| Library / Tipiṭaka / ཏིཔིཊཀ • Tipiṭaka / ཨུདཱན-ཨཊྛཀཐཱ • Udāna-aṭṭhakathā |
༨. སུནྡརཱིསུཏྟཝཎྞནཱ
8. Sundarīsuttavaṇṇanā
༣༨. ཨཊྛམེ སཀྐཏོཏིཨཱདཱིནཾ པདཱནཾ ཨཏྠོ ཧེཊྛཱ ཝཎྞིཏོཡེཝ། ཨསཧམཱནཱཏི ན སཧམཱནཱ, ཨུསཱུཡནྟཱཏི ཨཏྠོ། བྷིཀྑུསངྒྷསྶ ཙ སཀྐཱརཾ ཨསཧམཱནཱཏི སམྦནྡྷོ།
38. Aṭṭhame sakkatotiādīnaṃ padānaṃ attho heṭṭhā vaṇṇitoyeva. Asahamānāti na sahamānā, usūyantāti attho. Bhikkhusaṅghassa ca sakkāraṃ asahamānāti sambandho.
སུནྡརཱིཏི ཏསྶཱ ནཱམཾ། སཱ ཀིར ཏསྨིཾ ཀཱལེ སབྦཔརིབྦཱཛིཀཱསུ ཨབྷིརཱུཔཱ དསྶནཱིཡཱ པཱསཱདིཀཱ པརམཱཡ ཝཎྞཔོཀྑརཏཱཡ སམནྣཱགཏཱ, ཏེནེཝ སཱ ‘‘སུནྡརཱི’’ཏི པཉྙཱཡིཏྠ། སཱ ཙ ཨནཏཱིཏཡོབྦནཱ ཨསཾཡཏསམཱཙཱརཱཝ ཧོཏི, ཏསྨཱ ཏེ སུནྡརིཾ པརིབྦཱཛིཀཾ པཱཔཀམྨེ ཨུཡྻོཛེསུཾ། ཏེ ཧི ཨཉྙཏིཏྠིཡཱ བུདྡྷུཔྤཱདཏོ པཊྛཱཡ སཡཾ ཧཏལཱབྷསཀྐཱརཱ ཧེཊྛཱ ཨཀྐོསསུཏྟཝཎྞནཱཡཾ ཨཱགཏནཡེན བྷགཝཏོ བྷིཀྑུསངྒྷསྶ ཙ ཨུལཱ༹རཾ ཨཔརིམིཏཾ ལཱབྷསཀྐཱརཾ པཝཏྟམཱནཾ དིསྭཱ ཨིསྶཱཔཀཏཱ ཨེཀཏོ ཧུཏྭཱ སམྨནྟཡིཾསུ – མཡཾ སམཎསྶ གོཏམསྶ ཨུཔྤནྣཀཱལཏོ པཊྛཱཡ ནཊྛཱ ཧཏལཱབྷསཀྐཱརཱ, ན ནོ ཀོཙི ཨཏྠིབྷཱཝམྤི ཛཱནཱཏི, ཀིཾ ནིསྶཱཡ ནུ ཁོ ལོཀོ སམཎེ གོཏམེ ཨབྷིཔྤསནྣོ ཨུལཱ༹རཾ སཀྐཱརསམྨཱནཾ ཨུཔནེཏཱིཏི? ཏཏྠེཀོ ཨཱཧ – ‘‘ཨུཙྩཱཀུལཔྤསུཏོ ཨསམྦྷིནྣཱཡ མཧཱསམྨཏཔྤཝེཎིཡཱ ཛཱཏོ’’ཏི, ཨཔརོ ‘‘ཨབྷིཛཱཏིཡཾ ཏསྶ ཨནེཀཱནི ཨཙྪརིཡཱནི པཱཏུབྷཱུཏཱནཱི’’ཏི, ཨཉྙོ ‘‘ཀཱལདེཝིལཾ ཝནྡཱཔེཏུཾ ཨུཔནཱིཏསྶ པཱདཱ པརིཝཏྟིཏྭཱ ཏསྶ ཛཊཱསུ པཏིཊྛིཏཱ’’ཏི, ཨཔརོ ‘‘ཝཔྤམངྒལཀཱལེ ཛམྦུཙྪཱཡཱཡ སཡཱཔིཏསྶ ཝཱིཏིཀྐནྟེཔི མཛ྄ཛྷནྷིཀེ ཛམྦུཙྪཱཡཱ ཨཔརིཝཏྟིཏྭཱ ཋིཏཱ’’ཏི, ཨཉྙོ ‘‘ཨབྷིརཱུཔོ དསྶནཱིཡོ པཱསཱདིཀོ རཱུཔསམྤཏྟིཡཱ’’ཏི, ཨཔརོ ‘‘ཛིཎྞཱཏུརམཏཔབྦཛིཏསངྑཱཏནིམིཏྟེ དིསྭཱ སཾཝེགཛཱཏོ ཨཱགཱམིནཾ ཙཀྐཝཏྟིརཛྫཾ པཧཱཡ པབྦཛིཏོ’’ཏི། ཨེཝཾ ཨཔརིམཱཎཀཱལེ སམྦྷཏཾ ཨནཉྙསཱདྷཱརཎཾ བྷགཝཏོ པུཉྙཉཱཎསམྦྷཱརཾ ཨུཀྐཾསཔཱརམིཔྤཏྟཾ ནིརུཔམཾ སལླེཁཔྤཊིཔདཾ ཨནུཏྟརཉྩ ཉཱཎཔཧཱནསམྤདཱདིབུདྡྷཱནུབྷཱཝཾ ཨཛཱནནྟཱ ཨཏྟནཱ ཡཐཱདིཊྛཾ ཡཐཱསུཏཾ དྷརམཱནཾ ཏཾ ཏཾ བྷགཝཏོ བཧུམཱནཀཱརཎཾ ཀིཏྟེཏྭཱ ཨབཧུམཱནཀཱརཎཾ པརིཡེསིཏྭཱ ཨཔསྶནྟཱ ‘‘ཀེན ནུ ཁོ ཀཱརཎེན མཡཾ སམཎསྶ གོཏམསྶ ཨཡསཾ ཨུཔྤཱདེཏྭཱ ལཱབྷསཀྐཱརཾ ནཱསེཡྻཱམཱ’’ཏི། ཏེསུ ཨེཀོ ཏིཁིཎམནྟཱི ཨེཝམཱཧ – ‘‘ཨམྦྷོ ཨིམསྨིཾ སཏྟལོཀེ མཱཏུགཱམསུཁེ ཨསཏྟསཏྟཱ ནཱམ ནཏྠི, ཨཡཉྩ སམཎོ གོཏམོ ཨབྷིརཱུཔོ དེཝསམོ ཏརུཎོ, ཨཏྟནོ སམརཱུཔཾ མཱཏུགཱམཾ ལབྷིཏྭཱ སཛྫེཡྻ། ཨཐཱཔི ན སཛྫེཡྻ, ཛནསྶ པན སངྐིཡོ བྷཝེཡྻ, ཧནྡ མཡཾ སུནྡརིཾ པརིབྦཱཛིཀཾ ཏཐཱ ཨུཡྻོཛེམ, ཡཐཱ སམཎསྶ གོཏམསྶ ཨཡསོ པཐཝིཡཾ པཏྠརེཡྻཱ’’ཏི།
Sundarīti tassā nāmaṃ. Sā kira tasmiṃ kāle sabbaparibbājikāsu abhirūpā dassanīyā pāsādikā paramāya vaṇṇapokkharatāya samannāgatā, teneva sā ‘‘sundarī’’ti paññāyittha. Sā ca anatītayobbanā asaṃyatasamācārāva hoti, tasmā te sundariṃ paribbājikaṃ pāpakamme uyyojesuṃ. Te hi aññatitthiyā buddhuppādato paṭṭhāya sayaṃ hatalābhasakkārā heṭṭhā akkosasuttavaṇṇanāyaṃ āgatanayena bhagavato bhikkhusaṅghassa ca uḷāraṃ aparimitaṃ lābhasakkāraṃ pavattamānaṃ disvā issāpakatā ekato hutvā sammantayiṃsu – mayaṃ samaṇassa gotamassa uppannakālato paṭṭhāya naṭṭhā hatalābhasakkārā, na no koci atthibhāvampi jānāti, kiṃ nissāya nu kho loko samaṇe gotame abhippasanno uḷāraṃ sakkārasammānaṃ upanetīti? Tattheko āha – ‘‘uccākulappasuto asambhinnāya mahāsammatappaveṇiyā jāto’’ti, aparo ‘‘abhijātiyaṃ tassa anekāni acchariyāni pātubhūtānī’’ti, añño ‘‘kāladevilaṃ vandāpetuṃ upanītassa pādā parivattitvā tassa jaṭāsu patiṭṭhitā’’ti, aparo ‘‘vappamaṅgalakāle jambucchāyāya sayāpitassa vītikkantepi majjhanhike jambucchāyā aparivattitvā ṭhitā’’ti, añño ‘‘abhirūpo dassanīyo pāsādiko rūpasampattiyā’’ti, aparo ‘‘jiṇṇāturamatapabbajitasaṅkhātanimitte disvā saṃvegajāto āgāminaṃ cakkavattirajjaṃ pahāya pabbajito’’ti. Evaṃ aparimāṇakāle sambhataṃ anaññasādhāraṇaṃ bhagavato puññañāṇasambhāraṃ ukkaṃsapāramippattaṃ nirupamaṃ sallekhappaṭipadaṃ anuttarañca ñāṇapahānasampadādibuddhānubhāvaṃ ajānantā attanā yathādiṭṭhaṃ yathāsutaṃ dharamānaṃ taṃ taṃ bhagavato bahumānakāraṇaṃ kittetvā abahumānakāraṇaṃ pariyesitvā apassantā ‘‘kena nu kho kāraṇena mayaṃ samaṇassa gotamassa ayasaṃ uppādetvā lābhasakkāraṃ nāseyyāmā’’ti. Tesu eko tikhiṇamantī evamāha – ‘‘ambho imasmiṃ sattaloke mātugāmasukhe asattasattā nāma natthi, ayañca samaṇo gotamo abhirūpo devasamo taruṇo, attano samarūpaṃ mātugāmaṃ labhitvā sajjeyya. Athāpi na sajjeyya, janassa pana saṅkiyo bhaveyya, handa mayaṃ sundariṃ paribbājikaṃ tathā uyyojema, yathā samaṇassa gotamassa ayaso pathaviyaṃ patthareyyā’’ti.
ཏཾ སུཏྭཱ ཨིཏརེ ‘‘ཨིདཾ སུཊྛུ ཏཡཱ ཙིནྟིཏཾ, ཨེཝཉྷི ཀཏེ སམཎོ གོཏམོ ཨཡསཀེན ཨུཔདྡུཏོ སཱིསཾ ཨུཀྑིཔིཏུཾ ཨསཀྐོནྟོ ཡེན ཝཱ ཏེན ཝཱ པལཱཡིསྶཏཱི’’ཏི སབྦེཝ ཨེཀཛ྄ཛྷཱསཡཱ ཧུཏྭཱ ཏཐཱ ཨུཡྻོཛེཏུཾ སུནྡརིཡཱ སནྟིཀཾ ཨགམཾསུ། སཱ ཏེ དིསྭཱ ‘‘ཀིཾ ཏུམྷེ ཨེཀཏོ ཨཱགཏཏྠཱ’’ཏི ཨཱཧ། ཏིཏྠིཡཱ ཨནཱལཔནྟཱ ཨཱརཱམཔརིཡནྟེ པཊིཙྪནྣེ ཋཱནེ ནིསཱིདིཾསུ། སཱ ཏཏྠ གནྟྭཱ པུནཔྤུནཾ ཨཱལཔནྟཱི པཊིཝཙནཾ ཨལབྷིཏྭཱ ཀིཾ ཏུམྷཱཀཾ ཨཔརཛ྄ཛྷཾ? ཀསྨཱ མེ པཊིཝཙནཾ ན དེཐཱཏི? ཏཐཱ ཧི པན ཏྭཾ ཨམྷེ ཝིཧེཋིཡམཱནེ ཨཛ྄ཛྷུཔེཀྑསཱིཏི ། ཀོ ཏུམྷེ ཝིཧེཋེཏཱིཏི? ‘‘ཀིཾ པན ཏྭཾ ན པསྶསི, སམཎཾ གོཏམཾ ཨམྷེ ཝིཧེཋེཏྭཱ ཧཏལཱབྷསཀྐཱརེ ཀཏྭཱ ཝིཙརནྟ’’ནྟི ཝཏྭཱ ‘‘ཏཏྠ མཡཱ ཀིཾ ཀཱཏབྦ’’ནྟི ཝུཏྟེ ‘‘ཏེན ཧི ཏྭཾ ཨབྷིཀྑཎཾ ཛེཏཝནསམཱིཔཾ གནྟྭཱ མཧཱཛནསྶ ཨེཝཉྩེཝཉྩ ཝདེཡྻཱསཱི’’ཏི ཨཱཧཾསུ། སཱཔི ‘‘སཱདྷཱུ’’ཏི སམྤཊིཙྪི། ཏེན ཝུཏྟཾ – ‘‘ཨཉྙཏིཏྠིཡཱ པརིབྦཱཛཀཱ བྷགཝཏོ སཀྐཱརཾ ཨསཧམཱནཱ’’ཏིཨཱདི།
Taṃ sutvā itare ‘‘idaṃ suṭṭhu tayā cintitaṃ, evañhi kate samaṇo gotamo ayasakena upadduto sīsaṃ ukkhipituṃ asakkonto yena vā tena vā palāyissatī’’ti sabbeva ekajjhāsayā hutvā tathā uyyojetuṃ sundariyā santikaṃ agamaṃsu. Sā te disvā ‘‘kiṃ tumhe ekato āgatatthā’’ti āha. Titthiyā anālapantā ārāmapariyante paṭicchanne ṭhāne nisīdiṃsu. Sā tattha gantvā punappunaṃ ālapantī paṭivacanaṃ alabhitvā kiṃ tumhākaṃ aparajjhaṃ? Kasmā me paṭivacanaṃ na dethāti? Tathā hi pana tvaṃ amhe viheṭhiyamāne ajjhupekkhasīti . Ko tumhe viheṭhetīti? ‘‘Kiṃ pana tvaṃ na passasi, samaṇaṃ gotamaṃ amhe viheṭhetvā hatalābhasakkāre katvā vicaranta’’nti vatvā ‘‘tattha mayā kiṃ kātabba’’nti vutte ‘‘tena hi tvaṃ abhikkhaṇaṃ jetavanasamīpaṃ gantvā mahājanassa evañcevañca vadeyyāsī’’ti āhaṃsu. Sāpi ‘‘sādhū’’ti sampaṭicchi. Tena vuttaṃ – ‘‘aññatitthiyā paribbājakā bhagavatosakkāraṃ asahamānā’’tiādi.
ཏཏྠ ཨུསྶཧསཱིཏི སཀྐོསི། ཨཏྠནྟི ཧིཏཾ ཀིཙྩཾ ཝཱ། ཀྱཱཧནྟི ཀིཾ ཨཧཾ། ཡསྨཱ ཏེ ཏིཏྠིཡཱ ཏསྶཱ ཨཉྙཱཏཀཱཔི སམཱནཱ པབྦཛྫསམྦནྡྷམཏྟེན སངྒཎྷིཏུཾ ཉཱཏཀཱ ཝིཡ ཧུཏྭཱ ‘‘ཨུསྶཧསི ཏྭཾ བྷགིནི ཉཱཏཱིནཾ ཨཏྠཾ ཀཱཏུ’’ནྟི ཨཱཧཾསུ། ཏསྨཱ སཱཔི མིགཾ ཝལླི ཝིཡ པཱདེ ལགྒཱ ཛཱིཝིཏམྤི མེ པརིཙྩཏྟཾ ཉཱཏཱིནཾ ཨཏྠཱཡཱཏི ཨཱཧ།
Tattha ussahasīti sakkosi. Atthanti hitaṃ kiccaṃ vā. Kyāhanti kiṃ ahaṃ. Yasmā te titthiyā tassā aññātakāpi samānā pabbajjasambandhamattena saṅgaṇhituṃ ñātakā viya hutvā ‘‘ussahasi tvaṃ bhagini ñātīnaṃ atthaṃ kātu’’nti āhaṃsu. Tasmā sāpi migaṃ valli viya pāde laggā jīvitampi me pariccattaṃ ñātīnaṃ atthāyāti āha.
ཏེན ཧཱིཏི ‘‘ཡསྨཱ ཏྭཾ ‘ཛཱིཝིཏམྤི མེ ཏུམྷཱཀཾ ཨཏྠཱཡ པརིཙྩཏྟ’ནྟི ཝདསི, ཏྭཉྩ པཋམཝཡེ ཋིཏཱ ཨབྷིརཱུཔཱ སོབྷགྒཔྤཏྟཱ ཙ, ཏསྨཱ ཡཐཱ ཏཾ ནིསྶཱཡ སམཎསྶ གོཏམསྶ ཨཡསོ ཨུཔྤཛྫིསྶཏི, ཏཐཱ ཀརེཡྻཱསཱི’’ཏི ཝཏྭཱ ‘‘ཨབྷིཀྑཎཾ ཛེཏཝནཾ གཙྪཱཧཱི’’ཏི ཨུཡྻོཛེསུཾ། སཱཔི ཁོ བཱལཱ ཀཀཙདནྟཔནྟིཡཱ པུཔྥཱཝལིཀཱིལ༹ཾ ཀཱིལི༹ཏུཀཱམཱ ཝིཡ, པབྷིནྣམདཾ ཙཎྜཧཏྠིཾ སོཎྜཱཡ པརཱམསནྟཱི ཝིཡ, ནལཱཊེན མཙྩུཾ གཎྷནྟཱི ཝིཡ ཏིཏྠིཡཱནཾ ཝཙནཾ སམྤཊིཙྪིཏྭཱ མཱལཱགནྡྷཝིལེཔནཏམྦཱུལམུཁཝཱསཱདཱིནི གཧེཏྭཱ མཧཱཛནསྶ སཏྠུ དྷམྨདེསནཾ སུཏྭཱ ནགརཾ པཝིསནཀཱལེ ཛེཏཝནཱབྷིམུཁཱི གཙྪནྟཱི ‘‘ཀཧཾ གཙྪསཱི’’ཏི ཙ པུཊྛཱ ‘‘སམཎསྶ གོཏམསྶ སནྟིཀཾ, ཨཧཉྷི ཏེན སདྡྷིཾ ཨེཀགནྡྷཀུཊིཡཾ ཝསཱམཱི’’ཏི ཝཏྭཱ ཨཉྙཏརསྨིཾ ཏིཏྠིཡཱརཱམེ ཝསིཏྭཱ པཱཏོཝ ཛེཏཝནམགྒཾ ཨོཏརིཏྭཱ ནགརཱབྷིམུཁཱི ཨཱགཙྪནྟཱི ‘‘ཀིཾ སུནྡརི ཀཧཾ གཏཱསཱི’’ཏི ཙ པུཊྛཱ ‘‘སམཎེན གོཏམེན སདྡྷིཾ ཨེཀགནྡྷཀུཊིཡཾ ཝསིཏྭཱ ཏཾ ཀིལེསརཏིཡཱ རམཱཔེཏྭཱ ཨཱགཏཱམྷཱི’’ཏི ཝདཏི། ཏེན ཝུཏྟཾ – ‘‘ཨེཝཾ ཨཡྻཱཏི ཁོ སུནྡརཱི པརིབྦཱཛིཀཱ ཏེསཾ ཨཉྙཏིཏྠིཡཱནཾ པརིབྦཱཛཀཱནཾ པཊིསྶུཏྭཱ ཨབྷིཀྑཎཾ ཛེཏཝནཾ ཨགམཱསཱི’’ཏི།
Tena hīti ‘‘yasmā tvaṃ ‘jīvitampi me tumhākaṃ atthāya pariccatta’nti vadasi, tvañca paṭhamavaye ṭhitā abhirūpā sobhaggappattā ca, tasmā yathā taṃ nissāya samaṇassa gotamassa ayaso uppajjissati, tathā kareyyāsī’’ti vatvā ‘‘abhikkhaṇaṃ jetavanaṃ gacchāhī’’ti uyyojesuṃ. Sāpi kho bālā kakacadantapantiyā pupphāvalikīḷaṃ kīḷitukāmā viya, pabhinnamadaṃ caṇḍahatthiṃ soṇḍāya parāmasantī viya, nalāṭena maccuṃ gaṇhantī viya titthiyānaṃ vacanaṃ sampaṭicchitvā mālāgandhavilepanatambūlamukhavāsādīni gahetvā mahājanassa satthu dhammadesanaṃ sutvā nagaraṃ pavisanakāle jetavanābhimukhī gacchantī ‘‘kahaṃ gacchasī’’ti ca puṭṭhā ‘‘samaṇassa gotamassa santikaṃ, ahañhi tena saddhiṃ ekagandhakuṭiyaṃ vasāmī’’ti vatvā aññatarasmiṃ titthiyārāme vasitvā pātova jetavanamaggaṃ otaritvā nagarābhimukhī āgacchantī ‘‘kiṃ sundari kahaṃ gatāsī’’ti ca puṭṭhā ‘‘samaṇena gotamena saddhiṃ ekagandhakuṭiyaṃ vasitvā taṃ kilesaratiyā ramāpetvā āgatāmhī’’ti vadati. Tena vuttaṃ – ‘‘evaṃ ayyāti kho sundarī paribbājikā tesaṃ aññatitthiyānaṃ paribbājakānaṃ paṭissutvā abhikkhaṇaṃ jetavanaṃ agamāsī’’ti.
ཏིཏྠིཡཱ ཀཏིཔཱཧསྶ ཨཙྩཡེན དྷུཏྟཱནཾ ཀཧཱཔཎེ དཏྭཱ ‘‘གཙྪཐ, སུནྡརིཾ མཱརེཏྭཱ སམཎསྶ གོཏམསྶ གནྡྷཀུཊིཡཱ ཨཝིདཱུརེ མཱལཱཀཙཝརནྟརེ ནིཀྑིཔིཏྭཱ ཨེཐཱ’’ཏི ཝདིཾསུ། ཏེ ཏཐཱ ཨཀཾསུ། ཏཏོ ཏིཏྠིཡཱ ‘‘སུནྡརིཾ ན པསྶཱམཱ’’ཏི ཀོལཱཧལཾ ཀཏྭཱ རཉྙོ ཨཱརོཙེཏྭཱ ‘‘ཀཏྠ པན ཏུམྷེ པརིསངྐཐཱ’’ཏི རཉྙཱ ཝུཏྟཱ ཨིམེསུ དིཝསེསུ ཛེཏཝནེ ཝསཏི, ཏཏྠསྶཱ པཝཏྟིཾ ན ཛཱནཱམཱཏི། ‘‘ཏེན ཧི གཙྪཐ, ནཾ ཏཏྠ ཝིཙིནཐཱ’’ཏི རཉྙཱ ཨནུཉྙཱཏཱ ཨཏྟནོ ཨུཔཊྛཱཀེ གཧེཏྭཱ ཛེཏཝནཾ གནྟྭཱ ཝིཙིནནྟཱ ཝིཡ ཧུཏྭཱ མཱལཱཀཙཝརཾ བྱཱུཧིཏྭཱ ཏསྶཱ སརཱིརཾ མཉྩཀཾ ཨཱརོཔེཏྭཱ ནགརཾ པཝེསེཏྭཱ ‘‘སམཎསྶ གོཏམསྶ སཱཝཀཱ ‘སཏྠུནཱ ཀཏཾ པཱཔཀམྨཾ པཊིཙྪཱདེསྶཱམཱ’ཏི སུནྡརིཾ མཱརེཏྭཱ མཱལཱཀཙཝརནྟརེ ནིཀྑིཔིཾསཱུ’’ཏི རཉྙོ ཨཱརོཙེསུཾ། རཱཛཱཔི ཨནུཔཔརིཀྑིཏྭཱ ‘‘ཏེན ཧི གཙྪཐ, ནགརཾ ཨཱཧིཎྜཐཱ’’ཏི ཨཱཧ། ཏེ ནགརཝཱིཐཱིསུ ‘‘པསྶཐ སམཎཱནཾ སཀྱཔུཏྟིཡཱནཾ ཀམྨ’’ནྟིཨཱདཱིནི ཝདནྟཱ ཝིཙརིཏྭཱ པུན རཉྙོ ནིཝེསནདྭཱརཾ ཨགམཾསུ། རཱཛཱ སུནྡརིཡཱ སརཱིརཾ ཨཱམཀསུསཱནེ ཨཊྚཀཾ ཨཱརོཔེཏྭཱ རཀྑཱཔེསི། སཱཝཏྠིཝཱསིནོ ཋཔེཏྭཱ ཨརིཡསཱཝཀེ ཡེབྷུཡྻེན ‘‘པསྶཐ སམཎཱནཾ སཀྱཔུཏྟིཡཱནཾ ཀམྨ’’ནྟིཨཱདཱིནི ཝཏྭཱ ཨནྟོནགརེ བཧིནགརེ ཙ བྷིཀྑཱུ ཨཀྐོསནྟཱ ཝིཙརིཾསུ། ཏེན ཝུཏྟཾ – ‘‘ཡདཱ ཏེ ཨཉྙིཾསུ ཏིཏྠིཡཱ པརིབྦཱཛཀཱ ‘ཝོདིཊྛཱ ཁོ སུནྡརཱི’’’ཏིཨཱདི།
Titthiyā katipāhassa accayena dhuttānaṃ kahāpaṇe datvā ‘‘gacchatha, sundariṃ māretvā samaṇassa gotamassa gandhakuṭiyā avidūre mālākacavarantare nikkhipitvā ethā’’ti vadiṃsu. Te tathā akaṃsu. Tato titthiyā ‘‘sundariṃ na passāmā’’ti kolāhalaṃ katvā rañño ārocetvā ‘‘kattha pana tumhe parisaṅkathā’’ti raññā vuttā imesu divasesu jetavane vasati, tatthassā pavattiṃ na jānāmāti. ‘‘Tena hi gacchatha, naṃ tattha vicinathā’’ti raññā anuññātā attano upaṭṭhāke gahetvā jetavanaṃ gantvā vicinantā viya hutvā mālākacavaraṃ byūhitvā tassā sarīraṃ mañcakaṃ āropetvā nagaraṃ pavesetvā ‘‘samaṇassa gotamassa sāvakā ‘satthunā kataṃ pāpakammaṃ paṭicchādessāmā’ti sundariṃ māretvā mālākacavarantare nikkhipiṃsū’’ti rañño ārocesuṃ. Rājāpi anupaparikkhitvā ‘‘tena hi gacchatha, nagaraṃ āhiṇḍathā’’ti āha. Te nagaravīthīsu ‘‘passatha samaṇānaṃ sakyaputtiyānaṃ kamma’’ntiādīni vadantā vicaritvā puna rañño nivesanadvāraṃ agamaṃsu. Rājā sundariyā sarīraṃ āmakasusāne aṭṭakaṃ āropetvā rakkhāpesi. Sāvatthivāsino ṭhapetvā ariyasāvake yebhuyyena ‘‘passatha samaṇānaṃ sakyaputtiyānaṃ kamma’’ntiādīni vatvā antonagare bahinagare ca bhikkhū akkosantā vicariṃsu. Tena vuttaṃ – ‘‘yadā te aññiṃsu titthiyā paribbājakā ‘vodiṭṭhā kho sundarī’’’tiādi.
ཏཏྠ ཨཉྙིཾསཱུཏི ཛཱནིཾསུ། ཝོདིཊྛཱཏི བྱཔདིཊྛཱ, ཛེཏཝནཾ ཨཱགཙྪནྟཱི ཙ གཙྪནྟཱི ཙ ཝིསེསཏོ དིཊྛཱ, བཧུལཾ དིཊྛཱཏི ཨཏྠོ། པརིཁཱཀཱུཔེཏི དཱིགྷིཀཱཝཱཊེ ། ཡཱ སཱ, མཧཱརཱཛ, སུནྡརཱིཏི, མཧཱརཱཛ, ཡཱ སཱ ཨིམསྨིཾ ནགརེ རཱུཔསུནྡརཏཱཡ ‘‘སུནྡརཱི’’ཏི པཱཀཊཱ ཨབྷིཉྙཱཏཱ པརིབྦཱཛིཀཱ། སཱ ནོ ན དིསྶཏཱིཏི སཱ ཨམྷཱཀཾ ཙཀྑུ ཝིཡ ཛཱིཝིཏཾ ཝིཡ ཙ པིཡཱཡིཏབྦཱ, ཨིདཱནི ན དིསྶཏི། ཡཐཱནིཀྑིཏྟནྟི པུརིསེ ཨཱཎཱཔེཏྭཱ མཱལཱཀཙཝརནྟརེ ཨཏྟནཱ ཡཐཱཋཔིཏཾ། ‘‘ཡཐཱནིཁཱཏ’’ནྟིཔི པཱཋོ, པཐཝིཡཾ ནིཁཱཏཔྤཀཱརནྟི ཨཏྠོ།
Tattha aññiṃsūti jāniṃsu. Vodiṭṭhāti byapadiṭṭhā, jetavanaṃ āgacchantī ca gacchantī ca visesato diṭṭhā, bahulaṃ diṭṭhāti attho. Parikhākūpeti dīghikāvāṭe . Yā sā, mahārāja, sundarīti, mahārāja, yā sā imasmiṃ nagare rūpasundaratāya ‘‘sundarī’’ti pākaṭā abhiññātā paribbājikā. Sā no na dissatīti sā amhākaṃ cakkhu viya jīvitaṃ viya ca piyāyitabbā, idāni na dissati. Yathānikkhittanti purise āṇāpetvā mālākacavarantare attanā yathāṭhapitaṃ. ‘‘Yathānikhāta’’ntipi pāṭho, pathaviyaṃ nikhātappakāranti attho.
རཐིཡཱཡ རཐིཡནྟི ཝཱིཐིཏོ ཝཱིཐིཾ། ཝཱིཐཱིཏི ཧི ཝིནིཝིཛ྄ཛྷནཀརཙྪཱ། སིངྒྷཱཊཀནྟི ཏིཀོཎརཙྪཱ། ཨལཛྫིནོཏི ན ལཛྫིནོ, པཱཔཛིགུཙྪཱཝིརཧིཏཱཏི ཨཏྠོ། དུསྶཱིལཱཏི ནིསྶཱིལཱ། པཱཔདྷམྨཱཏི ལཱམཀསབྷཱཝཱ ནིཧཱིནཱཙཱརཱ། མུསཱཝཱདིནོཏི དུསྶཱིལཱ སམཱནཱ ‘‘སཱིལཝནྟོ མཡ’’ནྟི ཨལིཀཝཱདིཏཱཡ མུསཱཝཱདིནོ། ཨབྲཧྨཙཱརིནོཏི ‘‘མེཐུནཔྤཊིསེཝིཏཱཡ ཨསེཊྛཙཱརིནོ ཨིམེ ཧི ནཱམཱ’’ཏི ཧཱིལེ༹ནྟཱ ཝདནྟི། དྷམྨཙཱརིནོཏི ཀུསལདྷམྨཙཱརིནོ། སམཙཱརིནོཏི ཀཱཡཀམྨཱདིསམཙཱརིནོ། ཀལྱཱཎདྷམྨཱཏི སུནྡརསབྷཱཝཱ, པཊིཛཱནིསྶནྟི ནཱམཱཏི སམྦནྡྷོ། ནཱམསདྡཡོགེན ཧི ཨེཏྠ པཊིཛཱནིསྶནྟཱིཏི ཨནཱགཏཀཱལཝཙནཾ། སཱམཉྙནྟི སམཎབྷཱཝོ སམིཏཔཱཔཏཱ། བྲཧྨཉྙནྟི སེཊྛབྷཱཝོ བཱཧིཏཔཱཔཏཱ། ཀུཏོཏི ཀེན ཀཱརཎེན། ཨཔགཏཱཏི ཨཔེཏཱ པརིབྷཊྛཱ། པུརིསཀིཙྩནྟི མེཐུནཔྤཊིསེཝནཾ སནྡྷཱཡ ཝདནྟི།
Rathiyāya rathiyanti vīthito vīthiṃ. Vīthīti hi vinivijjhanakaracchā. Siṅghāṭakanti tikoṇaracchā. Alajjinoti na lajjino, pāpajigucchāvirahitāti attho. Dussīlāti nissīlā. Pāpadhammāti lāmakasabhāvā nihīnācārā. Musāvādinoti dussīlā samānā ‘‘sīlavanto maya’’nti alikavāditāya musāvādino. Abrahmacārinoti ‘‘methunappaṭisevitāya aseṭṭhacārino ime hi nāmā’’ti hīḷentā vadanti. Dhammacārinoti kusaladhammacārino. Samacārinoti kāyakammādisamacārino. Kalyāṇadhammāti sundarasabhāvā, paṭijānissanti nāmāti sambandho. Nāmasaddayogena hi ettha paṭijānissantīti anāgatakālavacanaṃ. Sāmaññanti samaṇabhāvo samitapāpatā. Brahmaññanti seṭṭhabhāvo bāhitapāpatā. Kutoti kena kāraṇena. Apagatāti apetā paribhaṭṭhā. Purisakiccanti methunappaṭisevanaṃ sandhāya vadanti.
ཨཐ བྷིཀྑཱུ ཏཾ པཝཏྟིཾ བྷགཝཏོ ཨཱརོཙེསུཾ། སཏྠཱ ‘‘ཏེན ཧི, བྷིཀྑཝེ, ཏུམྷེཔི ཏེ མནུསྶེ ཨིམཱཡ གཱཐཱཡ པཊིཙོདེཐཱ’’ཏི ཝཏྭཱ ‘‘ཨབྷཱུཏཝཱདཱི’’ཏི གཱཐམཱཧ། ཏཾ སནྡྷཱཡ ཝུཏྟཾ – ‘‘ཨཐ ཁོ སམྦཧུལཱ…པེ॰… ནིཧཱིནཀམྨཱ མནུཛཱ པརཏྠཱ’’ཏི། ཏཏྠ ནེསོ, བྷིཀྑཝེ, སདྡོ ཙིརཾ བྷཝིསྶཏཱིཏི ཨིདཾ སཏྠཱ ཏསྶ ཨཡསསྶ ནིཔྥཏྟིཾ སབྦཉྙུཏཉྙཱཎེན ཛཱནིཏྭཱ བྷིཀྑཱུ སམསྶཱསེནྟོ ཨཱཧ།
Atha bhikkhū taṃ pavattiṃ bhagavato ārocesuṃ. Satthā ‘‘tena hi, bhikkhave, tumhepi te manusse imāya gāthāya paṭicodethā’’ti vatvā ‘‘abhūtavādī’’ti gāthamāha. Taṃ sandhāya vuttaṃ – ‘‘atha kho sambahulā…pe… nihīnakammā manujā paratthā’’ti. Tattha neso, bhikkhave, saddo ciraṃbhavissatīti idaṃ satthā tassa ayasassa nipphattiṃ sabbaññutaññāṇena jānitvā bhikkhū samassāsento āha.
གཱཐཱཡཾ ཨབྷཱུཏཝཱདཱིཏི པརསྶ དོསཾ ཨདིསྭཱཝ མུསཱཝཱདཾ ཀཏྭཱ ཨབྷཱུཏེན ཨཏཙྪེན པརཾ ཨབྦྷཱཙིཀྑནྟོ། ཡོ ཝཱཔི ཀཏྭཱཏི ཡོ ཝཱ པན པཱཔཀམྨཾ ཀཏྭཱ ‘‘ནཱཧཾ ཨེཏཾ ཀརོམཱི’’ཏི ཨཱཧ། པེཙྩ སམཱ བྷཝནྟཱིཏི ཏེ ཨུབྷོཔི ཛནཱ ཨིཏོ པརལོཀཾ གནྟྭཱ ནིརཡཱུཔགམནེན གཏིཡཱ སམཱ བྷཝནྟི། གཏིཡེཝ ཧི ནེསཾ པརིཙྪིནྣཱ, ཨཱཡཱུ པན ཨཔརིཙྪིནྣཱ། བཧུཀཉྷི པཱཔཾ ཀཏྭཱ ཙིརཾ ནིརཡེ པཙྩཏི, པརིཏྟཀཾ ཀཏྭཱ ཨཔྤམཏྟཀམེཝ ཀཱལཾ པཙྩཏི། ཡསྨཱ པན ནེསཾ ཨུབྷིནྣམྤི ལཱམཀམེཝ ཀམྨཾ, ཏེན ཝུཏྟཾ – ནིཧཱིནཀམྨཱ མནུཛཱ པརཏྠཱཏི། ‘‘པརཏྠཱ’’ཏི ཨིམསྶ པན པདསྶ པུརཏོ ‘‘པེཙྩཱ’’ཏིཔདེན སམྦནྡྷོ, པེཙྩ པརཏྠ ཨིཏོ གནྟྭཱ ཏེ ནིཧཱིནཀམྨཱ པརལོཀེ སམཱ བྷཝནྟཱིཏི ཨཏྠོ།
Gāthāyaṃ abhūtavādīti parassa dosaṃ adisvāva musāvādaṃ katvā abhūtena atacchena paraṃ abbhācikkhanto. Yo vāpi katvāti yo vā pana pāpakammaṃ katvā ‘‘nāhaṃ etaṃ karomī’’ti āha. Pecca samā bhavantīti te ubhopi janā ito paralokaṃ gantvā nirayūpagamanena gatiyā samā bhavanti. Gatiyeva hi nesaṃ paricchinnā, āyū pana aparicchinnā. Bahukañhi pāpaṃ katvā ciraṃ niraye paccati, parittakaṃ katvā appamattakameva kālaṃ paccati. Yasmā pana nesaṃ ubhinnampi lāmakameva kammaṃ, tena vuttaṃ – nihīnakammā manujā paratthāti. ‘‘Paratthā’’ti imassa pana padassa purato ‘‘peccā’’tipadena sambandho, pecca parattha ito gantvā te nihīnakammā paraloke samā bhavantīti attho.
པརིཡཱཔུཎིཏྭཱཏི ཨུགྒཧེཏྭཱ། ཨཀཱརཀཱཏི ཨཔརཱདྷསྶ ན ཀཱརཀཱ། ནཡིམེཧི ཀཏནྟི ཨེཝཾ ཀིར ནེསམཧོསི – ཨིམེཧི སམཎེཧི སཀྱཔུཏྟིཡེཧི ཨདྡྷཱ ཏཾ པཱཔཀམྨཾ ན ཀཏཾ, ཡཾ ཨཉྙཏིཏྠིཡཱ ཨུགྒྷོསིཏྭཱ སཀལནགརཾ ཨཱཧིཎྜིཾསུ, ཡསྨཱ ཨིམེ ཨམྷེསུ ཨེཝཾ ཨསབྦྷཱཧི ཕརུསཱཧི ཝཱཙཱཧི ཨབྦྷཱཙིཀྑནྟེསུཔི ན ཀིཉྩི ཝིཀཱརཾ དསྶེནྟི, ཁནྟིསོརཙྩཉྩ ན ཝིཛཧནྟི, ཀེཝལཾ པན ‘‘ཨབྷཱུཏཝཱདཱི ནིརཡཾ ཨུཔེཏཱི’’ཏི དྷམྨཾཡེཝ ཝདནྟཱ སཔནྟིཡེཝ, ཨིམེ སམཎཱ སཀྱཔུཏྟིཡཱ ཨམྷེ ཨནུཔདྷཱརེཏྭཱ ཨབྦྷཱཙིཀྑནྟེ སཔནྟི, སཔཐཾ ཀརོནྟཱ ཝིཡ ཝདནྟི ། ཨཐ ཝཱ ‘‘ཡོ ཝཱཔི ཀཏྭཱ ‘ན ཀརོམི’ ཙཱཧཱ’’ཏི ཝདནྟཱ སཔནྟི, ཨཏྟནོ ཨཀཱརཀབྷཱཝཾ བོདྷེཏུཾ ཨམྷཱཀཾ སཔཐཾ ཀརོནྟི ཨིམེཏི ཨཏྠོ།
Pariyāpuṇitvāti uggahetvā. Akārakāti aparādhassa na kārakā. Nayimehi katanti evaṃ kira nesamahosi – imehi samaṇehi sakyaputtiyehi addhā taṃ pāpakammaṃ na kataṃ, yaṃ aññatitthiyā ugghositvā sakalanagaraṃ āhiṇḍiṃsu, yasmā ime amhesu evaṃ asabbhāhi pharusāhi vācāhi abbhācikkhantesupi na kiñci vikāraṃ dassenti, khantisoraccañca na vijahanti, kevalaṃ pana ‘‘abhūtavādī nirayaṃ upetī’’ti dhammaṃyeva vadantā sapantiyeva, ime samaṇā sakyaputtiyā amhe anupadhāretvā abbhācikkhante sapanti, sapathaṃ karontā viya vadanti . Atha vā ‘‘yo vāpi katvā ‘na karomi’ cāhā’’ti vadantā sapanti, attano akārakabhāvaṃ bodhetuṃ amhākaṃ sapathaṃ karonti imeti attho.
ཏེསཉྷི མནུསྶཱནཾ བྷགཝཏཱ བྷཱསིཏགཱཐཱཡ སཝནསམནནྟརམེཝ བུདྡྷཱནུབྷཱཝེན སཱརཛྫཾ ཨོཀྐམི, སཾཝེགོ ཨུཔྤཛྫི ‘‘ནཡིདཾ ཨམྷེཧི པཙྩཀྑཏོ དིཊྛཾ, སུཏཾ ནཱམ ཏཐཱཔི ཧོཏི, ཨཉྙཐཱཔི ཧོཏི, ཨེཏེ ཙ ཨཉྙཏིཏྠིཡཱ ཨིམེསཾ ཨནཏྠཀཱམཱ ཨཧིཏཀཱམཱ, ཏསྨཱ ཏེ སདྡྷཱཡ ནཡིདཾ ཨམྷེཧི ཝཏྟབྦཾ, དུཛྫཱནཱ ཧི སམཎཱ’’ཏི། ཏེ ཏཏོ པཊྛཱཡ ཏཏོ ཨོརམིཾསུ།
Tesañhi manussānaṃ bhagavatā bhāsitagāthāya savanasamanantarameva buddhānubhāvena sārajjaṃ okkami, saṃvego uppajji ‘‘nayidaṃ amhehi paccakkhato diṭṭhaṃ, sutaṃ nāma tathāpi hoti, aññathāpi hoti, ete ca aññatitthiyā imesaṃ anatthakāmā ahitakāmā, tasmā te saddhāya nayidaṃ amhehi vattabbaṃ, dujjānā hi samaṇā’’ti. Te tato paṭṭhāya tato oramiṃsu.
རཱཛཱཔི ཡེཧི སུནྡརཱི མཱརིཏཱ, ཏེསཾ ཛཱནནཏྠཾ པུརིསེ ཨཱཎཱཔེསི། ཨཐ ཏེ དྷུཏྟཱ ཏེཧི ཀཧཱཔཎེཧི སུརཾ པིཝནྟཱ ཨཉྙམཉྙཾ ཀལཧཾ ཀརིཾསུ། ཏེསུ ཧི ཨེཀོ ཨེཀཾ ཨཱཧ – ‘‘ཏྭཾ སུནྡརིཾ ཨེཀཔྤཧཱརེན མཱརེཏྭཱ མཱལཱཀཙཝརནྟརེ ཁིཔིཏྭཱ ཏཏོ ལདྡྷཀཧཱཔཎེཧི སུརཾ པིཝསི, ཧོཏུ ཧོཏཱུ’’ཏི། རཱཛཔུརིསཱ ཏཾ སུཏྭཱ ཏེ དྷུཏྟེ གཧེཏྭཱ རཉྙོ དསྶེསུཾ། རཱཛཱ ‘‘ཏུམྷེཧི སཱ མཱརིཏཱ’’ཏི ཏེ དྷུཏྟེ པུཙྪི། ‘‘ཨཱམ, དེཝཱ’’ཏི། ‘‘ཀེཧི མཱརཱཔིཏཱ’’ཏི? ‘‘ཨཉྙཏིཏྠིཡེཧི, དེཝཱ’’ཏི། རཱཛཱ ཏིཏྠིཡེ པཀྐོསཱཔེཏྭཱ ཏམཏྠཾ པཊིཛཱནཱཔེཏྭཱ, ‘‘ཨཡཾ སུནྡརཱི ཏསྶ སམཎསྶ གོཏམསྶ ཨཝཎྞཾ ཨཱརོཔེཏུཀཱམེཧི ཨམྷེཧི མཱརཱཔིཏཱ, ནེཝ གོཏམསྶ, ན གོཏམསཱཝཀཱནཾ དོསོ ཨཏྠི, ཨམྷཱཀམེཝ དོསོཏི ཨེཝཾ ཝདནྟཱ ནགརཾ ཨཱཧིཎྜཐཱ’’ཏི ཨཱཎཱཔེསི། ཏེ ཏཐཱ ཨཀཾསུ། མཧཱཛནོ སམྨདེཝ སདྡཧི། ཏིཏྠིཡཱནཾ དྷིཀྐཱརཾ ཨཀཱསི, ཏིཏྠིཡཱ མནུསྶཝདྷདཎྜཾ པཱཔུཎིཾསུ། ཏཏོ པཊྛཱཡ བུདྡྷསྶ བྷིཀྑུསངྒྷསྶ ཙ བྷིཡྻོསོམཏྟཱཡ སཀྐཱརསམྨཱནོ མཧཱ ཨཧོསི། བྷིཀྑཱུ ཨཙྪརིཡབྦྷུཏཙིཏྟཛཱཏཱ བྷགཝནྟཾ ཨབྷིཝཱདེཏྭཱ ཨཏྟམནཱ པཊིཝེདེསུཾ། ཏེན ཝུཏྟཾ – ‘‘ཨཐ ཁོ སམྦཧུལཱ བྷིཀྑཱུ…པེ॰… ཨནྟརཧིཏོ སོ, བྷནྟེ, སདྡོ’’ཏི།
Rājāpi yehi sundarī māritā, tesaṃ jānanatthaṃ purise āṇāpesi. Atha te dhuttā tehi kahāpaṇehi suraṃ pivantā aññamaññaṃ kalahaṃ kariṃsu. Tesu hi eko ekaṃ āha – ‘‘tvaṃ sundariṃ ekappahārena māretvā mālākacavarantare khipitvā tato laddhakahāpaṇehi suraṃ pivasi, hotu hotū’’ti. Rājapurisā taṃ sutvā te dhutte gahetvā rañño dassesuṃ. Rājā ‘‘tumhehi sā māritā’’ti te dhutte pucchi. ‘‘Āma, devā’’ti. ‘‘Kehi mārāpitā’’ti? ‘‘Aññatitthiyehi, devā’’ti. Rājā titthiye pakkosāpetvā tamatthaṃ paṭijānāpetvā, ‘‘ayaṃ sundarī tassa samaṇassa gotamassa avaṇṇaṃ āropetukāmehi amhehi mārāpitā, neva gotamassa, na gotamasāvakānaṃ doso atthi, amhākameva dosoti evaṃ vadantā nagaraṃ āhiṇḍathā’’ti āṇāpesi. Te tathā akaṃsu. Mahājano sammadeva saddahi. Titthiyānaṃ dhikkāraṃ akāsi, titthiyā manussavadhadaṇḍaṃ pāpuṇiṃsu. Tato paṭṭhāya buddhassa bhikkhusaṅghassa ca bhiyyosomattāya sakkārasammāno mahā ahosi. Bhikkhū acchariyabbhutacittajātā bhagavantaṃ abhivādetvā attamanā paṭivedesuṃ. Tena vuttaṃ – ‘‘atha kho sambahulā bhikkhū…pe… antarahito so, bhante, saddo’’ti.
ཀསྨཱ པན བྷགཝཱ ‘‘ཏིཏྠིཡཱནཾ ཨིདཾ ཀམྨ’’ནྟི བྷིཀྑཱུནཾ ནཱརོཙེསི? ཨརིཡཱནཾ ཏཱཝ ཨཱརོཙནེན པཡོཛནཾ ནཏྠི, པུཐུཛྫནེསུ པན ‘‘ཡེ ན སདྡཧེཡྻུཾ, ཏེསཾ ཏཾ དཱིགྷརཏྟཾ ཨཧིཏཱཡ དུཀྑཱཡ སཾཝཏྟེཡྻཱ’’ཏི ནཱརོཙེསི། ཨཔིཙེཏཾ བུདྡྷཱནཾ ཨནཱཙིཎྞཾ, ཡཾ ཨནཱགཏསྶ ཨཱིདིསསྶ ཝཏྠུསྶ ཨཱཙིཀྑནཾ། པརཱནུདྡེསིཀམེཝ ཧི བྷགཝཱ སཾཀིལེསཔཀྑཾ ཝིབྷཱཝེཏི , ཀམྨཉྩ ཀཏོཀཱསཾ ན སཀྐཱ ནིཝཏྟེཏུནྟི ཨབྦྷཀྑཱནཾ ཏནྣིམིཏྟཉྩ བྷགཝཱ ཨཛ྄ཛྷུཔེཀྑནྟོ ནིསཱིདི། ཝུཏྟཉྷེཏཾ –
Kasmā pana bhagavā ‘‘titthiyānaṃ idaṃ kamma’’nti bhikkhūnaṃ nārocesi? Ariyānaṃ tāva ārocanena payojanaṃ natthi, puthujjanesu pana ‘‘ye na saddaheyyuṃ, tesaṃ taṃ dīgharattaṃ ahitāya dukkhāya saṃvatteyyā’’ti nārocesi. Apicetaṃ buddhānaṃ anāciṇṇaṃ, yaṃ anāgatassa īdisassa vatthussa ācikkhanaṃ. Parānuddesikameva hi bhagavā saṃkilesapakkhaṃ vibhāveti , kammañca katokāsaṃ na sakkā nivattetunti abbhakkhānaṃ tannimittañca bhagavā ajjhupekkhanto nisīdi. Vuttañhetaṃ –
‘‘ན ཨནྟལིཀྑེ ན སམུདྡམཛ྄ཛྷེ,
‘‘Na antalikkhe na samuddamajjhe,
ན པབྦཏཱནཾ ཝིཝརཾ པཝིསྶ།
Na pabbatānaṃ vivaraṃ pavissa;
ན ཝིཛྫཏཱི སོ ཛགཏིཔྤདེསོ,
Na vijjatī so jagatippadeso,
ཡཏྠཊྛིཏོ མུཙྩེཡྻ པཱཔཀམྨཱ’’ཏི༎ (དྷ॰ པ॰ ༡༢༧; མི॰ པ॰ ༤.༢.༤)།
Yatthaṭṭhito mucceyya pāpakammā’’ti. (dha. pa. 127; mi. pa. 4.2.4);
ཨེཏམཏྠཾ ཝིདིཏྭཱཏི མམྨཙྪེདནཝསེནཱཔི བཱལཛནེཧི པཝཏྟིཏཾ དུརུཏྟཝཙནཾ ཁནྟིབལསམནྣཱགཏསྶ དྷཱིརསྶ དུཏྟིཏིཀྑཱ ནཱམ ནཏྠཱིཏི ཨིམམཏྠཾ སབྦཱཀཱརཏོ ཝིདིཏྭཱ། ཨིམཾ ཨུདཱནནྟི ཨིམཾ ཨདྷིཝཱསནཁནྟིབལཝིབྷཱཝནཾ ཨུདཱནཾ ཨུདཱནེསི།
Etamatthaṃ viditvāti mammacchedanavasenāpi bālajanehi pavattitaṃ duruttavacanaṃ khantibalasamannāgatassa dhīrassa duttitikkhā nāma natthīti imamatthaṃ sabbākārato viditvā. Imaṃ udānanti imaṃ adhivāsanakhantibalavibhāvanaṃ udānaṃ udānesi.
ཏཏྠ ཏུདནྟི ཝཱཙཱཡ ཛནཱ ཨསཉྙཏཱ, སརེཧི སངྒཱམགཏཾཝ ཀུཉྫརནྟི ཀཱཡིཀསཾཝརཱདཱིསུ ཀསྶཙིཔི སཾཝརསྶ ཨབྷཱཝེན ཨསཾཡཏཱ ཨཝིནཱིཏཱ བཱལཛནཱ སརེཧི སཱཡཀེཧི སངྒཱམགཏཾ ཡུདྡྷགཏཾ ཀུཉྫརཾཝ ཧཏྠིནཱགཾ པཊིཡོདྷཱ ཝིཡ ཝཱཙཱསཏྟཱིཧི ཏུདནྟི ཝིཛ྄ཛྷནྟི, ཨཡཾ ཏེསཾ སབྷཱཝོ ། སུཏྭཱན ཝཱཀྱཾ ཕརུསཾ ཨུདཱིརིཏཾ, ཨདྷིཝཱསཡེ བྷིཀྑུ ཨདུཊྛཙིཏྟོཏི ཏཾ པན ཏེཧི བཱལཛནེཧི ཨུདཱིརིཏཾ བྷཱསིཏཾ མམྨགྷཊྚནཝསེན པཝཏྟིཏཾ ཕརུསཾ ཝཱཀྱཾ ཝཙནཾ ཨབྷཱུཏཾ བྷཱུཏཏོ ནིབྦེཋེནྟོ མམ ཀཀཙཱུཔམཨོཝཱདཾ (མ॰ ནི॰ ༡.༢༢༢ ཨཱདཡོ) ཨནུསྶརནྟོ ཨཱིསཀམྤི ཨདུཊྛཙིཏྟོ ཧུཏྭཱ ‘‘སཾསཱརསབྷཱཝོ ཨེསོ’’ཏི སཾསཱརེ བྷཡཾ ཨིཀྑཎསཱིལོ བྷིཀྑུ ཨདྷིཝཱསཡེ, ཨདྷིཝཱསནཁནྟིཡཾ ཋཏྭཱ ཁམེཡྻཱཏི ཨཏྠོ།
Tattha tudanti vācāya janā asaññatā, sarehi saṅgāmagataṃvakuñjaranti kāyikasaṃvarādīsu kassacipi saṃvarassa abhāvena asaṃyatā avinītā bālajanā sarehi sāyakehi saṅgāmagataṃ yuddhagataṃ kuñjaraṃva hatthināgaṃ paṭiyodhā viya vācāsattīhi tudanti vijjhanti, ayaṃ tesaṃ sabhāvo . Sutvāna vākyaṃ pharusaṃ udīritaṃ, adhivāsaye bhikkhu aduṭṭhacittoti taṃ pana tehi bālajanehi udīritaṃ bhāsitaṃ mammaghaṭṭanavasena pavattitaṃ pharusaṃ vākyaṃ vacanaṃ abhūtaṃ bhūtato nibbeṭhento mama kakacūpamaovādaṃ (ma. ni. 1.222 ādayo) anussaranto īsakampi aduṭṭhacitto hutvā ‘‘saṃsārasabhāvo eso’’ti saṃsāre bhayaṃ ikkhaṇasīlo bhikkhu adhivāsaye, adhivāsanakhantiyaṃ ṭhatvā khameyyāti attho.
ཨེཏྠཱཧ – ཀིཾ པན ཏཾ ཀམྨཾ, ཡཾ ཨཔརིམཱཎཀཱལཾ སཀྐཙྩཾ ཨུཔཙིཏཝིཔུལཔུཉྙསམྦྷཱརོ སཏྠཱ ཨེཝཾ དཱརུཎཾ ཨབྷཱུཏབྦྷཀྑཱནཾ པཱཔུཎཱིཏི? ཝུཙྩཏེ – ཨཡཾ སོ བྷགཝཱ བོདྷིསཏྟབྷཱུཏོ ཨཏཱིཏཛཱཏིཡཾ མུནཱལི༹ ནཱམ དྷུཏྟོ ཧུཏྭཱ པཱཔཛནསེཝཱི ཨཡོནིསོམནསིཀཱརབཧུལོ ཝིཙརཏི། སོ ཨེཀདིཝསཾ སུརབྷིཾ ནཱམ པཙྩེཀསམྦུདྡྷཾ ནགརཾ པིཎྜཱཡ པཝིསིཏུཾ ཙཱིཝརཾ པཱརུཔནྟཾ པསྶི། ཏསྨིཉྩ སམཡེ ཨཉྙཏརཱ ཨིཏྠཱི ཏསྶ ཨཝིདཱུརེན གཙྪཏི། དྷུཏྟོ ‘‘ཨབྲཧྨཙཱརཱི ཨཡཾ སམཎོ’’ཏི ཨབྦྷཱཙིཀྑི། སོ ཏེན ཀམྨེན བཧཱུནི ཝསྶསཏསཧསྶཱནི ནིརཡེ པཙྩིཏྭཱ ཏསྶེཝ ཀམྨསྶ ཝིཔཱཀཱཝསེསེན ཨིདཱནི བུདྡྷོ ཧུཏྭཱཔི སུནྡརིཡཱ ཀཱརཎཱ ཨབྷཱུཏབྦྷཀྑཱནཾ པཱཔུཎི། ཡཐཱ ཙེཏཾ, ཨེཝཾ ཙིཉྩམཱཎཝིཀཱདཱིནཾ ཝིཀཱརཀིཏྠཱིནཾ བྷགཝཏོ ཨབྦྷཀྑཱནཱདཱིནི དུཀྑཱནི པཏྟཱནི, སབྦཱནི པུབྦེ ཀཏསྶ ཀམྨསྶ ཝིཔཱཀཱཝསེསཱནི, ཡཱནི ‘‘ཀམྨཔིལོཏིཀཱནཱི’’ཏི ཝུཙྩནྟི། ཝུཏྟཉྷེཏཾ ཨཔདཱནེ (ཨཔ॰ ཐེར ༡.༣༩.༦༤-༩༦) –
Etthāha – kiṃ pana taṃ kammaṃ, yaṃ aparimāṇakālaṃ sakkaccaṃ upacitavipulapuññasambhāro satthā evaṃ dāruṇaṃ abhūtabbhakkhānaṃ pāpuṇīti? Vuccate – ayaṃ so bhagavā bodhisattabhūto atītajātiyaṃ munāḷi nāma dhutto hutvā pāpajanasevī ayonisomanasikārabahulo vicarati. So ekadivasaṃ surabhiṃ nāma paccekasambuddhaṃ nagaraṃ piṇḍāya pavisituṃ cīvaraṃ pārupantaṃ passi. Tasmiñca samaye aññatarā itthī tassa avidūrena gacchati. Dhutto ‘‘abrahmacārī ayaṃ samaṇo’’ti abbhācikkhi. So tena kammena bahūni vassasatasahassāni niraye paccitvā tasseva kammassa vipākāvasesena idāni buddho hutvāpi sundariyā kāraṇā abhūtabbhakkhānaṃ pāpuṇi. Yathā cetaṃ, evaṃ ciñcamāṇavikādīnaṃ vikārakitthīnaṃ bhagavato abbhakkhānādīni dukkhāni pattāni, sabbāni pubbe katassa kammassa vipākāvasesāni, yāni ‘‘kammapilotikānī’’ti vuccanti. Vuttañhetaṃ apadāne (apa. thera 1.39.64-96) –
‘‘ཨནོཏཏྟསརཱསནྣེ, རམཎཱིཡེ སིལཱཏལེ།
‘‘Anotattasarāsanne, ramaṇīye silātale;
ནཱནཱརཏནཔཛྫོཏེ, ནཱནཱགནྡྷཝནནྟརེ༎
Nānāratanapajjote, nānāgandhavanantare.
‘‘མཧཏཱ བྷིཀྑུསངྒྷེན, པརེཏོ ལོཀནཱཡཀོ།
‘‘Mahatā bhikkhusaṅghena, pareto lokanāyako;
ཨཱསཱིནོ བྱཱཀརཱི ཏཏྠ, པུབྦཀམྨཱནི ཨཏྟནོ༎
Āsīno byākarī tattha, pubbakammāni attano.
‘‘སུཎཱཐ བྷིཀྑཝོ མཡ྄ཧཾ, ཡཾ ཀམྨཾ པཀཏཾ མཡཱ།
‘‘Suṇātha bhikkhavo mayhaṃ, yaṃ kammaṃ pakataṃ mayā;
པིལོཏིཀསྶ ཀམྨསྶ, བུདྡྷཏྟེཔི ཝིཔཙྩཏི༎
Pilotikassa kammassa, buddhattepi vipaccati.
༡.
1.
‘‘མུནཱལི༹ ནཱམཧཾ དྷུཏྟོ, པུབྦེ ཨཉྙཱསུ ཛཱཏིསུ།
‘‘Munāḷi nāmahaṃ dhutto, pubbe aññāsu jātisu;
པཙྩེཀབུདྡྷཾ སུརབྷིཾ, ཨབྦྷཱཙིཀྑིཾ ཨདཱུསཀཾ༎
Paccekabuddhaṃ surabhiṃ, abbhācikkhiṃ adūsakaṃ.
‘‘ཏེན ཀམྨཝིཔཱཀེན, ནིརཡེ སཾསརིཾ ཙིརཾ།
‘‘Tena kammavipākena, niraye saṃsariṃ ciraṃ;
བཧཱུ ཝསྶསཧསྶཱནི, དུཀྑཾ ཝེདེམི ཝེདནཾ༎
Bahū vassasahassāni, dukkhaṃ vedemi vedanaṃ.
‘‘ཏེན ཀམྨཱཝསེསེན, ཨིདྷ པཙྪིམཀེ བྷཝེ།
‘‘Tena kammāvasesena, idha pacchimake bhave;
ཨབྦྷཀྑཱནཾ མཡཱ ལདྡྷཾ, སུནྡརིཀཱཡ ཀཱརཎཱ༎
Abbhakkhānaṃ mayā laddhaṃ, sundarikāya kāraṇā.
༢.
2.
‘‘སབྦཱབྷིབྷུསྶ བུདྡྷསྶ, ནནྡོ ནཱམཱསི སཱཝཀོ།
‘‘Sabbābhibhussa buddhassa, nando nāmāsi sāvako;
ཏཾ ཨབྦྷཀྑཱཡ ནིརཡེ, ཙིརཾ སཾསརིཏཾ མཡཱ༎
Taṃ abbhakkhāya niraye, ciraṃ saṃsaritaṃ mayā.
‘‘དས ཝསྶསཧསྶཱནི, ནིརཡེ སཾསརིཾ ཙིརཾ།
‘‘Dasa vassasahassāni, niraye saṃsariṃ ciraṃ;
མནུསྶབྷཱཝཾ ལདྡྷཱཧཾ, ཨབྦྷཀྑཱནཾ བཧུཾ ལབྷིཾ༎
Manussabhāvaṃ laddhāhaṃ, abbhakkhānaṃ bahuṃ labhiṃ.
‘‘ཏེན ཀམྨཱཝསེསེན, ཙིཉྩམཱཎཝིཀཱ མམཾ།
‘‘Tena kammāvasesena, ciñcamāṇavikā mamaṃ;
ཨབྦྷཱཙིཀྑི ཨབྷཱུཏེན, ཛནཀཱཡསྶ ཨགྒཏོ༎
Abbhācikkhi abhūtena, janakāyassa aggato.
༣.
3.
‘‘བྲཱཧྨཎོ སུཏཝཱ ཨཱསིཾ, ཨཧཾ སཀྐཏཔཱུཛིཏོ།
‘‘Brāhmaṇo sutavā āsiṃ, ahaṃ sakkatapūjito;
མཧཱཝནེ པཉྩསཏེ, མནྟེ ཝཱཙེམི མཱཎཝེ༎
Mahāvane pañcasate, mante vācemi māṇave.
‘‘ཏཏྠཱགཏོ ཨིསཱི བྷཱིམོ, པཉྩཱབྷིཉྙོ མཧིདྡྷིཀོ།
‘‘Tatthāgato isī bhīmo, pañcābhiñño mahiddhiko;
ཏཉྩཱཧཾ ཨཱགཏཾ དིསྭཱ, ཨབྦྷཱཙིཀྑིཾ ཨདཱུསཀཾ༎
Tañcāhaṃ āgataṃ disvā, abbhācikkhiṃ adūsakaṃ.
‘‘ཏཏོཧཾ ཨཝཙཾ སིསྶེ, ཀཱམབྷོགཱི ཨཡཾ ཨིསི།
‘‘Tatohaṃ avacaṃ sisse, kāmabhogī ayaṃ isi;
མཡ྄ཧམྤི བྷཱསམཱནསྶ, ཨནུམོདིཾསུ མཱཎཝཱ༎
Mayhampi bhāsamānassa, anumodiṃsu māṇavā.
‘‘ཏཏོ མཱཎཝཀཱ སབྦེ, བྷིཀྑམཱནཾ ཀུལེ ཀུལེ།
‘‘Tato māṇavakā sabbe, bhikkhamānaṃ kule kule;
མཧཱཛནསྶ ཨཱཧཾསུ, ཀཱམབྷོགཱི ཨཡཾ ཨིསི༎
Mahājanassa āhaṃsu, kāmabhogī ayaṃ isi.
‘‘ཏེན ཀམྨཝིཔཱཀེན, པཉྩ བྷིཀྑུསཏཱ ཨིམེ།
‘‘Tena kammavipākena, pañca bhikkhusatā ime;
ཨབྦྷཀྑཱནཾ ལབྷུཾ སབྦེ, སུནྡརིཀཱཡ ཀཱརཎཱ༎
Abbhakkhānaṃ labhuṃ sabbe, sundarikāya kāraṇā.
༤.
4.
‘‘ཝེམཱཏུབྷཱཏིཀཾ པུབྦེ, དྷནཧེཏུ ཧནིཾ ཨཧཾ།
‘‘Vemātubhātikaṃ pubbe, dhanahetu haniṃ ahaṃ;
པཀྑིཔིཾགིརིདུགྒསྨིཾ, སིལཱཡ ཙ ཨཔིཾསཡིཾ༎
Pakkhipiṃgiriduggasmiṃ, silāya ca apiṃsayiṃ.
‘‘ཏེན ཀམྨཝིཔཱཀེན, དེཝདཏྟོ སིལཾ ཁིཔི།
‘‘Tena kammavipākena, devadatto silaṃ khipi;
ཨངྒུཊྛཾ པིཾསཡཱི པཱདེ, མམ པཱསཱཎསཀྑརཱ༎
Aṅguṭṭhaṃ piṃsayī pāde, mama pāsāṇasakkharā.
༥.
5.
‘‘པུརེཧཾ དཱརཀོ ཧུཏྭཱ, ཀཱིལ༹མཱནོ མཧཱཔཐེ།
‘‘Purehaṃ dārako hutvā, kīḷamāno mahāpathe;
པཙྩེཀབུདྡྷཾ དིསྭཱན, མགྒེ སཀལིཀཾ ཁིཔིཾ༎
Paccekabuddhaṃ disvāna, magge sakalikaṃ khipiṃ.
‘‘ཏེན ཀམྨཝིཔཱཀེན, ཨིདྷ པཙྪིམཀེ བྷཝེ།
‘‘Tena kammavipākena, idha pacchimake bhave;
ཝདྷཏྠཾ མཾ དེཝདཏྟོ, ཨབྷིམཱརེ པཡོཛཡི༎
Vadhatthaṃ maṃ devadatto, abhimāre payojayi.
༦.
6.
‘‘ཧཏྠཱརོཧོ པུརེ ཨཱསིཾ, པཙྩེཀམུནིམུཏྟམཾ།
‘‘Hatthāroho pure āsiṃ, paccekamunimuttamaṃ;
པིཎྜཱཡ ཝིཙརནྟཾ ཏཾ, ཨཱསཱདེསིཾ གཛེནཧཾ༎
Piṇḍāya vicarantaṃ taṃ, āsādesiṃ gajenahaṃ.
‘‘ཏེན ཀམྨཝིཔཱཀེན, བྷནྟོ ནཱལཱ༹གིརཱི གཛོ།
‘‘Tena kammavipākena, bhanto nāḷāgirī gajo;
གིརིབྦཛེ པུརཝརེ, དཱརུཎོ སམུཔཱགམི༎
Giribbaje puravare, dāruṇo samupāgami.
༧.
7.
‘‘རཱཛཱཧཾ པཏྠིཝོ ཨཱསིཾ, སཏྟིཡཱ པུརིསེ ཧནིཾ།
‘‘Rājāhaṃ patthivo āsiṃ, sattiyā purise haniṃ;
ཏེན ཀམྨཝིཔཱཀེན, ནིརཡེ པཙྩིསཾ བྷུསཾ༎
Tena kammavipākena, niraye paccisaṃ bhusaṃ.
‘‘ཀམྨུནོ ཏསྶ སེསེན, སོདཱནི སཀལཾ མམ།
‘‘Kammuno tassa sesena, sodāni sakalaṃ mama;
པཱདེ ཚཝིཾ པཀཔྤེསི, ན ཧི ཀམྨཾ ཝིནསྶཏི༎
Pāde chaviṃ pakappesi, na hi kammaṃ vinassati.
༨.
8.
‘‘ཨཧཾ ཀེཝཊྚགཱམསྨིཾ, ཨཧུཾ ཀེཝཊྚདཱརཀོ།
‘‘Ahaṃ kevaṭṭagāmasmiṃ, ahuṃ kevaṭṭadārako;
མཙྪཀེ གྷཱཏིཏེ དིསྭཱ, ཛནཡིཾ སོམནསྶཀཾ༎
Macchake ghātite disvā, janayiṃ somanassakaṃ.
‘‘ཏེན ཀམྨཝིཔཱཀེན, སཱིསདུཀྑཾ ཨཧཱུ མམ།
‘‘Tena kammavipākena, sīsadukkhaṃ ahū mama;
སཀྐཱ ཙ སབྦེ ཧཉྙིཾསུ, ཡདཱ ཧནི ཝིཊཊཱུབྷོ༎
Sakkā ca sabbe haññiṃsu, yadā hani viṭaṭūbho.
༩.
9.
‘‘ཕུསྶསྶཱཧཾ པཱཝཙནེ, སཱཝཀེ པརིབྷཱསཡིཾ།
‘‘Phussassāhaṃ pāvacane, sāvake paribhāsayiṃ;
ཡཝཾ ཁཱདཐ བྷུཉྫཐ, མཱ ཙ བྷུཉྫཐ སཱལཡོ༎
Yavaṃ khādatha bhuñjatha, mā ca bhuñjatha sālayo.
‘‘ཏེན ཀམྨཝིཔཱཀེན, ཏེམཱསཾ ཁཱདིཏཾ ཡཝཾ།
‘‘Tena kammavipākena, temāsaṃ khāditaṃ yavaṃ;
ནིམནྟིཏོ བྲཱཧྨཎེན, ཝེརཉྫཱཡཾ ཝསིཾ ཏདཱ༎
Nimantito brāhmaṇena, verañjāyaṃ vasiṃ tadā.
༡༠.
10.
‘‘ནིབྦུདྡྷེ ཝཏྟམཱནམྷི, མལླཔུཏྟཾ ནིཧེཋཡིཾ།
‘‘Nibbuddhe vattamānamhi, mallaputtaṃ niheṭhayiṃ;
ཏེན ཀམྨཝིཔཱཀེན, པིཊྛིདུཀྑཾ ཨཧཱུ མམ༎
Tena kammavipākena, piṭṭhidukkhaṃ ahū mama.
༡༡.
11.
‘‘ཏིཀིཙྪཀོ ཨཧཾ ཨཱསིཾ, སེཊྛིཔུཏྟཾ ཝིརེཙཡིཾ།
‘‘Tikicchako ahaṃ āsiṃ, seṭṭhiputtaṃ virecayiṃ;
ཏེན ཀམྨཝིཔཱཀེན, ཧོཏི པཀྑནྡིཀཱ མམ༎
Tena kammavipākena, hoti pakkhandikā mama.
༡༢.
12.
‘‘ཨཝཙཱཧཾ ཛོཏིཔཱལོ, ཀསྶཔཾ སུགཏཾ ཏདཱ།
‘‘Avacāhaṃ jotipālo, kassapaṃ sugataṃ tadā;
ཀུཏོ ནུ བོདྷི མུཎྜསྶ, བོདྷི པརམདུལླབྷཱ༎
Kuto nu bodhi muṇḍassa, bodhi paramadullabhā.
‘‘ཏེན ཀམྨཝིཔཱཀེན, ཨཙརིཾ དུཀྐརཾ བཧུཾ།
‘‘Tena kammavipākena, acariṃ dukkaraṃ bahuṃ;
ཚབྦསྶཱནུརུཝེལཱཡཾ, ཏཏོ བོདྷིཾ ཨཔཱཔུཎིཾ༎
Chabbassānuruvelāyaṃ, tato bodhiṃ apāpuṇiṃ.
‘‘ནཱཧཾ ཨེཏེན མགྒེན, པཱཔུཎིཾ བོདྷིམུཏྟམཾ།
‘‘Nāhaṃ etena maggena, pāpuṇiṃ bodhimuttamaṃ;
ཀུམྨགྒེན གཝེསིསྶཾ, པུབྦཀམྨེན ཝཱརིཏོ༎
Kummaggena gavesissaṃ, pubbakammena vārito.
‘‘པུཉྙཔཱཔཔརིཀྑཱིཎོ, སབྦསནྟཱཔཝཛྫིཏོ།
‘‘Puññapāpaparikkhīṇo, sabbasantāpavajjito;
ཨསོཀོ ཨནུཔཱཡཱསོ, ནིབྦཱཡིསྶམནཱསཝོ༎
Asoko anupāyāso, nibbāyissamanāsavo.
‘‘ཨེཝཾ ཛིནོ ཝིཡཱཀཱསི, བྷིཀྑུསངྒྷསྶ ཨགྒཏོ།
‘‘Evaṃ jino viyākāsi, bhikkhusaṅghassa aggato;
སབྦཱབྷིཉྙཱབལཔྤཏྟོ, ཨནོཏཏྟམཧཱསརེ’’ཏི༎ (ཨཔ॰ ཐེར ༡.༣༩.༦༤-༩༦)།
Sabbābhiññābalappatto, anotattamahāsare’’ti. (apa. thera 1.39.64-96);
ཨཊྛམསུཏྟཝཎྞནཱ ནིཊྛིཏཱ།
Aṭṭhamasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨུདཱནཔཱལི༹ • Udānapāḷi / ༨. སུནྡརཱིསུཏྟཾ • 8. Sundarīsuttaṃ
