| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
2. суман̇г̇алад̇т̇зраабад̣̇аанаван̣н̣анаа
2. Sumaṅgalattheraapadānavaṇṇanā
ад̇т̇ад̣̇ассий ж̇инаварод̇иаад̣̇игам̣ ааяасмад̇о суман̇г̇алад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о ад̇т̇ад̣̇ассисса бхаг̇авад̇о гаалз згасмим̣ д̇ал̣аагасамийбз ругкад̣̇звад̇аа худ̇ваа ниб̣б̣ад̇д̇и. д̇асмим̣ самаяз бхаг̇аваа вихаарад̇о нигкамид̇ваа нахааяид̇угаамо д̇асса д̇ал̣аагасса д̇ийрам̣ г̇анд̇ваа д̇ад̇т̇а нхад̇ваа згажийваро ж̇аламаано б̣рахмаа вияа суурияо вияа суван̣н̣аб̣имб̣ам̣ вияа адтааси. ат̇а со д̣̇звабуд̇д̇о соманассаж̇аад̇о бан̃ж̇алиго т̇оманамагааси, ад̇д̇ано д̣̇иб̣б̣аг̇ийд̇ад̇ууриязхи убахааран̃жа агааси. со д̇зна бун̃н̃агаммзна д̣̇звамануссзсу самбад̇д̇ияо анубхавид̇ваа абарабхааг̇з имасмим̣ б̣уд̣̇д̇хуббаад̣̇з гулаг̇зхз ниб̣б̣ад̇д̇о вин̃н̃уд̇ам̣ бад̇д̇о сад̇т̇ари басийд̣̇ид̇ваа баб̣б̣аж̇ид̇ваа нажирассзва арахаа ахоси.
Atthadassī jinavarotiādikaṃ āyasmato sumaṅgalattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle ekasmiṃ taḷākasamīpe rukkhadevatā hutvā nibbatti. Tasmiṃ samaye bhagavā vihārato nikkhamitvā nahāyitukāmo tassa taḷākassa tīraṃ gantvā tattha nhatvā ekacīvaro jalamāno brahmā viya sūriyo viya suvaṇṇabimbaṃ viya aṭṭhāsi. Atha so devaputto somanassajāto pañjaliko thomanamakāsi, attano dibbagītatūriyehi upahārañca akāsi. So tena puññakammena devamanussesu sampattiyo anubhavitvā aparabhāge imasmiṃ buddhuppāde kulagehe nibbatto viññutaṃ patto satthari pasīditvā pabbajitvā nacirasseva arahā ahosi.
11. со бажчаа буб̣б̣агаммам̣ сарид̇ваа соманассаж̇аад̇о буб̣б̣ажарид̇аабад̣̇аанам̣ багаасзнд̇о ад̇т̇ад̣̇ассий ж̇инаварод̇иаад̣̇имааха. д̇ад̇т̇а барамад̇т̇ам̣ ниб̣б̣аанам̣ д̣̇агкад̇и бассад̇ийд̇и ад̇т̇ад̣̇ассий, ат̇а ваа саб̣б̣асад̇д̇аанам̣ жад̇ураарияасажжасан̇каад̇ам̣ ад̇т̇абаяож̇анам̣ д̣̇ассанасийлод̇и ад̇т̇ад̣̇ассий, гилзсз аж̇ини ж̇инаад̇и ж̇иниссад̇ийд̇и ж̇ино. варид̇аб̣б̣о бад̇т̇зд̇аб̣б̣о саб̣б̣асад̇д̇зхийд̇и варо, ад̇т̇ад̣̇ассий ж̇ино жа со варо жаад̇и ад̇т̇ад̣̇ассий ж̇инаваро. логаж̇здтод̇и луж̇ж̇ад̇и балуж̇ж̇ад̇ийд̇и лого, логийяад̇и бассийяад̇и б̣уд̣̇д̇хаад̣̇ийхи баараббад̇д̇од̇и ваа лого, лого жа лого жа лого жаад̇и лого. згасзсасамаасавасзна ‘‘логаа’’д̇и вад̇д̇аб̣б̣з ‘‘лого’’д̇и вуд̇д̇о. логасса ж̇здто логаж̇здто, со логаж̇здто нараасабход̇и ад̇т̇о. сзсам̣ саб̣б̣ад̇т̇а уд̇д̇аанамзваад̇и.
11. So pacchā pubbakammaṃ saritvā somanassajāto pubbacaritāpadānaṃ pakāsento atthadassī jinavarotiādimāha. Tattha paramatthaṃ nibbānaṃ dakkhati passatīti atthadassī, atha vā sabbasattānaṃ caturāriyasaccasaṅkhātaṃ atthapayojanaṃ dassanasīloti atthadassī, kilese ajini jināti jinissatīti jino. Varitabbo patthetabbo sabbasattehīti varo, atthadassī jino ca so varo cāti atthadassī jinavaro. Lokajeṭṭhoti lujjati palujjatīti loko, lokīyati passīyati buddhādīhi pārappattoti vā loko, loko ca loko ca loko cāti loko. Ekasesasamāsavasena ‘‘lokā’’ti vattabbe ‘‘loko’’ti vutto. Lokassa jeṭṭho lokajeṭṭho, so lokajeṭṭho narāsabhoti attho. Sesaṃ sabbattha uttānamevāti.
суман̇г̇алад̇т̇зраабад̣̇аанаван̣н̣анаа самад̇д̇аа.
Sumaṅgalattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 2. суман̇г̇алад̇т̇зраабад̣̇аанам̣ • 2. Sumaṅgalattheraapadānaṃ
