| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៤. សុមនវគ្គោ
4. Sumanavaggo
១. សុមនសុត្តវណ្ណនា
1. Sumanasuttavaṇṇanā
៣១. ចតុត្ថស្ស បឋមេ សតក្កកូតិ សតសិខរោ, អនេកកូដោតិ អត្ថោ។ ឥទំ តស្ស មហាមេឃភាវទស្សនំ។ សោ ហិ មហាវស្សំ វស្សតិ។ តេនេវាហ – ‘‘ឥតោ ចិតោ ច ឧដ្ឋិតេន វលាហកកូដសតេន សមន្នាគតោតិ អត្ថោ’’តិ។ ទស្សនសម្បន្នោតិ ឯត្ថ ទស្សនំ នាម សោតាបត្តិមគ្គោ។ សោ ហិ បឋមំ និព្ពានទស្សនតោ ‘‘ទស្សន’’ន្តិ វុច្ចតិ។ យទិបិ តំ គោត្រភុ បឋមតរំ បស្សតិ, ទិស្វា បន កត្តព្ពកិច្ចស្ស កិលេសប្បហានស្ស អករណតោ ន តំ ‘‘ទស្សន’’ន្តិ វុច្ចតិ។ អាវជ្ជនដ្ឋានិយញ្ហិ តំ ញាណំ។ មគ្គស្ស និព្ពានារម្មណតាសាមញ្ញេន ចេតំ វុត្តំ, ន និព្ពានប្បដិវិជ្ឈនេន, តស្មា ធម្មចក្ខុំ បុនប្បុនំ និព្ពត្តនេន ភាវនំ អប្បត្តំ ទស្សនំ, ធម្មចក្ខុញ្ច បរិញ្ញាទិកិច្ចករណេន ចតុសច្ចធម្មទស្សនំ តទភិសមយោតិ នត្ថេត្ថ គោត្រភុស្ស ទស្សនភាវាបត្តិ។ សេសមេត្ថ សុវិញ្ញេយ្យមេវ។
31. Catutthassa paṭhame satakkakūti satasikharo, anekakūṭoti attho. Idaṃ tassa mahāmeghabhāvadassanaṃ. So hi mahāvassaṃ vassati. Tenevāha – ‘‘ito cito ca uṭṭhitena valāhakakūṭasatena samannāgatoti attho’’ti. Dassanasampannoti ettha dassanaṃ nāma sotāpattimaggo. So hi paṭhamaṃ nibbānadassanato ‘‘dassana’’nti vuccati. Yadipi taṃ gotrabhu paṭhamataraṃ passati, disvā pana kattabbakiccassa kilesappahānassa akaraṇato na taṃ ‘‘dassana’’nti vuccati. Āvajjanaṭṭhāniyañhi taṃ ñāṇaṃ. Maggassa nibbānārammaṇatāsāmaññena cetaṃ vuttaṃ, na nibbānappaṭivijjhanena, tasmā dhammacakkhuṃ punappunaṃ nibbattanena bhāvanaṃ appattaṃ dassanaṃ, dhammacakkhuñca pariññādikiccakaraṇena catusaccadhammadassanaṃ tadabhisamayoti natthettha gotrabhussa dassanabhāvāpatti. Sesamettha suviññeyyameva.
សុមនសុត្តវណ្ណនា និដ្ឋិតា។
Sumanasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១. សុមនសុត្តំ • 1. Sumanasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១. សុមនសុត្តវណ្ណនា • 1. Sumanasuttavaṇṇanā
