| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. සුනෙත්‌තසුත්‌තං
9. Sunettasuttaṃ
73. 1 ‘‘භූතපුබ්‌බං, භික්‌ඛවෙ, සුනෙත්‌තො නාම සත්‌ථා අහොසි තිත්‌ථකරො කාමෙසු වීතරාගො. සුනෙත්‌තස්‌ස ඛො පන, භික්‌ඛවෙ, සත්‌ථුනො අනෙකානි සාවකසතානි අහෙසුං. සුනෙත්‌තො සත්‌ථා සාවකානං බ්‍රහ්‌මලොකසහබ්‍යතාය ධම්‌මං දෙසෙසි. යෙ ඛො පන, භික්‌ඛවෙ 2, සුනෙත්‌තස්‌ස සත්‌ථුනො බ්‍රහ්‌මලොකසහබ්‍යතාය ධම්‌මං දෙසෙන්‌තස්‌ස චිත්‌තානි නප්‌පසාදෙසුං තෙ කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජිංසු. යෙ ඛො පන, භික්‌ඛවෙ, සුනෙත්‌තස්‌ස සත්‌ථුනො බ්‍රහ්‌මලොකසහබ්‍යතාය ධම්‌මං දෙසෙන්‌තස්‌ස චිත්‌තානි පසාදෙසුං තෙ කායස්‌ස භෙදා පරං මරණා සුගතිං සග්‌ගං ලොකං උපපජ්‌ජිංසු.
73.3 ‘‘Bhūtapubbaṃ, bhikkhave, sunetto nāma satthā ahosi titthakaro kāmesu vītarāgo. Sunettassa kho pana, bhikkhave, satthuno anekāni sāvakasatāni ahesuṃ. Sunetto satthā sāvakānaṃ brahmalokasahabyatāya dhammaṃ desesi. Ye kho pana, bhikkhave 4, sunettassa satthuno brahmalokasahabyatāya dhammaṃ desentassa cittāni nappasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, bhikkhave, sunettassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘භූතපුබ්‌බං , භික්‌ඛවෙ, මූගපක්‌ඛො නාම සත්‌ථා අහොසි…පෙ.… අරනෙමි නාම සත්‌ථා අහොසි…පෙ.… කුද්‌දාලකො 5 නාම සත්‌ථා අහොසි…පෙ.… හත්‌ථිපාලො නාම සත්‌ථා අහොසි…පෙ.… ජොතිපාලො නාම සත්‌ථා අහොසි…පෙ.… අරකො නාම සත්‌ථා අහොසි තිත්‌ථකරො කාමෙසු වීතරාගො . අරකස්‌ස ඛො පන, භික්‌ඛවෙ, සත්‌ථුනො අනෙකානි සාවකසතානි අහෙසුං. අරකො නාම සත්‌ථා සාවකානං බ්‍රහ්‌මලොකසහබ්‍යතාය ධම්‌මං දෙසෙසි. යෙ ඛො පන, භික්‌ඛවෙ, අරකස්‌ස සත්‌ථුනො බ්‍රහ්‌මලොකසහබ්‍යතාය ධම්‌මං දෙසෙන්‌තස්‌ස චිත්‌තානි නප්‌පසාදෙසුං, තෙ කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජිංසු. යෙ ඛො පන, භික්‌ඛවෙ, අරකස්‌ස සත්‌ථුනො බ්‍රහ්‌මලොකසහබ්‍යතාය ධම්‌මං දෙසෙන්‌තස්‌ස චිත්‌තානි පසාදෙසුං, තෙ කායස්‌ස භෙදා පරං මරණා සුගතිං සග්‌ගං ලොකං උපපජ්‌ජිංසු.
‘‘Bhūtapubbaṃ , bhikkhave, mūgapakkho nāma satthā ahosi…pe… aranemi nāma satthā ahosi…pe… kuddālako 6 nāma satthā ahosi…pe… hatthipālo nāma satthā ahosi…pe… jotipālo nāma satthā ahosi…pe… arako nāma satthā ahosi titthakaro kāmesu vītarāgo . Arakassa kho pana, bhikkhave, satthuno anekāni sāvakasatāni ahesuṃ. Arako nāma satthā sāvakānaṃ brahmalokasahabyatāya dhammaṃ desesi. Ye kho pana, bhikkhave, arakassa satthuno brahmalokasahabyatāya dhammaṃ desentassa cittāni nappasādesuṃ, te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, bhikkhave, arakassa satthuno brahmalokasahabyatāya dhammaṃ desentassa cittāni pasādesuṃ, te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘තං කිං මඤ්‌ඤථ, භික්‌ඛවෙ, යො ඉමෙ සත්‌ත සත්‌ථාරෙ තිත්‌ථකරෙ කාමෙසු වීතරාගෙ අනෙකසතපරිවාරෙ සසාවකසඞ්‌ඝෙ පදුට්‌ඨචිත්‌තො අක්‌කොසෙය්‍ය පරිභාසෙය්‍ය, බහුං සො අපුඤ්‌ඤං පසවෙය්‍යා’’ති? ‘‘එවං, භන්‌තෙ’’. ‘‘යො, භික්‌ඛවෙ, ඉමෙ සත්‌ත සත්‌ථාරෙ තිත්‌ථකරෙ කාමෙසු වීතරාගෙ අනෙකසතපරිවාරෙ සසාවකසඞ්‌ඝෙ පදුට්‌ඨචිත්‌තො අක්‌කොසෙය්‍ය පරිභාසෙය්‍ය, බහුං සො අපුඤ්‌ඤං පසවෙය්‍ය. යො එකං දිට්‌ඨිසම්‌පන්‌නං පුග්‌ගලං පදුට්‌ඨචිත්‌තො අක්‌කොසති පරිභාසති, අයං තතො බහුතරං අපුඤ්‌ඤං පසවති. තං කිස්‌ස හෙතු? නාහං, භික්‌ඛවෙ, ඉතො බහිද්‌ධා එවරූපිං ඛන්‌තිං වදාමි යථාමං සබ්‍රහ්‌මචාරීසු’’.
‘‘Taṃ kiṃ maññatha, bhikkhave, yo ime satta satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyyā’’ti? ‘‘Evaṃ, bhante’’. ‘‘Yo, bhikkhave, ime satta satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyya. Yo ekaṃ diṭṭhisampannaṃ puggalaṃ paduṭṭhacitto akkosati paribhāsati, ayaṃ tato bahutaraṃ apuññaṃ pasavati. Taṃ kissa hetu? Nāhaṃ, bhikkhave, ito bahiddhā evarūpiṃ khantiṃ vadāmi yathāmaṃ sabrahmacārīsu’’.
‘‘තස්‌මාතිහ, භික්‌ඛවෙ, එවං සික්‌ඛිතබ්‌බං – ‘න නො සබ්‍රහ්‌මචාරීසු 7 චිත්‌තානි පදුට්‌ඨානි භවිස්‌සන්‌තී’ති. එවඤ්‌හි වො, භික්‌ඛවෙ, සික්‌ඛිතබ්‌බ’’න්‌ති. නවමං.
‘‘Tasmātiha, bhikkhave, evaṃ sikkhitabbaṃ – ‘na no sabrahmacārīsu 8 cittāni paduṭṭhāni bhavissantī’ti. Evañhi vo, bhikkhave, sikkhitabba’’nti. Navamaṃ.
Footnotes:
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8-9. අග්‌ගික්‌ඛන්‌ධොපමසුත්‌තාදිවණ්‌ණනා • 8-9. Aggikkhandhopamasuttādivaṇṇanā
