| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၉. သုမနတ္ထေရအပဒာနဝဏ္ဏနာ
9. Sumanattheraapadānavaṇṇanā
သုမနော နာမ နာမေနာတိအာဒိကံ အာယသ္မတော သုမနတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော သိခိသ္သ ဘဂဝတော ကာလေ မာလာကာရသ္သ ကုလဂေဟေ နိဗ္ဗတ္တော ဝုဒ္ဓိမန္ဝာယ သဒ္ဓာဇာတော ဘဂဝတိ ပသန္နမာနသော သုမနမာလာမုဋ္ဌိယော ဂဟေတ္ဝာ ဥဘောဟိ ဟတ္ထေဟိ ပူဇေသိ။ သော တေန ပုညေန ဒေဝမနုသ္သေသု ဒ္ဝေ သမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဧကသ္မိံ ကုလဂေဟေ နိဗ္ဗတ္တော ဝုဒ္ဓိမန္ဝာယ ပုတ္တဒာရေဟိ ဝဍ္ဎိတ္ဝာ သုမနနာမေန ပာကဋော သတ္ထရိ ပသီဒိတ္ဝာ ပဗ္ဗဇိတော နစိရသ္သေဝ အရဟာ အဟောသိ။
Sumanonāma nāmenātiādikaṃ āyasmato sumanattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle mālākārassa kulagehe nibbatto vuddhimanvāya saddhājāto bhagavati pasannamānaso sumanamālāmuṭṭhiyo gahetvā ubhohi hatthehi pūjesi. So tena puññena devamanussesu dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā sumananāmena pākaṭo satthari pasīditvā pabbajito nacirasseva arahā ahosi.
၆၂. သော အရဟာ ဟုတ္ဝာ အတ္တနော ပုဗ္ဗကမ္မံ သရိတ္ဝာ သောမနသ္သဇာတော အတ္တနော ပုဗ္ဗစရိတာပဒာနံ ပကာသေန္တော သုမနော နာမ နာမေနာတိအာဒိမာဟ။ သုန္ဒရံ မနံ စိတ္တံ ယသ္သ သော သုမနော။ သဒ္ဓာပသာဒဗဟုမာနေန ယုတ္တော နာမေန သုမနော နာမ မာလာကာရော တဒာ အဟံ အဟောသိံ။
62. So arahā hutvā attano pubbakammaṃ saritvā somanassajāto attano pubbacaritāpadānaṃ pakāsento sumano nāma nāmenātiādimāha. Sundaraṃ manaṃ cittaṃ yassa so sumano. Saddhāpasādabahumānena yutto nāmena sumano nāma mālākāro tadā ahaṃ ahosiṃ.
၆၃. သိခိနော လောကဗန္ဓုနောတိ သိခာ မုဒ္ဓာ ကာသတီတိ သိခီ။ အထ ဝာ သမ္ပယုတ္တသမ္ပယောဂေ ခာဒတိ ဝိဒ္ဓံသေတီတိ သိခီ, ကာ သာ? အဂ္ဂိသိခာ, အဂ္ဂိသိခာ ဝိယ သိခာယ ဒိပ္ပနတော သိခီ။ ယထာ အဂ္ဂိသိခာ ဇောတတိ ပာကဋာ ဟောတိ, သိခီ ပတ္တတိဏကဋ္ဌပလာသာဒိကေ ဒဟတိ, ဧဝမယမ္ပိ ဘဂဝာ နီလပီတာဒိရံသီဟိ ဇောတတိ သကလလောကသန္နိဝာသေ ပာကဋော ဟောတိ။ သကသန္တာနဂတသဗ္ဗကိလေသေ သောသေတိ ဝိဒ္ဓံသေတိ ဈာပေတီတိ ဝောဟာရနာမံ နာမကမ္မံ နာမဓေယ္ယံ, တသ္သ သိခိနော။ သကလလောကသ္သ ဗန္ဓုဉာတကောတိ လောကဗန္ဓု, တသ္သ သိခိနော လောကဗန္ဓုနော ဘဂဝတော သုမနပုပ္ဖံ အဘိရောပယိံ ပူဇေသိန္တိ အတ္ထော။
63.Sikhino lokabandhunoti sikhā muddhā kāsatīti sikhī. Atha vā sampayuttasampayoge khādati viddhaṃsetīti sikhī, kā sā? Aggisikhā, aggisikhā viya sikhāya dippanato sikhī. Yathā aggisikhā jotati pākaṭā hoti, sikhī pattatiṇakaṭṭhapalāsādike dahati, evamayampi bhagavā nīlapītādiraṃsīhi jotati sakalalokasannivāse pākaṭo hoti. Sakasantānagatasabbakilese soseti viddhaṃseti jhāpetīti vohāranāmaṃ nāmakammaṃ nāmadheyyaṃ, tassa sikhino. Sakalalokassa bandhuñātakoti lokabandhu, tassa sikhino lokabandhuno bhagavato sumanapupphaṃ abhiropayiṃ pūjesinti attho.
သုမနတ္ထေရအပဒာနဝဏ္ဏနာ သမတ္တာ။
Sumanattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၉. သုမနတ္ထေရအပဒာနံ • 9. Sumanattheraapadānaṃ
