| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
9. сунд̣̇аригасуд̇д̇аван̣н̣анаа
9. Sundarikasuttavaṇṇanā
195. аанзд̇ваа хунид̇аб̣б̣ад̇о аахуд̇и. саббимад̇хубааяасаад̣̇ийхи аг̇г̇им̣ ж̇уход̇и зд̇т̇аад̇и аг̇г̇ихуд̇д̇ам̣, саад̇хидтаанам̣ взд̣̇ид̇аб̣б̣ам̣. д̇знааха ‘‘аг̇яааяад̇ана’’нд̇иаад̣̇и. сувисод̇хид̇о жассаад̇и нихийнаж̇аад̇игаанам̣ анзна судту висод̇хид̇о жа бхавзяяа. ‘‘мз’’д̇и бад̣̇ам̣ аанзд̇ваа самб̣анд̇хо.
195. Ānetvā hunitabbato āhuti. Sappimadhupāyasādīhi aggiṃ juhoti etthāti aggihuttaṃ, sādhiṭṭhānaṃ veditabbaṃ. Tenāha ‘‘agyāyatana’’ntiādi. Suvisodhito cassāti nihīnajātikānaṃ anena suṭṭhu visodhito ca bhaveyya. ‘‘Me’’ti padaṃ ānetvā sambandho.
апалам̣ гарод̇ийд̇и ид̇о бадтааяа яаава д̣̇змийд̇и бад̣̇ам̣. д̇аава ананд̇арасуд̇д̇аван̣н̣анааяа ааг̇ад̇асад̣̇исамзваад̇и бзяяаалавасзна табзси, на саббисан̇каарадтабанам̣. химабаад̇асса жа сийд̇аваад̇асса жа бадиб̣ааханад̇т̇анд̇и агааран̣амзд̇анд̇и д̇ам̣ анаад̣̇ияид̇ваа ан̃н̃амзва сугааран̣ам̣ д̣̇ассзд̇ум̣ ‘‘бадиб̣аловаа’’д̇иаад̣̇и вуд̇д̇ам̣. сан̃ж̇аанид̇ваад̇и ‘‘нааяам̣ б̣раахман̣о’’д̇и сан̃ж̇аанид̇ваа.
Aphalaṃ karotīti ito paṭṭhāya yāva demīti padaṃ. Tāva anantarasuttavaṇṇanāya āgatasadisamevāti peyyālavasena ṭhapesi, na sappisaṅkhāraṭṭhapanaṃ. Himapātassa ca sītavātassa ca paṭibāhanatthanti akāraṇametanti taṃ anādiyitvā aññameva sukāraṇaṃ dassetuṃ ‘‘paṭibalovā’’tiādi vuttaṃ. Sañjānitvāti ‘‘nāyaṃ brāhmaṇo’’ti sañjānitvā.
нийжагзсанд̇анд̇и рассагзсанд̇ам̣. б̣раахман̣аанам̣ суд̣̇д̇хиад̇т̇аа сикаад̇и ааха ‘‘бавад̇д̇амад̇д̇амби, сикам̣ ад̣̇исваа’’д̇и, ‘‘барамахам̣сабаригкаад̣̇инаа’’д̇и гзжи.
Nīcakesantanti rassakesantaṃ. Brāhmaṇānaṃ suddhiatthā sikhāti āha ‘‘pavattamattampi, sikhaṃ adisvā’’ti, ‘‘paramahaṃsaparikkhādinā’’ti keci.
агааран̣ам̣ д̣̇агкин̣зяяабхаавасса ж̇аад̇и ад̣̇агкин̣зяяабхаавахзд̇уунам̣ баабад̇хаммаанам̣ абадигкзбабхаавад̇о. зд̇анд̇и сийлаад̣̇ибхзд̣̇ам̣ жаран̣ам̣. д̣̇агкин̣зяяабхаавасса гааран̣ам̣ ад̣̇агкин̣зяяабхаавагаарагабаабад̇хаммаанам̣ д̇ад̣̇ан̇г̇аад̣̇ивасзна баж̇аханад̇о. ассаад̇и б̣раахман̣асса. д̇амад̇т̇анд̇и д̇ам̣ д̣̇агкин̣зяяабхаавасса гааран̣ад̇аасан̇каад̇амад̇т̇ам̣ убамааяа вибхаавзнд̇о. саалаад̣̇игадтаа ж̇аад̇оваад̇и саалаад̣̇ивисуд̣̇д̇хагадтаава ж̇аад̇о. саабаанад̣̇он̣иаад̣̇иависуд̣̇д̇хагадтаа ж̇аад̇о аг̇г̇игижжам̣ на жа на гарод̇и. званд̇и яат̇аа аг̇г̇и яад̇о гуд̇ожи ж̇аад̇оби аг̇г̇игижжам̣ гарод̇иязва, звам̣ жан̣д̣аалагулаад̣̇ийсу ж̇аад̇оби д̣̇агкин̣зяяо на на ход̇и г̇ун̣асамбад̣̇аавасзна арияаанам̣ вам̣сз баж̇аад̇ад̇д̇аад̇и ааха ‘‘г̇ун̣асамбад̇д̇ияаа ж̇аад̇имаа’’д̇и. д̇хид̇ияаа г̇ун̣асамбад̇д̇ияаа бамукабхаавам̣ д̣̇ассзд̇ум̣ ‘‘со хий’’д̇иаад̣̇и вуд̇д̇ам̣. д̇ад̇т̇а д̇хид̇ияаад̇и вийриязна. д̇ан̃хи ануббаннаанам̣ гусалад̇хаммаанам̣ уббаад̣̇анабариб̣рууханзхи д̇з д̇хаарзд̇и. хирияаа д̣̇осз нисзд̇хзд̇и, саммад̣̇зва баабаанам̣ ж̇иг̇ужчанз сад̇и д̇зсам̣ бавад̇д̇ияаа авасаро зва над̇т̇и. монад̇хаммзна н̃аан̣асан̇каад̇зна од̇д̇аббад̇хаммзна. гааран̣аагааран̣аж̇аананагод̇и д̇зсам̣ д̇зсам̣ д̇хаммаанам̣ яат̇аабхууд̇ам̣ таанам̣, баабад̇хаммаанам̣ ваа виббагаарасабхаавадтаанам̣ ж̇аананаго.
Akāraṇaṃ dakkhiṇeyyabhāvassa jāti adakkhiṇeyyabhāvahetūnaṃ pāpadhammānaṃ apaṭikkhepabhāvato. Etanti sīlādibhedaṃ caraṇaṃ. Dakkhiṇeyyabhāvassa kāraṇaṃ adakkhiṇeyyabhāvakārakapāpadhammānaṃ tadaṅgādivasena pajahanato. Assāti brāhmaṇassa. Tamatthanti taṃ dakkhiṇeyyabhāvassa kāraṇatāsaṅkhātamatthaṃ upamāya vibhāvento. Sālādikaṭṭhā jātovāti sālādivisuddhakaṭṭhāva jāto. Sāpānadoṇiādiavisuddhakaṭṭhā jāto aggikiccaṃ na ca na karoti. Evanti yathā aggi yato kutoci jātopi aggikiccaṃ karotiyeva, evaṃ caṇḍālakulādīsu jātopi dakkhiṇeyyo na na hoti guṇasampadāvasena ariyānaṃ vaṃse pajātattāti āha ‘‘guṇasampattiyā jātimā’’ti. Dhitiyā guṇasampattiyā pamukhabhāvaṃ dassetuṃ ‘‘so hī’’tiādi vuttaṃ. Tattha dhitiyāti vīriyena. Tañhi anuppannānaṃ kusaladhammānaṃ uppādanaparibrūhanehi te dhāreti. Hiriyā dose nisedheti, sammadeva pāpānaṃ jigucchane sati tesaṃ pavattiyā avasaro eva natthi. Monadhammena ñāṇasaṅkhātena ottappadhammena. Kāraṇākāraṇajānanakoti tesaṃ tesaṃ dhammānaṃ yathābhūtaṃ ṭhānaṃ, pāpadhammānaṃ vā vippakārasabhāvaṭṭhānaṃ jānanako.
барамад̇т̇асажжзна ниб̣б̣аанзна аарамман̣абажжаяабхууд̇зна арияамаг̇г̇зна д̣̇анд̇о. инд̣̇рияад̣̇амзнаад̇и д̇ад̇о зва ариязна инд̣̇рияасам̣варзна убаг̇ад̇о. вид̣̇анд̇и д̇зхи сажжаанийд̇и взд̣̇аа. маг̇г̇авзд̣̇аанам̣ анд̇анд̇и арияапалам̣. гилзсаанам̣ анд̇анд̇и д̇зсам̣ ануббаад̣̇анирод̇хадтаанам̣. яан̃н̃од̇и аг̇г̇апалам̣. нирад̇т̇аганд̇и апалам̣ д̇зсам̣ анааг̇аманад̇о, ааг̇ад̇аанамби аг̇г̇ад̣̇агкин̣зяяаабхаавад̇о. ж̇ухад̇и д̣̇зд̇и.
Paramatthasaccena nibbānena ārammaṇapaccayabhūtena ariyamaggena danto. Indriyadamenāti tato eva ariyena indriyasaṃvarena upagato. Vidanti tehi saccānīti vedā. Maggavedānaṃ antanti ariyaphalaṃ. Kilesānaṃ antanti tesaṃ anuppādanirodhaṭṭhānaṃ. Yaññoti aggaphalaṃ. Niratthakanti aphalaṃ tesaṃ anāgamanato, āgatānampi aggadakkhiṇeyyābhāvato. Juhati deti.
суяидтанд̇и суд̣̇аанам̣ аг̇г̇ад̣̇агкин̣зяяалаабхзна. сухуд̇анд̇и д̇ассзва взважанам̣. ат̇а ваа суяидтанд̇и судту саммад̣̇зва яидтам̣ саарз убанийд̇ам̣ мама ид̣̇ам̣ д̣̇зяяавад̇т̇у. сухуд̇анд̇и зд̇т̇ааби зсзва наяо.
Suyiṭṭhanti sudānaṃ aggadakkhiṇeyyalābhena. Suhutanti tasseva vevacanaṃ. Atha vā suyiṭṭhanti suṭṭhu sammadeva yiṭṭhaṃ sāre upanītaṃ mama idaṃ deyyavatthu. Suhutanti etthāpi eseva nayo.
убахадамад̇д̇зд̇и б̣раахман̣зна ‘‘бхун̃ж̇ад̇у бхава’’нд̇и убанийд̇амад̇д̇з. ниб̣б̣ад̇д̇ид̇ож̇амзваад̇и савад̇т̇угам̣ аг̇г̇ахзд̇ваа вад̇т̇уд̇о вивзжид̇аож̇амзва. д̇зна д̇ам̣ сукумад̇д̇ам̣ г̇ад̇анд̇и д̇ам̣ хаб̣яасзсам̣ саб̣б̣асо сукумабхаавам̣ г̇ад̇анд̇и ож̇ааяа анол̣ааригад̇ааяа буримаагаарзнзва бан̃н̃ааяамаанад̇ам̣ санд̇хааяа вуд̇д̇ам̣, на бана ож̇ааяа зва гзвалааяа г̇ахан̣ам̣ санд̇хааяа. саа хи авиниб̣бхог̇авуд̇д̇ид̇ааяа висум̣ г̇ан̣хид̇ум̣ на саггаа, д̇асмаа д̣̇звад̇аахиби савад̇т̇угаа г̇аяхад̇и. мануссаанам̣ вад̇т̇ууд̇и гараж̇агааяамааха. ол̣ааригавад̇т̇уд̇ааяа д̣̇зваанам̣ вияа г̇ахан̣ий на д̇игкаад̇и д̣̇иб̣б̣ож̇асаммиссад̇ааяа саммаа барин̣аамам̣ на г̇ажчад̇и. сукумааби самаанаа д̣̇иб̣б̣ож̇аа д̇зна бааяасзна миссид̇аа ол̣ааригасаммиссад̇ааяа сукумавад̇т̇угаанам̣ д̣̇зваанам̣ сукад̣̇аа на ход̇ийд̇и имамад̇т̇ам̣ д̣̇ассзд̇и ‘‘г̇ояуусз банаа’’д̇иаад̣̇инаа. барибхог̇авад̇т̇уно ол̣ааригад̇ааяа ваа д̣̇зваанам̣ д̣̇уггарам̣ саммаа барин̣аамзд̇ум̣, д̣̇иб̣б̣ож̇ааяа г̇аруд̇арабхаавзна мануссаанам̣. д̇знааха бхаг̇аваа ‘‘на квааха’’нд̇иаад̣̇и. самаабад̇д̇ижид̇д̇асамудтид̇аа д̇зж̇од̇хаад̇у жхаанаанубхаавасанд̇зж̇ид̇аа д̇игкад̇араа ход̇ийд̇и вуд̇д̇ам̣ ‘‘адта…бз… барин̣аамзяяаа’’д̇и. бхаг̇авад̇о бана суд̣̇д̇хзнзва барин̣амад̇ийд̇и вуд̇д̇ам̣ ‘‘баагад̇игзнзваа’’д̇и, жхаанаанубхааваббад̇д̇зна жхаанзна винаа сабхаавасид̣̇д̇хзнзва.
Upahaṭamatteti brāhmaṇena ‘‘bhuñjatu bhava’’nti upanītamatte. Nibbattitojamevāti savatthukaṃ aggahetvā vatthuto vivecitaojameva. Tena taṃ sukhumattaṃ gatanti taṃ habyasesaṃ sabbaso sukhumabhāvaṃ gatanti ojāya anoḷārikatāya purimākāreneva paññāyamānataṃ sandhāya vuttaṃ, na pana ojāya eva kevalāya gahaṇaṃ sandhāya. Sā hi avinibbhogavuttitāya visuṃ gaṇhituṃ na sakkā, tasmā devatāhipi savatthukā gayhati. Manussānaṃ vatthūti karajakāyamāha. Oḷārikavatthutāya devānaṃ viya gahaṇī na tikkhāti dibbojasammissatāya sammā pariṇāmaṃ na gacchati. Sukhumāpi samānā dibbojā tena pāyasena missitā oḷārikasammissatāya sukhumavatthukānaṃ devānaṃ sukhadā na hotīti imamatthaṃ dasseti ‘‘goyūse panā’’tiādinā. Paribhogavatthuno oḷārikatāya vā devānaṃ dukkaraṃ sammā pariṇāmetuṃ, dibbojāya garutarabhāvena manussānaṃ. Tenāha bhagavā ‘‘na khvāha’’ntiādi. Samāpatticittasamuṭṭhitā tejodhātu jhānānubhāvasantejitā tikkhatarā hotīti vuttaṃ ‘‘aṭṭha…pe… pariṇāmeyyā’’ti. Bhagavato pana suddheneva pariṇamatīti vuttaṃ ‘‘pākatikenevā’’ti, jhānānubhāvappattena jhānena vinā sabhāvasiddheneva.
‘‘аббахарид̇з’’д̇и зд̇т̇а абба-сад̣̇д̣̇о ‘‘аббижчо’’д̇иаад̣̇ийсу вияа абхаавад̇т̇од̇и ааха ‘‘аббахарид̇зд̇и ахарид̇з’’д̇и. баад̇исад̇зби бааяасз. на аалул̣ад̇ийд̇и на аавилам̣ ход̇и. анааг̇анд̇аава г̇ажчзяяа ‘‘ад̇д̇анааби на барибхун̃ж̇и, ан̃н̃зсам̣ на д̣̇аабзси, гзвалам̣ бааяасам̣ наасзсий’’д̇и д̣̇оманассаббад̇д̇о.
‘‘Appaharite’’ti ettha appa-saddo ‘‘appiccho’’tiādīsu viya abhāvatthoti āha ‘‘appahariteti aharite’’ti. Pātisatepi pāyase. Na āluḷatīti na āvilaṃ hoti. Anāgantāva gaccheyya ‘‘attanāpi na paribhuñji, aññesaṃ na dāpesi, kevalaṃ pāyasaṃ nāsesī’’ti domanassappatto.
д̣̇аару самаад̣̇ахаанод̇и д̣̇аарухарид̣̇д̣̇и д̣̇аарусмим̣ д̇асса д̣̇аханд̇о. яад̣̇ийд̇иаад̣̇и д̣̇ааружхаабанасса б̣ахид̣̇д̇хабхаавасаад̇ханам̣ асуд̣̇д̇хахзд̇уунам̣ бадибагкаабхаавад̇о д̇асса. канд̇хаад̣̇ийсу гусалаад̇и д̇зсу сабхаавад̇о самуд̣̇аяад̇о ад̇т̇ан̇г̇амад̇о ассаад̣̇ад̇о аад̣̇ийнавад̇о ниссаран̣ад̇о ж̇аананад̇о чзгаа бан̣д̣ид̇аа. н̃аан̣аж̇од̇инд̇и н̃аан̣амаяам̣ ж̇од̇им̣. ж̇аалзмийд̇и баж̇ж̇алид̇ам̣ гароми. нижжам̣ баж̇ж̇алид̇аг̇г̇и саб̣б̣ад̇т̇агамзва виг̇ад̇асаммоханд̇хагаарад̇ааяа згобхаасабхаавад̇о. саб̣б̣асо вигкзбаабхаавад̇о нижжасамаахид̇ад̇д̇о. звам̣ вад̣̇ад̇ийд̇и жарид̇ам̣ б̣рахмажарияам̣ г̇ахзд̇ваа жараамийд̇и звам̣ вад̇д̇амаанам̣ вияа вад̣̇ад̇и аасаннад̇ам̣ хад̣̇аяз табзд̇ваа.
Dārusamādahānoti dāruhariddi dārusmiṃ tassa dahanto. Yadītiādi dārujhāpanassa bahiddhabhāvasādhanaṃ asuddhahetūnaṃ paṭipakkhābhāvato tassa. Khandhādīsu kusalāti tesu sabhāvato samudayato atthaṅgamato assādato ādīnavato nissaraṇato jānanato chekā paṇḍitā. Ñāṇajotinti ñāṇamayaṃ jotiṃ. Jālemīti pajjalitaṃ karomi. Niccaṃ pajjalitaggi sabbatthakameva vigatasammohandhakāratāya ekobhāsabhāvato. Sabbaso vikkhepābhāvato niccasamāhitatto. Evaṃ vadatīti caritaṃ brahmacariyaṃ gahetvā carāmīti evaṃ vattamānaṃ viya vadati āsannataṃ hadaye ṭhapetvā.
каарибхаарод̇и каарибхаарасад̣̇исо. д̇знааха ‘‘яат̇аа’’д̇иаад̣̇и. канд̇хзна ваяхамаанод̇и гааж̇з багкибид̇ваа канд̇хзна ваяхамаано. бат̇авияаа сад̣̇д̇хим̣ пусзд̇и бхаарасса г̇аругабхаавзна гааж̇асса барин̣аманзна. маанзна ад̇д̇ано ж̇аад̇иаад̣̇ийни баг̇г̇ан̣хад̇о ан̃н̃асса д̇аани на сахад̇ийд̇и ааха – ‘‘д̇ад̇т̇а д̇ад̇т̇а иссам̣ уббаад̣̇знд̇о’’д̇и, д̇ад̇т̇а д̇ад̇т̇а ж̇аад̇иаад̣̇имаанавад̇т̇усмим̣ г̇аруд̇араг̇г̇ахан̣зна сам̣сийд̣̇зяяаад̇и ад̇хиббааяо. год̇хо д̇хуумод̇и яат̇ааби бхаасуро аг̇г̇и д̇хуумзна убаггилидто, звам̣ год̇хзна убаггилидто. н̃аан̣аг̇г̇ийд̇и д̇асса год̇хо д̇хуумо. мусааваад̣̇ова мосаваж̇ж̇ам̣. яат̇аа н̃аан̣з сад̇и мусааваад̣̇о над̇т̇и, звам̣ мусааваад̣̇з сад̇и н̃аан̣амбийд̇и д̇зна д̇ам̣ нирод̇хид̇ам̣ вияа ход̇ийд̇и ааха – ‘‘мусааваад̣̇зна бадижчаннам̣ н̃аан̣а’’нд̇и. яат̇аа суж̇ааяа винаа б̣раахман̣аанам̣ яааг̇о на иж̇жхад̇и, звам̣ бахууд̇аж̇ивхааяа винаа сад̇т̇у д̇хаммаяааг̇о на иж̇жхад̇ийд̇и ж̇ивхаа суж̇аабарияааяаа вуд̇д̇аа. ж̇од̇и тияад̇и зд̇т̇аад̇и ж̇од̇идтаанам̣ взд̣̇и, яам̣ аг̇г̇игун̣д̣ам̣. сад̇д̇аанам̣ хад̣̇аяам̣ ж̇од̇идтаанам̣ н̃аан̣аг̇г̇ино д̇ад̇т̇а самуж̇ж̇аланад̇о. ад̇д̇аад̇и жид̇д̇ам̣ ‘‘аахид̇о ахам̣ маано зд̇т̇аа’’д̇и гад̇ваа.
Khāribhāroti khāribhārasadiso. Tenāha ‘‘yathā’’tiādi. Khandhena vayhamānoti kāje pakkhipitvā khandhena vayhamāno. Pathaviyā saddhiṃ phuseti bhārassa garukabhāvena kājassa pariṇamanena. Mānena attano jātiādīni paggaṇhato aññassa tāni na sahatīti āha – ‘‘tattha tattha issaṃ uppādento’’ti, tattha tattha jātiādimānavatthusmiṃ garutaraggahaṇena saṃsīdeyyāti adhippāyo. Kodho dhūmoti yathāpi bhāsuro aggi dhūmena upakkiliṭṭho, evaṃ kodhena upakkiliṭṭho. Ñāṇaggīti tassa kodho dhūmo. Musāvādova mosavajjaṃ. Yathā ñāṇe sati musāvādo natthi, evaṃ musāvāde sati ñāṇampīti tena taṃ nirodhitaṃ viya hotīti āha – ‘‘musāvādena paṭicchannaṃ ñāṇa’’nti. Yathā sujāya vinā brāhmaṇānaṃ yāgo na ijjhati, evaṃ pahūtajivhāya vinā satthu dhammayāgo na ijjhatīti jivhā sujāpariyāyā vuttā. Joti ṭhiyati etthāti jotiṭṭhānaṃ vedi, yaṃ aggikuṇḍaṃ. Sattānaṃ hadayaṃ jotiṭṭhānaṃ ñāṇaggino tattha samujjalanato. Attāti cittaṃ ‘‘āhito ahaṃ māno etthā’’ti katvā.
д̇хаммо рахад̣̇од̇и ассад̣̇д̇хияаад̣̇иааласияаабхаавад̇о гилзсамалабагкааланад̇о барамаг̇г̇иниб̣б̣уд̇ааваханад̇о арияамаг̇г̇ад̇хаммо анаавило рахад̣̇о. хздтубарияаваалугаад̇и вибаривад̇д̇ид̇аваалугаа худ̇ваа. аалул̣аад̇и аагулаж̇аад̇аа. бан̣д̣ид̇аанам̣ басад̇т̇од̇и бан̣д̣ид̇аанам̣ бурад̇о сздто. сздтабхаавзна санд̇о баасам̣со худ̇ваа гилзсз бхинд̣̇ад̇и самужчинд̣̇ад̇ийд̇и саб̣бхийд̇и вужжад̇и. д̇знааха ‘‘уд̇д̇амадтзнаа’’д̇и. д̇ат̇аа жааха бхаг̇аваа ‘‘маг̇г̇аанадтан̇г̇иго сздто’’д̇и (д̇ха. ба. 273).
Dhammo rahadoti assaddhiyādiālasiyābhāvato kilesamalapakkhālanato paramagginibbutāvahanato ariyamaggadhammo anāvilo rahado. Heṭṭhupariyavālukāti viparivattitavālukā hutvā. Āluḷāti ākulajātā. Paṇḍitānaṃ pasatthoti paṇḍitānaṃ purato seṭṭho. Seṭṭhabhāvena santo pāsaṃso hutvā kilese bhindati samucchindatīti sabbhīti vuccati. Tenāha ‘‘uttamaṭṭhenā’’ti. Tathā cāha bhagavā ‘‘maggānaṭṭhaṅgiko seṭṭho’’ti (dha. pa. 273).
важийсажжанд̇и иминаа ‘‘жад̇уран̇г̇асаманнааг̇ад̇аа ваажаа субарисуд̣̇д̇хаа ход̇ий’’д̇и саммааваажам̣ д̣̇ассзд̇и. сажжасам̣яамабад̣̇зхи д̣̇ассид̇аа маг̇г̇ад̇хаммаа ид̇ха ‘‘д̇хаммо’’д̇и ад̇хиббзд̇аад̇и ааха – ‘‘д̇хаммод̇и иминаа…бз… д̣̇ассзд̇ий’’д̇и. маг̇г̇асажжам̣ г̇ахид̇ам̣ ананд̇араг̇аат̇ааяа анзгзхи висзсзд̇ваа вуд̇д̇ад̇д̇аа. ад̇т̇ад̇од̇и буб̣б̣ан̇г̇амад̇д̇аад̣̇иад̇т̇ад̇о. д̇ааяа хи сагижжам̣ гаронд̇ияаа ид̇арз саб̣б̣зби д̇ад̣̇анувад̇д̇игаа хонд̇и. д̇аг̇г̇ад̇игад̇д̇аад̇и саммаад̣̇идтияаа убагаарагабхаавзна д̇ааяа самаанаг̇ад̇игад̇д̇аа. аарамман̣ан̃хи вид̇аггзнаахадам̣ бан̃н̃аа вижинид̇ум̣ саггод̇и. д̇ат̇аа хи со бан̃н̃аагканд̇хзна сан̇г̇ахам̣ г̇ад̇о. д̇хаммод̇и сабхаавад̇о самаад̇хи г̇ахид̇о, ид̇арз д̣̇вз д̇ад̣̇убагаарад̇д̇аа. д̇ат̇аа хи ‘‘звам̣д̇хаммаа д̇з бхаг̇аванд̇о’’д̇иаад̣̇ийсу (д̣̇ий. ни. 2.13; ма. ни. 3.197; сам̣. ни. 5.378) самаад̇хи ‘‘д̇хаммо’’д̇и вуд̇д̇о. барамад̇т̇асажжам̣ г̇ахид̇ам̣ саб̣б̣зсам̣ сздтабхаавад̇о. яат̇ааха – ‘‘яаавад̇аа, бхигкавз, д̇хаммаа сан̇кад̇аа ваа асан̇кад̇аа ваа, вирааг̇о д̇зсам̣ аг̇г̇амагкааяад̇ий’’д̇и (ид̇иву. 90; а. ни. 4.34). ад̇т̇ад̇од̇и д̇ад̇о зва барамад̇т̇ад̇о, ананд̇арам̣ вужжамаанаанам̣ ваа маг̇г̇ад̇хаммаанам̣ аарамман̣абхаавад̇о. бан̃жан̇г̇аани г̇ахид̇аани д̇аасам̣ маг̇г̇абхаавад̇о. д̇ийн̣и ан̇г̇аани. б̣рахмажарияам̣ наамаад̇и зд̇ам̣ ниб̣б̣аанаг̇аами уд̇д̇амадтзна маг̇г̇аб̣рахмажарияам̣ наама. маж̇жхз сид̇аад̇и лийнуд̣̇д̇хажжаад̣̇ианд̇ад̣̇ваяавиваж̇ж̇анзна маж̇жхз маж̇жхимабадибад̣̇аабхааванам̣ ниссид̇аа. сассад̇ужчзд̣̇аг̇г̇ахан̣ам̣ хзд̇т̇а бад̇хаанад̇ааяа нид̣̇ассанамад̇д̇ам̣. сздтаббад̇д̇ийд̇и сздтабхааваббад̇д̇и. д̇а-гааро бад̣̇асанд̇хигарод̇и ‘‘са уж̇убхууд̇зсуу’’д̇и вад̇д̇аб̣б̣з маж̇жхз д̇а-гааро бад̣̇асанд̇хигаро, ‘‘са д̣̇уж̇ж̇убхууд̇зсууд̇и гзжи батанд̇и, д̇зсам̣ д̣̇а-гааро бад̣̇асанд̇хигаро. са-ид̇и сунд̣̇ариго б̣раахман̣о вуд̇д̇од̇и гад̇ваа ааха ‘‘са д̇ва’’нд̇и, со д̇ванд̇и ад̇т̇о. д̇хаммо саарияо барид̇хаанабхууд̇аа алан̇гаараа зд̇ассаад̇и д̇хаммасаарий. ат̇а ваа д̇хаммзхи саарид̇аваад̇и д̇хаммасаарий, д̇зхи саарзд̇ваа тид̇аваад̇и ад̇т̇о. д̇знааха ‘‘гусалад̇хаммзхий’’д̇иаад̣̇и.
Vacīsaccanti iminā ‘‘caturaṅgasamannāgatā vācā suparisuddhā hotī’’ti sammāvācaṃ dasseti. Saccasaṃyamapadehi dassitā maggadhammā idha ‘‘dhammo’’ti adhippetāti āha – ‘‘dhammoti iminā…pe… dassetī’’ti. Maggasaccaṃ gahitaṃ anantaragāthāya anekehi visesetvā vuttattā. Atthatoti pubbaṅgamattādiatthato. Tāya hi sakiccaṃ karontiyā itare sabbepi tadanuvattikā honti. Taggatikattāti sammādiṭṭhiyā upakārakabhāvena tāya samānagatikattā. Ārammaṇañhi vitakkenāhaṭaṃ paññā vicinituṃ sakkoti. Tathā hi so paññākkhandhena saṅgahaṃ gato. Dhammoti sabhāvato samādhi gahito, itare dve tadupakārattā. Tathā hi ‘‘evaṃdhammā te bhagavanto’’tiādīsu (dī. ni. 2.13; ma. ni. 3.197; saṃ. ni. 5.378) samādhi ‘‘dhammo’’ti vutto. Paramatthasaccaṃ gahitaṃ sabbesaṃ seṭṭhabhāvato. Yathāha – ‘‘yāvatā, bhikkhave, dhammā saṅkhatā vā asaṅkhatā vā, virāgo tesaṃ aggamakkhāyatī’’ti (itivu. 90; a. ni. 4.34). Atthatoti tato eva paramatthato, anantaraṃ vuccamānānaṃ vā maggadhammānaṃ ārammaṇabhāvato. Pañcaṅgāni gahitāni tāsaṃ maggabhāvato. Tīṇi aṅgāni. Brahmacariyaṃ nāmāti etaṃ nibbānagāmi uttamaṭṭhena maggabrahmacariyaṃ nāma. Majjhe sitāti līnuddhaccādiantadvayavivajjanena majjhe majjhimapaṭipadābhāvanaṃ nissitā. Sassatucchedaggahaṇaṃ hettha padhānatāya nidassanamattaṃ. Seṭṭhappattīti seṭṭhabhāvappatti. Ta-kāro padasandhikaroti ‘‘sa ujubhūtesū’’ti vattabbe majjhe ta-kāro padasandhikaro, ‘‘sa dujjubhūtesūti keci paṭhanti, tesaṃ da-kāro padasandhikaro. Sa-iti sundariko brāhmaṇo vuttoti katvā āha ‘‘sa tva’’nti, so tvanti attho. Dhammo sāriyo paridhānabhūtā alaṅkārā etassāti dhammasārī. Atha vā dhammehi sāritavāti dhammasārī, tehi sāretvā ṭhitavāti attho. Tenāha ‘‘kusaladhammehī’’tiādi.
сунд̣̇аригасуд̇д̇аван̣н̣анаа нидтид̇аа.
Sundarikasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 9. сунд̣̇аригасуд̇д̇ам̣ • 9. Sundarikasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 9. сунд̣̇аригасуд̇д̇аван̣н̣анаа • 9. Sundarikasuttavaṇṇanā
