| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. ஸுமங்க³லத்தே²ரஅபதா³னவண்ணனா
10. Sumaṅgalattheraapadānavaṇṇanā
ஆஹுதிங் யிட்டு²காமோதிஆதி³கங் ஆயஸ்மதோ ஸுமங்க³லத்தே²ரஸ்ஸ அபதா³னங். அயம்பாயஸ்மா புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பியத³ஸ்ஸிஸ்ஸ ப⁴க³வதோ காலே ருக்க²தே³வதா ஹுத்வா நிப்³ப³த்தி. ஸோ ஏகதி³வஸங் ஸத்தா²ரங் ந்ஹத்வா ஏகசீவரங் டி²தங் தி³ஸ்வா ஸோமனஸ்ஸப்பத்தோ அப்போ²டேஸி. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யா அவிதூ³ரே அஞ்ஞதரஸ்மிங் கா³மகே தாதி³ஸேன கம்மனிஸ்ஸந்தே³ன த³லித்³த³குலே நிப்³ப³த்தி, தஸ்ஸ ஸுமங்க³லோதி நாமங் அஹோஸி. ஸோ வயப்பத்தோ கு²ஜ்ஜகாஸிதனங்க³லகுத்³தா³லபரிக்கா²ரோ ஹுத்வா கஸியா ஜீவிகங் கப்பேஸி. ஸோ ஏகதி³வஸங் ரஞ்ஞா பஸேனதி³னா கோஸலேன ப⁴க³வதோ பி⁴க்கு²ஸங்க⁴ஸ்ஸ ச மஹாதா³னே பவத்தியமானே தா³னூபகரணானி க³ஹெத்வா ஆக³ச்ச²ந்தேஹி மனுஸ்ஸேஹி ஸத்³தி⁴ங் த³தி⁴க⁴டங் க³ஹெத்வா ஆக³தோ பி⁴க்கூ²னங் ஸக்காரஸம்மானங் தி³ஸ்வா ‘‘இமே ஸமணா ஸக்யபுத்தியா ஸுகு²மவத்த²னிவத்தா² ஸுபோ⁴ஜனானி பு⁴ஞ்ஜித்வா நிவாதேஸு ஸேனாஸனேஸு விஹரந்தி, யங்னூனாஹம்பி பப்³ப³ஜெய்ய’’ந்தி சிந்தெத்வா அஞ்ஞதரங் மஹாதே²ரங் உபஸங்கமித்வா அத்தனோ பப்³ப³ஜாதி⁴ப்பாயங் நிவேதே³ஸி. ஸோ தங் கருணாயந்தோ பப்³பா³ஜெத்வா கம்மட்டா²னங் ஆசிக்கி². ஸோ அரஞ்ஞே விஹரந்தோ ஏககவிஹாரே நிப்³பி³ன்னோ உக்கண்டி²தோ ஹுத்வா விப்³ப⁴மிதுகாமோ ஞாதிகா³மங் க³ச்ச²ந்தோ அந்தராமக்³கே³ கச்ச²ங் ப³ந்தி⁴த்வா கெ²த்தங் கஸந்தே கிலிட்ட²வத்த²னிவத்தே² ஸமந்ததோ ரஜோகிண்ணஸரீரே வாதாதபேன ஸுஸ்ஸந்தே கெ²த்தங் கஸ்ஸகே மனுஸ்ஸே தி³ஸ்வா ‘‘மஹந்தங் வதிமே ஸத்தா ஜீவிகனிமித்தங் து³க்க²ங் பச்சனுப⁴வந்தீ’’தி ஸங்வேக³ங் படிலபி⁴. ஞாணஸ்ஸ பரிபாகக³தத்தா சஸ்ஸ யதா²க³ஹிதங் கம்மட்டா²னங் உபட்டா²ஸி. ஸோ அஞ்ஞதரங் ருக்க²மூலங் உபக³ந்த்வா விவேகங் லபி⁴த்வா யோனிஸோமனஸிகரொந்தோ விபஸ்ஸனங் வட்³டெ⁴த்வா மக்³க³படிபாடியா அரஹத்தங் பாபுணி.
Āhutiṃyiṭṭhukāmotiādikaṃ āyasmato sumaṅgalattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle rukkhadevatā hutvā nibbatti. So ekadivasaṃ satthāraṃ nhatvā ekacīvaraṃ ṭhitaṃ disvā somanassappatto apphoṭesi. So tena puññena devamanussesu saṃsaranto imasmiṃ buddhuppāde sāvatthiyā avidūre aññatarasmiṃ gāmake tādisena kammanissandena daliddakule nibbatti, tassa sumaṅgaloti nāmaṃ ahosi. So vayappatto khujjakāsitanaṅgalakuddālaparikkhāro hutvā kasiyā jīvikaṃ kappesi. So ekadivasaṃ raññā pasenadinā kosalena bhagavato bhikkhusaṅghassa ca mahādāne pavattiyamāne dānūpakaraṇāni gahetvā āgacchantehi manussehi saddhiṃ dadhighaṭaṃ gahetvā āgato bhikkhūnaṃ sakkārasammānaṃ disvā ‘‘ime samaṇā sakyaputtiyā sukhumavatthanivatthā subhojanāni bhuñjitvā nivātesu senāsanesu viharanti, yaṃnūnāhampi pabbajeyya’’nti cintetvā aññataraṃ mahātheraṃ upasaṅkamitvā attano pabbajādhippāyaṃ nivedesi. So taṃ karuṇāyanto pabbājetvā kammaṭṭhānaṃ ācikkhi. So araññe viharanto ekakavihāre nibbinno ukkaṇṭhito hutvā vibbhamitukāmo ñātigāmaṃ gacchanto antarāmagge kacchaṃ bandhitvā khettaṃ kasante kiliṭṭhavatthanivatthe samantato rajokiṇṇasarīre vātātapena sussante khettaṃ kassake manusse disvā ‘‘mahantaṃ vatime sattā jīvikanimittaṃ dukkhaṃ paccanubhavantī’’ti saṃvegaṃ paṭilabhi. Ñāṇassa paripākagatattā cassa yathāgahitaṃ kammaṭṭhānaṃ upaṭṭhāsi. So aññataraṃ rukkhamūlaṃ upagantvā vivekaṃ labhitvā yonisomanasikaronto vipassanaṃ vaḍḍhetvā maggapaṭipāṭiyā arahattaṃ pāpuṇi.
124. ஏவங் ஸோ பத்தஅரஹத்தப²லோ அத்தனோ புப்³ப³கம்மங் ஸரித்வா ஸோமனஸ்ஸவஸேன புப்³ப³சரிதாபதா³னங் பகாஸெந்தோ ஆஹுதிங் யிட்டு²காமோஹந்திஆதி³மாஹ. தத்த² ஆஹுதிந்தி அன்னபானாதி³அனேகவித⁴ங் பூஜாஸக்காரூபகரணங். யிட்டு²காமோதி யஜிதுகாமோ, தா³னங் தா³துகாமோ அஹங். படியாதெ³த்வான போ⁴ஜனந்தி ஆஹாரங் படியாதெ³த்வா நிப்பா²தெ³த்வா. ப்³ராஹ்மணே படிமானெந்தோதி படிக்³கா³ஹகே ஸுத்³த⁴பப்³ப³ஜிதே பரியேஸந்தோ. விஸாலே மாளகே டி²தோதி பரிஸுத்³த⁴பண்ட³ரபுலினதலாபி⁴ராமே விபுலே மாளகே டி²தோ.
124. Evaṃ so pattaarahattaphalo attano pubbakammaṃ saritvā somanassavasena pubbacaritāpadānaṃ pakāsento āhutiṃ yiṭṭhukāmohantiādimāha. Tattha āhutinti annapānādianekavidhaṃ pūjāsakkārūpakaraṇaṃ. Yiṭṭhukāmoti yajitukāmo, dānaṃ dātukāmo ahaṃ. Paṭiyādetvāna bhojananti āhāraṃ paṭiyādetvā nipphādetvā. Brāhmaṇe paṭimānentoti paṭiggāhake suddhapabbajite pariyesanto. Visāle māḷake ṭhitoti parisuddhapaṇḍarapulinatalābhirāme vipule māḷake ṭhito.
125-7. அத²த்³த³ஸாஸிங் ஸம்பு³த்³த⁴ந்திஆதீ³ஸு மஹாயஸங் மஹாபரிவாரங் ஸப்³ப³லோகங் ஸகலஸத்தலோகங் வினேதானங் விஸேஸேன நேதாரங் நிப்³பா³னஸம்பாபகங் ஸயம்பு⁴ங் ஸயமேவ பூ⁴தங் அனாசரியகங் அக்³க³புக்³க³லங் ஸெட்ட²புக்³க³லங் ப⁴க³வந்தங் ப⁴க்³யவந்தாதி³கு³ணயுத்தங் ஜுதிமந்தங் நீலபீதாதி³பபா⁴ஸம்பன்னங் ஸாவகேஹி புரக்க²தங் பரிவாரிதங் ஆதி³ச்சமிவ ஸூரியமிவ ரோசந்தங் ஸோப⁴மானங் ரதி²யங் வீதி²யங் படிபன்னகங் க³ச்ச²ந்தங் பியத³ஸ்ஸிங் நாம ஸம்பு³த்³த⁴ங் அத்³த³ஸிந்தி ஸம்ப³ந்தோ⁴. அஞ்ஜலிங் பக்³க³ஹெத்வானாதி ப³ந்த⁴ஞ்ஜலிபுடங் ஸிரஸி கத்வா ஸகங் சித்தங் அத்தனோ சித்தங் பஸாத³யிங் இத்த²ம்பூ⁴தஸ்ஸ ப⁴க³வதோ கு³ணே பஸாதே³ஸிங் பஸன்னமகாஸிந்தி அத்தோ². மனஸாவ நிமந்தேஸிந்தி சித்தேன பவாரேஸிங். ஆக³ச்ச²து மஹாமுனீதி மஹிதோ பூஜாரஹோ முனி ப⁴க³வா மம நிவேஸனங் ஆக³ச்ச²து.
125-7.Athaddasāsiṃ sambuddhantiādīsu mahāyasaṃ mahāparivāraṃ sabbalokaṃ sakalasattalokaṃ vinetānaṃ visesena netāraṃ nibbānasampāpakaṃ sayambhuṃ sayameva bhūtaṃ anācariyakaṃ aggapuggalaṃ seṭṭhapuggalaṃ bhagavantaṃ bhagyavantādiguṇayuttaṃ jutimantaṃ nīlapītādipabhāsampannaṃ sāvakehi purakkhataṃ parivāritaṃ ādiccamiva sūriyamiva rocantaṃ sobhamānaṃ rathiyaṃ vīthiyaṃ paṭipannakaṃ gacchantaṃ piyadassiṃ nāma sambuddhaṃ addasinti sambandho. Añjaliṃ paggahetvānāti bandhañjalipuṭaṃ sirasi katvā sakaṃ cittaṃ attano cittaṃ pasādayiṃ itthambhūtassa bhagavato guṇe pasādesiṃ pasannamakāsinti attho. Manasāva nimantesinti cittena pavāresiṃ. Āgacchatu mahāmunīti mahito pūjāraho muni bhagavā mama nivesanaṃ āgacchatu.
128. மம ஸங்கப்பமஞ்ஞாயாதி மய்ஹங் சித்தஸங்கப்பங் ஞத்வா லோகே ஸத்தலோகே அனுத்தரோ உத்தரவிரஹிதோ ஸத்தா² கீ²ணாஸவஸஹஸ்ஸேஹி அரஹந்தஸஹஸ்ஸேஹி பரிவுதோ மம த்³வாரங் மய்ஹங் கே³ஹத்³வாரங் உபாக³மி ஸம்பாபுணி.
128.Mama saṅkappamaññāyāti mayhaṃ cittasaṅkappaṃ ñatvā loke sattaloke anuttaro uttaravirahito satthā khīṇāsavasahassehi arahantasahassehi parivuto mama dvāraṃ mayhaṃ gehadvāraṃ upāgami sampāpuṇi.
129. தஸ்ஸ ஸம்பத்தஸ்ஸ ஸத்து²னோ ஏவங் நமக்காரமகாஸிங். புரிஸாஜஞ்ஞ புரிஸானங் ஆஜஞ்ஞ, ஸெட்ட², மம நமக்காரோ தே துய்ஹங் அத்து² ப⁴வது. புரிஸுத்தம புரிஸானங் உத்தம அதி⁴ககு³ணவிஸிட்ட² தே துய்ஹங் மம நமக்காரோ அத்து². பாஸாத³ங் பஸாத³ஜனகங் மம நிவேஸனங் அபி⁴ருஹித்வா ஸீஹாஸனே உத்தமாஸனே நிஸீத³தந்தி ஆயாசிந்தி அத்தோ².
129. Tassa sampattassa satthuno evaṃ namakkāramakāsiṃ. Purisājañña purisānaṃ ājañña, seṭṭha, mama namakkāro te tuyhaṃ atthu bhavatu. Purisuttama purisānaṃ uttama adhikaguṇavisiṭṭha te tuyhaṃ mama namakkāro atthu. Pāsādaṃ pasādajanakaṃ mama nivesanaṃ abhiruhitvā sīhāsane uttamāsane nisīdatanti āyācinti attho.
130. த³ந்தோ த³ந்தபரிவாரோதி ஸயங் த்³வாரத்தயேன த³ந்தோ ததா² த³ந்தாஹி பி⁴க்கு²பி⁴க்கு²னீஉபாஸகஉபாஸிகாஸங்கா²தாஹி சதூஹி பரிஸாஹி பரிவாரிதோ. திண்ணோ தாரயதங் வரோதி ஸயங் திண்ணோ ஸங்ஸாரதோ உத்திண்ணோ நிக்க²ந்தோ தாரயதங் தாரயந்தானங் விஸிட்ட²புக்³க³லானங் வரோ உத்தமோ ப⁴க³வா மமாராத⁴னேன பாஸாத³ங் அபி⁴ருஹித்வா பவராஸனே உத்தமாஸனே நிஸீதி³ நிஸஜ்ஜங் கப்பேஸி.
130.Danto dantaparivāroti sayaṃ dvārattayena danto tathā dantāhi bhikkhubhikkhunīupāsakaupāsikāsaṅkhātāhi catūhi parisāhi parivārito. Tiṇṇo tārayataṃ varoti sayaṃ tiṇṇo saṃsārato uttiṇṇo nikkhanto tārayataṃ tārayantānaṃ visiṭṭhapuggalānaṃ varo uttamo bhagavā mamārādhanena pāsādaṃ abhiruhitvā pavarāsane uttamāsane nisīdi nisajjaṃ kappesi.
131. யங் மே அத்தி² ஸகே கே³ஹேதி அத்தனோ கே³ஹே யங் ஆமிஸங் பச்சுபட்டி²தங் ஸம்பாதி³தங் ராஸிகதங் அத்தி². தாஹங் பு³த்³த⁴ஸ்ஸ பாதா³ஸிந்தி பு³த்³த⁴ஸ்ஸ பு³த்³த⁴ப்பமுக²ஸ்ஸ ஸங்க⁴ஸ்ஸ தங் ஆமிஸங் பாதா³ஸிங் ப-காரேன ஆத³ரேன வா அதா³ஸிந்தி அத்தோ². பஸன்னோ ஸேஹி பாணிபீ⁴தி அத்தனோ த்³வீஹி ஹத்தே²ஹி பஸ்ஸன்னசித்தோ க³ஹெத்வா பாதா³ஸிந்தி அத்தோ².
131.Yaṃ me atthi sake geheti attano gehe yaṃ āmisaṃ paccupaṭṭhitaṃ sampāditaṃ rāsikataṃ atthi. Tāhaṃ buddhassa pādāsinti buddhassa buddhappamukhassa saṅghassa taṃ āmisaṃ pādāsiṃ pa-kārena ādarena vā adāsinti attho. Pasanno sehi pāṇibhīti attano dvīhi hatthehi passannacitto gahetvā pādāsinti attho.
132. பஸன்னசித்தோ பஸாதி³தமனஸங்கப்போ ஸுமனோ ஸுந்த³ரமனோ. வேத³ஜாதோ ஜாதவேதோ³ உப்பன்னஸோமனஸ்ஸோ கதஞ்ஜலீ ஸிரஸி ட²பிதஅஞ்ஜலிபுடோ பு³த்³த⁴ஸெட்ட²ங் நமஸ்ஸாமி ஸெட்ட²ஸ்ஸ பு³த்³த⁴ஸ்ஸ பணாமங் கரோமீதி அத்தோ². அஹோ பு³த்³த⁴ஸ்ஸுளாரதாதி படிவித்³த⁴சதுஸச்சஸ்ஸ ஸத்து²னோ உளாரதா மஹந்தபா⁴வோ அஹோ அச்ச²ரியந்தி அத்தோ².
132.Pasannacitto pasāditamanasaṅkappo sumano sundaramano. Vedajāto jātavedo uppannasomanasso katañjalī sirasi ṭhapitaañjalipuṭo buddhaseṭṭhaṃ namassāmi seṭṭhassa buddhassa paṇāmaṃ karomīti attho. Aho buddhassuḷāratāti paṭividdhacatusaccassa satthuno uḷāratā mahantabhāvo aho acchariyanti attho.
133. அட்ட²ன்னங் பயிரூபாஸதந்தி பயிருபாஸந்தானங் பு⁴ஞ்ஜங் பு⁴ஞ்ஜந்தானங் அட்ட²ன்னங் அரியபுக்³க³லானங் அந்தரே கீ²ணாஸவா அரஹந்தோவ ப³ஹூதி அத்தோ². துய்ஹேவேஸோ ஆனுபா⁴வோதி ஏஸோ ஆகாஸசரணஉம்முஜ்ஜனநிமுஜ்ஜனாதி³ஆனுபா⁴வோ துய்ஹேவ துய்ஹங் ஏவ ஆனுபா⁴வோ, நாஞ்ஞேஸங். ஸரணங் தங் உபேமஹந்தி தங் இத்த²ம்பூ⁴தங் துவங் ஸரணங் தாணங் லேணங் பராயனந்தி உபேமி க³ச்சா²மி ஜானாமி வாதி அத்தோ².
133.Aṭṭhannaṃpayirūpāsatanti payirupāsantānaṃ bhuñjaṃ bhuñjantānaṃ aṭṭhannaṃ ariyapuggalānaṃ antare khīṇāsavā arahantova bahūti attho. Tuyheveso ānubhāvoti eso ākāsacaraṇaummujjananimujjanādiānubhāvo tuyheva tuyhaṃ eva ānubhāvo, nāññesaṃ. Saraṇaṃ taṃ upemahanti taṃ itthambhūtaṃ tuvaṃ saraṇaṃ tāṇaṃ leṇaṃ parāyananti upemi gacchāmi jānāmi vāti attho.
134. லோகஜெட்டோ² நராஸபோ⁴ பியத³ஸ்ஸீ ப⁴க³வா பி⁴க்கு²ஸங்க⁴மஜ்ஜே² நிஸீதி³த்வா இமா ப்³யாகரணகா³தா² அபா⁴ஸத² கதே²ஸீதி அத்தோ². ஸேஸங் ஸுவிஞ்ஞெய்யமேவாதி.
134. Lokajeṭṭho narāsabho piyadassī bhagavā bhikkhusaṅghamajjhe nisīditvā imā byākaraṇagāthā abhāsatha kathesīti attho. Sesaṃ suviññeyyamevāti.
ஸுமங்க³லத்தே²ரஅபதா³னவண்ணனா ஸமத்தா.
Sumaṅgalattheraapadānavaṇṇanā samattā.
து³தியஸ்ஸ ஸீஹாஸனவக்³க³ஸ்ஸ வண்ணனா ஸமத்தா.
Dutiyassa sīhāsanavaggassa vaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. ஸுமங்க³லத்தே²ரஅபதா³னங் • 10. Sumaṅgalattheraapadānaṃ
