| Library / Tipiṭaka / д̇ибидага • Tipiṭaka / д̇хаммасан̇г̇ан̣ий-мууладийгаа • Dhammasaṅgaṇī-mūlaṭīkā |
сумзд̇хагат̇ааван̣н̣анаа
Sumedhakathāvaṇṇanā
жад̇уро жа асан̇киязд̇и (б̣у. вам̣. адта. 2.1-2) уд̣̇д̇хам̣ аароханавасзна ад̇иггамид̇ваа амарам̣ наама наг̇арам̣ ахосийд̇и важанасзсаяож̇анаа гаад̇аб̣б̣аа. д̣̇асахийд̇и хад̇т̇иассарат̇абхзрийсан̇камуд̣̇ин̇г̇авийн̣ааг̇ийд̇асаммад̇аал̣зхи ‘‘аснаат̇а биват̇а каад̣̇ат̇аа’’д̇и д̣̇асамзна сад̣̇д̣̇зна. д̇з бана згад̣̇зсзна д̣̇ассзд̇ум̣ ‘‘хад̇т̇исад̣̇д̣̇а’’нд̇иаад̣̇и вуд̇д̇ам̣. хад̇т̇исад̣̇д̣̇анд̇и гаран̣ад̇т̇з убаяог̇о д̣̇адтаб̣б̣о. бхзрийсан̇карат̇аанан̃жа сад̣̇д̣̇зхи авивид̇д̇анд̇и ваа гхосид̇анд̇и ваа яож̇зд̇аб̣б̣ам̣. хад̇т̇исад̣̇д̣̇анд̇и ваа хад̇т̇исад̣̇д̣̇аванд̇ам̣ наг̇арам̣. каад̣̇ат̇а биват̇а жзваад̇и ид̇и-сад̣̇д̣̇о н̃аад̇ад̇т̇ад̇д̇аа аббаяуд̇д̇о д̣̇адтаб̣б̣о.
Caturo ca asaṅkhiyeti (bu. vaṃ. aṭṭha. 2.1-2) uddhaṃ ārohanavasena atikkamitvā amaraṃ nāma nagaraṃ ahosīti vacanasesayojanā kātabbā. Dasahīti hatthiassarathabherīsaṅkhamudiṅgavīṇāgītasammatāḷehi ‘‘asnātha pivatha khādathā’’ti dasamena saddena. Te pana ekadesena dassetuṃ ‘‘hatthisadda’’ntiādi vuttaṃ. Hatthisaddanti karaṇatthe upayogo daṭṭhabbo. Bherīsaṅkharathānañca saddehi avivittanti vā ghositanti vā yojetabbaṃ. Hatthisaddanti vā hatthisaddavantaṃ nagaraṃ. Khādatha pivatha cevāti iti-saddo ñātatthattā appayutto daṭṭhabbo.
саб̣б̣ан̇г̇асамбаннам̣ уяяаанабогкаран̣ийаад̣̇исамбаннад̇д̇аа. лагкан̣зд̇и ид̇т̇илагкан̣з бурисалагкан̣з жа. ид̇ихаасзд̇и бораан̣з. сад̇хаммзд̇и ад̇д̇ано д̇звиж̇ж̇ад̇хаммз жа яан̃н̃авид̇хиаад̣̇игз жа. баараминд̇и бааран̃аан̣ам̣ баараад̇хиг̇амам̣ г̇ад̇о. жинд̇зсаханд̇и жинд̇зсим̣ ахам̣ сумзд̇хабхууд̇од̇и сад̇т̇аа вад̣̇ад̇и. ад̇т̇и хзхид̇ийд̇и со виж̇ж̇амаано бхависсад̇и. на хзд̇уязд̇и абхавид̇ум̣. звамзваад̇и звамзвам̣. на г̇авзсад̇ийд̇и на г̇анд̇ум̣ зсад̇и на ижчад̇и наануг̇ажчад̇и ваа. д̇ховзд̇и д̇хованд̇з. сзрийд̇и сааяад̇д̇иго. саяам̣васийд̇и савасо. махаажорасамо вияаад̇и гааяасаарааг̇авасзна д̣̇ужжарид̇аанзсанзхи гусалабхан̣д̣ажчзд̣̇анаа. наат̇аад̇и наат̇аванд̇о. бан̃жад̣̇осавиваж̇ж̇ид̇анд̇и звамаад̣̇игасса ад̇т̇о гзсужи адтагат̇аабод̇т̇агзсу ликид̇од̇и гад̇ваа на вагкаама.
Sabbaṅgasampannaṃ uyyānapokkharaṇīādisampannattā. Lakkhaṇeti itthilakkhaṇe purisalakkhaṇe ca. Itihāseti porāṇe. Sadhammeti attano tevijjadhamme ca yaññavidhiādike ca. Pāraminti pārañāṇaṃ pārādhigamaṃ gato. Cintesahanti cintesiṃ ahaṃ sumedhabhūtoti satthā vadati. Atthihehitīti so vijjamāno bhavissati. Na hetuyeti abhavituṃ. Evamevāti evamevaṃ. Na gavesatīti na gantuṃ esati na icchati nānugacchati vā. Dhoveti dhovante. Serīti sāyattiko. Sayaṃvasīti savaso. Mahācorasamo viyāti kāyasārāgavasena duccaritānesanehi kusalabhaṇḍacchedanā. Nāthāti nāthavanto. Pañcadosavivajjitanti evamādikassa attho kesuci aṭṭhakathāpotthakesu likhitoti katvā na vakkhāma.
саасанзд̇и зд̇т̇а д̇аабасасаасанам̣ жхаанаабхин̃н̃аа жа. васийбхууд̇асса сад̇о. маяи звам̣бхууд̇з д̣̇ийбан̇гаро ж̇ино уббаж̇ж̇и. сод̇хзд̇и ж̇ано. ан̃ж̇асам̣ вадумааяананд̇и барияааяаважанзхи маг̇г̇амзва вад̣̇ад̇и. маа нам̣ аггамид̇т̇аад̇и зд̇т̇а нанд̇и бад̣̇абууран̣амад̇д̇з нибаад̇о. гхаад̇ияаамаханд̇и зд̇т̇а жа а-ид̇и жа хам̣-ид̇и жа нибаад̇аа, ахам̣-ид̇и ваа зго нибаад̇о саанунаасиго гад̇о. аахуд̇ийнанд̇и д̣̇агкин̣аахуд̇ийнам̣. манд̇и мама, мам̣ ваа аб̣рви.
Sāsaneti ettha tāpasasāsanaṃ jhānābhiññā ca. Vasībhūtassa sato. Mayi evaṃbhūte dīpaṅkaro jino uppajji. Sodheti jano. Añjasaṃ vaṭumāyananti pariyāyavacanehi maggameva vadati. Mā naṃ akkamitthāti ettha nanti padapūraṇamatte nipāto. Ghātiyāmahanti ettha ca a-iti ca haṃ-iti ca nipātā, ahaṃ-iti vā eko nipāto sānunāsiko kato. Āhutīnanti dakkhiṇāhutīnaṃ. Manti mama, maṃ vā abrvi.
габбз ад̇иггамид̇ваа вуд̇д̇зби б̣од̇химхи маад̇аад̣̇исам̣гид̇д̇анз сан̇г̇ан̣хид̇ум̣ ‘‘б̣од̇хи д̇асса бхаг̇авад̇о’’д̇иаад̣̇имааха. сукзнаад̇и уд̇д̇амзна сукзна. асамод̇и д̇аабасзхи асамо. абхин̃н̃аасукад̇оби висидтам̣ ийд̣̇исам̣ б̣уд̣̇д̇хад̇д̇аб̣яаагаран̣аж̇ам̣ сукам̣ алабхим̣. яаад̇и яаани нимид̇д̇аани. аабхуж̇ад̇ийд̇и аавад̇д̇ад̇и. абхираванд̇ийд̇и сад̣̇д̣̇ам̣ гаронд̇и. чуд̣̇д̇хаад̇и нигканд̇аа. нуд̣̇д̇хам̣сад̇ийд̇и на уд̣̇д̇хам̣ г̇ажчад̇и. убхаяанд̇и убхаяаважанам̣. д̇хувасассад̇анд̇и зганд̇асассад̇ам̣, авибарийд̇амзваад̇и ад̇т̇о. аабаннасад̇д̇аананд̇и г̇аб̣бхинийнам̣. яаавад̇аад̣̇аса д̣̇исаа, д̇ад̇т̇а. д̇хаммад̇хаад̇уяаад̇и д̇хаммад̇хаад̇уяам̣, саб̣б̣зсу д̇хаммзсу вижинаамийд̇и ад̇т̇о.
Kappe atikkamitvā vuttepi bodhimhi mātādisaṃkittane saṅgaṇhituṃ ‘‘bodhi tassa bhagavato’’tiādimāha. Sukhenāti uttamena sukhena. Asamoti tāpasehi asamo. Abhiññāsukhatopi visiṭṭhaṃ īdisaṃ buddhattabyākaraṇajaṃ sukhaṃ alabhiṃ. Yāti yāni nimittāni. Ābhujatīti āvattati. Abhiravantīti saddaṃ karonti. Chuddhāti nikkhantā. Nuddhaṃsatīti na uddhaṃ gacchati. Ubhayanti ubhayavacanaṃ. Dhuvasassatanti ekantasassataṃ, aviparītamevāti attho. Āpannasattānanti gabbhinīnaṃ. Yāvatādasa disā, tattha. Dhammadhātuyāti dhammadhātuyaṃ, sabbesu dhammesu vicināmīti attho.
яасса самбун̣н̣о, д̇ам̣ вамад̇зва уд̣̇агам̣ ниссзсам̣. зд̇зд̇и згиссааби д̣̇аанабаарамид̇ааяа анзгаббагаарад̇ааяа б̣ахуважананид̣̇д̣̇зсо гад̇о. бадилаг̇г̇ид̇ам̣ рагкад̇ийд̇и важанасзсо, бхуммад̇т̇з ваа убаяог̇о . жад̇уусу бхуумийсууд̇и баад̇имогкаад̣̇ийсу сам̣варабхуумийсу. ад̣̇взж̇жхамаанасод̇и гад̣̇аажи каманам̣ гад̣̇аажи агкаманам̣, гассажи каманам̣ гассажи агкамананд̇и звам̣ д̣̇взд̇хаабхаавам̣ анаабаннамаанасо худ̇ваа. сажжасса вийт̇и наама д̣̇идтаад̣̇и жа ад̣̇идтаад̣̇и жа яат̇аабхууд̇ам̣ва вад̇т̇у. ад̇хидтаананд̇и гусаласамаад̣̇аанаад̇хидтаанам̣, самаад̣̇иннзсу гусалзсу ажалад̇аа ад̇хидтаанам̣ наама. бат̇авияаа убзгканам̣ наама вигаараанаабад̇д̇и. ан̃н̃ад̇раад̇и ан̃н̃ам̣. сабхааварасалагкан̣зд̇и зд̇т̇а бхаавод̇и авибарийд̇ад̇аа виж̇ж̇амаанад̇аа, саха бхаавзна сабхааво, авибарийд̇о ад̇д̇ано б̣од̇хибарибаажанагижжасан̇каад̇о расо, анаваж̇ж̇авад̇т̇убарижжааг̇аад̣̇исан̇каад̇ам̣ лагкан̣ан̃жа сабхааварасалагкан̣ам̣, д̇ад̇о саммасад̇о. д̇хаммад̇зж̇знаад̇и н̃аан̣ад̇зж̇зна. жалад̇аад̇и жалад̇ааяа гамбанад̇ааяа. сзсийд̇и саяи. маа бхаат̇аад̇и маа бхааяид̇т̇а. саб̣б̣ийд̇ияод̇и саб̣б̣аа ийд̇ияо убад̣̇д̣̇аваа д̇ам̣ виваж̇ж̇анд̇у.
Yassa sampuṇṇo, taṃ vamateva udakaṃ nissesaṃ. Eteti ekissāpi dānapāramitāya anekappakāratāya bahuvacananiddeso kato. Paṭilaggitaṃ rakkhatīti vacanaseso, bhummatthe vā upayogo . Catūsu bhūmīsūti pātimokkhādīsu saṃvarabhūmīsu. Advejjhamānasoti kadāci khamanaṃ kadāci akkhamanaṃ, kassaci khamanaṃ kassaci akkhamananti evaṃ dvedhābhāvaṃ anāpannamānaso hutvā. Saccassa vīthi nāma diṭṭhādi ca adiṭṭhādi ca yathābhūtaṃva vatthu. Adhiṭṭhānanti kusalasamādānādhiṭṭhānaṃ, samādinnesu kusalesu acalatā adhiṭṭhānaṃ nāma. Pathaviyā upekkhanaṃ nāma vikārānāpatti. Aññatrāti aññaṃ. Sabhāvarasalakkhaṇeti ettha bhāvoti aviparītatā vijjamānatā, saha bhāvena sabhāvo, aviparīto attano bodhiparipācanakiccasaṅkhāto raso, anavajjavatthupariccāgādisaṅkhātaṃ lakkhaṇañca sabhāvarasalakkhaṇaṃ, tato sammasato. Dhammatejenāti ñāṇatejena. Calatāti calatāya kampanatāya. Sesīti sayi. Mā bhāthāti mā bhāyittha. Sabbītiyoti sabbā ītiyo upaddavā taṃ vivajjantu.
сумзд̇хагат̇ааван̣н̣анаа нидтид̇аа.
Sumedhakathāvaṇṇanā niṭṭhitā.
баважчад̇ийд̇и д̣̇зд̇и. яог̇знаад̇и убааязна. самим̣сууд̇и саннибад̇им̣су. аббад̇д̇амаанасаад̇и аббад̇д̇аарахад̇д̇аа бхигкуу г̇арахид̇аа бхаванд̇и. рид̇д̇аад̇и сун̃н̃аа анд̇арахид̇аа. саалагаляаан̣ий наама зго ругко. б̣уд̣̇д̇хажаггавад̇д̇игаалзязва гира згаахзнзва уббаж̇ж̇ад̇и.
Pavacchatīti deti. Yogenāti upāyena. Samiṃsūti sannipatiṃsu. Appattamānasāti appattaarahattā bhikkhū garahitā bhavanti. Rittāti suññā antarahitā. Sālakalyāṇī nāma eko rukkho. Buddhacakkavattikāleyeva kira ekāheneva uppajjati.
лин̇г̇асамбад̇д̇ийд̇и бурисалин̇г̇ад̇аа. хзд̇ууд̇и д̇ихзд̇угабадисанд̇хид̇аа. г̇ун̣асамбад̇д̇ийд̇и абхин̃н̃аасамаабад̇д̇илаабхид̇аа. ад̇хигаарод̇и б̣уд̣̇д̇хаанам̣ саггаарагаран̣ам̣. чанд̣̇ад̇аад̇и б̣уд̣̇д̇хад̇д̇аббад̇д̇ияам̣ чанд̣̇асамааяог̇о. саб̣б̣ан̇г̇асамбаннаад̇и адтан̇г̇аани самод̇хаанзд̇ваа гад̇абан̣ид̇хаанаа. багкигаад̇и бийтасаббигаа. бан̣д̣агаад̇и убхаяалин̇г̇арахид̇аа. б̣од̇хисад̇д̇аа жа б̣рахмалогуубабад̇д̇ибатамагаббигзсу гаалзсу убхаяалин̇г̇арахид̇аа хонд̇и, на бана бан̣д̣агабарияаабаннаад̇и зд̇амад̇т̇ам̣ д̣̇ассзд̇ум̣ ‘‘барияаабаннаа на бхаванд̇ий’’д̇и вуд̇д̇ам̣, яат̇аавуд̇д̇зсу ваа д̣̇осзсу саб̣б̣зсу барияаабаннаа на бхаванд̇и, б̣од̇хисад̇д̇зсу ваа барияаабаннаа д̇ад̣̇анд̇ог̇ад̇хаа, барижчиннасам̣саарад̇д̇аа ваа барияаабаннаа б̣од̇хисад̇д̇аа убхад̇об̣яан̃ж̇анабан̣д̣агаа на бхаванд̇ийд̇и ад̇т̇о. саб̣б̣ад̇т̇а суд̣̇д̇хаг̇ожараа яасмаа, д̇асмаа мижчаад̣̇идтим̣ на сзванд̇и. мижчаад̣̇идтинд̇и над̇т̇игаахзд̇угаагирияад̣̇идтим̣. бхаваабхавзд̇и куд̣̇д̣̇агз жзва маханд̇з жа бхавз. бхож̇абуд̇д̇зд̇и луд̣̇д̣̇агз. лаг̇ананд̇и сан̇г̇о. ан̃н̃ат̇аад̇и лийнад̇аа. г̇ааман̣д̣алаад̇и г̇аамад̣̇аарагаа. руубанд̇и виббагаарам̣. аяам̣ д̇аава нид̣̇аанагат̇аа яааяа абхид̇хаммасса б̣уд̣̇д̇хабхаасид̇ад̇аасид̣̇д̇хийд̇и ад̇т̇аяож̇анаа гаад̇аб̣б̣аа.
Liṅgasampattīti purisaliṅgatā. Hetūti tihetukapaṭisandhitā. Guṇasampattīti abhiññāsamāpattilābhitā. Adhikāroti buddhānaṃ sakkārakaraṇaṃ. Chandatāti buddhattappattiyaṃ chandasamāyogo. Sabbaṅgasampannāti aṭṭhaṅgāni samodhānetvā katapaṇidhānā. Pakkhikāti pīṭhasappikā. Paṇḍakāti ubhayaliṅgarahitā. Bodhisattā ca brahmalokūpapattipaṭhamakappikesu kālesu ubhayaliṅgarahitā honti, na pana paṇḍakapariyāpannāti etamatthaṃ dassetuṃ ‘‘pariyāpannā na bhavantī’’ti vuttaṃ, yathāvuttesu vā dosesu sabbesu pariyāpannā na bhavanti, bodhisattesu vā pariyāpannā tadantogadhā, paricchinnasaṃsārattā vā pariyāpannā bodhisattā ubhatobyañjanapaṇḍakā na bhavantīti attho. Sabbattha suddhagocarā yasmā, tasmā micchādiṭṭhiṃ na sevanti. Micchādiṭṭhinti natthikāhetukākiriyadiṭṭhiṃ. Bhavābhaveti khuddake ceva mahante ca bhave. Bhojaputteti luddake. Lagananti saṅgo. Aññathāti līnatā. Gāmaṇḍalāti gāmadārakā. Rūpanti vippakāraṃ. Ayaṃ tāva nidānakathā yāya abhidhammassa buddhabhāsitatāsiddhīti atthayojanā kātabbā.
нид̣̇аанагат̇ааван̣н̣анаа нидтид̇аа.
Nidānakathāvaṇṇanā niṭṭhitā.
Related texts:
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / д̇хаммасан̇г̇ан̣ий-анудийгаа • Dhammasaṅgaṇī-anuṭīkā / сумзд̇хагат̇ааван̣н̣анаа • Sumedhakathāvaṇṇanā
