| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. සුමනත්‌ථෙරඅපදානවණ්‌ණනා
9. Sumanattheraapadānavaṇṇanā
සුමනො නාම නාමෙනාතිආදිකං ආයස්‌මතො සුමනත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සිඛිස්‌ස භගවතො කාලෙ මාලාකාරස්‌ස කුලගෙහෙ නිබ්‌බත්‌තො වුද්‌ධිමන්‌වාය සද්‌ධාජාතො භගවති පසන්‌නමානසො සුමනමාලාමුට්‌ඨියො ගහෙත්‌වා උභොහි හත්‌ථෙහි පූජෙසි. සො තෙන පුඤ්‌ඤෙන දෙවමනුස්‌සෙසු ද්‌වෙ සම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය පුත්‌තදාරෙහි වඩ්‌ඪිත්‌වා සුමනනාමෙන පාකටො සත්‌ථරි පසීදිත්‌වා පබ්‌බජිතො නචිරස්‌සෙව අරහා අහොසි.
Sumanonāma nāmenātiādikaṃ āyasmato sumanattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle mālākārassa kulagehe nibbatto vuddhimanvāya saddhājāto bhagavati pasannamānaso sumanamālāmuṭṭhiyo gahetvā ubhohi hatthehi pūjesi. So tena puññena devamanussesu dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā sumananāmena pākaṭo satthari pasīditvā pabbajito nacirasseva arahā ahosi.
62. සො අරහා හුත්‌වා අත්‌තනො පුබ්‌බකම්‌මං සරිත්‌වා සොමනස්‌සජාතො අත්‌තනො පුබ්‌බචරිතාපදානං පකාසෙන්‌තො සුමනො නාම නාමෙනාතිආදිමාහ. සුන්‌දරං මනං චිත්‌තං යස්‌ස සො සුමනො. සද්‌ධාපසාදබහුමානෙන යුත්‌තො නාමෙන සුමනො නාම මාලාකාරො තදා අහං අහොසිං.
62. So arahā hutvā attano pubbakammaṃ saritvā somanassajāto attano pubbacaritāpadānaṃ pakāsento sumano nāma nāmenātiādimāha. Sundaraṃ manaṃ cittaṃ yassa so sumano. Saddhāpasādabahumānena yutto nāmena sumano nāma mālākāro tadā ahaṃ ahosiṃ.
63. සිඛිනො ලොකබන්‌ධුනොති සිඛා මුද්‌ධා කාසතීති සිඛී. අථ වා සම්‌පයුත්‌තසම්‌පයොගෙ ඛාදති විද්‌ධංසෙතීති සිඛී, කා සා? අග්‌ගිසිඛා, අග්‌ගිසිඛා විය සිඛාය දිප්‌පනතො සිඛී. යථා අග්‌ගිසිඛා ජොතති පාකටා හොති, සිඛී පත්‌තතිණකට්‌ඨපලාසාදිකෙ දහති, එවමයම්‌පි භගවා නීලපීතාදිරංසීහි ජොතති සකලලොකසන්‌නිවාසෙ පාකටො හොති. සකසන්‌තානගතසබ්‌බකිලෙසෙ සොසෙති විද්‌ධංසෙති ඣාපෙතීති වොහාරනාමං නාමකම්‌මං නාමධෙය්‍යං, තස්‌ස සිඛිනො. සකලලොකස්‌ස බන්‌ධුඤාතකොති ලොකබන්‌ධු, තස්‌ස සිඛිනො ලොකබන්‌ධුනො භගවතො සුමනපුප්‌ඵං අභිරොපයිං පූජෙසින්‌ති අත්‌ථො.
63.Sikhino lokabandhunoti sikhā muddhā kāsatīti sikhī. Atha vā sampayuttasampayoge khādati viddhaṃsetīti sikhī, kā sā? Aggisikhā, aggisikhā viya sikhāya dippanato sikhī. Yathā aggisikhā jotati pākaṭā hoti, sikhī pattatiṇakaṭṭhapalāsādike dahati, evamayampi bhagavā nīlapītādiraṃsīhi jotati sakalalokasannivāse pākaṭo hoti. Sakasantānagatasabbakilese soseti viddhaṃseti jhāpetīti vohāranāmaṃ nāmakammaṃ nāmadheyyaṃ, tassa sikhino. Sakalalokassa bandhuñātakoti lokabandhu, tassa sikhino lokabandhuno bhagavato sumanapupphaṃ abhiropayiṃ pūjesinti attho.
සුමනත්‌ථෙරඅපදානවණ්‌ණනා සමත්‌තා.
Sumanattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. සුමනත්‌ථෙරඅපදානං • 9. Sumanattheraapadānaṃ
