| Library / Tipiṭaka / ਤਿਪਿਟਕ • Tipiṭaka / ਧਮ੍ਮਸਙ੍ਗਣੀ-ਮੂਲਟੀਕਾ • Dhammasaṅgaṇī-mūlaṭīkā |
ਸੁਮੇਧਕਥਾવਣ੍ਣਨਾ
Sumedhakathāvaṇṇanā
ਚਤੁਰੋ ਚ ਅਸਙ੍ਖਿਯੇਤਿ (ਬੁ॰ વਂ॰ ਅਟ੍ਠ॰ ੨.੧-੨) ਉਦ੍ਧਂ ਆਰੋਹਨવਸੇਨ ਅਤਿਕ੍ਕਮਿਤ੍વਾ ਅਮਰਂ ਨਾਮ ਨਗਰਂ ਅਹੋਸੀਤਿ વਚਨਸੇਸਯੋਜਨਾ ਕਾਤਬ੍ਬਾ। ਦਸਹੀਤਿ ਹਤ੍ਥਿਅਸ੍ਸਰਥਭੇਰੀਸਙ੍ਖਮੁਦਿਙ੍ਗવੀਣਾਗੀਤਸਮ੍ਮਤਾਲ਼ੇਹਿ ‘‘ਅਸ੍ਨਾਥ ਪਿવਥ ਖਾਦਥਾ’’ਤਿ ਦਸਮੇਨ ਸਦ੍ਦੇਨ। ਤੇ ਪਨ ਏਕਦੇਸੇਨ ਦਸ੍ਸੇਤੁਂ ‘‘ਹਤ੍ਥਿਸਦ੍ਦ’’ਨ੍ਤਿਆਦਿ વੁਤ੍ਤਂ। ਹਤ੍ਥਿਸਦ੍ਦਨ੍ਤਿ ਕਰਣਤ੍ਥੇ ਉਪਯੋਗੋ ਦਟ੍ਠਬ੍ਬੋ। ਭੇਰੀਸਙ੍ਖਰਥਾਨਞ੍ਚ ਸਦ੍ਦੇਹਿ ਅવਿવਿਤ੍ਤਨ੍ਤਿ વਾ ਘੋਸਿਤਨ੍ਤਿ વਾ ਯੋਜੇਤਬ੍ਬਂ। ਹਤ੍ਥਿਸਦ੍ਦਨ੍ਤਿ વਾ ਹਤ੍ਥਿਸਦ੍ਦવਨ੍ਤਂ ਨਗਰਂ। ਖਾਦਥ ਪਿવਥ ਚੇવਾਤਿ ਇਤਿ-ਸਦ੍ਦੋ ਞਾਤਤ੍ਥਤ੍ਤਾ ਅਪ੍ਪਯੁਤ੍ਤੋ ਦਟ੍ਠਬ੍ਬੋ।
Caturo ca asaṅkhiyeti (bu. vaṃ. aṭṭha. 2.1-2) uddhaṃ ārohanavasena atikkamitvā amaraṃ nāma nagaraṃ ahosīti vacanasesayojanā kātabbā. Dasahīti hatthiassarathabherīsaṅkhamudiṅgavīṇāgītasammatāḷehi ‘‘asnātha pivatha khādathā’’ti dasamena saddena. Te pana ekadesena dassetuṃ ‘‘hatthisadda’’ntiādi vuttaṃ. Hatthisaddanti karaṇatthe upayogo daṭṭhabbo. Bherīsaṅkharathānañca saddehi avivittanti vā ghositanti vā yojetabbaṃ. Hatthisaddanti vā hatthisaddavantaṃ nagaraṃ. Khādatha pivatha cevāti iti-saddo ñātatthattā appayutto daṭṭhabbo.
ਸਬ੍ਬਙ੍ਗਸਮ੍ਪਨ੍ਨਂ ਉਯ੍ਯਾਨਪੋਕ੍ਖਰਣੀਆਦਿਸਮ੍ਪਨ੍ਨਤ੍ਤਾ। ਲਕ੍ਖਣੇਤਿ ਇਤ੍ਥਿਲਕ੍ਖਣੇ ਪੁਰਿਸਲਕ੍ਖਣੇ ਚ। ਇਤਿਹਾਸੇਤਿ ਪੋਰਾਣੇ। ਸਧਮ੍ਮੇਤਿ ਅਤ੍ਤਨੋ ਤੇવਿਜ੍ਜਧਮ੍ਮੇ ਚ ਯਞ੍ਞવਿਧਿਆਦਿਕੇ ਚ। ਪਾਰਮਿਨ੍ਤਿ ਪਾਰਞਾਣਂ ਪਾਰਾਧਿਗਮਂ ਗਤੋ। ਚਿਨ੍ਤੇਸਹਨ੍ਤਿ ਚਿਨ੍ਤੇਸਿਂ ਅਹਂ ਸੁਮੇਧਭੂਤੋਤਿ ਸਤ੍ਥਾ વਦਤਿ। ਅਤ੍ਥਿ ਹੇਹਿਤੀਤਿ ਸੋ વਿਜ੍ਜਮਾਨੋ ਭવਿਸ੍ਸਤਿ। ਨ ਹੇਤੁਯੇਤਿ ਅਭવਿਤੁਂ। ਏવਮੇવਾਤਿ ਏવਮੇવਂ। ਨ ਗવੇਸਤੀਤਿ ਨ ਗਨ੍ਤੁਂ ਏਸਤਿ ਨ ਇਚ੍ਛਤਿ ਨਾਨੁਗਚ੍ਛਤਿ વਾ। ਧੋવੇਤਿ ਧੋવਨ੍ਤੇ। ਸੇਰੀਤਿ ਸਾਯਤ੍ਤਿਕੋ। ਸਯਂવਸੀਤਿ ਸવਸੋ। ਮਹਾਚੋਰਸਮੋ વਿਯਾਤਿ ਕਾਯਸਾਰਾਗવਸੇਨ ਦੁਚ੍ਚਰਿਤਾਨੇਸਨੇਹਿ ਕੁਸਲਭਣ੍ਡਚ੍ਛੇਦਨਾ। ਨਾਥਾਤਿ ਨਾਥવਨ੍ਤੋ। ਪਞ੍ਚਦੋਸવਿવਜ੍ਜਿਤਨ੍ਤਿ ਏવਮਾਦਿਕਸ੍ਸ ਅਤ੍ਥੋ ਕੇਸੁਚਿ ਅਟ੍ਠਕਥਾਪੋਤ੍ਥਕੇਸੁ ਲਿਖਿਤੋਤਿ ਕਤ੍વਾ ਨ વਕ੍ਖਾਮ।
Sabbaṅgasampannaṃ uyyānapokkharaṇīādisampannattā. Lakkhaṇeti itthilakkhaṇe purisalakkhaṇe ca. Itihāseti porāṇe. Sadhammeti attano tevijjadhamme ca yaññavidhiādike ca. Pāraminti pārañāṇaṃ pārādhigamaṃ gato. Cintesahanti cintesiṃ ahaṃ sumedhabhūtoti satthā vadati. Atthihehitīti so vijjamāno bhavissati. Na hetuyeti abhavituṃ. Evamevāti evamevaṃ. Na gavesatīti na gantuṃ esati na icchati nānugacchati vā. Dhoveti dhovante. Serīti sāyattiko. Sayaṃvasīti savaso. Mahācorasamo viyāti kāyasārāgavasena duccaritānesanehi kusalabhaṇḍacchedanā. Nāthāti nāthavanto. Pañcadosavivajjitanti evamādikassa attho kesuci aṭṭhakathāpotthakesu likhitoti katvā na vakkhāma.
ਸਾਸਨੇਤਿ ਏਤ੍ਥ ਤਾਪਸਸਾਸਨਂ ਝਾਨਾਭਿਞ੍ਞਾ ਚ। વਸੀਭੂਤਸ੍ਸ ਸਤੋ। ਮਯਿ ਏવਂਭੂਤੇ ਦੀਪਙ੍ਕਰੋ ਜਿਨੋ ਉਪ੍ਪਜ੍ਜਿ। ਸੋਧੇਤਿ ਜਨੋ। ਅਞ੍ਜਸਂ વਟੁਮਾਯਨਨ੍ਤਿ ਪਰਿਯਾਯવਚਨੇਹਿ ਮਗ੍ਗਮੇવ વਦਤਿ। ਮਾ ਨਂ ਅਕ੍ਕਮਿਤ੍ਥਾਤਿ ਏਤ੍ਥ ਨਨ੍ਤਿ ਪਦਪੂਰਣਮਤ੍ਤੇ ਨਿਪਾਤੋ। ਘਾਤਿਯਾਮਹਨ੍ਤਿ ਏਤ੍ਥ ਚ ਅ-ਇਤਿ ਚ ਹਂ-ਇਤਿ ਚ ਨਿਪਾਤਾ, ਅਹਂ-ਇਤਿ વਾ ਏਕੋ ਨਿਪਾਤੋ ਸਾਨੁਨਾਸਿਕੋ ਕਤੋ। ਆਹੁਤੀਨਨ੍ਤਿ ਦਕ੍ਖਿਣਾਹੁਤੀਨਂ। ਮਨ੍ਤਿ ਮਮ, ਮਂ વਾ ਅਬ੍ਰ੍વਿ।
Sāsaneti ettha tāpasasāsanaṃ jhānābhiññā ca. Vasībhūtassa sato. Mayi evaṃbhūte dīpaṅkaro jino uppajji. Sodheti jano. Añjasaṃ vaṭumāyananti pariyāyavacanehi maggameva vadati. Mā naṃ akkamitthāti ettha nanti padapūraṇamatte nipāto. Ghātiyāmahanti ettha ca a-iti ca haṃ-iti ca nipātā, ahaṃ-iti vā eko nipāto sānunāsiko kato. Āhutīnanti dakkhiṇāhutīnaṃ. Manti mama, maṃ vā abrvi.
ਕਪ੍ਪੇ ਅਤਿਕ੍ਕਮਿਤ੍વਾ વੁਤ੍ਤੇਪਿ ਬੋਧਿਮ੍ਹਿ ਮਾਤਾਦਿਸਂਕਿਤ੍ਤਨੇ ਸਙ੍ਗਣ੍ਹਿਤੁਂ ‘‘ਬੋਧਿ ਤਸ੍ਸ ਭਗવਤੋ’’ਤਿਆਦਿਮਾਹ। ਸੁਖੇਨਾਤਿ ਉਤ੍ਤਮੇਨ ਸੁਖੇਨ। ਅਸਮੋਤਿ ਤਾਪਸੇਹਿ ਅਸਮੋ। ਅਭਿਞ੍ਞਾਸੁਖਤੋਪਿ વਿਸਿਟ੍ਠਂ ਈਦਿਸਂ ਬੁਦ੍ਧਤ੍ਤਬ੍ਯਾਕਰਣਜਂ ਸੁਖਂ ਅਲਭਿਂ। ਯਾਤਿ ਯਾਨਿ ਨਿਮਿਤ੍ਤਾਨਿ। ਆਭੁਜਤੀਤਿ ਆવਤ੍ਤਤਿ। ਅਭਿਰવਨ੍ਤੀਤਿ ਸਦ੍ਦਂ ਕਰੋਨ੍ਤਿ। ਛੁਦ੍ਧਾਤਿ ਨਿਕ੍ਖਨ੍ਤਾ। ਨੁਦ੍ਧਂਸਤੀਤਿ ਨ ਉਦ੍ਧਂ ਗਚ੍ਛਤਿ। ਉਭਯਨ੍ਤਿ ਉਭਯવਚਨਂ। ਧੁવਸਸ੍ਸਤਨ੍ਤਿ ਏਕਨ੍ਤਸਸ੍ਸਤਂ, ਅવਿਪਰੀਤਮੇવਾਤਿ ਅਤ੍ਥੋ। ਆਪਨ੍ਨਸਤ੍ਤਾਨਨ੍ਤਿ ਗਬ੍ਭਿਨੀਨਂ। ਯਾવਤਾਦਸ ਦਿਸਾ, ਤਤ੍ਥ। ਧਮ੍ਮਧਾਤੁਯਾਤਿ ਧਮ੍ਮਧਾਤੁਯਂ, ਸਬ੍ਬੇਸੁ ਧਮ੍ਮੇਸੁ વਿਚਿਨਾਮੀਤਿ ਅਤ੍ਥੋ।
Kappe atikkamitvā vuttepi bodhimhi mātādisaṃkittane saṅgaṇhituṃ ‘‘bodhi tassa bhagavato’’tiādimāha. Sukhenāti uttamena sukhena. Asamoti tāpasehi asamo. Abhiññāsukhatopi visiṭṭhaṃ īdisaṃ buddhattabyākaraṇajaṃ sukhaṃ alabhiṃ. Yāti yāni nimittāni. Ābhujatīti āvattati. Abhiravantīti saddaṃ karonti. Chuddhāti nikkhantā. Nuddhaṃsatīti na uddhaṃ gacchati. Ubhayanti ubhayavacanaṃ. Dhuvasassatanti ekantasassataṃ, aviparītamevāti attho. Āpannasattānanti gabbhinīnaṃ. Yāvatādasa disā, tattha. Dhammadhātuyāti dhammadhātuyaṃ, sabbesu dhammesu vicināmīti attho.
ਯਸ੍ਸ ਸਮ੍ਪੁਣ੍ਣੋ, ਤਂ વਮਤੇવ ਉਦਕਂ ਨਿਸ੍ਸੇਸਂ। ਏਤੇਤਿ ਏਕਿਸ੍ਸਾਪਿ ਦਾਨਪਾਰਮਿਤਾਯ ਅਨੇਕਪ੍ਪਕਾਰਤਾਯ ਬਹੁવਚਨਨਿਦ੍ਦੇਸੋ ਕਤੋ। ਪਟਿਲਗ੍ਗਿਤਂ ਰਕ੍ਖਤੀਤਿ વਚਨਸੇਸੋ, ਭੁਮ੍ਮਤ੍ਥੇ વਾ ਉਪਯੋਗੋ । ਚਤੂਸੁ ਭੂਮੀਸੂਤਿ ਪਾਤਿਮੋਕ੍ਖਾਦੀਸੁ ਸਂવਰਭੂਮੀਸੁ। ਅਦ੍વੇਜ੍ਝਮਾਨਸੋਤਿ ਕਦਾਚਿ ਖਮਨਂ ਕਦਾਚਿ ਅਕ੍ਖਮਨਂ, ਕਸ੍ਸਚਿ ਖਮਨਂ ਕਸ੍ਸਚਿ ਅਕ੍ਖਮਨਨ੍ਤਿ ਏવਂ ਦ੍વੇਧਾਭਾવਂ ਅਨਾਪਨ੍ਨਮਾਨਸੋ ਹੁਤ੍વਾ। ਸਚ੍ਚਸ੍ਸ વੀਥਿ ਨਾਮ ਦਿਟ੍ਠਾਦਿ ਚ ਅਦਿਟ੍ਠਾਦਿ ਚ ਯਥਾਭੂਤਂવ વਤ੍ਥੁ। ਅਧਿਟ੍ਠਾਨਨ੍ਤਿ ਕੁਸਲਸਮਾਦਾਨਾਧਿਟ੍ਠਾਨਂ, ਸਮਾਦਿਨ੍ਨੇਸੁ ਕੁਸਲੇਸੁ ਅਚਲਤਾ ਅਧਿਟ੍ਠਾਨਂ ਨਾਮ। ਪਥવਿਯਾ ਉਪੇਕ੍ਖਨਂ ਨਾਮ વਿਕਾਰਾਨਾਪਤ੍ਤਿ। ਅਞ੍ਞਤ੍ਰਾਤਿ ਅਞ੍ਞਂ। ਸਭਾવਰਸਲਕ੍ਖਣੇਤਿ ਏਤ੍ਥ ਭਾવੋਤਿ ਅવਿਪਰੀਤਤਾ વਿਜ੍ਜਮਾਨਤਾ, ਸਹ ਭਾવੇਨ ਸਭਾવੋ, ਅવਿਪਰੀਤੋ ਅਤ੍ਤਨੋ ਬੋਧਿਪਰਿਪਾਚਨਕਿਚ੍ਚਸਙ੍ਖਾਤੋ ਰਸੋ, ਅਨવਜ੍ਜવਤ੍ਥੁਪਰਿਚ੍ਚਾਗਾਦਿਸਙ੍ਖਾਤਂ ਲਕ੍ਖਣਞ੍ਚ ਸਭਾવਰਸਲਕ੍ਖਣਂ, ਤਤੋ ਸਮ੍ਮਸਤੋ। ਧਮ੍ਮਤੇਜੇਨਾਤਿ ਞਾਣਤੇਜੇਨ। ਚਲਤਾਤਿ ਚਲਤਾਯ ਕਮ੍ਪਨਤਾਯ। ਸੇਸੀਤਿ ਸਯਿ। ਮਾ ਭਾਥਾਤਿ ਮਾ ਭਾਯਿਤ੍ਥ। ਸਬ੍ਬੀਤਿਯੋਤਿ ਸਬ੍ਬਾ ਈਤਿਯੋ ਉਪਦ੍ਦવਾ ਤਂ વਿવਜ੍ਜਨ੍ਤੁ।
Yassa sampuṇṇo, taṃ vamateva udakaṃ nissesaṃ. Eteti ekissāpi dānapāramitāya anekappakāratāya bahuvacananiddeso kato. Paṭilaggitaṃ rakkhatīti vacanaseso, bhummatthe vā upayogo . Catūsu bhūmīsūti pātimokkhādīsu saṃvarabhūmīsu. Advejjhamānasoti kadāci khamanaṃ kadāci akkhamanaṃ, kassaci khamanaṃ kassaci akkhamananti evaṃ dvedhābhāvaṃ anāpannamānaso hutvā. Saccassa vīthi nāma diṭṭhādi ca adiṭṭhādi ca yathābhūtaṃva vatthu. Adhiṭṭhānanti kusalasamādānādhiṭṭhānaṃ, samādinnesu kusalesu acalatā adhiṭṭhānaṃ nāma. Pathaviyā upekkhanaṃ nāma vikārānāpatti. Aññatrāti aññaṃ. Sabhāvarasalakkhaṇeti ettha bhāvoti aviparītatā vijjamānatā, saha bhāvena sabhāvo, aviparīto attano bodhiparipācanakiccasaṅkhāto raso, anavajjavatthupariccāgādisaṅkhātaṃ lakkhaṇañca sabhāvarasalakkhaṇaṃ, tato sammasato. Dhammatejenāti ñāṇatejena. Calatāti calatāya kampanatāya. Sesīti sayi. Mā bhāthāti mā bhāyittha. Sabbītiyoti sabbā ītiyo upaddavā taṃ vivajjantu.
ਸੁਮੇਧਕਥਾવਣ੍ਣਨਾ ਨਿਟ੍ਠਿਤਾ।
Sumedhakathāvaṇṇanā niṭṭhitā.
ਪવਚ੍ਛਤੀਤਿ ਦੇਤਿ। ਯੋਗੇਨਾਤਿ ਉਪਾਯੇਨ। ਸਮਿਂਸੂਤਿ ਸਨ੍ਨਿਪਤਿਂਸੁ। ਅਪ੍ਪਤ੍ਤਮਾਨਸਾਤਿ ਅਪ੍ਪਤ੍ਤਅਰਹਤ੍ਤਾ ਭਿਕ੍ਖੂ ਗਰਹਿਤਾ ਭવਨ੍ਤਿ। ਰਿਤ੍ਤਾਤਿ ਸੁਞ੍ਞਾ ਅਨ੍ਤਰਹਿਤਾ। ਸਾਲਕਲ੍ਯਾਣੀ ਨਾਮ ਏਕੋ ਰੁਕ੍ਖੋ। ਬੁਦ੍ਧਚਕ੍ਕવਤ੍ਤਿਕਾਲੇਯੇવ ਕਿਰ ਏਕਾਹੇਨੇવ ਉਪ੍ਪਜ੍ਜਤਿ।
Pavacchatīti deti. Yogenāti upāyena. Samiṃsūti sannipatiṃsu. Appattamānasāti appattaarahattā bhikkhū garahitā bhavanti. Rittāti suññā antarahitā. Sālakalyāṇī nāma eko rukkho. Buddhacakkavattikāleyeva kira ekāheneva uppajjati.
ਲਿਙ੍ਗਸਮ੍ਪਤ੍ਤੀਤਿ ਪੁਰਿਸਲਿਙ੍ਗਤਾ। ਹੇਤੂਤਿ ਤਿਹੇਤੁਕਪਟਿਸਨ੍ਧਿਤਾ। ਗੁਣਸਮ੍ਪਤ੍ਤੀਤਿ ਅਭਿਞ੍ਞਾਸਮਾਪਤ੍ਤਿਲਾਭਿਤਾ। ਅਧਿਕਾਰੋਤਿ ਬੁਦ੍ਧਾਨਂ ਸਕ੍ਕਾਰਕਰਣਂ। ਛਨ੍ਦਤਾਤਿ ਬੁਦ੍ਧਤ੍ਤਪ੍ਪਤ੍ਤਿਯਂ ਛਨ੍ਦਸਮਾਯੋਗੋ। ਸਬ੍ਬਙ੍ਗਸਮ੍ਪਨ੍ਨਾਤਿ ਅਟ੍ਠਙ੍ਗਾਨਿ ਸਮੋਧਾਨੇਤ੍વਾ ਕਤਪਣਿਧਾਨਾ। ਪਕ੍ਖਿਕਾਤਿ ਪੀਠਸਪ੍ਪਿਕਾ। ਪਣ੍ਡਕਾਤਿ ਉਭਯਲਿਙ੍ਗਰਹਿਤਾ। ਬੋਧਿਸਤ੍ਤਾ ਚ ਬ੍ਰਹ੍ਮਲੋਕੂਪਪਤ੍ਤਿਪਠਮਕਪ੍ਪਿਕੇਸੁ ਕਾਲੇਸੁ ਉਭਯਲਿਙ੍ਗਰਹਿਤਾ ਹੋਨ੍ਤਿ, ਨ ਪਨ ਪਣ੍ਡਕਪਰਿਯਾਪਨ੍ਨਾਤਿ ਏਤਮਤ੍ਥਂ ਦਸ੍ਸੇਤੁਂ ‘‘ਪਰਿਯਾਪਨ੍ਨਾ ਨ ਭવਨ੍ਤੀ’’ਤਿ વੁਤ੍ਤਂ, ਯਥਾવੁਤ੍ਤੇਸੁ વਾ ਦੋਸੇਸੁ ਸਬ੍ਬੇਸੁ ਪਰਿਯਾਪਨ੍ਨਾ ਨ ਭવਨ੍ਤਿ, ਬੋਧਿਸਤ੍ਤੇਸੁ વਾ ਪਰਿਯਾਪਨ੍ਨਾ ਤਦਨ੍ਤੋਗਧਾ, ਪਰਿਚ੍ਛਿਨ੍ਨਸਂਸਾਰਤ੍ਤਾ વਾ ਪਰਿਯਾਪਨ੍ਨਾ ਬੋਧਿਸਤ੍ਤਾ ਉਭਤੋਬ੍ਯਞ੍ਜਨਪਣ੍ਡਕਾ ਨ ਭવਨ੍ਤੀਤਿ ਅਤ੍ਥੋ। ਸਬ੍ਬਤ੍ਥ ਸੁਦ੍ਧਗੋਚਰਾ ਯਸ੍ਮਾ, ਤਸ੍ਮਾ ਮਿਚ੍ਛਾਦਿਟ੍ਠਿਂ ਨ ਸੇવਨ੍ਤਿ। ਮਿਚ੍ਛਾਦਿਟ੍ਠਿਨ੍ਤਿ ਨਤ੍ਥਿਕਾਹੇਤੁਕਾਕਿਰਿਯਦਿਟ੍ਠਿਂ। ਭવਾਭવੇਤਿ ਖੁਦ੍ਦਕੇ ਚੇવ ਮਹਨ੍ਤੇ ਚ ਭવੇ। ਭੋਜਪੁਤ੍ਤੇਤਿ ਲੁਦ੍ਦਕੇ। ਲਗਨਨ੍ਤਿ ਸਙ੍ਗੋ। ਅਞ੍ਞਥਾਤਿ ਲੀਨਤਾ। ਗਾਮਣ੍ਡਲਾਤਿ ਗਾਮਦਾਰਕਾ। ਰੂਪਨ੍ਤਿ વਿਪ੍ਪਕਾਰਂ। ਅਯਂ ਤਾવ ਨਿਦਾਨਕਥਾ ਯਾਯ ਅਭਿਧਮ੍ਮਸ੍ਸ ਬੁਦ੍ਧਭਾਸਿਤਤਾਸਿਦ੍ਧੀਤਿ ਅਤ੍ਥਯੋਜਨਾ ਕਾਤਬ੍ਬਾ।
Liṅgasampattīti purisaliṅgatā. Hetūti tihetukapaṭisandhitā. Guṇasampattīti abhiññāsamāpattilābhitā. Adhikāroti buddhānaṃ sakkārakaraṇaṃ. Chandatāti buddhattappattiyaṃ chandasamāyogo. Sabbaṅgasampannāti aṭṭhaṅgāni samodhānetvā katapaṇidhānā. Pakkhikāti pīṭhasappikā. Paṇḍakāti ubhayaliṅgarahitā. Bodhisattā ca brahmalokūpapattipaṭhamakappikesu kālesu ubhayaliṅgarahitā honti, na pana paṇḍakapariyāpannāti etamatthaṃ dassetuṃ ‘‘pariyāpannā na bhavantī’’ti vuttaṃ, yathāvuttesu vā dosesu sabbesu pariyāpannā na bhavanti, bodhisattesu vā pariyāpannā tadantogadhā, paricchinnasaṃsārattā vā pariyāpannā bodhisattā ubhatobyañjanapaṇḍakā na bhavantīti attho. Sabbattha suddhagocarā yasmā, tasmā micchādiṭṭhiṃ na sevanti. Micchādiṭṭhinti natthikāhetukākiriyadiṭṭhiṃ. Bhavābhaveti khuddake ceva mahante ca bhave. Bhojaputteti luddake. Lagananti saṅgo. Aññathāti līnatā. Gāmaṇḍalāti gāmadārakā. Rūpanti vippakāraṃ. Ayaṃ tāva nidānakathā yāya abhidhammassa buddhabhāsitatāsiddhīti atthayojanā kātabbā.
ਨਿਦਾਨਕਥਾવਣ੍ਣਨਾ ਨਿਟ੍ਠਿਤਾ।
Nidānakathāvaṇṇanā niṭṭhitā.
Related texts:
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਧਮ੍ਮਸਙ੍ਗਣੀ-ਅਨੁਟੀਕਾ • Dhammasaṅgaṇī-anuṭīkā / ਸੁਮੇਧਕਥਾવਣ੍ਣਨਾ • Sumedhakathāvaṇṇanā
