| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤២០. សុមង្គលជាតកំ (៤)
420. Sumaṅgalajātakaṃ (4)
២៧.
27.
ភុសម្ហិ 1 កុទ្ធោតិ អវេក្ខិយាន, ន តាវ ទណ្ឌំ បណយេយ្យ ឥស្សរោ;
Bhusamhi 2 kuddhoti avekkhiyāna, na tāva daṇḍaṃ paṇayeyya issaro;
អដ្ឋានសោ អប្បតិរូបមត្តនោ, បរស្ស ទុក្ខានិ ភុសំ ឧទីរយេ។
Aṭṭhānaso appatirūpamattano, parassa dukkhāni bhusaṃ udīraye.
២៨.
28.
យតោ ច ជានេយ្យ បសាទមត្តនោ, អត្ថំ និយុញ្ជេយ្យ បរស្ស ទុក្កដំ;
Yato ca jāneyya pasādamattano, atthaṃ niyuñjeyya parassa dukkaṭaṃ;
តទាយមត្ថោតិ សយំ អវេក្ខិយ, អថស្ស ទណ្ឌំ សទិសំ និវេសយេ។
Tadāyamatthoti sayaṃ avekkhiya, athassa daṇḍaṃ sadisaṃ nivesaye.
២៩.
29.
ន ចាបិ ឈាបេតិ បរំ ន អត្តនំ, អមុច្ឆិតោ យោ នយតេ នយានយំ;
Na cāpi jhāpeti paraṃ na attanaṃ, amucchito yo nayate nayānayaṃ;
យោ ទណ្ឌធារោ ភវតីធ ឥស្សរោ, ស វណ្ណគុត្តោ សិរិយា ន ធំសតិ។
Yo daṇḍadhāro bhavatīdha issaro, sa vaṇṇagutto siriyā na dhaṃsati.
៣០.
30.
យេ ខត្តិយា សេ អនិសម្មការិនោ, បណេន្តិ ទណ្ឌំ សហសា បមុច្ឆិតា;
Ye khattiyā se anisammakārino, paṇenti daṇḍaṃ sahasā pamucchitā;
អវណ្ណសំយុតា 3 ជហន្តិ ជីវិតំ, ឥតោ វិមុត្តាបិ ច យន្តិ ទុគ្គតិំ។
Avaṇṇasaṃyutā 4 jahanti jīvitaṃ, ito vimuttāpi ca yanti duggatiṃ.
៣១.
31.
ធម្មេ ច យេ អរិយប្បវេទិតេ រតា, អនុត្តរា តេ វចសា មនសា កម្មុនា ច;
Dhamme ca ye ariyappavedite ratā, anuttarā te vacasā manasā kammunā ca;
តេ សន្តិសោរច្ចសមាធិសណ្ឋិតា, វជន្តិ លោកំ ទុភយំ តថាវិធា។
Te santisoraccasamādhisaṇṭhitā, vajanti lokaṃ dubhayaṃ tathāvidhā.
៣២.
32.
រាជាហមស្មិ នរបមទានមិស្សរោ, សចេបិ កុជ្ឈាមិ ឋបេមិ អត្តនំ;
Rājāhamasmi narapamadānamissaro, sacepi kujjhāmi ṭhapemi attanaṃ;
និសេធយន្តោ ជនតំ តថាវិធំ, បណេមិ ទណ្ឌំ អនុកម្ប យោនិសោ។
Nisedhayanto janataṃ tathāvidhaṃ, paṇemi daṇḍaṃ anukampa yoniso.
៣៣.
33.
សិរី ច លក្ខី ច តវេវ ខត្តិយ, ជនាធិប មា វិជហិ កុទាចនំ;
Sirī ca lakkhī ca taveva khattiya, janādhipa mā vijahi kudācanaṃ;
អក្កោធនោ និច្ចបសន្នចិត្តោ, អនីឃោ តុវំ វស្សសតានិ បាលយ។
Akkodhano niccapasannacitto, anīgho tuvaṃ vassasatāni pālaya.
៣៤.
34.
គុណេហិ ឯតេហិ ឧបេត ខត្តិយ, ឋិតមរិយវត្តី 5 សុវចោ អកោធនោ;
Guṇehi etehi upeta khattiya, ṭhitamariyavattī 6 suvaco akodhano;
សុខី អនុប្បីឡ បសាសមេទិនិំ 7, ឥតោ វិមុត្តោបិ ច យាហិ សុគ្គតិំ។
Sukhī anuppīḷa pasāsamediniṃ 8, ito vimuttopi ca yāhi suggatiṃ.
៣៥.
35.
ឯវំ សុនីតេន 9 សុភាសិតេន, ធម្មេន ញាយេន ឧបាយសោ នយំ;
Evaṃ sunītena 10 subhāsitena, dhammena ñāyena upāyaso nayaṃ;
និព្ពាបយេ សង្ខុភិតំ មហាជនំ, មហាវ មេឃោ សលិលេន មេទិនិន្តិ 11។
Nibbāpaye saṅkhubhitaṃ mahājanaṃ, mahāva megho salilena medininti 12.
សុមង្គលជាតកំ ចតុត្ថំ។
Sumaṅgalajātakaṃ catutthaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤២០] ៤. សុមង្គលជាតកវណ្ណនា • [420] 4. Sumaṅgalajātakavaṇṇanā
