| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༩. སུནེཏྟསུཏྟཾ
9. Sunettasuttaṃ
༧༣. 1 ‘‘བྷཱུཏཔུབྦཾ, བྷིཀྑཝེ, སུནེཏྟོ ནཱམ སཏྠཱ ཨཧོསི ཏིཏྠཀརོ ཀཱམེསུ ཝཱིཏརཱགོ། སུནེཏྟསྶ ཁོ པན, བྷིཀྑཝེ, སཏྠུནོ ཨནེཀཱནི སཱཝཀསཏཱནི ཨཧེསུཾ། སུནེཏྟོ སཏྠཱ སཱཝཀཱནཾ བྲཧྨལོཀསཧབྱཏཱཡ དྷམྨཾ དེསེསི། ཡེ ཁོ པན, བྷིཀྑཝེ 2, སུནེཏྟསྶ སཏྠུནོ བྲཧྨལོཀསཧབྱཏཱཡ དྷམྨཾ དེསེནྟསྶ ཙིཏྟཱནི ནཔྤསཱདེསུཾ ཏེ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫིཾསུ། ཡེ ཁོ པན, བྷིཀྑཝེ, སུནེཏྟསྶ སཏྠུནོ བྲཧྨལོཀསཧབྱཏཱཡ དྷམྨཾ དེསེནྟསྶ ཙིཏྟཱནི པསཱདེསུཾ ཏེ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫིཾསུ།
73.3 ‘‘Bhūtapubbaṃ, bhikkhave, sunetto nāma satthā ahosi titthakaro kāmesu vītarāgo. Sunettassa kho pana, bhikkhave, satthuno anekāni sāvakasatāni ahesuṃ. Sunetto satthā sāvakānaṃ brahmalokasahabyatāya dhammaṃ desesi. Ye kho pana, bhikkhave 4, sunettassa satthuno brahmalokasahabyatāya dhammaṃ desentassa cittāni nappasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, bhikkhave, sunettassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘བྷཱུཏཔུབྦཾ , བྷིཀྑཝེ, མཱུགཔཀྑོ ནཱམ སཏྠཱ ཨཧོསི…པེ॰… ཨརནེམི ནཱམ སཏྠཱ ཨཧོསི…པེ॰… ཀུདྡཱལཀོ 5 ནཱམ སཏྠཱ ཨཧོསི…པེ॰… ཧཏྠིཔཱལོ ནཱམ སཏྠཱ ཨཧོསི…པེ॰… ཛོཏིཔཱལོ ནཱམ སཏྠཱ ཨཧོསི…པེ॰… ཨརཀོ ནཱམ སཏྠཱ ཨཧོསི ཏིཏྠཀརོ ཀཱམེསུ ཝཱིཏརཱགོ ། ཨརཀསྶ ཁོ པན, བྷིཀྑཝེ, སཏྠུནོ ཨནེཀཱནི སཱཝཀསཏཱནི ཨཧེསུཾ། ཨརཀོ ནཱམ སཏྠཱ སཱཝཀཱནཾ བྲཧྨལོཀསཧབྱཏཱཡ དྷམྨཾ དེསེསི། ཡེ ཁོ པན, བྷིཀྑཝེ, ཨརཀསྶ སཏྠུནོ བྲཧྨལོཀསཧབྱཏཱཡ དྷམྨཾ དེསེནྟསྶ ཙིཏྟཱནི ནཔྤསཱདེསུཾ, ཏེ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫིཾསུ། ཡེ ཁོ པན, བྷིཀྑཝེ, ཨརཀསྶ སཏྠུནོ བྲཧྨལོཀསཧབྱཏཱཡ དྷམྨཾ དེསེནྟསྶ ཙིཏྟཱནི པསཱདེསུཾ, ཏེ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫིཾསུ།
‘‘Bhūtapubbaṃ , bhikkhave, mūgapakkho nāma satthā ahosi…pe… aranemi nāma satthā ahosi…pe… kuddālako 6 nāma satthā ahosi…pe… hatthipālo nāma satthā ahosi…pe… jotipālo nāma satthā ahosi…pe… arako nāma satthā ahosi titthakaro kāmesu vītarāgo . Arakassa kho pana, bhikkhave, satthuno anekāni sāvakasatāni ahesuṃ. Arako nāma satthā sāvakānaṃ brahmalokasahabyatāya dhammaṃ desesi. Ye kho pana, bhikkhave, arakassa satthuno brahmalokasahabyatāya dhammaṃ desentassa cittāni nappasādesuṃ, te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, bhikkhave, arakassa satthuno brahmalokasahabyatāya dhammaṃ desentassa cittāni pasādesuṃ, te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘ཏཾ ཀིཾ མཉྙཐ, བྷིཀྑཝེ, ཡོ ཨིམེ སཏྟ སཏྠཱརེ ཏིཏྠཀརེ ཀཱམེསུ ཝཱིཏརཱགེ ཨནེཀསཏཔརིཝཱརེ སསཱཝཀསངྒྷེ པདུཊྛཙིཏྟོ ཨཀྐོསེཡྻ པརིབྷཱསེཡྻ, བཧུཾ སོ ཨཔུཉྙཾ པསཝེཡྻཱ’’ཏི? ‘‘ཨེཝཾ, བྷནྟེ’’། ‘‘ཡོ, བྷིཀྑཝེ, ཨིམེ སཏྟ སཏྠཱརེ ཏིཏྠཀརེ ཀཱམེསུ ཝཱིཏརཱགེ ཨནེཀསཏཔརིཝཱརེ སསཱཝཀསངྒྷེ པདུཊྛཙིཏྟོ ཨཀྐོསེཡྻ པརིབྷཱསེཡྻ, བཧུཾ སོ ཨཔུཉྙཾ པསཝེཡྻ། ཡོ ཨེཀཾ དིཊྛིསམྤནྣཾ པུགྒལཾ པདུཊྛཙིཏྟོ ཨཀྐོསཏི པརིབྷཱསཏི, ཨཡཾ ཏཏོ བཧུཏརཾ ཨཔུཉྙཾ པསཝཏི། ཏཾ ཀིསྶ ཧེཏུ? ནཱཧཾ, བྷིཀྑཝེ, ཨིཏོ བཧིདྡྷཱ ཨེཝརཱུཔིཾ ཁནྟིཾ ཝདཱམི ཡཐཱམཾ སབྲཧྨཙཱརཱིསུ’’།
‘‘Taṃ kiṃ maññatha, bhikkhave, yo ime satta satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyyā’’ti? ‘‘Evaṃ, bhante’’. ‘‘Yo, bhikkhave, ime satta satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyya. Yo ekaṃ diṭṭhisampannaṃ puggalaṃ paduṭṭhacitto akkosati paribhāsati, ayaṃ tato bahutaraṃ apuññaṃ pasavati. Taṃ kissa hetu? Nāhaṃ, bhikkhave, ito bahiddhā evarūpiṃ khantiṃ vadāmi yathāmaṃ sabrahmacārīsu’’.
Footnotes:
Related texts:
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༨-༩. ཨགྒིཀྑནྡྷོཔམསུཏྟཱདིཝཎྞནཱ • 8-9. Aggikkhandhopamasuttādivaṇṇanā
