| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
9. сунд̣̇аригасуд̇д̇аван̣н̣анаа
9. Sundarikasuttavaṇṇanā
195. навамз сунд̣̇аригабхаарад̣̇вааж̇од̇и сунд̣̇аригааяа над̣̇ияаа д̇ийрз аг̇г̇иж̇ухан̣зна звам̣лад̣̇д̇ханаамо. сунд̣̇аригааяаад̇и звам̣наамигааяа над̣̇ияаа. аг̇г̇им̣ ж̇ухад̇ийд̇и аахуд̇им̣ багкибанзна ж̇аалзд̇и . аг̇г̇ихуд̇д̇ам̣ барижарад̇ийд̇и аг̇яааяад̇анам̣ саммаж̇ж̇анубалзбанаб̣алигаммаад̣̇инаа баяирубаасад̇и. го ну ко имам̣ хаб̣яасзсам̣ бхун̃ж̇зяяаад̇и со гира б̣раахман̣о аг̇г̇имхи худ̇аавасзсам̣ бааяаасам̣ д̣̇исваа жинд̇зси – ‘‘аг̇г̇имхи д̇аава багкид̇д̇абааяаасо махааб̣рахмунаа бхуд̇д̇о, аяам̣ бана авасзсо ад̇т̇и, д̇ам̣ яад̣̇и б̣рахмуно мукад̇о ж̇аад̇асса б̣раахман̣асса д̣̇ад̣̇зяяам̣, звам̣ мз бид̇араа саха буд̇д̇оби санд̇аббид̇о бхавзяяа, сувисод̇хид̇о жасса б̣рахмалогаг̇аамимаг̇г̇о’’д̇и. со б̣раахман̣асса д̣̇ассанад̇т̇ам̣ удтааяаасанаа жад̇уд̣̇д̣̇исаа анувилогзси, ‘‘го ну ко имам̣ хаб̣яасзсам̣ бхун̃ж̇зяяаа’’д̇и?
195. Navame sundarikabhāradvājoti sundarikāya nadiyā tīre aggijuhaṇena evaṃladdhanāmo. Sundarikāyāti evaṃnāmikāya nadiyā. Aggiṃjuhatīti āhutiṃ pakkhipanena jāleti . Aggihuttaṃ paricaratīti agyāyatanaṃ sammajjanupalepanabalikammādinā payirupāsati. Ko nu kho imaṃ habyasesaṃ bhuñjeyyāti so kira brāhmaṇo aggimhi hutāvasesaṃ pāyāsaṃ disvā cintesi – ‘‘aggimhi tāva pakkhittapāyāso mahābrahmunā bhutto, ayaṃ pana avaseso atthi, taṃ yadi brahmuno mukhato jātassa brāhmaṇassa dadeyyaṃ, evaṃ me pitarā saha puttopi santappito bhaveyya, suvisodhito cassa brahmalokagāmimaggo’’ti. So brāhmaṇassa dassanatthaṃ uṭṭhāyāsanā catuddisā anuvilokesi, ‘‘ko nu kho imaṃ habyasesaṃ bhuñjeyyā’’ti?
ругкамуулзд̇и д̇асмим̣ ванасан̣д̣з ж̇здтагаругкасса муулз. сасийсам̣ бааруд̇ам̣ нисиннанд̇и саха сийсзна бааруд̇агааяам̣ нисиннам̣. гасмаа бана бхаг̇аваа д̇ад̇т̇а нисийд̣̇и? бхаг̇аваа гира бажжуусасамаяз логам̣ ологзнд̇о имам̣ б̣раахман̣ам̣ д̣̇исваа жинд̇зси – аяам̣ б̣раахман̣о зваруубам̣ аг̇г̇абааяаасам̣ г̇ахзд̇ваа ‘‘махааб̣рахмаанам̣ бхож̇змий’’д̇и аг̇г̇имхи жхаабзнд̇о апалам̣ гарод̇и…бз… жад̇д̇ааро маг̇г̇з жзва жад̇д̇аари жа палаани д̣̇змийд̇и. д̇асмаа гаалассзва вудтааяа сарийрабадиж̇аг̇г̇анам̣ гад̇ваа бад̇д̇ажийварам̣ аад̣̇ааяа г̇анд̇ваа вуд̇д̇анаязна д̇асмим̣ ругкамуулз нисийд̣̇и. ат̇а гасмаа сасийсам̣ баарубийд̇и? химабаад̇асса жа сийд̇аваад̇асса жа бадиб̣аахан̣ад̇т̇ам̣, бадиб̣алова зд̇ам̣ д̇ат̇ааг̇ад̇о ад̇хиваасзд̇ум̣. сажз бана абаарубид̇ваа нисийд̣̇зяяа, б̣раахман̣о д̣̇уурад̇ова сан̃ж̇аанид̇ваа нивад̇д̇зяяа, звам̣ сад̇и гат̇аа наббавад̇д̇зяяа. ид̇и бхаг̇аваа – ‘‘б̣раахман̣з ааг̇ад̇з сийсам̣ вивариссаами, ат̇а мам̣ со д̣̇исваа гат̇ам̣ бавад̇д̇зссад̇и, д̇ассаахам̣ гат̇аанусаарзна д̇хаммам̣ д̣̇зсзссаамий’’д̇и гат̇аабавад̇д̇анад̇т̇ам̣ звамагааси.
Rukkhamūleti tasmiṃ vanasaṇḍe jeṭṭhakarukkhassa mūle. Sasīsaṃ pārutaṃ nisinnanti saha sīsena pārutakāyaṃ nisinnaṃ. Kasmā pana bhagavā tattha nisīdi? Bhagavā kira paccūsasamaye lokaṃ olokento imaṃ brāhmaṇaṃ disvā cintesi – ayaṃ brāhmaṇo evarūpaṃ aggapāyāsaṃ gahetvā ‘‘mahābrahmānaṃ bhojemī’’ti aggimhi jhāpento aphalaṃ karoti…pe… cattāro magge ceva cattāri ca phalāni demīti. Tasmā kālasseva vuṭṭhāya sarīrapaṭijagganaṃ katvā pattacīvaraṃ ādāya gantvā vuttanayena tasmiṃ rukkhamūle nisīdi. Atha kasmā sasīsaṃ pārupīti? Himapātassa ca sītavātassa ca paṭibāhaṇatthaṃ, paṭibalova etaṃ tathāgato adhivāsetuṃ. Sace pana apārupitvā nisīdeyya, brāhmaṇo dūratova sañjānitvā nivatteyya, evaṃ sati kathā nappavatteyya. Iti bhagavā – ‘‘brāhmaṇe āgate sīsaṃ vivarissāmi, atha maṃ so disvā kathaṃ pavattessati, tassāhaṃ kathānusārena dhammaṃ desessāmī’’ti kathāpavattanatthaṃ evamakāsi.
убасан̇гамийд̇и б̣раахман̣о – ‘‘аяам̣ сасийсам̣ баарубид̇ваа саб̣б̣арад̇д̇им̣ бад̇хаанамануяуд̇д̇о. имасса д̣̇агкин̣од̣̇агам̣ д̣̇ад̇ваа имам̣ хаб̣яасзсам̣ д̣̇ассаамий’’д̇и, б̣раахман̣асан̃н̃ий худ̇ваа убасан̇гами. мун̣д̣о аяам̣ бхавам̣, мун̣д̣аго аяам̣ бхаванд̇и сийсз виварид̇амад̇д̇з нийжагзсанд̇ам̣ д̣̇исваа ‘‘мун̣д̣о’’д̇и ааха. д̇ад̇о судтуд̇арам̣ ологзнд̇о бавад̇д̇амад̇д̇амби сикам̣ ад̣̇исваа хийл̣знд̇о ‘‘мун̣д̣аго’’д̇и ааха. д̇ад̇оваад̇и яад̇т̇а тид̇о ад̣̇д̣̇аса, д̇амхаава бад̣̇зсаа. мун̣д̣ааби хийд̇и гзнажи гааран̣зна мун̣д̣ид̇асийсааби хонд̇и.
Upasaṅkamīti brāhmaṇo – ‘‘ayaṃ sasīsaṃ pārupitvā sabbarattiṃ padhānamanuyutto. Imassa dakkhiṇodakaṃ datvā imaṃ habyasesaṃ dassāmī’’ti, brāhmaṇasaññī hutvā upasaṅkami. Muṇḍo ayaṃ bhavaṃ, muṇḍako ayaṃ bhavanti sīse vivaritamatte nīcakesantaṃ disvā ‘‘muṇḍo’’ti āha. Tato suṭṭhutaraṃ olokento pavattamattampi sikhaṃ adisvā hīḷento ‘‘muṇḍako’’ti āha. Tatovāti yattha ṭhito addasa, tamhāva padesā. Muṇḍāpi hīti kenaci kāraṇena muṇḍitasīsāpi honti.
маа ж̇аад̇им̣ бужчаад̇и яад̣̇и д̣̇аанасса махабпалад̇ам̣ бажжаасийсаси, ж̇аад̇им̣ маа бужча. агааран̣ам̣ хи д̣̇агкин̣зяяабхаавасса ж̇аад̇и. жаран̣ан̃жа бужчаад̇и абижа ко сийлаад̣̇иг̇ун̣абхзд̣̇ам̣ жаран̣ам̣ бужча. зд̇ам̣ хи д̣̇агкин̣зяяабхаавасса гааран̣ам̣. ид̣̇аанисса д̇амад̇т̇ам̣ вибхаавзнд̇о гадтаа хавз ж̇ааяад̇и ж̇аад̇авзд̣̇од̇иаад̣̇имааха . д̇ад̇рааяам̣ ад̇хиббааяо – ид̇ха гадтаа аг̇г̇и ж̇ааяад̇и, на жа со саалаад̣̇игадтаа ж̇аад̇ова аг̇г̇игижжам̣ гарод̇и, саабаана-д̣̇он̣иаад̣̇игадтаа ж̇аад̇о на гарод̇и, ад̇д̇ано бана ажжияаад̣̇иг̇ун̣асамбад̇д̇ияаа яад̇о ваа д̇ад̇о ваа ж̇аад̇о гарод̇иязва. звам̣ на б̣раахман̣агулаад̣̇ийсу ж̇аад̇ова д̣̇агкин̣зяяо ход̇и, жан̣д̣аалагулаад̣̇ийсу ж̇аад̇о на ход̇и, абижа ко нийжагулиноби ужжагулиноби кийн̣аасава-муни д̇хид̇имаа хирийнисзд̇хо ааж̇аанийяо ход̇и. имааяа д̇хид̇ихирибамогкааяа г̇ун̣асамбад̇д̇ияаа ж̇аад̇имаа уд̇д̇амад̣̇агкин̣зяяо ход̇и. со хи д̇хид̇ияаа г̇ун̣з д̇хаарзд̇и, хирияаа д̣̇осз нисзд̇хзд̇ийд̇и. абижзд̇т̇а мунийд̇и монад̇хаммзна саманнааг̇ад̇о. д̇хид̇имаад̇и вийрияаваа. ааж̇аанийяод̇и гааран̣аагааран̣аж̇аананаго. хирийнисзд̇ход̇и хирияаа баабаани нисзд̇хзд̇ваа тид̇о.
Mājātiṃ pucchāti yadi dānassa mahapphalataṃ paccāsīsasi, jātiṃ mā puccha. Akāraṇaṃ hi dakkhiṇeyyabhāvassa jāti. Caraṇañca pucchāti apica kho sīlādiguṇabhedaṃ caraṇaṃ puccha. Etaṃ hi dakkhiṇeyyabhāvassa kāraṇaṃ. Idānissa tamatthaṃ vibhāvento kaṭṭhā have jāyati jātavedotiādimāha . Tatrāyaṃ adhippāyo – idha kaṭṭhā aggi jāyati, na ca so sālādikaṭṭhā jātova aggikiccaṃ karoti, sāpāna-doṇiādikaṭṭhā jāto na karoti, attano pana acciyādiguṇasampattiyā yato vā tato vā jāto karotiyeva. Evaṃ na brāhmaṇakulādīsu jātova dakkhiṇeyyo hoti, caṇḍālakulādīsu jāto na hoti, apica kho nīcakulinopi uccakulinopi khīṇāsava-muni dhitimā hirīnisedho ājānīyo hoti. Imāya dhitihiripamokkhāya guṇasampattiyā jātimā uttamadakkhiṇeyyo hoti. So hi dhitiyā guṇe dhāreti, hiriyā dose nisedhetīti. Apicettha munīti monadhammena samannāgato. Dhitimāti vīriyavā. Ājānīyoti kāraṇākāraṇajānanako. Hirīnisedhoti hiriyā pāpāni nisedhetvā ṭhito.
сажжзна д̣̇анд̇од̇и барамад̇т̇асажжзна д̣̇анд̇о. д̣̇амасаа убзд̇од̇и инд̣̇рияад̣̇амзна убзд̇о. взд̣̇анд̇аг̇ууд̇и жад̇уннам̣ маг̇г̇авзд̣̇аанам̣ анд̇ам̣, жад̇уухи ваа маг̇г̇авзд̣̇зхи гилзсаанам̣ анд̇ам̣ г̇ад̇о. вусид̇аб̣рахмажарияод̇и маг̇г̇аб̣рахмажарияаваасам̣ вуд̇т̇о. яан̃н̃обанийд̇од̇и убанийд̇аяан̃н̃о бадияаад̣̇ид̇аяан̃н̃о жа. д̇амубавхаязт̇аад̇и язна яан̃н̃о бадияаад̣̇ид̇о, со д̇ам̣ барамад̇т̇аб̣раахман̣ам̣ авхаязяяа. ‘‘инд̣̇амавхаяаама, сомамавхаяаама, варун̣амавхаяаама, ийсаанамавхаяаама, яаамамавхаяаамаа’’д̇и ид̣̇ам̣ бана авхаанам̣ нирад̇т̇агам̣. гаалзнаад̇и авхаяанд̇о жа ‘‘гаало, бханд̇з, нидтид̇ам̣ бхад̇д̇а’’нд̇и анд̇омаж̇жханхигагаалзязва д̇ам̣ убавхаязяяа. со ж̇ухад̇и д̣̇агкин̣зяязд̇и яо звам̣ гаалз кийн̣аасавам̣ ааманд̇зд̇ваа д̇ад̇т̇а жад̇убажжаяад̣̇агкин̣ам̣ бад̇идтабзд̇и, со д̣̇агкин̣зяяз ж̇ухад̇и наама, на ажзд̇анз аг̇г̇имхи багкибанд̇о.
Saccena dantoti paramatthasaccena danto. Damasā upetoti indriyadamena upeto. Vedantagūti catunnaṃ maggavedānaṃ antaṃ, catūhi vā maggavedehi kilesānaṃ antaṃ gato. Vusitabrahmacariyoti maggabrahmacariyavāsaṃ vuttho. Yaññopanītoti upanītayañño paṭiyāditayañño ca. Tamupavhayethāti yena yañño paṭiyādito, so taṃ paramatthabrāhmaṇaṃ avhayeyya. ‘‘Indamavhayāma, somamavhayāma, varuṇamavhayāma, īsānamavhayāma, yāmamavhayāmā’’ti idaṃ pana avhānaṃ niratthakaṃ. Kālenāti avhayanto ca ‘‘kālo, bhante, niṭṭhitaṃ bhatta’’nti antomajjhanhikakāleyeva taṃ upavhayeyya. So juhati dakkhiṇeyyeti yo evaṃ kāle khīṇāsavaṃ āmantetvā tattha catupaccayadakkhiṇaṃ patiṭṭhapeti, so dakkhiṇeyye juhati nāma, na acetane aggimhi pakkhipanto.
ид̇и б̣раахман̣о бхаг̇авад̇о гат̇ам̣ сун̣анд̇о басийд̣̇ид̇ваа ид̣̇аани ад̇д̇ано басаад̣̇ам̣ аавигаронд̇о ад̣̇д̇хаа суяидтанд̇иаад̣̇имааха. д̇ассад̇т̇о – ад̣̇д̇хаа мама яид̣̇ам̣ ид̣̇аани суяидтан̃жа сухуд̇ан̃жа бхависсад̇и, буб̣б̣з бана аг̇г̇имхи жхаабид̇ам̣ нирад̇т̇агам̣ ахосийд̇и. ан̃н̃о ж̇анод̇и ‘‘ахам̣ б̣раахман̣о, ахам̣ б̣раахман̣о’’д̇и вад̣̇анд̇о анд̇хаб̣аалабут̇уж̇ж̇ано. хаб̣яасзсанд̇и худ̇асзсам̣. бхун̃ж̇ад̇у бхаванд̇иаад̣̇и буримасуд̇д̇з вуд̇д̇анаязнзва взд̣̇ид̇аб̣б̣ам̣.
Iti brāhmaṇo bhagavato kathaṃ suṇanto pasīditvā idāni attano pasādaṃ āvikaronto addhā suyiṭṭhantiādimāha. Tassattho – addhā mama yidaṃ idāni suyiṭṭhañca suhutañca bhavissati, pubbe pana aggimhi jhāpitaṃ niratthakaṃ ahosīti. Añño janoti ‘‘ahaṃ brāhmaṇo, ahaṃ brāhmaṇo’’ti vadanto andhabālaputhujjano. Habyasesanti hutasesaṃ. Bhuñjatu bhavantiādi purimasutte vuttanayeneva veditabbaṃ.
на квааханд̇и на ко ахам̣. гасмаа банзвамаахаад̇и? д̇асмим̣ гира бхож̇анз убахадамад̇д̇зва ‘‘сад̇т̇аа бхун̃ж̇иссад̇ий’’д̇и сан̃н̃ааяа жад̇уусу махаад̣̇ийбзсу д̣̇вийсу барид̇д̇ад̣̇ийбасахассзсу д̣̇звад̇аа бубпапалаад̣̇ийни жзва саббинаванийд̇ад̇зламад̇хупаан̣ид̇аад̣̇ийни жа аад̣̇ааяа мад̇хубадалам̣ бийл̣зд̇ваа мад̇хум̣ г̇ан̣ханд̇ияо вияа д̣̇иб̣б̣аанубхаавзна ниб̣б̣ад̇д̇ид̇ож̇амзва г̇ахзд̇ваа багкибим̣су. д̇зна д̇ам̣ сукумад̇д̇ам̣ г̇ад̇ам̣, мануссаанан̃жа ол̣ааригам̣ вад̇т̇ууд̇и д̇зсам̣ д̇аава ол̣ааригавад̇т̇уд̇ааяа саммаа барин̣аамам̣ на г̇ажчад̇и. г̇ояуусз бана д̇илаб̣ийж̇аани багкибид̇ваа баггад̇д̇аа ол̣ааригамиссагам̣ ж̇аад̇ам̣, д̣̇зваанан̃жа сукумам̣ вад̇т̇ууд̇и д̇зсам̣ сукумавад̇т̇уд̇ааяа саммаа барин̣аамам̣ на г̇ажчад̇и. сугкавибассагакийн̣аасавассааби гужчияам̣ на барин̣амад̇и. адтасамаабад̇д̇илаабхийкийн̣аасавасса бана самаабад̇д̇иб̣алзна барин̣аамзяяа. бхаг̇авад̇о бана баагад̇игзнзва гаммаж̇ад̇зж̇зна барин̣аамзяяа.
Na khvāhanti na kho ahaṃ. Kasmā panevamāhāti? Tasmiṃ kira bhojane upahaṭamatteva ‘‘satthā bhuñjissatī’’ti saññāya catūsu mahādīpesu dvīsu parittadīpasahassesu devatā pupphaphalādīni ceva sappinavanītatelamadhuphāṇitādīni ca ādāya madhupaṭalaṃ pīḷetvā madhuṃ gaṇhantiyo viya dibbānubhāvena nibbattitojameva gahetvā pakkhipiṃsu. Tena taṃ sukhumattaṃ gataṃ, manussānañca oḷārikaṃ vatthūti tesaṃ tāva oḷārikavatthutāya sammā pariṇāmaṃ na gacchati. Goyūse pana tilabījāni pakkhipitvā pakkattā oḷārikamissakaṃ jātaṃ, devānañca sukhumaṃ vatthūti tesaṃ sukhumavatthutāya sammā pariṇāmaṃ na gacchati. Sukkhavipassakakhīṇāsavassāpi kucchiyaṃ na pariṇamati. Aṭṭhasamāpattilābhīkhīṇāsavassa pana samāpattibalena pariṇāmeyya. Bhagavato pana pākatikeneva kammajatejena pariṇāmeyya.
аббахарид̇зд̇и ахарид̇з. сажз хи харид̇зсу д̇ин̣зсу багкибзяяа, синид̣̇д̇хабааяаасзна д̇ин̣аани бууд̇ийни бхавзяяум̣. б̣уд̣̇д̇хаа жа бхууд̇аг̇аамасигкаабад̣̇ам̣ на вийд̇иггаманд̇и, д̇асмаа звамааха. яад̇т̇а бана г̇алаббамаан̣аани махаад̇ин̣аани, д̇аад̣̇исз таанз багкибид̇ум̣ ваддад̇и. аббаан̣агзд̇и саббаан̣агасмим̣ хи барид̇д̇агз уд̣̇агз багкид̇д̇з баан̣агаа маранд̇и, д̇асмаа звамааха. яам̣ бана г̇амбхийрам̣ махаауд̣̇агам̣ ход̇и, баад̇исад̇зби баад̇исахассзби багкид̇д̇з на аалул̣ад̇и, д̇ат̇ааруубз уд̣̇агз ваддад̇и. обилаабзсийд̇и суван̣н̣абаад̇ияаа сад̣̇д̇хим̣язва нимуж̇ж̇аабзси. жижжидааяад̇и жидижидааяад̇ийд̇и зваруубам̣ сад̣̇д̣̇ам̣ гарод̇и. гим̣ банзса бааяаасасса аанубхааво, уд̣̇ааху д̇ат̇ааг̇ад̇ассаад̇и? д̇ат̇ааг̇ад̇асса. аяам̣ хи б̣раахман̣о д̇ам̣ бааяаасам̣ обилаабзд̇ваа уммаг̇г̇ам̣ ааруяха сад̇т̇у санд̇игам̣ анааг̇анд̇ваава г̇ажчзяяа, ат̇а бхаг̇аваа – ‘‘зд̇д̇агам̣ ажчарияам̣ д̣̇исваа мама санд̇игам̣ ааг̇амиссад̇и. ат̇ассаахам̣ д̇хаммад̣̇зсанааяа мижчаад̣̇идтиг̇ахан̣ам̣ бхинд̣̇ид̇ваа саасанз од̇аарзд̇ваа амад̇абаанам̣ бааязссаамий’’д̇и ад̇хидтаанаб̣алзна звамагааси.
Appahariteti aharite. Sace hi haritesu tiṇesu pakkhipeyya, siniddhapāyāsena tiṇāni pūtīni bhaveyyuṃ. Buddhā ca bhūtagāmasikkhāpadaṃ na vītikkamanti, tasmā evamāha. Yattha pana galappamāṇāni mahātiṇāni, tādise ṭhāne pakkhipituṃ vaṭṭati. Appāṇaketi sappāṇakasmiṃ hi parittake udake pakkhitte pāṇakā maranti, tasmā evamāha. Yaṃ pana gambhīraṃ mahāudakaṃ hoti, pātisatepi pātisahassepi pakkhitte na āluḷati, tathārūpe udake vaṭṭati. Opilāpesīti suvaṇṇapātiyā saddhiṃyeva nimujjāpesi. Cicciṭāyati ciṭiciṭāyatīti evarūpaṃ saddaṃ karoti. Kiṃ panesa pāyāsassa ānubhāvo, udāhu tathāgatassāti? Tathāgatassa. Ayaṃ hi brāhmaṇo taṃ pāyāsaṃ opilāpetvā ummaggaṃ āruyha satthu santikaṃ anāgantvāva gaccheyya, atha bhagavā – ‘‘ettakaṃ acchariyaṃ disvā mama santikaṃ āgamissati. Athassāhaṃ dhammadesanāya micchādiṭṭhigahaṇaṃ bhinditvā sāsane otāretvā amatapānaṃ pāyessāmī’’ti adhiṭṭhānabalena evamakāsi.
д̣̇аару самаад̣̇ахаанод̇и д̣̇аарум̣ жхаабаяамаано. б̣ахид̣̇д̇хаа хи зд̇анд̇и зд̇ам̣ д̣̇ааруж̇жхаабанам̣ наама арияад̇хаммад̇о б̣ахид̣̇д̇хаа. яад̣̇и зд̇зна суд̣̇д̇хи бхавзяяа, яз д̣̇авад̣аахагаад̣̇аяо б̣ахууни д̣̇аарууни жхаабзнд̇и, д̇з батамад̇арам̣ суж̇жхзяяум̣. гусалаад̇и канд̇хаад̣̇ийсу гусалаа. аж̇жхад̇д̇амзвуж̇ж̇алаяаами ж̇од̇инд̇и нияагаж̇жхад̇д̇з ад̇д̇ано санд̇аанасмим̣язва н̃аан̣аж̇од̇им̣ ж̇аалзми. нижжаг̇г̇инийд̇и ааваж̇ж̇анабадиб̣ад̣̇д̇хзна саб̣б̣ан̃н̃уд̇ан̃н̃аан̣зна нижжам̣ баж̇ж̇алид̇аг̇г̇и. нижжасамаахид̇ад̇д̇од̇и нижжам̣ саммаа табид̇ажид̇д̇о. б̣рахмажарияам̣ жараамийд̇и б̣од̇химан̣д̣з жарид̇ам̣ б̣рахмажарияам̣ г̇ахзд̇ваа звам̣ вад̣̇ад̇и.
Dārusamādahānoti dāruṃ jhāpayamāno. Bahiddhā hi etanti etaṃ dārujjhāpanaṃ nāma ariyadhammato bahiddhā. Yadi etena suddhi bhaveyya, ye davaḍāhakādayo bahūni dārūni jhāpenti, te paṭhamataraṃ sujjheyyuṃ. Kusalāti khandhādīsu kusalā. Ajjhattamevujjalayāmi jotinti niyakajjhatte attano santānasmiṃyeva ñāṇajotiṃ jālemi. Niccagginīti āvajjanapaṭibaddhena sabbaññutaññāṇena niccaṃ pajjalitaggi. Niccasamāhitattoti niccaṃ sammā ṭhapitacitto. Brahmacariyaṃ carāmīti bodhimaṇḍe caritaṃ brahmacariyaṃ gahetvā evaṃ vadati.
маано хи д̇з, б̣раахман̣а, каарибхаарод̇и яат̇аа каарибхааро канд̇хзна ваяхамаано убари тид̇оби агганд̇агганд̇адтаанз бат̇авияаа сад̣̇д̇хим̣ пусзд̇и, звамзва ж̇аад̇иг̇од̇д̇агулаад̣̇ийни маанавад̇т̇ууни ниссааяа уссаабид̇о мааноби д̇ад̇т̇а д̇ад̇т̇а иссам̣ уббаад̣̇знд̇о жад̇уусу абааязсу сам̣сийд̣̇аабзд̇и. д̇знааха ‘‘маано хи д̇з, б̣раахман̣а, каарибхааро’’д̇и . год̇хо д̇хуумод̇и д̇ава н̃аан̣аг̇г̇исса убаггилзсадтзна год̇хо д̇хумо. д̇зна хи д̇з убаггилидто н̃аан̣аг̇г̇и на вирожад̇и. бхасмани мосаваж̇ж̇анд̇и нирож̇адтзна мусааваад̣̇о чааригаа наама. яат̇аа хи чааригааяа бадижчанно аг̇г̇и на ж̇од̇зд̇и, звам̣ д̇з мусааваад̣̇зна бадижчаннам̣ н̃аан̣анд̇и д̣̇ассзд̇и. ж̇ивхаа суж̇аад̇и яат̇аа д̇уяхам̣ суван̣н̣араж̇ад̇алохагадтамад̇д̇игаасу ан̃н̃ад̇арамаяаа яааг̇аяаж̇анад̇т̇ааяа суж̇аа ход̇и, звам̣ маяхам̣ д̇хаммаяааг̇ам̣ яаж̇анад̇т̇ааяа бахууд̇аж̇ивхаа суж̇аад̇и вад̣̇ад̇и. хад̣̇аяам̣ ж̇од̇идтаананд̇и яат̇аа д̇уяхам̣ над̣̇ийд̇ийрз ж̇од̇идтаанам̣, звам̣ маяхам̣ д̇хаммаяааг̇асса яаж̇анадтаанад̇т̇зна сад̇д̇аанам̣ хад̣̇аяам̣ ж̇од̇идтаанам̣. ад̇д̇аад̇и жид̇д̇ам̣.
Mānohi te, brāhmaṇa, khāribhāroti yathā khāribhāro khandhena vayhamāno upari ṭhitopi akkantakkantaṭṭhāne pathaviyā saddhiṃ phuseti, evameva jātigottakulādīni mānavatthūni nissāya ussāpito mānopi tattha tattha issaṃ uppādento catūsu apāyesu saṃsīdāpeti. Tenāha ‘‘māno hi te, brāhmaṇa, khāribhāro’’ti . Kodho dhūmoti tava ñāṇaggissa upakkilesaṭṭhena kodho dhumo. Tena hi te upakkiliṭṭho ñāṇaggi na virocati. Bhasmani mosavajjanti nirojaṭṭhena musāvādo chārikā nāma. Yathā hi chārikāya paṭicchanno aggi na joteti, evaṃ te musāvādena paṭicchannaṃ ñāṇanti dasseti. Jivhā sujāti yathā tuyhaṃ suvaṇṇarajatalohakaṭṭhamattikāsu aññataramayā yāgayajanatthāya sujā hoti, evaṃ mayhaṃ dhammayāgaṃ yajanatthāya pahūtajivhā sujāti vadati. Hadayaṃ jotiṭṭhānanti yathā tuyhaṃ nadītīre jotiṭṭhānaṃ, evaṃ mayhaṃ dhammayāgassa yajanaṭṭhānatthena sattānaṃ hadayaṃ jotiṭṭhānaṃ. Attāti cittaṃ.
д̇хаммо рахад̣̇од̇и яат̇аа д̇вам̣ аг̇г̇им̣ барижарид̇ваа д̇хуумачааригасзд̣̇агилидтасарийро сунд̣̇аригам̣ над̣̇им̣ од̇арид̇ваа нхааяаси, звам̣ маяхам̣ сунд̣̇аригаасад̣̇исзна б̣аахирзна рахад̣̇зна ад̇т̇о над̇т̇и, адтан̇г̇игамаг̇г̇ад̇хаммо бана маяхам̣ рахад̣̇о, д̇ад̇раахам̣ баан̣асад̇амби баан̣асахассамби жад̇ураасийд̇ибаан̣асахассааниби згаббахаарзна нхаабзми. сийлад̇ид̇т̇од̇и д̇асса бана мз д̇хаммарахад̣̇асса жад̇убаарисуд̣̇д̇хисийлам̣ д̇ид̇т̇анд̇и д̣̇ассзд̇и. анаавилод̇и яат̇аа д̇уяхам̣ сунд̣̇аригаа над̣̇ий жад̇уухи бан̃жахи згад̇о нхааяанд̇зхи хздтубарияаваалигаа аалул̣аа ход̇и , на звам̣ маяхам̣ рахад̣̇о, анзгасад̇асахассзсуби баан̣зсу од̇арид̇ваа нхааяанд̇зсу со анаавило виббасаннова ход̇и. саб̣бхи сад̇ам̣ басад̇т̇од̇и бан̣д̣ид̇зхи бан̣д̣ид̇аанам̣ басадто. уд̇д̇амад̇т̇зна ваа со саб̣бхийд̇и вужжад̇и, бан̣д̣ид̇зхи басад̇т̇ад̇д̇аа сад̇ам̣ басад̇т̇о. д̇аранд̇и бааранд̇и ниб̣б̣аанабаарам̣ г̇ажчанд̇и.
Dhammo rahadoti yathā tvaṃ aggiṃ paricaritvā dhūmachārikasedakiliṭṭhasarīro sundarikaṃ nadiṃ otaritvā nhāyasi, evaṃ mayhaṃ sundarikāsadisena bāhirena rahadena attho natthi, aṭṭhaṅgikamaggadhammo pana mayhaṃ rahado, tatrāhaṃ pāṇasatampi pāṇasahassampi caturāsītipāṇasahassānipi ekappahārena nhāpemi. Sīlatitthoti tassa pana me dhammarahadassa catupārisuddhisīlaṃ titthanti dasseti. Anāviloti yathā tuyhaṃ sundarikā nadī catūhi pañcahi ekato nhāyantehi heṭṭhupariyavālikā āluḷā hoti , na evaṃ mayhaṃ rahado, anekasatasahassesupi pāṇesu otaritvā nhāyantesu so anāvilo vippasannova hoti. Sabbhi sataṃ pasatthoti paṇḍitehi paṇḍitānaṃ pasaṭṭho. Uttamatthena vā so sabbhīti vuccati, paṇḍitehi pasatthattā sataṃ pasattho. Taranti pāranti nibbānapāraṃ gacchanti.
ид̣̇аани арияамаг̇г̇арахад̣̇асса ан̇г̇аани уд̣̇д̇харид̇ваа д̣̇ассзнд̇о сажжам̣ д̇хаммод̇иаад̣̇имааха. д̇ад̇т̇а сажжанд̇и важийсажжам̣. д̇хаммод̇и иминаа д̣̇идтисан̇габбавааяаамасад̇исамаад̇хаяо д̣̇ассзд̇и. сам̣яамод̇и иминаа гамманд̇ааж̇ийваа г̇ахид̇аа. сажжанд̇и ваа иминаа маг̇г̇асажжам̣ г̇ахид̇ам̣. саа ад̇т̇ад̇о саммаад̣̇идти. вуд̇д̇ан̃хзд̇ам̣ – ‘‘саммаад̣̇идти маг̇г̇о жзва хзд̇у жаа’’д̇и (д̇ха. са. 1039). саммаад̣̇идтияаа бана г̇ахид̇ааяа д̇аг̇г̇ад̇игад̇д̇аа саммаасан̇габбо г̇ахид̇ова ход̇и. д̇хаммод̇и иминаа вааяаамасад̇исамаад̇хаяо. сам̣яамод̇и иминаа ваажаагамманд̇ааж̇ийваа. звамби адтан̇г̇иго маг̇г̇о д̣̇ассид̇о ход̇и. ат̇а ваа сажжанд̇и барамад̇т̇асажжам̣ , д̇ам̣ ад̇т̇ад̇о ниб̣б̣аанам̣. д̇хаммод̇ибад̣̇зна д̣̇идти сан̇габбо вааяаамо сад̇и самаад̇хийд̇и бан̃жан̇г̇аани г̇ахид̇аани. сам̣яамод̇и ваажаа гамманд̇о ааж̇ийвод̇и д̇ийн̣и. звамби адтан̇г̇иго маг̇г̇о д̣̇ассид̇о ход̇и. б̣рахмажарияанд̇и зд̇ам̣ б̣рахмажарияам̣ наама. маж̇жхз сид̇аад̇и сассад̇ужчзд̣̇з важ̇ж̇зд̇ваа маж̇жхз ниссид̇аа. б̣рахмабад̇д̇ийд̇и сздтабад̇д̇и. са д̇уж̇ж̇убхууд̇зсу намо гарохийд̇и зд̇т̇а д̇а-гааро бад̣̇асанд̇хигаро, са д̇вам̣ уж̇убхууд̇зсу кийн̣аасавзсу намо гарохийд̇и ад̇т̇о. д̇амахам̣ нарам̣ д̇хаммасаарийд̇и б̣руумийд̇и яо звам̣ бадибаж̇ж̇ад̇и, д̇амахам̣ буг̇г̇алам̣ ‘‘д̇хаммасаарий зсо д̇хаммасаарияаа бадижчанно’’д̇и жа ‘‘гусалад̇хаммзхи агусалад̇хаммз саарзд̇ваа тид̇о’’д̇и ваад̇и вад̣̇аамийд̇и. навамам̣.
Idāni ariyamaggarahadassa aṅgāni uddharitvā dassento saccaṃ dhammotiādimāha. Tattha saccanti vacīsaccaṃ. Dhammoti iminā diṭṭhisaṅkappavāyāmasatisamādhayo dasseti. Saṃyamoti iminā kammantājīvā gahitā. Saccanti vā iminā maggasaccaṃ gahitaṃ. Sā atthato sammādiṭṭhi. Vuttañhetaṃ – ‘‘sammādiṭṭhi maggo ceva hetu cā’’ti (dha. sa. 1039). Sammādiṭṭhiyā pana gahitāya taggatikattā sammāsaṅkappo gahitova hoti. Dhammoti iminā vāyāmasatisamādhayo. Saṃyamoti iminā vācākammantājīvā. Evampi aṭṭhaṅgiko maggo dassito hoti. Atha vā saccanti paramatthasaccaṃ , taṃ atthato nibbānaṃ. Dhammotipadena diṭṭhi saṅkappo vāyāmo sati samādhīti pañcaṅgāni gahitāni. Saṃyamoti vācā kammanto ājīvoti tīṇi. Evampi aṭṭhaṅgiko maggo dassito hoti. Brahmacariyanti etaṃ brahmacariyaṃ nāma. Majjhe sitāti sassatucchede vajjetvā majjhe nissitā. Brahmapattīti seṭṭhapatti. Sa tujjubhūtesu namo karohīti ettha ta-kāro padasandhikaro, sa tvaṃ ujubhūtesu khīṇāsavesu namo karohīti attho. Tamahaṃ naraṃ dhammasārīti brūmīti yo evaṃ paṭipajjati, tamahaṃ puggalaṃ ‘‘dhammasārī eso dhammasāriyā paṭicchanno’’ti ca ‘‘kusaladhammehi akusaladhamme sāretvā ṭhito’’ti vāti vadāmīti. Navamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 9. сунд̣̇аригасуд̇д̇ам̣ • 9. Sundarikasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 9. сунд̣̇аригасуд̇д̇аван̣н̣анаа • 9. Sundarikasuttavaṇṇanā
