| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๑๐. สุมงฺคลเตฺถรอปทานํ
10. Sumaṅgalattheraapadānaṃ
๑๒๔.
124.
‘‘อาหุติํ ยิฎฺฐุกาโมหํ, ปฎิยาเทตฺวาน โภชนํ;
‘‘Āhutiṃ yiṭṭhukāmohaṃ, paṭiyādetvāna bhojanaṃ;
พฺราหฺมเณ ปฎิมาเนโนฺต, วิสาเล มาฬเก ฐิโตฯ
Brāhmaṇe paṭimānento, visāle māḷake ṭhito.
๑๒๕.
125.
‘‘อถทฺทสาสิํ สมฺพุทฺธํ, ปิยทสฺสิํ มหายสํ;
‘‘Athaddasāsiṃ sambuddhaṃ, piyadassiṃ mahāyasaṃ;
สพฺพโลกวิเนตารํ, สยมฺภุํ อคฺคปุคฺคลํฯ
Sabbalokavinetāraṃ, sayambhuṃ aggapuggalaṃ.
๑๒๖.
126.
‘‘ภควนฺตํ ชุติมนฺตํ, สาวเกหิ ปุรกฺขตํ;
‘‘Bhagavantaṃ jutimantaṃ, sāvakehi purakkhataṃ;
อาทิจฺจมิว โรจนฺตํ, รถิยํ ปฎิปนฺนกํฯ
Ādiccamiva rocantaṃ, rathiyaṃ paṭipannakaṃ.
๑๒๗.
127.
‘‘อญฺชลิํ ปคฺคเหตฺวาน, สกํ จิตฺตํ ปสาทยิํ;
‘‘Añjaliṃ paggahetvāna, sakaṃ cittaṃ pasādayiṃ;
มนสาว นิมเนฺตสิํ, ‘อาคจฺฉตุ มหามุนิ’ฯ
Manasāva nimantesiṃ, ‘āgacchatu mahāmuni’.
๑๒๘.
128.
‘‘มม สงฺกปฺปมญฺญาย, สตฺถา โลเก อนุตฺตโร;
‘‘Mama saṅkappamaññāya, satthā loke anuttaro;
ขีณาสวสหเสฺสหิ, มม ทฺวารํ อุปาคมิฯ
Khīṇāsavasahassehi, mama dvāraṃ upāgami.
๑๒๙.
129.
‘‘นโม เต ปุริสาชญฺญ, นโม เต ปุริสุตฺตม;
‘‘Namo te purisājañña, namo te purisuttama;
๑๓๐.
130.
‘‘ทโนฺต ทนฺตปริวาโร, ติโณฺณ ตารยตํ วโร;
‘‘Danto dantaparivāro, tiṇṇo tārayataṃ varo;
ปาสาทํ อภิรูหิตฺวา, นิสีทิ ปวราสเนฯ
Pāsādaṃ abhirūhitvā, nisīdi pavarāsane.
๑๓๑.
131.
‘‘ยํ เม อตฺถิ สเก เคเห, อามิสํ ปจฺจุปฎฺฐิตํ;
‘‘Yaṃ me atthi sake gehe, āmisaṃ paccupaṭṭhitaṃ;
ตาหํ พุทฺธสฺส ปาทาสิํ, ปสโนฺน เสหิ ปาณิภิฯ
Tāhaṃ buddhassa pādāsiṃ, pasanno sehi pāṇibhi.
๑๓๒.
132.
‘‘ปสนฺนจิโตฺต สุมโน, เวทชาโต กตญฺชลี;
‘‘Pasannacitto sumano, vedajāto katañjalī;
พุทฺธเสฎฺฐํ นมสฺสามิ, อโห พุทฺธสฺสุฬารตาฯ
Buddhaseṭṭhaṃ namassāmi, aho buddhassuḷāratā.
๑๓๓.
133.
‘‘อฎฺฐนฺนํ ปยิรูปาสตํ, ภุญฺชํ ขีณาสวา พหู;
‘‘Aṭṭhannaṃ payirūpāsataṃ, bhuñjaṃ khīṇāsavā bahū;
ตุเยฺหเวโส อานุภาโว, สรณํ ตํ อุเปมหํฯ
Tuyheveso ānubhāvo, saraṇaṃ taṃ upemahaṃ.
๑๓๔.
134.
‘‘ปิยทสฺสี จ ภควา, โลกเชโฎฺฐ นราสโภ;
‘‘Piyadassī ca bhagavā, lokajeṭṭho narāsabho;
ภิกฺขุสเงฺฆ นิสีทิตฺวา, อิมา คาถา อภาสถฯ
Bhikkhusaṅghe nisīditvā, imā gāthā abhāsatha.
๑๓๕.
135.
‘‘‘โย โส สงฺฆํ อโภเชสิ, อุชุภูตํ สมาหิตํ;
‘‘‘Yo so saṅghaṃ abhojesi, ujubhūtaṃ samāhitaṃ;
ตถาคตญฺจ สมฺพุทฺธํ, สุณาถ มม ภาสโตฯ
Tathāgatañca sambuddhaṃ, suṇātha mama bhāsato.
๑๓๖.
136.
‘‘‘สตฺตวีสติกฺขตฺตุํ โส, เทวรชฺชํ กริสฺสติ;
‘‘‘Sattavīsatikkhattuṃ so, devarajjaṃ karissati;
สกกมฺมาภิรโทฺธ โส, เทวโลเก รมิสฺสติฯ
Sakakammābhiraddho so, devaloke ramissati.
๑๓๗.
137.
‘‘‘ทส อฎฺฐ จกฺขตฺตุํ 3 โส, จกฺกวตฺตี ภวิสฺสติ;
‘‘‘Dasa aṭṭha cakkhattuṃ 4 so, cakkavattī bhavissati;
ปถพฺยา รชฺชํ ปญฺจสตํ, วสุธํ อาวสิสฺสติ’ฯ
Pathabyā rajjaṃ pañcasataṃ, vasudhaṃ āvasissati’.
๑๓๘.
138.
‘‘อรญฺญวนโมคฺคยฺห, กานนํ พฺยคฺฆเสวิตํ;
‘‘Araññavanamoggayha, kānanaṃ byagghasevitaṃ;
ปธานํ ปทหิตฺวาน, กิเลสา ฌาปิตา มยาฯ
Padhānaṃ padahitvāna, kilesā jhāpitā mayā.
๑๓๙.
139.
‘‘อฎฺฐารเส กปฺปสเต, ยํ ทานมททิํ ตทา;
‘‘Aṭṭhārase kappasate, yaṃ dānamadadiṃ tadā;
ทุคฺคติํ นาภิชานามิ, ภตฺตทานสฺสิทํ ผลํฯ
Duggatiṃ nābhijānāmi, bhattadānassidaṃ phalaṃ.
๑๔๐.
140.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา สุมงฺคโล เถโร อิมา คาถาโย อภาสิตฺถาติฯ
Itthaṃ sudaṃ āyasmā sumaṅgalo thero imā gāthāyo abhāsitthāti.
สุมงฺคลเตฺถรสฺสาปทานํ ทสมํฯ
Sumaṅgalattherassāpadānaṃ dasamaṃ.
ตสฺสุทฺทานํ –
Tassuddānaṃ –
สีหาสนี เอกถมฺภี, นโนฺท จ จูฬปนฺถโก;
Sīhāsanī ekathambhī, nando ca cūḷapanthako;
ปิลินฺทราหุโล เจว, วงฺคโนฺต รฎฺฐปาลโกฯ
Pilindarāhulo ceva, vaṅganto raṭṭhapālako.
โสปาโก มงฺคโล เจว, ทเสว ทุติเย วเคฺค;
Sopāko maṅgalo ceva, daseva dutiye vagge;
สตญฺจ อฎฺฐติํส จ, คาถา เจตฺถ ปกาสิตาฯ
Satañca aṭṭhatiṃsa ca, gāthā cettha pakāsitā.
สีหาสนิยวโคฺค ทุติโยฯ
Sīhāsaniyavaggo dutiyo.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑๐. สุมงฺคลเตฺถรอปทานวณฺณนา • 10. Sumaṅgalattheraapadānavaṇṇanā
