| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. সুমঙ্গলত্থেরঅপদানৰণ্ণনা
10. Sumaṅgalattheraapadānavaṇṇanā
আহুতিং যিট্ঠুকামোতিআদিকং আযস্মতো সুমঙ্গলত্থেরস্স অপদানং। অযম্পাযস্মা পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পিযদস্সিস্স ভগৰতো কালে রুক্খদেৰতা হুত্ৰা নিব্বত্তি। সো একদিৰসং সত্থারং ন্হত্ৰা একচীৰরং ঠিতং দিস্ৰা সোমনস্সপ্পত্তো অপ্ফোটেসি। সো তেন পুঞ্ঞেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযা অৰিদূরে অঞ্ঞতরস্মিং গামকে তাদিসেন কম্মনিস্সন্দেন দলিদ্দকুলে নিব্বত্তি, তস্স সুমঙ্গলোতি নামং অহোসি। সো ৰযপ্পত্তো খুজ্জকাসিতনঙ্গলকুদ্দালপরিক্খারো হুত্ৰা কসিযা জীৰিকং কপ্পেসি। সো একদিৰসং রঞ্ঞা পসেনদিনা কোসলেন ভগৰতো ভিক্খুসঙ্ঘস্স চ মহাদানে পৰত্তিযমানে দানূপকরণানি গহেত্ৰা আগচ্ছন্তেহি মনুস্সেহি সদ্ধিং দধিঘটং গহেত্ৰা আগতো ভিক্খূনং সক্কারসম্মানং দিস্ৰা ‘‘ইমে সমণা সক্যপুত্তিযা সুখুমৰত্থনিৰত্থা সুভোজনানি ভুঞ্জিত্ৰা নিৰাতেসু সেনাসনেসু ৰিহরন্তি, যংনূনাহম্পি পব্বজেয্য’’ন্তি চিন্তেত্ৰা অঞ্ঞতরং মহাথেরং উপসঙ্কমিত্ৰা অত্তনো পব্বজাধিপ্পাযং নিৰেদেসি। সো তং করুণাযন্তো পব্বাজেত্ৰা কম্মট্ঠানং আচিক্খি। সো অরঞ্ঞে ৰিহরন্তো এককৰিহারে নিব্বিন্নো উক্কণ্ঠিতো হুত্ৰা ৰিব্ভমিতুকামো ঞাতিগামং গচ্ছন্তো অন্তরামগ্গে কচ্ছং বন্ধিত্ৰা খেত্তং কসন্তে কিলিট্ঠৰত্থনিৰত্থে সমন্ততো রজোকিণ্ণসরীরে ৰাতাতপেন সুস্সন্তে খেত্তং কস্সকে মনুস্সে দিস্ৰা ‘‘মহন্তং ৰতিমে সত্তা জীৰিকনিমিত্তং দুক্খং পচ্চনুভৰন্তী’’তি সংৰেগং পটিলভি। ঞাণস্স পরিপাকগতত্তা চস্স যথাগহিতং কম্মট্ঠানং উপট্ঠাসি। সো অঞ্ঞতরং রুক্খমূলং উপগন্ত্ৰা ৰিৰেকং লভিত্ৰা যোনিসোমনসিকরোন্তো ৰিপস্সনং ৰড্ঢেত্ৰা মগ্গপটিপাটিযা অরহত্তং পাপুণি।
Āhutiṃyiṭṭhukāmotiādikaṃ āyasmato sumaṅgalattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle rukkhadevatā hutvā nibbatti. So ekadivasaṃ satthāraṃ nhatvā ekacīvaraṃ ṭhitaṃ disvā somanassappatto apphoṭesi. So tena puññena devamanussesu saṃsaranto imasmiṃ buddhuppāde sāvatthiyā avidūre aññatarasmiṃ gāmake tādisena kammanissandena daliddakule nibbatti, tassa sumaṅgaloti nāmaṃ ahosi. So vayappatto khujjakāsitanaṅgalakuddālaparikkhāro hutvā kasiyā jīvikaṃ kappesi. So ekadivasaṃ raññā pasenadinā kosalena bhagavato bhikkhusaṅghassa ca mahādāne pavattiyamāne dānūpakaraṇāni gahetvā āgacchantehi manussehi saddhiṃ dadhighaṭaṃ gahetvā āgato bhikkhūnaṃ sakkārasammānaṃ disvā ‘‘ime samaṇā sakyaputtiyā sukhumavatthanivatthā subhojanāni bhuñjitvā nivātesu senāsanesu viharanti, yaṃnūnāhampi pabbajeyya’’nti cintetvā aññataraṃ mahātheraṃ upasaṅkamitvā attano pabbajādhippāyaṃ nivedesi. So taṃ karuṇāyanto pabbājetvā kammaṭṭhānaṃ ācikkhi. So araññe viharanto ekakavihāre nibbinno ukkaṇṭhito hutvā vibbhamitukāmo ñātigāmaṃ gacchanto antarāmagge kacchaṃ bandhitvā khettaṃ kasante kiliṭṭhavatthanivatthe samantato rajokiṇṇasarīre vātātapena sussante khettaṃ kassake manusse disvā ‘‘mahantaṃ vatime sattā jīvikanimittaṃ dukkhaṃ paccanubhavantī’’ti saṃvegaṃ paṭilabhi. Ñāṇassa paripākagatattā cassa yathāgahitaṃ kammaṭṭhānaṃ upaṭṭhāsi. So aññataraṃ rukkhamūlaṃ upagantvā vivekaṃ labhitvā yonisomanasikaronto vipassanaṃ vaḍḍhetvā maggapaṭipāṭiyā arahattaṃ pāpuṇi.
১২৪. এৰং সো পত্তঅরহত্তফলো অত্তনো পুব্বকম্মং সরিত্ৰা সোমনস্সৰসেন পুব্বচরিতাপদানং পকাসেন্তো আহুতিং যিট্ঠুকামোহন্তিআদিমাহ। তত্থ আহুতিন্তি অন্নপানাদিঅনেকৰিধং পূজাসক্কারূপকরণং। যিট্ঠুকামোতি যজিতুকামো, দানং দাতুকামো অহং। পটিযাদেত্ৰান ভোজনন্তি আহারং পটিযাদেত্ৰা নিপ্ফাদেত্ৰা। ব্রাহ্মণে পটিমানেন্তোতি পটিগ্গাহকে সুদ্ধপব্বজিতে পরিযেসন্তো। ৰিসালে মাল়কে ঠিতোতি পরিসুদ্ধপণ্ডরপুলিনতলাভিরামে ৰিপুলে মাল়কে ঠিতো।
124. Evaṃ so pattaarahattaphalo attano pubbakammaṃ saritvā somanassavasena pubbacaritāpadānaṃ pakāsento āhutiṃ yiṭṭhukāmohantiādimāha. Tattha āhutinti annapānādianekavidhaṃ pūjāsakkārūpakaraṇaṃ. Yiṭṭhukāmoti yajitukāmo, dānaṃ dātukāmo ahaṃ. Paṭiyādetvāna bhojananti āhāraṃ paṭiyādetvā nipphādetvā. Brāhmaṇe paṭimānentoti paṭiggāhake suddhapabbajite pariyesanto. Visāle māḷake ṭhitoti parisuddhapaṇḍarapulinatalābhirāme vipule māḷake ṭhito.
১২৫-৭. অথদ্দসাসিং সম্বুদ্ধন্তিআদীসু মহাযসং মহাপরিৰারং সব্বলোকং সকলসত্তলোকং ৰিনেতানং ৰিসেসেন নেতারং নিব্বানসম্পাপকং সযম্ভুং সযমেৰ ভূতং অনাচরিযকং অগ্গপুগ্গলং সেট্ঠপুগ্গলং ভগৰন্তং ভগ্যৰন্তাদিগুণযুত্তং জুতিমন্তং নীলপীতাদিপভাসম্পন্নং সাৰকেহি পুরক্খতং পরিৰারিতং আদিচ্চমিৰ সূরিযমিৰ রোচন্তং সোভমানং রথিযং ৰীথিযং পটিপন্নকং গচ্ছন্তং পিযদস্সিং নাম সম্বুদ্ধং অদ্দসিন্তি সম্বন্ধো। অঞ্জলিং পগ্গহেত্ৰানাতি বন্ধঞ্জলিপুটং সিরসি কত্ৰা সকং চিত্তং অত্তনো চিত্তং পসাদযিং ইত্থম্ভূতস্স ভগৰতো গুণে পসাদেসিং পসন্নমকাসিন্তি অত্থো। মনসাৰ নিমন্তেসিন্তি চিত্তেন পৰারেসিং। আগচ্ছতু মহামুনীতি মহিতো পূজারহো মুনি ভগৰা মম নিৰেসনং আগচ্ছতু।
125-7.Athaddasāsiṃ sambuddhantiādīsu mahāyasaṃ mahāparivāraṃ sabbalokaṃ sakalasattalokaṃ vinetānaṃ visesena netāraṃ nibbānasampāpakaṃ sayambhuṃ sayameva bhūtaṃ anācariyakaṃ aggapuggalaṃ seṭṭhapuggalaṃ bhagavantaṃ bhagyavantādiguṇayuttaṃ jutimantaṃ nīlapītādipabhāsampannaṃ sāvakehi purakkhataṃ parivāritaṃ ādiccamiva sūriyamiva rocantaṃ sobhamānaṃ rathiyaṃ vīthiyaṃ paṭipannakaṃ gacchantaṃ piyadassiṃ nāma sambuddhaṃ addasinti sambandho. Añjaliṃ paggahetvānāti bandhañjalipuṭaṃ sirasi katvā sakaṃ cittaṃ attano cittaṃ pasādayiṃ itthambhūtassa bhagavato guṇe pasādesiṃ pasannamakāsinti attho. Manasāva nimantesinti cittena pavāresiṃ. Āgacchatu mahāmunīti mahito pūjāraho muni bhagavā mama nivesanaṃ āgacchatu.
১২৮. মম সঙ্কপ্পমঞ্ঞাযাতি ময্হং চিত্তসঙ্কপ্পং ঞত্ৰা লোকে সত্তলোকে অনুত্তরো উত্তরৰিরহিতো সত্থা খীণাসৰসহস্সেহি অরহন্তসহস্সেহি পরিৰুতো মম দ্ৰারং ময্হং গেহদ্ৰারং উপাগমি সম্পাপুণি।
128.Mama saṅkappamaññāyāti mayhaṃ cittasaṅkappaṃ ñatvā loke sattaloke anuttaro uttaravirahito satthā khīṇāsavasahassehi arahantasahassehi parivuto mama dvāraṃ mayhaṃ gehadvāraṃ upāgami sampāpuṇi.
১২৯. তস্স সম্পত্তস্স সত্থুনো এৰং নমক্কারমকাসিং। পুরিসাজঞ্ঞ পুরিসানং আজঞ্ঞ, সেট্ঠ, মম নমক্কারো তে তুয্হং অত্থু ভৰতু। পুরিসুত্তম পুরিসানং উত্তম অধিকগুণৰিসিট্ঠ তে তুয্হং মম নমক্কারো অত্থু। পাসাদং পসাদজনকং মম নিৰেসনং অভিরুহিত্ৰা সীহাসনে উত্তমাসনে নিসীদতন্তি আযাচিন্তি অত্থো।
129. Tassa sampattassa satthuno evaṃ namakkāramakāsiṃ. Purisājañña purisānaṃ ājañña, seṭṭha, mama namakkāro te tuyhaṃ atthu bhavatu. Purisuttama purisānaṃ uttama adhikaguṇavisiṭṭha te tuyhaṃ mama namakkāro atthu. Pāsādaṃ pasādajanakaṃ mama nivesanaṃ abhiruhitvā sīhāsane uttamāsane nisīdatanti āyācinti attho.
১৩০. দন্তো দন্তপরিৰারোতি সযং দ্ৰারত্তযেন দন্তো তথা দন্তাহি ভিক্খুভিক্খুনীউপাসকউপাসিকাসঙ্খাতাহি চতূহি পরিসাহি পরিৰারিতো। তিণ্ণো তারযতং ৰরোতি সযং তিণ্ণো সংসারতো উত্তিণ্ণো নিক্খন্তো তারযতং তারযন্তানং ৰিসিট্ঠপুগ্গলানং ৰরো উত্তমো ভগৰা মমারাধনেন পাসাদং অভিরুহিত্ৰা পৰরাসনে উত্তমাসনে নিসীদি নিসজ্জং কপ্পেসি।
130.Danto dantaparivāroti sayaṃ dvārattayena danto tathā dantāhi bhikkhubhikkhunīupāsakaupāsikāsaṅkhātāhi catūhi parisāhi parivārito. Tiṇṇo tārayataṃ varoti sayaṃ tiṇṇo saṃsārato uttiṇṇo nikkhanto tārayataṃ tārayantānaṃ visiṭṭhapuggalānaṃ varo uttamo bhagavā mamārādhanena pāsādaṃ abhiruhitvā pavarāsane uttamāsane nisīdi nisajjaṃ kappesi.
১৩১. যং মে অত্থি সকে গেহেতি অত্তনো গেহে যং আমিসং পচ্চুপট্ঠিতং সম্পাদিতং রাসিকতং অত্থি। তাহং বুদ্ধস্স পাদাসিন্তি বুদ্ধস্স বুদ্ধপ্পমুখস্স সঙ্ঘস্স তং আমিসং পাদাসিং প-কারেন আদরেন ৰা অদাসিন্তি অত্থো। পসন্নো সেহি পাণিভীতি অত্তনো দ্ৰীহি হত্থেহি পস্সন্নচিত্তো গহেত্ৰা পাদাসিন্তি অত্থো।
131.Yaṃ me atthi sake geheti attano gehe yaṃ āmisaṃ paccupaṭṭhitaṃ sampāditaṃ rāsikataṃ atthi. Tāhaṃ buddhassa pādāsinti buddhassa buddhappamukhassa saṅghassa taṃ āmisaṃ pādāsiṃ pa-kārena ādarena vā adāsinti attho. Pasanno sehi pāṇibhīti attano dvīhi hatthehi passannacitto gahetvā pādāsinti attho.
১৩২. পসন্নচিত্তো পসাদিতমনসঙ্কপ্পো সুমনো সুন্দরমনো। ৰেদজাতো জাতৰেদো উপ্পন্নসোমনস্সো কতঞ্জলী সিরসি ঠপিতঅঞ্জলিপুটো বুদ্ধসেট্ঠং নমস্সামি সেট্ঠস্স বুদ্ধস্স পণামং করোমীতি অত্থো। অহো বুদ্ধস্সুল়ারতাতি পটিৰিদ্ধচতুসচ্চস্স সত্থুনো উল়ারতা মহন্তভাৰো অহো অচ্ছরিযন্তি অত্থো।
132.Pasannacitto pasāditamanasaṅkappo sumano sundaramano. Vedajāto jātavedo uppannasomanasso katañjalī sirasi ṭhapitaañjalipuṭo buddhaseṭṭhaṃ namassāmi seṭṭhassa buddhassa paṇāmaṃ karomīti attho. Aho buddhassuḷāratāti paṭividdhacatusaccassa satthuno uḷāratā mahantabhāvo aho acchariyanti attho.
১৩৩. অট্ঠন্নং পযিরূপাসতন্তি পযিরুপাসন্তানং ভুঞ্জং ভুঞ্জন্তানং অট্ঠন্নং অরিযপুগ্গলানং অন্তরে খীণাসৰা অরহন্তোৰ বহূতি অত্থো। তুয্হেৰেসো আনুভাৰোতি এসো আকাসচরণউম্মুজ্জননিমুজ্জনাদিআনুভাৰো তুয্হেৰ তুয্হং এৰ আনুভাৰো, নাঞ্ঞেসং। সরণং তং উপেমহন্তি তং ইত্থম্ভূতং তুৰং সরণং তাণং লেণং পরাযনন্তি উপেমি গচ্ছামি জানামি ৰাতি অত্থো।
133.Aṭṭhannaṃpayirūpāsatanti payirupāsantānaṃ bhuñjaṃ bhuñjantānaṃ aṭṭhannaṃ ariyapuggalānaṃ antare khīṇāsavā arahantova bahūti attho. Tuyheveso ānubhāvoti eso ākāsacaraṇaummujjananimujjanādiānubhāvo tuyheva tuyhaṃ eva ānubhāvo, nāññesaṃ. Saraṇaṃ taṃ upemahanti taṃ itthambhūtaṃ tuvaṃ saraṇaṃ tāṇaṃ leṇaṃ parāyananti upemi gacchāmi jānāmi vāti attho.
১৩৪. লোকজেট্ঠো নরাসভো পিযদস্সী ভগৰা ভিক্খুসঙ্ঘমজ্ঝে নিসীদিত্ৰা ইমা ব্যাকরণগাথা অভাসথ কথেসীতি অত্থো। সেসং সুৰিঞ্ঞেয্যমেৰাতি।
134. Lokajeṭṭho narāsabho piyadassī bhagavā bhikkhusaṅghamajjhe nisīditvā imā byākaraṇagāthā abhāsatha kathesīti attho. Sesaṃ suviññeyyamevāti.
সুমঙ্গলত্থেরঅপদানৰণ্ণনা সমত্তা।
Sumaṅgalattheraapadānavaṇṇanā samattā.
দুতিযস্স সীহাসনৰগ্গস্স ৰণ্ণনা সমত্তা।
Dutiyassa sīhāsanavaggassa vaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. সুমঙ্গলত্থেরঅপদানং • 10. Sumaṅgalattheraapadānaṃ
