| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. ஸுமனத்தே²ரஅபதா³னவண்ணனா
9. Sumanattheraapadānavaṇṇanā
ஸுமனோ நாம நாமேனாதிஆதி³கங் ஆயஸ்மதோ ஸுமனத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸிகி²ஸ்ஸ ப⁴க³வதோ காலே மாலாகாரஸ்ஸ குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஜாதோ ப⁴க³வதி பஸன்னமானஸோ ஸுமனமாலாமுட்டி²யோ க³ஹெத்வா உபோ⁴ஹி ஹத்தே²ஹி பூஜேஸி. ஸோ தேன புஞ்ஞேன தே³வமனுஸ்ஸேஸு த்³வே ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய புத்ததா³ரேஹி வட்³டி⁴த்வா ஸுமனநாமேன பாகடோ ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Sumanonāma nāmenātiādikaṃ āyasmato sumanattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle mālākārassa kulagehe nibbatto vuddhimanvāya saddhājāto bhagavati pasannamānaso sumanamālāmuṭṭhiyo gahetvā ubhohi hatthehi pūjesi. So tena puññena devamanussesu dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā sumananāmena pākaṭo satthari pasīditvā pabbajito nacirasseva arahā ahosi.
62. ஸோ அரஹா ஹுத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ அத்தனோ புப்³ப³சரிதாபதா³னங் பகாஸெந்தோ ஸுமனோ நாம நாமேனாதிஆதி³மாஹ. ஸுந்த³ரங் மனங் சித்தங் யஸ்ஸ ஸோ ஸுமனோ. ஸத்³தா⁴பஸாத³ப³ஹுமானேன யுத்தோ நாமேன ஸுமனோ நாம மாலாகாரோ ததா³ அஹங் அஹோஸிங்.
62. So arahā hutvā attano pubbakammaṃ saritvā somanassajāto attano pubbacaritāpadānaṃ pakāsento sumano nāma nāmenātiādimāha. Sundaraṃ manaṃ cittaṃ yassa so sumano. Saddhāpasādabahumānena yutto nāmena sumano nāma mālākāro tadā ahaṃ ahosiṃ.
63. ஸிகி²னோ லோகப³ந்து⁴னோதி ஸிகா² முத்³தா⁴ காஸதீதி ஸிகீ². அத² வா ஸம்பயுத்தஸம்பயோகே³ கா²த³தி வித்³த⁴ங்ஸேதீதி ஸிகீ², கா ஸா? அக்³கி³ஸிகா², அக்³கி³ஸிகா² விய ஸிகா²ய தி³ப்பனதோ ஸிகீ². யதா² அக்³கி³ஸிகா² ஜோததி பாகடா ஹோதி, ஸிகீ² பத்ததிணகட்ட²பலாஸாதி³கே த³ஹதி, ஏவமயம்பி ப⁴க³வா நீலபீதாதி³ரங்ஸீஹி ஜோததி ஸகலலோகஸன்னிவாஸே பாகடோ ஹோதி. ஸகஸந்தானக³தஸப்³ப³கிலேஸே ஸோஸேதி வித்³த⁴ங்ஸேதி ஜா²பேதீதி வோஹாரனாமங் நாமகம்மங் நாமதெ⁴ய்யங், தஸ்ஸ ஸிகி²னோ. ஸகலலோகஸ்ஸ ப³ந்து⁴ஞாதகோதி லோகப³ந்து⁴, தஸ்ஸ ஸிகி²னோ லோகப³ந்து⁴னோ ப⁴க³வதோ ஸுமனபுப்ப²ங் அபி⁴ரோபயிங் பூஜேஸிந்தி அத்தோ².
63.Sikhino lokabandhunoti sikhā muddhā kāsatīti sikhī. Atha vā sampayuttasampayoge khādati viddhaṃsetīti sikhī, kā sā? Aggisikhā, aggisikhā viya sikhāya dippanato sikhī. Yathā aggisikhā jotati pākaṭā hoti, sikhī pattatiṇakaṭṭhapalāsādike dahati, evamayampi bhagavā nīlapītādiraṃsīhi jotati sakalalokasannivāse pākaṭo hoti. Sakasantānagatasabbakilese soseti viddhaṃseti jhāpetīti vohāranāmaṃ nāmakammaṃ nāmadheyyaṃ, tassa sikhino. Sakalalokassa bandhuñātakoti lokabandhu, tassa sikhino lokabandhuno bhagavato sumanapupphaṃ abhiropayiṃ pūjesinti attho.
ஸுமனத்தே²ரஅபதா³னவண்ணனா ஸமத்தா.
Sumanattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. ஸுமனத்தே²ரஅபதா³னங் • 9. Sumanattheraapadānaṃ
