| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৯. সুমনত্থেরঅপদানৰণ্ণনা
9. Sumanattheraapadānavaṇṇanā
সুমনো নাম নামেনাতিআদিকং আযস্মতো সুমনত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে মালাকারস্স কুলগেহে নিব্বত্তো ৰুদ্ধিমন্ৰায সদ্ধাজাতো ভগৰতি পসন্নমানসো সুমনমালামুট্ঠিযো গহেত্ৰা উভোহি হত্থেহি পূজেসি। সো তেন পুঞ্ঞেন দেৰমনুস্সেসু দ্ৰে সম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায পুত্তদারেহি ৰড্ঢিত্ৰা সুমননামেন পাকটো সত্থরি পসীদিত্ৰা পব্বজিতো নচিরস্সেৰ অরহা অহোসি।
Sumanonāma nāmenātiādikaṃ āyasmato sumanattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle mālākārassa kulagehe nibbatto vuddhimanvāya saddhājāto bhagavati pasannamānaso sumanamālāmuṭṭhiyo gahetvā ubhohi hatthehi pūjesi. So tena puññena devamanussesu dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā sumananāmena pākaṭo satthari pasīditvā pabbajito nacirasseva arahā ahosi.
৬২. সো অরহা হুত্ৰা অত্তনো পুব্বকম্মং সরিত্ৰা সোমনস্সজাতো অত্তনো পুব্বচরিতাপদানং পকাসেন্তো সুমনো নাম নামেনাতিআদিমাহ। সুন্দরং মনং চিত্তং যস্স সো সুমনো। সদ্ধাপসাদবহুমানেন যুত্তো নামেন সুমনো নাম মালাকারো তদা অহং অহোসিং।
62. So arahā hutvā attano pubbakammaṃ saritvā somanassajāto attano pubbacaritāpadānaṃ pakāsento sumano nāma nāmenātiādimāha. Sundaraṃ manaṃ cittaṃ yassa so sumano. Saddhāpasādabahumānena yutto nāmena sumano nāma mālākāro tadā ahaṃ ahosiṃ.
৬৩. সিখিনো লোকবন্ধুনোতি সিখা মুদ্ধা কাসতীতি সিখী। অথ ৰা সম্পযুত্তসম্পযোগে খাদতি ৰিদ্ধংসেতীতি সিখী, কা সা? অগ্গিসিখা, অগ্গিসিখা ৰিয সিখায দিপ্পনতো সিখী। যথা অগ্গিসিখা জোততি পাকটা হোতি, সিখী পত্ততিণকট্ঠপলাসাদিকে দহতি, এৰমযম্পি ভগৰা নীলপীতাদিরংসীহি জোততি সকললোকসন্নিৰাসে পাকটো হোতি। সকসন্তানগতসব্বকিলেসে সোসেতি ৰিদ্ধংসেতি ঝাপেতীতি ৰোহারনামং নামকম্মং নামধেয্যং, তস্স সিখিনো। সকললোকস্স বন্ধুঞাতকোতি লোকবন্ধু, তস্স সিখিনো লোকবন্ধুনো ভগৰতো সুমনপুপ্ফং অভিরোপযিং পূজেসিন্তি অত্থো।
63.Sikhino lokabandhunoti sikhā muddhā kāsatīti sikhī. Atha vā sampayuttasampayoge khādati viddhaṃsetīti sikhī, kā sā? Aggisikhā, aggisikhā viya sikhāya dippanato sikhī. Yathā aggisikhā jotati pākaṭā hoti, sikhī pattatiṇakaṭṭhapalāsādike dahati, evamayampi bhagavā nīlapītādiraṃsīhi jotati sakalalokasannivāse pākaṭo hoti. Sakasantānagatasabbakilese soseti viddhaṃseti jhāpetīti vohāranāmaṃ nāmakammaṃ nāmadheyyaṃ, tassa sikhino. Sakalalokassa bandhuñātakoti lokabandhu, tassa sikhino lokabandhuno bhagavato sumanapupphaṃ abhiropayiṃ pūjesinti attho.
সুমনত্থেরঅপদানৰণ্ণনা সমত্তা।
Sumanattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৯. সুমনত্থেরঅপদানং • 9. Sumanattheraapadānaṃ
