྷཱཝཾ ཨུལཏི གཙྪཏཱིཏི པཾསུཀཱུལནྟི ཨེཝཾ ལདྡྷནཱམཾ རཐིཀཱདཱིསུ པཏིཏནནྟཀཱནི ཨུཙྩིནིཏྭཱ ཀཏཙཱིཝརཾ། པིཎྜིཡཱལོཔོཏི ཛངྒྷཔིཎྜིཡཱ བལེན ཙརིཏྭཱ གྷརེ གྷརེ ཨཱལོཔམཏྟཾ ཀཏྭཱ ལདྡྷབྷོཛནཾ། རུཀྑམཱུལནྟི ཝིཝེཀཱནུརཱུཔཾ ཡཾཀིཉྩི རུཀྑསམཱིཔཾ། པཱུཏིམུཏྟནྟི ཡཾཀིཉྩི གོམུཏྟཾ། ཡཐཱ ཧི སུཝཎྞཝཎྞོཔི ཀཱཡོ པཱུཏིཀཱཡོཝ ཨེཝཾ ཨབྷིནཝམྤི མུཏྟཾ པཱུཏིམུཏྟམེཝ། ཏཏྠ ཀེཙི གོམུཏྟབྷཱཝིཏཾ ཧརིཏཀཱིཁཎྜཾ ‘‘པཱུཏིམུཏྟ’’ནྟི ཝདནྟི, པཱུཏིབྷཱཝེན ཨཱཔཎཱདིཏོ ཝིསྶཊྛཾ ཚཌྜིཏཾ ཨཔརིགྒཧིཏཾ ཡཾཀིཉྩི བྷེསཛྫཾ པཱུཏིམུཏྟནྟི ཨདྷིཔྤེཏནྟི ཨཔརེ།
Paṃsukūlanti rathikāsusānasaṅkārakūṭādīsu yattha katthaci paṃsūnaṃ upari ṭhitattā abbhuggataṭṭhena paṃsukūlaṃ viyāti paṃsukūlaṃ, paṃsu viya kucchitabhāvaṃ ulati gacchatīti paṃsukūlanti evaṃ laddhanāmaṃ rathikādīsu patitanantakāni uccinitvā katacīvaraṃ. Piṇḍiyālopoti jaṅghapiṇḍiyā balena caritvā ghare ghare ālopamattaṃ katvā laddhabhojanaṃ. Rukkhamūlanti vivekānurūpaṃ yaṃkiñci rukkhasamīpaṃ. Pūtimuttanti yaṃkiñci gomuttaṃ. Yathā hi suvaṇṇavaṇṇopi kāyo pūtikāyova evaṃ abhinavampi muttaṃ pūtimuttameva. Tattha keci gomuttabhāvitaṃ haritakīkhaṇḍaṃ ‘‘pūtimutta’’nti vadanti, pūtibhāvena āpaṇādito vissaṭṭhaṃ chaḍḍitaṃ apariggahitaṃ yaṃkiñci bhesajjaṃ pūtimuttanti adhippetanti apare.
ཡཏོ ཁོཏི པཙྩཏྟེ ནིསྶཀྐཝཙནཾ, ཡཾ ཁོཏི ཝུཏྟཾ ཧོཏི། ཏེན ‘‘ཏུཊྛོ ཧོཏཱི’’ཏི ཝུཏྟཀིརིཡཾ པརཱམསཏི། ཏུཊྛོཏི སནྟུཊྛོ། ཨིདམསྶཱཧནྟི ཡྭཱཡཾ ཙཏུབྦིདྷེན ཡཐཱཝུཏྟེན པཙྩཡེན ཨཔྤེན སུལབྷེན སནྟོསོ, ཨིདཾ ཨིམསྶ བྷིཀྑུནོ སཱིལསཾཝརཱདཱིསུ ཨཉྙཏརཾ ཨེཀཾ སཱམཉྙངྒཾ སམཎབྷཱཝཀཱརཎནྟི ཨཧཾ ཝདཱམི། སནྟུཊྛསྶ ཧི ཙཏུཔཱརིསུདྡྷིསཱིལཾ སུཔརིཔུཎྞཾ ཧོཏི, སམཐཝིཔསྶནཱ ཙ བྷཱཝནཱཔཱརིཔཱུརིཾ གཙྪནྟི། ཨཐ ཝཱ སཱམཉྙཾ ནཱམ ཨརིཡམགྒོ། ཏསྶ སངྑེཔཏོ དྭེ ཨངྒཱནི – བཱཧིརཾ, ཨཛ྄ཛྷཏྟིཀནྟི། ཏཏྠ བཱཧིརཾ སཔྤུརིསཱུཔནིསྶཡོ སདྡྷམྨསྶཝནཉྩ, ཨཛ྄ཛྷཏྟིཀཾ པན ཡོནིསོ མནསིཀཱརོ དྷམྨཱནུདྷམྨཔཊིཔཏྟི ཙ། ཏེསུ ཡསྨཱ ཡཐཱརཧཾ དྷམྨཱནུདྷམྨཔཊིཔཏྟིབྷཱུཏཱ ཏསྶཱ མཱུལབྷཱུཏཱ ཙེཏེ དྷམྨཱ, ཡདིདཾ ཨཔྤིཙྪཏཱ སནྟུཊྛིཏཱ པཝིཝིཏྟཏཱ ཨསཾསཊྛཏཱ ཨཱརདྡྷཝཱིརིཡཏཱཏི ཨེཝམཱདཡོ, ཏསྨཱ ཝུཏྟཾ ‘‘ཨིདམསྶཱཧཾ ཨཉྙཏརཾ སཱམཉྙངྒནྟི ཝདཱམཱི’’ཏི།
Yato khoti paccatte nissakkavacanaṃ, yaṃ khoti vuttaṃ hoti. Tena ‘‘tuṭṭho hotī’’ti vuttakiriyaṃ parāmasati. Tuṭṭhoti santuṭṭho. Idamassāhanti yvāyaṃ catubbidhena yathāvuttena paccayena appena sulabhena santoso, idaṃ imassa bhikkhuno sīlasaṃvarādīsu aññataraṃ ekaṃ sāmaññaṅgaṃ samaṇabhāvakāraṇanti ahaṃ vadāmi. Santuṭṭhassa hi catupārisuddhisīlaṃ suparipuṇṇaṃ hoti, samathavipassanā ca bhāvanāpāripūriṃ gacchanti. Atha vā sāmaññaṃ nāma ariyamaggo. Tassa saṅkhepato dve aṅgāni – bāhiraṃ, ajjhattikanti. Tattha bāhiraṃ sappurisūpanissayo saddhammassavanañca, ajjhattikaṃ pana yoniso manasikāro dhammānudhammapaṭipatti ca. Tesu yasmā yathārahaṃ dhammānudhammapaṭipattibhūtā tassā mūlabhūtā cete dhammā, yadidaṃ appicchatā santuṭṭhitā pavivittatā asaṃsaṭṭhatā āraddhavīriyatāti evamādayo, tasmā vuttaṃ ‘‘idamassāhaṃ aññataraṃ sāmaññaṅganti vadāmī’’ti.
གཱཐཱསུ སེནཱསནམཱརབྦྷཱཏི ཝིཧཱརཱདིཾ མཉྩཔཱིཋཱདིཉྩ སེནཱསནཾ ནིསྶཱཡ། ཙཱིཝརཾ པཱནབྷོཛནནྟི ནིཝཱསནཱདིཙཱིཝརཾ, ཨམྦཔཱནཀཱདིཔཱནཾ, ཁཱདནཱིཡབྷོཛནཱིཡཱདིབྷུཉྫིཏབྦཝཏྠུཉྩ ཨཱརབྦྷཱཏི སམྦནྡྷོ། ཝིགྷཱཏོ ཝིཧཏབྷཱཝོ ཙེཏོདུཀྑཾ ན ཧོཏཱིཏི ཡོཛནཱ། ཨཡཉྷེཏྠ སངྑེཔཏྠོ – ‘‘ཨསུཀསྨིཾ ནཱམ ཨཱཝཱསེ པཙྩཡཱ སུལབྷཱ’’ཏི ལབྷིཏབྦཊྛཱནགམནེན ཝཱ ‘‘མཡ྄ཧཾ པཱཔུཎཱཏི ན ཏུཡ྄ཧ’’ནྟི ཝིཝཱདཱཔཛྫནེན ཝཱ ནཝཀམྨཀརཎཱདིཝསེན ཝཱ སེནཱསནཱདཱིནི པརིཡེསནྟཱནཾ ཨསནྟུཊྛཱནཾ ཨིཙྪིཏལཱབྷཱདིནཱ ཡོ ཝིགྷཱཏོ ཙིཏྟསྶ ཧོཏི, སོ ཏཏྠ སནྟུཊྛསྶ ན ཧོཏཱིཏི། དིསཱ ནཔྤཊིཧཉྙཏཱིཏི སནྟུཊྛིཡཱ ཙཱཏུདྡིསཱབྷཱཝེན དིསཱ ནཔྤཊིཧནྟི། ཝུཏྟཉྷེཏཾ –
Gāthāsu senāsanamārabbhāti vihārādiṃ mañcapīṭhādiñca senāsanaṃ nissāya. Cīvaraṃ pānabhojananti nivāsanādicīvaraṃ, ambapānakādipānaṃ, khādanīyabhojanīyādibhuñjitabbavatthuñca ārabbhāti sambandho. Vighāto vihatabhāvo cetodukkhaṃ na hotīti yojanā. Ayañhettha saṅkhepattho – ‘‘asukasmiṃ nāma āvāse paccayā sulabhā’’ti labhitabbaṭṭhānagamanena vā ‘‘mayhaṃ pāpuṇāti na tuyha’’nti vivādāpajjanena vā navakammakaraṇādivasena vā senāsanādīni pariyesantānaṃ asantuṭṭhānaṃ icchitalābhādinā yo vighāto cittassa hoti, so tattha santuṭṭhassa na hotīti. Disā nappaṭihaññatīti santuṭṭhiyā cātuddisābhāvena disā nappaṭihanti. Vuttañhetaṃ –
‘‘ཙཱཏུདྡིསོ ཨཔྤཊིགྷོ ཙ ཧོཏི,
‘‘Cātuddiso appaṭigho ca hoti,
སནྟུསྶམཱནོ ཨིཏརཱིཏརེནཱ’’ཏི༎ (སུ॰ ནི॰ ༤༢; ཙཱུལ༹ནི॰ ཁགྒཝིསཱཎསུཏྟནིདྡེས ༡༢༨)།
Santussamāno itarītarenā’’ti. (su. ni. 42; cūḷani. khaggavisāṇasuttaniddesa 128);
ཡསྶ ཧི ‘‘ཨསུཀཊྛཱནཾ ནཱམ གཏོ ཙཱིཝརཱདཱིནི ལབྷིསྶཱམཱི’’ཏི ཙིཏྟཾ ཨུཔྤཛྫཏི, ཏསྶ དིསཱ པཊིཧཉྙཏི ནཱམ། ཡསྶ པན ཨེཝཾ ན ཨུཔྤཛྫཏི, ཏསྶ དིསཱ ན པཊིཧཉྙཏི ནཱམ། དྷམྨཱཏི པཊིཔཏྟིདྷམྨཱ། སཱམཉྙསྶཱནུལོམིཀཱཏི སམཎདྷམྨསྶ སམཐཝིཔསྶནཱབྷཱཝནཱཡ ཨརིཡམགྒསྶེཝ ཝཱ ཨནུཙྪཝིཀཱ ཨཔྤིཙྪཏཱདཡོ། ཨདྷིགྒཧིཏཱཏི སབྦེ ཏེ ཏུཊྛཙིཏྟསྶ སནྟུཊྛཙིཏྟེན བྷིཀྑུནཱ ཨདྷིགྒཧིཏཱ པཊིཔཀྑདྷམྨེ ཨབྷིབྷཝིཏྭཱ གཧིཏཱ ཧོནྟི ཨབྦྷནྟརགཏཱ, ན བཱཧིརགཏཱཏི།
Yassa hi ‘‘asukaṭṭhānaṃ nāma gato cīvarādīni labhissāmī’’ti cittaṃ uppajjati, tassa disā paṭihaññati nāma. Yassa pana evaṃ na uppajjati, tassa disā na paṭihaññati nāma. Dhammāti paṭipattidhammā. Sāmaññassānulomikāti samaṇadhammassa samathavipassanābhāvanāya ariyamaggasseva vā anucchavikā appicchatādayo. Adhiggahitāti sabbe te tuṭṭhacittassa santuṭṭhacittena bhikkhunā adhiggahitā paṭipakkhadhamme abhibhavitvā gahitā honti abbhantaragatā, na bāhiragatāti.
དུཏིཡསུཏྟཝཎྞནཱ ནིཊྛིཏཱ།
Dutiyasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨིཏིཝུཏྟཀཔཱལི༹ • Itivuttakapāḷi / ༢. སུལབྷསུཏྟཾ • 2. Sulabhasuttaṃ
