| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஸுனித⁴வஸ்ஸகாரவத்து²கதா²வண்ணனா
Sunidhavassakāravatthukathāvaṇṇanā
286. ஸுனித⁴வஸ்ஸகாராதி (தீ³॰ நி॰ 2.153; உதா³॰ அட்ட²॰ 76) ஸுனிதோ⁴ ச வஸ்ஸகாரோ ச த்³வே ப்³ராஹ்மணா. மக³த⁴மஹாமத்தாதி மக³த⁴ரஞ்ஞோ மஹாஅமச்சா, மக³த⁴ரட்டே² வா மஹாமத்தா, மஹதியா இஸ்ஸரியமத்தாய ஸமன்னாக³தாதி மக³த⁴மஹாமத்தா. பாடலிகா³மே நக³ரங் மாபெந்தீதி பாடலிகா³மந்தஸங்கா²தே பூ⁴மிப்பதே³ஸே நக³ரங் மாபெந்தி, புப்³பே³ ‘‘பாடலிகா³மோ’’தி லத்³த⁴னாமங் டா²னங் இதா³னி நக³ரங் கத்வா மாபெந்தீதி அத்தோ². வஜ்ஜீனங் படிபா³ஹாயாதி லிச்ச²விராஜூனங் ஆயமுக²பச்சி²ந்த³னத்த²ங். வத்தூ²னீதி க⁴ரவத்தூ²னி க⁴ரபதிட்டா²பனட்டா²னானி. சித்தானி நமந்தி நிவேஸனானி மாபேதுந்தி ரஞ்ஞோ ராஜமஹாமத்தானஞ்ச நிவேஸனானி மாபேதுங் வத்து²விஜ்ஜாபாட²கானங் சித்தானி நமந்தி. தே கிர அத்தனோ ஸிப்பானுபா⁴வேன ஹெட்டா²பத²வியங் திங்ஸஹத்த²மத்தே டா²னே ‘‘இத⁴ நாகா³னங் நிவாஸபரிக்³க³ஹோ, இத⁴ யக்கா²னங், இத⁴ பூ⁴தானங் நிவாஸபரிக்³க³ஹோ, இத⁴ பாஸாணோ வா கா²ணுகோ வா அத்தீ²’’தி ஜானந்தி, தே ததா³ ஸிப்பங் ஜப்பித்வா தாதி³ஸங் ஸாரம்ப⁴ட்டா²னங் பரிஹரித்வா அனாரம்பே⁴ டா²னே தாஹி வத்து²பரிக்³கா³ஹிகாஹி தே³வதாஹி ஸத்³தி⁴ங் மந்தயமானா விய தங்தங்கே³ஹானி மாபெந்தி.
286.Sunidhavassakārāti (dī. ni. 2.153; udā. aṭṭha. 76) sunidho ca vassakāro ca dve brāhmaṇā. Magadhamahāmattāti magadharañño mahāamaccā, magadharaṭṭhe vā mahāmattā, mahatiyā issariyamattāya samannāgatāti magadhamahāmattā. Pāṭaligāme nagaraṃ māpentīti pāṭaligāmantasaṅkhāte bhūmippadese nagaraṃ māpenti, pubbe ‘‘pāṭaligāmo’’ti laddhanāmaṃ ṭhānaṃ idāni nagaraṃ katvā māpentīti attho. Vajjīnaṃ paṭibāhāyāti licchavirājūnaṃ āyamukhapacchindanatthaṃ. Vatthūnīti gharavatthūni gharapatiṭṭhāpanaṭṭhānāni. Cittāni namanti nivesanāni māpetunti rañño rājamahāmattānañca nivesanāni māpetuṃ vatthuvijjāpāṭhakānaṃ cittāni namanti. Te kira attano sippānubhāvena heṭṭhāpathaviyaṃ tiṃsahatthamatte ṭhāne ‘‘idha nāgānaṃ nivāsapariggaho, idha yakkhānaṃ, idha bhūtānaṃ nivāsapariggaho, idha pāsāṇo vā khāṇuko vā atthī’’ti jānanti, te tadā sippaṃ jappitvā tādisaṃ sārambhaṭṭhānaṃ pariharitvā anārambhe ṭhāne tāhi vatthupariggāhikāhi devatāhi saddhiṃ mantayamānā viya taṃtaṃgehāni māpenti.
அத² வா நேஸங் ஸரீரே தே³வதா அதி⁴முச்சித்வா தத்த² தத்த² நிவேஸனானி மாபேதுங் சித்தங் நாமெந்தி. தா சதூஸு கோணேஸு கா²ணுகே கொட்டெத்வா வத்து²ம்ஹி க³ஹிதமத்தே படிவிக³ச்ச²ந்தி. ஸத்³தா⁴னங் குலானங் ஸத்³தா⁴ தே³வதா ததா² கரொந்தி, அஸ்ஸத்³தா⁴னங் குலானங் அஸ்ஸத்³தா⁴ தே³வதா ச. கிங் காரணா? ஸத்³தா⁴னஞ்ஹி ஏவங் ஹோதி ‘‘இத⁴ மனுஸ்ஸா நிவேஸனங் மாபெந்தா பட²மங் பி⁴க்கு²ஸங்க⁴ங் நிஸீதா³பெத்வா மங்க³லங் வதா³பெஸ்ஸந்தி, அத² மயங் ஸீலவந்தானங் த³ஸ்ஸனங் த⁴ம்மகத²ங் பஞ்ஹவிஸ்ஸஜ்ஜனங் அனுமோத³னஞ்ச ஸோதுங் லபி⁴ஸ்ஸாம, மனுஸ்ஸாதா³னங் த³த்வா அம்ஹாகங் பத்திங் த³ஸ்ஸந்தீ’’தி. அஸ்ஸத்³தா⁴ தே³வதாபி ‘‘அத்தனோ இச்சா²னுரூபங் தேஸங் படிபத்திங் பஸ்ஸிதுங் கத²ஞ்ச ஸோதுங் லபி⁴ஸ்ஸாமா’’தி ததா² கரொந்தி.
Atha vā nesaṃ sarīre devatā adhimuccitvā tattha tattha nivesanāni māpetuṃ cittaṃ nāmenti. Tā catūsu koṇesu khāṇuke koṭṭetvā vatthumhi gahitamatte paṭivigacchanti. Saddhānaṃ kulānaṃ saddhā devatā tathā karonti, assaddhānaṃ kulānaṃ assaddhā devatā ca. Kiṃ kāraṇā? Saddhānañhi evaṃ hoti ‘‘idha manussā nivesanaṃ māpentā paṭhamaṃ bhikkhusaṅghaṃ nisīdāpetvā maṅgalaṃ vadāpessanti, atha mayaṃ sīlavantānaṃ dassanaṃ dhammakathaṃ pañhavissajjanaṃ anumodanañca sotuṃ labhissāma, manussādānaṃ datvā amhākaṃ pattiṃ dassantī’’ti. Assaddhā devatāpi ‘‘attano icchānurūpaṃ tesaṃ paṭipattiṃ passituṃ kathañca sotuṃ labhissāmā’’ti tathā karonti.
தாவதிங்ஸேஹீதி யதா² ஹி ஏகஸ்மிங் குலே ஏகங் பண்டி³தங் மனுஸ்ஸங், ஏகஸ்மிஞ்ச விஹாரே ஏகங் ப³ஹுஸ்ஸுதங் பி⁴க்கு²ங் உபாதா³ய ‘‘அஸுககுலே மனுஸ்ஸா பண்டி³தா, அஸுகவிஹாரே பி⁴க்கூ² ப³ஹுஸ்ஸுதா’’தி ஸத்³தோ³ அப்³பு⁴க்³க³ச்ச²தி, ஏவமேவங் ஸக்கங் தே³வராஜானங் விஸ்ஸகம்மஞ்ச தே³வபுத்தங் உபாதா³ய ‘‘தாவதிங்ஸா பண்டி³தா’’தி ஸத்³தோ³ அப்³பு⁴க்³க³தோ. தேனாஹ ‘‘தாவதிங்ஸேஹீ’’தி. ஸெய்யதா²பீதிஆதி³னா தே³வேஹி தாவதிங்ஸேஹி ஸத்³தி⁴ங் மந்தெத்வா விய ஸுனித⁴வஸ்ஸகாரா நக³ரங் மாபெந்தீதி த³ஸ்ஸேதி.
Tāvatiṃsehīti yathā hi ekasmiṃ kule ekaṃ paṇḍitaṃ manussaṃ, ekasmiñca vihāre ekaṃ bahussutaṃ bhikkhuṃ upādāya ‘‘asukakule manussā paṇḍitā, asukavihāre bhikkhū bahussutā’’ti saddo abbhuggacchati, evamevaṃ sakkaṃ devarājānaṃ vissakammañca devaputtaṃ upādāya ‘‘tāvatiṃsā paṇḍitā’’ti saddo abbhuggato. Tenāha ‘‘tāvatiṃsehī’’ti. Seyyathāpītiādinā devehi tāvatiṃsehi saddhiṃ mantetvā viya sunidhavassakārā nagaraṃ māpentīti dasseti.
யாவதா அரியங் ஆயதனந்தி யத்தகங் அரியமனுஸ்ஸானங் ஓஸரணட்டா²னங் நாம அத்தி². யாவதா வணிப்பதோ²தி யத்தகங் வாணிஜானங் ஆஹடப⁴ண்ட³ஸ்ஸ ராஸிவஸேனேவ கயவிக்கயட்டா²னங் நாம, வாணிஜானங் வஸனட்டா²னங் வா அத்தி². இத³ங் அக்³க³னக³ரந்தி தேஸங் அரியாயதனவணிப்பதா²னங் இத³ங் நக³ரங் அக்³க³ங் ப⁴விஸ்ஸதி ஜெட்ட²கங் பாமொக்க²ங். புடபே⁴த³னந்தி ப⁴ண்ட³புடபே⁴த³னட்டா²னங், ப⁴ண்ட³க³ந்தி²கானங் மோசனட்டா²னந்தி வுத்தங் ஹோதி. ஸகலஜம்பு³தீ³பே அலத்³த⁴ப⁴ண்ட³ம்பி ஹி இதே⁴வ லபி⁴ஸ்ஸதி, அஞ்ஞத்த² விக்கயங் அக³ச்ச²ந்தம்பி இத⁴ விக்கயங் க³ச்சி²ஸ்ஸதி, தஸ்மா இதே⁴வ புடங் பி⁴ந்தி³ஸ்ஸதீதி அத்தோ². ஆயந்தி யானி சதூஸு த்³வாரேஸு சத்தாரி, ஸபா⁴யங் ஏகந்தி ஏவங் தி³வஸே தி³வஸே பஞ்சஸதஸஹஸ்ஸானி தத்த² உட்ட²ஹிஸ்ஸந்தி, தானிஸ்ஸ பா⁴வீனி ஆயானி த³ஸ்ஸேதி. அக்³கி³தோ வாதிஆதீ³ஸு ச-காரத்தோ² வா-ஸத்³தோ³, அக்³கி³னா ச உத³கேன ச மிது²பே⁴தே³ன ச நஸ்ஸிஸ்ஸதீதி அத்தோ². தஸ்ஸ ஹி ஏகோ கொட்டா²ஸோ அக்³கி³னா நஸ்ஸிஸ்ஸதி, நிப்³பா³பேதும்பி நங் ந ஸக்கி²ஸ்ஸதி, ஏகங் கொட்டா²ஸங் க³ங்கா³ க³ஹெத்வா க³மிஸ்ஸதி, ஏகோ இமினா அகதி²தங் அமுஸ்ஸ, அமுனா அகதி²தங் இமஸ்ஸ வத³ந்தானங் பிஸுணவாசானங் வஸேன பி⁴ன்னானங் மனுஸ்ஸானங் அஞ்ஞமஞ்ஞபே⁴தே³ன வினஸ்ஸிஸ்ஸதி.
Yāvatā ariyaṃ āyatananti yattakaṃ ariyamanussānaṃ osaraṇaṭṭhānaṃ nāma atthi. Yāvatā vaṇippathoti yattakaṃ vāṇijānaṃ āhaṭabhaṇḍassa rāsivaseneva kayavikkayaṭṭhānaṃ nāma, vāṇijānaṃ vasanaṭṭhānaṃ vā atthi. Idaṃ agganagaranti tesaṃ ariyāyatanavaṇippathānaṃ idaṃ nagaraṃ aggaṃ bhavissati jeṭṭhakaṃ pāmokkhaṃ. Puṭabhedananti bhaṇḍapuṭabhedanaṭṭhānaṃ, bhaṇḍaganthikānaṃ mocanaṭṭhānanti vuttaṃ hoti. Sakalajambudīpe aladdhabhaṇḍampi hi idheva labhissati, aññattha vikkayaṃ agacchantampi idha vikkayaṃ gacchissati, tasmā idheva puṭaṃ bhindissatīti attho. Āyanti yāni catūsu dvāresu cattāri, sabhāyaṃ ekanti evaṃ divase divase pañcasatasahassāni tattha uṭṭhahissanti, tānissa bhāvīni āyāni dasseti. Aggito vātiādīsu ca-kārattho vā-saddo, agginā ca udakena ca mithubhedena ca nassissatīti attho. Tassa hi eko koṭṭhāso agginā nassissati, nibbāpetumpi naṃ na sakkhissati, ekaṃ koṭṭhāsaṃ gaṅgā gahetvā gamissati, eko iminā akathitaṃ amussa, amunā akathitaṃ imassa vadantānaṃ pisuṇavācānaṃ vasena bhinnānaṃ manussānaṃ aññamaññabhedena vinassissati.
ஏவங் வத்வா ப⁴க³வா பச்சூஸகாலே க³ங்கா³தீரங் க³ந்த்வா கதமுக²தோ⁴வனோ பி⁴க்கா²சாரகாலங் ஆக³மயமானோ நிஸீதி³. ஸுனித⁴வஸ்ஸகாராபி ‘‘அம்ஹாகங் ராஜா ஸமணஸ்ஸ கோ³தமஸ்ஸ உபட்டா²கோ, ஸோ அம்ஹே உபக³தே புச்சி²ஸ்ஸதி ‘ஸத்தா² கிர பாடலிகா³மங் அக³மாஸி, கிங் தஸ்ஸ ஸந்திகங் உபஸங்கமித்த², ந உபஸங்கமித்தா²’தி, ‘உபஸங்கமிம்ஹா’தி ச வுத்தே ‘நிமந்தயித்த², ந நிமந்தயித்தா²’தி புச்சி²ஸ்ஸதி, ‘ந நிமந்தயிம்ஹா’தி ச வுத்தே அம்ஹாகங் தோ³ஸங் ஆரோபெத்வா நிக்³க³ண்ஹிஸ்ஸதி, இத³ஞ்சாபி மயங் அகதட்டா²னே நக³ரங் மாபேம, ஸமணஸ்ஸ கோ² பன கோ³தமஸ்ஸ க³தக³தட்டா²னே காளகண்ணிஸத்தா படிக்கமந்தி, தங் மயங் நக³ரமங்க³லங் வாசாபெஸ்ஸாமா’’தி சிந்தெத்வா ஸத்தா²ரங் உபஸங்கமித்வா நிமந்தயிங்ஸு. தேன வுத்தங் ‘‘அத² கோ² ஸுனித⁴வஸ்ஸகாரா’’திஆதி³. புப்³ப³ண்ஹஸமயந்தி புப்³ப³ண்ஹகாலே. நிவாஸெத்வாதி கா³மப்பவேஸனநீஹாரேன நிவாஸனங் நிவாஸெத்வா காயப³ந்த⁴னங் ப³ந்தி⁴த்வா. பத்தசீவரமாதா³யாதி பத்தஞ்ச சீவரஞ்ச ஆதி³யித்வா காயபடிப³த்³த⁴ங் கத்வா, சீவரங் பாருபித்வா பத்தங் ஹத்தே²ன க³ஹெத்வாதி அத்தோ².
Evaṃ vatvā bhagavā paccūsakāle gaṅgātīraṃ gantvā katamukhadhovano bhikkhācārakālaṃ āgamayamāno nisīdi. Sunidhavassakārāpi ‘‘amhākaṃ rājā samaṇassa gotamassa upaṭṭhāko, so amhe upagate pucchissati ‘satthā kira pāṭaligāmaṃ agamāsi, kiṃ tassa santikaṃ upasaṅkamittha, na upasaṅkamitthā’ti, ‘upasaṅkamimhā’ti ca vutte ‘nimantayittha, na nimantayitthā’ti pucchissati, ‘na nimantayimhā’ti ca vutte amhākaṃ dosaṃ āropetvā niggaṇhissati, idañcāpi mayaṃ akataṭṭhāne nagaraṃ māpema, samaṇassa kho pana gotamassa gatagataṭṭhāne kāḷakaṇṇisattā paṭikkamanti, taṃ mayaṃ nagaramaṅgalaṃ vācāpessāmā’’ti cintetvā satthāraṃ upasaṅkamitvā nimantayiṃsu. Tena vuttaṃ ‘‘atha kho sunidhavassakārā’’tiādi. Pubbaṇhasamayanti pubbaṇhakāle. Nivāsetvāti gāmappavesananīhārena nivāsanaṃ nivāsetvā kāyabandhanaṃ bandhitvā. Pattacīvaramādāyāti pattañca cīvarañca ādiyitvā kāyapaṭibaddhaṃ katvā, cīvaraṃ pārupitvā pattaṃ hatthena gahetvāti attho.
ஸீலவந்தெத்தா²தி ஸீலவந்தே எத்த² அத்தனோ வஸனட்டா²னே. ஸஞ்ஞதேதி காயவாசாசித்தேஹி ஸஞ்ஞதே. தாஸங் த³க்கி²ணமாதி³ஸேதி ஸங்க⁴ஸ்ஸ தி³ன்னே சத்தாரோ பச்சயே தாஸங் க⁴ரதே³வதானங் ஆதி³ஸெய்யபத்திங் த³தெ³ய்ய. பூஜிதா பூஜயந்தீதி ‘‘இமே மனுஸ்ஸா அம்ஹாகங் ஞாதகாபி ந ஹொந்தி, ததா²பி நோ பத்திங் தெ³ந்தீதி ஆரக்க²ங் ஸுஸங்விஹிதங் கரோதா²’’தி ஸுட்டு² ஆரக்க²ங் கரொந்தி. மானிதா மானயந்தீதி காலானுகாலங் ப³லிகம்மகரணேன மானிதா ‘‘ஏதே மனுஸ்ஸா அம்ஹாகங் ஞாதகாபி ந ஹொந்தி, ததா²பி சதுமாஸச²மாஸந்தரே நோ ப³லிகம்மங் கரொந்தீ’’தி மானெந்தி உப்பன்னபரிஸ்ஸயங் ஹரந்தி. ததோ நந்தி ததோ நங் பண்டி³தஜாதிகங் மனுஸ்ஸங். ஓரஸந்தி உரே ட²பெத்வா ஸங்வட்³டி⁴தங், யதா² மாதா ஓரஸங் புத்தங் அனுகம்பதி, உப்பன்னபரிஸ்ஸயஹரணத்த²மேவஸ்ஸ வாயமதி, ஏவங் அனுகம்பந்தீதி அத்தோ². ப⁴த்³ரானி பஸ்ஸதீதி ஸுந்த³ரானி பஸ்ஸதி.
Sīlavantetthāti sīlavante ettha attano vasanaṭṭhāne. Saññateti kāyavācācittehi saññate. Tāsaṃ dakkhiṇamādiseti saṅghassa dinne cattāro paccaye tāsaṃ gharadevatānaṃ ādiseyyapattiṃ dadeyya. Pūjitā pūjayantīti ‘‘ime manussā amhākaṃ ñātakāpi na honti, tathāpi no pattiṃ dentīti ārakkhaṃ susaṃvihitaṃ karothā’’ti suṭṭhu ārakkhaṃ karonti. Mānitā mānayantīti kālānukālaṃ balikammakaraṇena mānitā ‘‘ete manussā amhākaṃ ñātakāpi na honti, tathāpi catumāsachamāsantare no balikammaṃ karontī’’ti mānenti uppannaparissayaṃ haranti. Tato nanti tato naṃ paṇḍitajātikaṃ manussaṃ. Orasanti ure ṭhapetvā saṃvaḍḍhitaṃ, yathā mātā orasaṃ puttaṃ anukampati, uppannaparissayaharaṇatthamevassa vāyamati, evaṃ anukampantīti attho. Bhadrāni passatīti sundarāni passati.
அனுமோதி³த்வாதி தேஹி ததா³ பஸுதபுஞ்ஞஸ்ஸ அனுமோத³னவஸேன தேஸங் த⁴ம்மகத²ங் கத்வா. ஸுனித⁴வஸ்ஸகாராபி ‘‘யா தத்த² தே³வதா ஆஸுங், தாஸங் த³க்கி²ணமாதி³ஸே’’தி ப⁴க³வதோ வசனங் ஸுத்வா தே³வதானங் பத்திங் அத³ங்ஸு. தங் கோ³தமத்³வாரங் நாம அஹோஸீதி தஸ்ஸ நக³ரஸ்ஸ யேன த்³வாரேன ப⁴க³வா நிக்க²மி, தங் கோ³தமத்³வாரங் நாம அஹோஸி. க³ங்கா³ய பன உத்தரணத்த²ங் அனோதிண்ணத்தா கோ³தமதித்த²ங் நாம நாஹோஸி. பூராதி புண்ணா. ஸமதித்திகாதி தீரஸமங் உத³கஸ்ஸ தித்தா ப⁴ரிதா. காகபெய்யாதி தீரே டி²தகாகேஹி பாதுங் ஸக்குணெய்யஉத³கா. தீஹிபி பதே³ஹி உப⁴தோகூலஸமங் பரிபுண்ணபா⁴வமேவ வத³தி. உளும்பந்தி பாரக³மனத்தா²ய லஹுகே தா³ருத³ண்டே³ க³ஹெத்வா கவாடப²லகே விய அஞ்ஞமஞ்ஞஸம்ப³ந்தே⁴ காதுங் ஆணியோ கொட்டெத்வா நாவாஸங்கே²பேன கதங். குல்லந்தி வேளுனளாதி³கே ஸங்க⁴ரித்வா வல்லிஆதீ³ஹி கலாபவஸேன ப³ந்தி⁴த்வா கதங்.
Anumoditvāti tehi tadā pasutapuññassa anumodanavasena tesaṃ dhammakathaṃ katvā. Sunidhavassakārāpi ‘‘yā tattha devatā āsuṃ, tāsaṃ dakkhiṇamādise’’ti bhagavato vacanaṃ sutvā devatānaṃ pattiṃ adaṃsu. Taṃ gotamadvāraṃ nāma ahosīti tassa nagarassa yena dvārena bhagavā nikkhami, taṃ gotamadvāraṃ nāma ahosi. Gaṅgāya pana uttaraṇatthaṃ anotiṇṇattā gotamatitthaṃ nāma nāhosi. Pūrāti puṇṇā. Samatittikāti tīrasamaṃ udakassa tittā bharitā. Kākapeyyāti tīre ṭhitakākehi pātuṃ sakkuṇeyyaudakā. Tīhipi padehi ubhatokūlasamaṃ paripuṇṇabhāvameva vadati. Uḷumpanti pāragamanatthāya lahuke dārudaṇḍe gahetvā kavāṭaphalake viya aññamaññasambandhe kātuṃ āṇiyo koṭṭetvā nāvāsaṅkhepena kataṃ. Kullanti veḷunaḷādike saṅgharitvā valliādīhi kalāpavasena bandhitvā kataṃ.
ஏதமத்த²ங் விதி³த்வாதி ஏதங் மஹாஜனஸ்ஸ க³ங்கு³த³கமத்தஸ்ஸபி கேவலங் தரிதுங் அஸமத்த²தங், அத்தனோ பன பி⁴க்கு²ஸங்க⁴ஸ்ஸ ச அதிக³ம்பீ⁴ரவித்த²தங் ஸங்ஸாரமஹண்ணவங் தரித்வா டி²தபா⁴வஞ்ச ஸப்³பா³காரதோ விதி³த்வா தத³த்த²பரிதீ³பனங் இமங் உதா³னங் உதா³னேஸி. உதா³னகா³தா²ய அத்தோ² பன அட்ட²கதா²யங் த³ஸ்ஸிதோயேவ. தத்த² உத³கட்டா²னஸ்ஸேதங் அதி⁴வசனந்தி யதா²வுத்தஸ்ஸ யஸ்ஸ கஸ்ஸசி உத³கட்டா²னஸ்ஸ ஏதங் அண்ணவந்தி அதி⁴வசனங், ந ஸமுத்³த³ஸ்ஸேவாதி அதி⁴ப்பாயோ. ஸரந்தி இத⁴ நதீ³ அதி⁴ப்பேதா ஸரதி ஸந்த³தீதி கத்வா. க³ம்பீ⁴ரங் வித்த²தந்தி அகா³த⁴ட்டே²ன க³ம்பீ⁴ரங், ஸகலலோகத்தயப்³யாபிதாய வித்த²தங். விஸஜ்ஜாதி அனாஸஜ்ஜ அப்பத்வா ஏவ பல்லலானி தேஸங் அதரணதோ. குல்லஞ்ஹி ஜனோ ப³ந்த⁴தீதி குல்லங் ப³ந்தி⁴துங் ஆயாஸங் ஆபஜ்ஜதி. வினா ஏவ குல்லேனாதி ஈதி³ஸங் உத³கங் குல்லேன ஈதி³ஸேன வினா ஏவ. திண்ணா மேதா⁴வினோ ஜனாதி அரியமக்³க³ஞாணஸங்கா²தாய மேதா⁴ய ஸமன்னாக³தத்தா மேதா⁴வினோ பு³த்³தா⁴ ச பு³த்³த⁴ஸாவகா ச திண்ணா பரதீரே பதிட்டி²தா.
Etamatthaṃviditvāti etaṃ mahājanassa gaṅgudakamattassapi kevalaṃ tarituṃ asamatthataṃ, attano pana bhikkhusaṅghassa ca atigambhīravitthataṃ saṃsāramahaṇṇavaṃ taritvā ṭhitabhāvañca sabbākārato viditvā tadatthaparidīpanaṃ imaṃ udānaṃ udānesi. Udānagāthāya attho pana aṭṭhakathāyaṃ dassitoyeva. Tattha udakaṭṭhānassetaṃ adhivacananti yathāvuttassa yassa kassaci udakaṭṭhānassa etaṃ aṇṇavanti adhivacanaṃ, na samuddassevāti adhippāyo. Saranti idha nadī adhippetā sarati sandatīti katvā. Gambhīraṃ vitthatanti agādhaṭṭhena gambhīraṃ, sakalalokattayabyāpitāya vitthataṃ. Visajjāti anāsajja appatvā eva pallalāni tesaṃ ataraṇato. Kullañhi jano bandhatīti kullaṃ bandhituṃ āyāsaṃ āpajjati. Vinā eva kullenāti īdisaṃ udakaṃ kullena īdisena vinā eva. Tiṇṇā medhāvino janāti ariyamaggañāṇasaṅkhātāya medhāya samannāgatattā medhāvino buddhā ca buddhasāvakā ca tiṇṇā paratīre patiṭṭhitā.
ஸுனித⁴வஸ்ஸகாரவத்து²கதா²வண்ணனா நிட்டி²தா.
Sunidhavassakāravatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 174. ஸுனித⁴வஸ்ஸகாரவத்து² • 174. Sunidhavassakāravatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பாடலிகா³மவத்து²கதா² • Pāṭaligāmavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாடலிகா³மவத்து²கதா²வண்ணனா • Pāṭaligāmavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 173. பாடலிகா³மவத்து²கதா² • 173. Pāṭaligāmavatthukathā
