| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
7. сад̇д̇аганибаад̇о
7. Sattakanipāto
1. сунд̣̇арасамуд̣̇д̣̇ад̇т̇зраг̇аат̇ааван̣н̣анаа
1. Sundarasamuddattheragāthāvaṇṇanā
сад̇д̇аганибаад̇з алан̇гад̇аад̇иаад̣̇игаа ааяасмад̇о сунд̣̇арасамуд̣̇д̣̇ад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз бун̃н̃аани убажинид̇ваа имасмим̣ б̣уд̣̇д̇хуббаад̣̇з рааж̇аг̇ахз ан̃н̃ад̇арасса махаавибхавасса сздтино буд̇д̇о худ̇ваа ниб̣б̣ад̇д̇и. самуд̣̇д̣̇од̇исса наамам̣ ахоси. руубасамбад̇д̇ияаа бана сунд̣̇арасамуд̣̇д̣̇од̇и бан̃н̃ааяид̇т̇а. со батамаваяз тид̇о бхаг̇авад̇о рааж̇аг̇ахаббавзсз б̣уд̣̇д̇хаанубхаавам̣ д̣̇исваа, бадилад̣̇д̇хасад̣̇д̇хо ниссаран̣аж̇жхаасаяад̇ааяа баб̣б̣аж̇ид̇ваа, лад̣̇д̇хуубасамбад̣̇о самаад̣̇иннад̇худ̇ад̇хаммо рааж̇аг̇ахад̇о саавад̇т̇им̣ г̇анд̇ваа, галяаан̣амид̇д̇асса санд̇игз вибассанаажаарам̣ уг̇г̇ахзд̇ваа, гаммадтаанам̣ ануяун̃ж̇анд̇о вихарад̇и. д̇асса маад̇аа рааж̇аг̇ахз уссавад̣̇ивасз ан̃н̃з сздтибуд̇д̇з сабаж̇аабад̇игз алан̇гад̇абадияад̇д̇з уссавагийл̣ам̣ гийл̣анд̇з д̣̇исваа, буд̇д̇ам̣ ануссарид̇ваа род̣̇ад̇и. д̇ам̣ д̣̇исваа ан̃н̃ад̇араа г̇ан̣игаа род̣̇анагааран̣ам̣ бужчи. саа д̇ассаа д̇ам̣ гааран̣ам̣ гат̇зси. д̇ам̣ суд̇ваа г̇ан̣игаа ‘‘ахам̣ д̇ам̣ аанзссаами, басса д̇аава мама ид̇т̇ибхаава’’нд̇и вад̇ваа ‘‘яад̣̇и звам̣ д̇ам̣язва д̇асса баж̇аабад̇им̣ гад̇ваа имасса гуласса сааминим̣ гариссаамий’’д̇и д̇ааяа б̣ахум̣ д̇ханам̣ д̣̇ад̇ваа , виссаж̇ж̇ид̇аа махад̇аа бариваарзна саавад̇т̇им̣ г̇анд̇ваа, т̇зрасса бин̣д̣ааяа вижаран̣адтаанз згасмим̣ г̇зхз васамаанаа д̣̇ивасз д̣̇ивасз ан̃н̃зхи т̇зрасса саггажжам̣ бин̣д̣абаад̇ам̣ д̣̇аабзси. алан̇гад̇абадияад̇д̇аа жа худ̇ваа суван̣н̣абаад̣̇угаа ааруяха ад̇д̇аанам̣ д̣̇ассзси. ат̇згад̣̇ивасам̣ г̇зхад̣̇ваарзна г̇ажчанд̇ам̣ т̇зрам̣ д̣̇исваа, суван̣н̣абаад̣̇угаа омун̃жид̇ваа, ан̃ж̇алим̣ баг̇г̇аяха бурад̇о г̇ажчанд̇ий наанаббагаарам̣ т̇зрам̣ гааманиманд̇анааяа ниманд̇зси. д̇ам̣ суд̇ваа т̇зро ‘‘бут̇уж̇ж̇анажид̇д̇ам̣ наама жан̃жалам̣, яам̣нууна маяаа ид̣̇аанзва уссаахо гаран̣ийяо’’д̇и д̇ад̇т̇зва тид̇о бхааванам̣ уссуггаабзд̇ваа чал̣абхин̃н̃о ахоси. д̇ам̣ санд̇хааяа вуд̇д̇ам̣ –
Sattakanipāte alaṅkatātiādikā āyasmato sundarasamuddattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinitvā imasmiṃ buddhuppāde rājagahe aññatarassa mahāvibhavassa seṭṭhino putto hutvā nibbatti. Samuddotissa nāmaṃ ahosi. Rūpasampattiyā pana sundarasamuddoti paññāyittha. So paṭhamavaye ṭhito bhagavato rājagahappavese buddhānubhāvaṃ disvā, paṭiladdhasaddho nissaraṇajjhāsayatāya pabbajitvā, laddhūpasampado samādinnadhutadhammo rājagahato sāvatthiṃ gantvā, kalyāṇamittassa santike vipassanācāraṃ uggahetvā, kammaṭṭhānaṃ anuyuñjanto viharati. Tassa mātā rājagahe ussavadivase aññe seṭṭhiputte sapajāpatike alaṅkatapaṭiyatte ussavakīḷaṃ kīḷante disvā, puttaṃ anussaritvā rodati. Taṃ disvā aññatarā gaṇikā rodanakāraṇaṃ pucchi. Sā tassā taṃ kāraṇaṃ kathesi. Taṃ sutvā gaṇikā ‘‘ahaṃ taṃ ānessāmi, passa tāva mama itthibhāva’’nti vatvā ‘‘yadi evaṃ taṃyeva tassa pajāpatiṃ katvā imassa kulassa sāminiṃ karissāmī’’ti tāya bahuṃ dhanaṃ datvā , vissajjitā mahatā parivārena sāvatthiṃ gantvā, therassa piṇḍāya vicaraṇaṭṭhāne ekasmiṃ gehe vasamānā divase divase aññehi therassa sakkaccaṃ piṇḍapātaṃ dāpesi. Alaṅkatapaṭiyattā ca hutvā suvaṇṇapādukā āruyha attānaṃ dassesi. Athekadivasaṃ gehadvārena gacchantaṃ theraṃ disvā, suvaṇṇapādukā omuñcitvā, añjaliṃ paggayha purato gacchantī nānappakāraṃ theraṃ kāmanimantanāya nimantesi. Taṃ sutvā thero ‘‘puthujjanacittaṃ nāma cañcalaṃ, yaṃnūna mayā idāneva ussāho karaṇīyo’’ti tattheva ṭhito bhāvanaṃ ussukkāpetvā chaḷabhiñño ahosi. Taṃ sandhāya vuttaṃ –
459.
459.
‘‘алан̇гад̇аа сувасанаа, маалад̇хаарий вибхуусид̇аа;
‘‘Alaṅkatā suvasanā, māladhārī vibhūsitā;
алад̇д̇агагад̇аабаад̣̇аа, баад̣̇угааруяха взсигаа.
Alattakakatāpādā, pādukāruyha vesikā.
460.
460.
‘‘баад̣̇угаа орухид̇ваана, бурад̇о бан̃ж̇алийгад̇аа;
‘‘Pādukā oruhitvāna, purato pañjalīkatā;
саа мам̣ сан̣хзна муд̣̇унаа, мхид̇абуб̣б̣ам̣ абхаасат̇а.
Sā maṃ saṇhena mudunā, mhitapubbaṃ abhāsatha.
461.
461.
‘‘‘яувааси д̇вам̣ баб̣б̣аж̇ид̇о, д̇идтаахи мама саасанз;
‘‘‘Yuvāsi tvaṃ pabbajito, tiṭṭhāhi mama sāsane;
бхун̃ж̇а маанусагз гаамз, ахам̣ вид̇д̇ам̣ д̣̇ад̣̇аами д̇з;
Bhuñja mānusake kāme, ahaṃ vittaṃ dadāmi te;
сажжам̣ д̇з бадиж̇аанаами, аг̇г̇им̣ ваа д̇з хараамахам̣.
Saccaṃ te paṭijānāmi, aggiṃ vā te harāmahaṃ.
462.
462.
‘‘‘яад̣̇аа ж̇ин̣н̣аа бхависсаама, убхо д̣̇ан̣д̣абарааяанаа;
‘‘‘Yadā jiṇṇā bhavissāma, ubho daṇḍaparāyanā;
убхоби баб̣б̣аж̇иссаама, убхаяад̇т̇а гадаг̇г̇ахо’’’.
Ubhopi pabbajissāma, ubhayattha kaṭaggaho’’’.
463.
463.
‘‘д̇ан̃жа д̣̇исваана яаажанд̇им̣, взсигам̣ бан̃ж̇алийгад̇ам̣;
‘‘Tañca disvāna yācantiṃ, vesikaṃ pañjalīkataṃ;
алан̇гад̇ам̣ сувасанам̣, мажжубаасам̣ва од̣д̣ид̇ам̣.
Alaṅkataṃ suvasanaṃ, maccupāsaṃva oḍḍitaṃ.
464.
464.
‘‘д̇ад̇о мз манасийгааро, яонисо уд̣̇абаж̇ж̇ат̇а;
‘‘Tato me manasīkāro, yoniso udapajjatha;
аад̣̇ийнаво баад̇ураху, ниб̣б̣ид̣̇аа самад̇идтат̇а.
Ādīnavo pāturahu, nibbidā samatiṭṭhatha.
465.
465.
‘‘д̇ад̇о жид̇д̇ам̣ вимужжи мз, басса д̇хаммасуд̇хаммад̇ам̣;
‘‘Tato cittaṃ vimucci me, passa dhammasudhammataṃ;
д̇иссо виж̇ж̇аа ануббад̇д̇аа, гад̇ам̣ б̣уд̣̇д̇хасса саасана’’нд̇и.
Tisso vijjā anuppattā, kataṃ buddhassa sāsana’’nti.
д̇ад̇т̇а маалад̇хаарийд̇и маалаад̇хаариний бил̣анд̇хабубпад̣̇аамаа. вибхуусид̇аад̇и уунадтаанасса бууран̣авасзна бубпзхи жзва г̇анд̇хавилзбанаад̣̇ийхи жа вибхуусид̇аг̇ад̇д̇аа. ‘‘алан̇гад̇аа’’д̇и иминаа хад̇т̇уубаг̇аг̇ийвуубаг̇аад̣̇ийхи аабхаран̣зхи алан̇гаран̣ам̣ ад̇хиббзд̇ам̣. алад̇д̇агагад̇аабаад̣̇аад̇и барин̣ад̇аж̇аяасуманабубпаван̣н̣зна лаакаарасзна ран̃ж̇ид̇ажаран̣аяуг̇ал̣аа. самаасабад̣̇ан̃хзд̇ам̣, ‘‘алад̇д̇агагад̇абаад̣̇аа’’д̇и вад̇д̇аб̣б̣з г̇аат̇аасукад̇т̇ам̣ д̣̇ийгхам̣ гад̇ваа вуд̇д̇ам̣. асамаасабхаавз бана ‘‘д̇ассаа’’д̇и важанасзсо взд̣̇ид̇аб̣б̣о. баад̣̇угааруяха взсигаад̇и згаа руубуубаж̇ийвигаа ид̇т̇ий яат̇аавуд̇д̇авзсаа суван̣н̣абаад̣̇угаа бадимун̃жид̇ваа ‘‘тид̇аа’’д̇и важанасзсо.
Tattha māladhārīti mālādhārinī piḷandhapupphadāmā. Vibhūsitāti ūnaṭṭhānassa pūraṇavasena pupphehi ceva gandhavilepanādīhi ca vibhūsitagattā. ‘‘Alaṅkatā’’ti iminā hatthūpagagīvūpagādīhi ābharaṇehi alaṅkaraṇaṃ adhippetaṃ. Alattakakatāpādāti pariṇatajayasumanapupphavaṇṇena lākhārasena rañjitacaraṇayugaḷā. Samāsapadañhetaṃ, ‘‘alattakakatapādā’’ti vattabbe gāthāsukhatthaṃ dīghaṃ katvā vuttaṃ. Asamāsabhāve pana ‘‘tassā’’ti vacanaseso veditabbo. Pādukāruyha vesikāti ekā rūpūpajīvikā itthī yathāvuttavesā suvaṇṇapādukā paṭimuñcitvā ‘‘ṭhitā’’ti vacanaseso.
баад̣̇угаа орухид̇ваанаад̇и баад̣̇угаахи од̇арид̇ваа, суван̣н̣абаад̣̇угааяо омун̃жид̇ваад̇и ад̇т̇о. бан̃ж̇алийгад̇аад̇и баг̇г̇ахид̇аан̃ж̇алигаа саа взсий мам̣. саамам̣ ваа важанабарамбарам̣ винаа саяамзва абхаасат̇а. сан̣хзнаад̇и мадтзна. муд̣̇унаад̇и мад̇хурзна. ‘‘важанзнаа’’д̇и авуд̇д̇амби вуд̇д̇амзва ход̇и, абхаасат̇аад̇и, вуд̇д̇ад̇д̇аа.
Pādukā oruhitvānāti pādukāhi otaritvā, suvaṇṇapādukāyo omuñcitvāti attho. Pañjalīkatāti paggahitaañjalikā sā vesī maṃ. Sāmaṃ vā vacanaparamparaṃ vinā sayameva abhāsatha. Saṇhenāti maṭṭhena. Mudunāti madhurena. ‘‘Vacanenā’’ti avuttampi vuttameva hoti, abhāsathāti, vuttattā.
яувааси д̇вам̣ баб̣б̣аж̇ид̇од̇и д̇вам̣ баб̣б̣аж̇анд̇о яуваа, д̣̇ахароязва худ̇ваа баб̣б̣аж̇ид̇оси, нану баб̣б̣аж̇анд̇зна сад̇д̇амз д̣̇асагз самбад̇д̇зва баб̣б̣аж̇ид̇аб̣б̣анд̇и д̣̇ассзд̇и. д̇идтаахи мама саасанзд̇и мама важанз д̇идта.
Yuvāsitvaṃ pabbajitoti tvaṃ pabbajanto yuvā, daharoyeva hutvā pabbajitosi, nanu pabbajantena sattame dasake sampatteva pabbajitabbanti dasseti. Tiṭṭhāhi mama sāsaneti mama vacane tiṭṭha.
гим̣ бана д̇анд̇и ааха ‘‘бхун̃ж̇а маанусагз гаамз’’д̇и гаамз барибхун̃ж̇ид̇угаамасса руубасамбад̇д̇и, ваяасамбад̇д̇и, бариваарасамбад̇д̇и, бхог̇асамбад̇д̇и жа ижчид̇аб̣б̣аа. д̇ад̇т̇а ‘‘гуд̇о мз бхог̇асамбад̇д̇ий’’д̇и вад̣̇зяяаад̇и, ааха ‘‘ахам̣ вид̇д̇ам̣ д̣̇ад̣̇аами д̇з’’д̇и. ‘‘д̇аяид̣̇ам̣ важанам̣ гат̇ам̣ сад̣̇д̣̇ахаад̇аб̣б̣а’’нд̇и ман̃н̃зяяаад̇и д̇ам̣ сад̣̇д̣̇ахаабзнд̇ий ааха ‘‘сажжам̣ д̇з бадиж̇аанаами, аг̇г̇им̣ ваа д̇з хараамаха’’нд̇и. ‘‘бхун̃ж̇а маанусагз гаамз, ахам̣ вид̇д̇ам̣ д̣̇ад̣̇аами д̇з’’д̇и яад̣̇ид̣̇ам̣ маяаа бадин̃н̃аад̇ам̣, д̇ам̣ згам̣сзна сажжамзва бадиж̇аанаами, сажз мз на бад̇д̇ияааяаси, аг̇г̇им̣ ваа д̇з хараамахам̣ аг̇г̇им̣ харид̇ваа аг̇г̇ибажжаяам̣ сабат̇ам̣ гаромийд̇и ад̇т̇о. убхаяад̇т̇а гадаг̇г̇аход̇и амхаагам̣ убхиннам̣ ж̇ин̣н̣агаалз баб̣б̣аж̇ж̇анам̣ убхаяад̇т̇а ж̇аяаг̇г̇аахо. яам̣ маяам̣ яаава д̣̇ан̣д̣абарааяанагаалаа бхог̇з бхун̃ж̇аама, звам̣ ид̇халогзби бхог̇зхи на ж̇ийяаама, маяам̣ бажчаа баб̣б̣аж̇иссаама, звам̣ баралогзби бхог̇зхи на ж̇ийяаамаад̇и ад̇хиббааяо. д̇ад̇од̇и д̇ам̣ нимид̇д̇ам̣, гаамзхи ниманд̇знд̇ияаа ‘‘яувааси д̇ва’’нд̇иаад̣̇инаа ‘‘яад̣̇аа ж̇ин̣н̣аа бхависсаамаа’’д̇иаад̣̇инаа жа д̇ассаа взсияаа вуд̇д̇аважанахзд̇у. д̇ан̃хи важанам̣ ан̇гусам̣ гад̇ваа т̇зро саман̣ад̇хаммам̣ гаронд̇о сад̣̇ад̇т̇ам̣ барибуурзси. сзсам̣ хздтаа вуд̇д̇анаяамзва.
Kiṃ pana tanti āha ‘‘bhuñja mānusake kāme’’ti kāme paribhuñjitukāmassa rūpasampatti, vayasampatti, parivārasampatti, bhogasampatti ca icchitabbā. Tattha ‘‘kuto me bhogasampattī’’ti vadeyyāti, āha ‘‘ahaṃ vittaṃ dadāmi te’’ti. ‘‘Tayidaṃ vacanaṃ kathaṃ saddahātabba’’nti maññeyyāti taṃ saddahāpentī āha ‘‘saccaṃ te paṭijānāmi, aggiṃ vā te harāmaha’’nti. ‘‘Bhuñja mānusake kāme, ahaṃ vittaṃ dadāmi te’’ti yadidaṃ mayā paṭiññātaṃ, taṃ ekaṃsena saccameva paṭijānāmi, sace me na pattiyāyasi, aggiṃ vā te harāmahaṃ aggiṃ haritvā aggipaccayaṃ sapathaṃ karomīti attho. Ubhayattha kaṭaggahoti amhākaṃ ubhinnaṃ jiṇṇakāle pabbajjanaṃ ubhayattha jayaggāho. Yaṃ mayaṃ yāva daṇḍaparāyanakālā bhoge bhuñjāma, evaṃ idhalokepi bhogehi na jīyāma, mayaṃ pacchā pabbajissāma, evaṃ paralokepi bhogehi na jīyāmāti adhippāyo. Tatoti taṃ nimittaṃ, kāmehi nimantentiyā ‘‘yuvāsi tva’’ntiādinā ‘‘yadā jiṇṇā bhavissāmā’’tiādinā ca tassā vesiyā vuttavacanahetu. Tañhi vacanaṃ aṅkusaṃ katvā thero samaṇadhammaṃ karonto sadatthaṃ paripūresi. Sesaṃ heṭṭhā vuttanayameva.
сунд̣̇арасамуд̣̇д̣̇ад̇т̇зраг̇аат̇ааван̣н̣анаа нидтид̇аа.
Sundarasamuddattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 1. сунд̣̇арасамуд̣̇д̣̇ад̇т̇зраг̇аат̇аа • 1. Sundarasamuddattheragāthā
