| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༤. སུམནཝགྒོ
4. Sumanavaggo
༡. སུམནསུཏྟཝཎྞནཱ
1. Sumanasuttavaṇṇanā
༣༡. ཙཏུཏྠསྶ པཋམེ སཏཀྐཀཱུཏི སཏསིཁརོ, ཨནེཀཀཱུཊོཏི ཨཏྠོ། ཨིདཾ ཏསྶ མཧཱམེགྷབྷཱཝདསྶནཾ། སོ ཧི མཧཱཝསྶཾ ཝསྶཏི། ཏེནེཝཱཧ – ‘‘ཨིཏོ ཙིཏོ ཙ ཨུཊྛིཏེན ཝལཱཧཀཀཱུཊསཏེན སམནྣཱགཏོཏི ཨཏྠོ’’ཏི། དསྶནསམྤནྣོཏི ཨེཏྠ དསྶནཾ ནཱམ སོཏཱཔཏྟིམགྒོ། སོ ཧི པཋམཾ ནིབྦཱནདསྶནཏོ ‘‘དསྶན’’ནྟི ཝུཙྩཏི། ཡདིཔི ཏཾ གོཏྲབྷུ པཋམཏརཾ པསྶཏི, དིསྭཱ པན ཀཏྟབྦཀིཙྩསྶ ཀིལེསཔྤཧཱནསྶ ཨཀརཎཏོ ན ཏཾ ‘‘དསྶན’’ནྟི ཝུཙྩཏི། ཨཱཝཛྫནཊྛཱནིཡཉྷི ཏཾ ཉཱཎཾ། མགྒསྶ ནིབྦཱནཱརམྨཎཏཱསཱམཉྙེན ཙེཏཾ ཝུཏྟཾ, ན ནིབྦཱནཔྤཊིཝིཛ྄ཛྷནེན, ཏསྨཱ དྷམྨཙཀྑུཾ པུནཔྤུནཾ ནིབྦཏྟནེན བྷཱཝནཾ ཨཔྤཏྟཾ དསྶནཾ, དྷམྨཙཀྑུཉྩ པརིཉྙཱདིཀིཙྩཀརཎེན ཙཏུསཙྩདྷམྨདསྶནཾ ཏདབྷིསམཡོཏི ནཏྠེཏྠ གོཏྲབྷུསྶ དསྶནབྷཱཝཱཔཏྟི། སེསམེཏྠ སུཝིཉྙེཡྻམེཝ།
31. Catutthassa paṭhame satakkakūti satasikharo, anekakūṭoti attho. Idaṃ tassa mahāmeghabhāvadassanaṃ. So hi mahāvassaṃ vassati. Tenevāha – ‘‘ito cito ca uṭṭhitena valāhakakūṭasatena samannāgatoti attho’’ti. Dassanasampannoti ettha dassanaṃ nāma sotāpattimaggo. So hi paṭhamaṃ nibbānadassanato ‘‘dassana’’nti vuccati. Yadipi taṃ gotrabhu paṭhamataraṃ passati, disvā pana kattabbakiccassa kilesappahānassa akaraṇato na taṃ ‘‘dassana’’nti vuccati. Āvajjanaṭṭhāniyañhi taṃ ñāṇaṃ. Maggassa nibbānārammaṇatāsāmaññena cetaṃ vuttaṃ, na nibbānappaṭivijjhanena, tasmā dhammacakkhuṃ punappunaṃ nibbattanena bhāvanaṃ appattaṃ dassanaṃ, dhammacakkhuñca pariññādikiccakaraṇena catusaccadhammadassanaṃ tadabhisamayoti natthettha gotrabhussa dassanabhāvāpatti. Sesamettha suviññeyyameva.
སུམནསུཏྟཝཎྞནཱ ནིཊྛིཏཱ།
Sumanasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. སུམནསུཏྟཾ • 1. Sumanasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. སུམནསུཏྟཝཎྞནཱ • 1. Sumanasuttavaṇṇanā
