Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

    ๒. สุมงฺคลเตฺถรอปทานํ

    2. Sumaṅgalattheraapadānaṃ

    ๑๑.

    11.

    ‘‘อตฺถทสฺสี ชินวโร, โลกเชโฎฺฐ นราสโภ;

    ‘‘Atthadassī jinavaro, lokajeṭṭho narāsabho;

    วิหารา อภินิกฺขมฺม, ตฬากํ อุปสงฺกมิฯ

    Vihārā abhinikkhamma, taḷākaṃ upasaṅkami.

    ๑๒.

    12.

    ‘‘นฺหตฺวา ปิตฺวา จ สมฺพุโทฺธ, อุตฺตริเตฺวกจีวโร;

    ‘‘Nhatvā pitvā ca sambuddho, uttaritvekacīvaro;

    อฎฺฐาสิ ภควา ตตฺถ, วิโลเกโนฺต ทิโสทิสํฯ

    Aṭṭhāsi bhagavā tattha, vilokento disodisaṃ.

    ๑๓.

    13.

    ‘‘ภวเน อุปวิโฎฺฐหํ, อทฺทสํ โลกนายกํ;

    ‘‘Bhavane upaviṭṭhohaṃ, addasaṃ lokanāyakaṃ;

    หโฎฺฐ หเฎฺฐน จิเตฺตน, อโปฺผเฎสิํ อหํ ตทาฯ

    Haṭṭho haṭṭhena cittena, apphoṭesiṃ ahaṃ tadā.

    ๑๔.

    14.

    ‘‘สตรํสิํว โชตนฺตํ, ปภาสนฺตํว กญฺจนํ 1;

    ‘‘Sataraṃsiṃva jotantaṃ, pabhāsantaṃva kañcanaṃ 2;

    นจฺจคีเต ปยุโตฺตหํ, ปญฺจงฺคตูริยมฺหิ จฯ

    Naccagīte payuttohaṃ, pañcaṅgatūriyamhi ca.

    ๑๕.

    15.

    ‘‘ยํ ยํ โยนุปปชฺชามิ, เทวตฺตํ อถ มานุสํ;

    ‘‘Yaṃ yaṃ yonupapajjāmi, devattaṃ atha mānusaṃ;

    สเพฺพ สเตฺต อภิโภมิ, วิปุโล โหติ เม ยโส 3ฯ

    Sabbe satte abhibhomi, vipulo hoti me yaso 4.

    ๑๖.

    16.

    ‘‘นโม เต ปุริสาชญฺญ, นโม เต ปุริสุตฺตม;

    ‘‘Namo te purisājañña, namo te purisuttama;

    อตฺตานํ โตสยิตฺวาน, ปเร โตเสสิ ตฺวํ มุนิฯ

    Attānaṃ tosayitvāna, pare tosesi tvaṃ muni.

    ๑๗.

    17.

    ‘‘ปริคฺคเห 5 นิสีทิตฺวา, หาสํ กตฺวาน สุพฺพเต;

    ‘‘Pariggahe 6 nisīditvā, hāsaṃ katvāna subbate;

    อุปฎฺฐหิตฺวา สมฺพุทฺธํ, ตุสิตํ อุปปชฺชหํฯ

    Upaṭṭhahitvā sambuddhaṃ, tusitaṃ upapajjahaṃ.

    ๑๘.

    18.

    ‘‘โสฬเสโต กปฺปสเต, ทฺวินวเอกจินฺติตา;

    ‘‘Soḷaseto kappasate, dvinavaekacintitā;

    สตฺตรตนสมฺปนฺนา, จกฺกวตฺตี มหพฺพลาฯ

    Sattaratanasampannā, cakkavattī mahabbalā.

    ๑๙.

    19.

    ‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ

    ‘‘Paṭisambhidā catasso…pe… kataṃ buddhassa sāsanaṃ’’.

    อิตฺถํ สุทํ อายสฺมา สุมงฺคโล เถโร อิมา คาถาโย อภาสิตฺถาติฯ

    Itthaṃ sudaṃ āyasmā sumaṅgalo thero imā gāthāyo abhāsitthāti.

    สุมงฺคลเตฺถรสฺสาปทานํ ทุติยํฯ

    Sumaṅgalattherassāpadānaṃ dutiyaṃ.




    Next: ๓. สรณคมนิยเตฺถรอปทานํ • 3. Saraṇagamaniyattheraapadānaṃ




    Footnotes:
    1. อิมินา ปาททฺวเยน ปุริมปาททฺวยสฺส ปุรโต ภวิตพฺพํ
    2. iminā pādadvayena purimapādadvayassa purato bhavitabbaṃ
    3. อยญฺจ คาถา ปริคฺคเหติคาถาย อนนฺตรเมว ฐาตุํ ยุตฺตา
    4. ayañca gāthā pariggahetigāthāya anantarameva ṭhātuṃ yuttā
    5. ปริคฺคยฺห (สี.), ปริคฺคหิตฺวา (สฺยา.), ปริคฺคเหน (ก.)
    6. pariggayha (sī.), pariggahitvā (syā.), pariggahena (ka.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๒. สุมงฺคลเตฺถรอปทานวณฺณนา • 2. Sumaṅgalattheraapadānavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact