| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
2. сунийд̇ад̇т̇зраг̇аат̇ааван̣н̣анаа
2. Sunītattheragāthāvaṇṇanā
нийжз гуламхийд̇иаад̣̇игаа ааяасмад̇о сунийд̇ад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз бун̃н̃аани убажинид̇ваа д̣̇звамануссзсу сам̣саранд̇о б̣уд̣̇д̇хасса сун̃н̃агаалз гулаг̇зхз ниб̣б̣ад̇д̇ид̇ваа ваяаббад̇д̇о б̣аалаж̇анзхи сад̣̇д̇хим̣ гийл̣аабасуд̇о худ̇ваа вижаранд̇о згам̣ бажжзгаб̣уд̣̇д̇хам̣ г̇аамз бин̣д̣ааяа жаранд̇ам̣ д̣̇исваа, ‘‘гим̣ д̇уяхам̣ саб̣б̣асо ван̣ид̇асарийрасса вияа сагалам̣ гааяам̣ бадижчаад̣̇зд̇ваа бхигкаажаран̣зна, нану наама гасиваан̣иж̇ж̇аад̣̇ийхи ж̇ийвигаа габбзд̇аб̣б̣аа? д̇аани жз гаад̇ум̣ на саггоси, гхарз гхарз муд̇д̇агарийсаад̣̇ийни нийхаранд̇о бажчаа вад̇т̇усод̇ханзна ж̇ийваахий’’д̇и аггоси. со д̇зна гаммзна нираяз бажжид̇ваа д̇ассзва гаммасса вибаагаавасзсзна мануссалогзби б̣ахууни ж̇аад̇исад̇аани бубпачад̣д̣агагулз ниб̣б̣ад̇д̇ид̇ваа д̇ат̇аа ж̇ийвигам̣ габбзси. имасмин̃жа б̣уд̣̇д̇хуббаад̣̇з бубпачад̣д̣агагулз зва ниб̣б̣ад̇д̇о уггаарасод̇ханагаммзна ж̇ийвигам̣ габбзд̇и гхаасажчаад̣̇анамад̇д̇амби алабханд̇о.
Nīcekulamhītiādikā āyasmato sunītattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinitvā devamanussesu saṃsaranto buddhassa suññakāle kulagehe nibbattitvā vayappatto bālajanehi saddhiṃ kīḷāpasuto hutvā vicaranto ekaṃ paccekabuddhaṃ gāme piṇḍāya carantaṃ disvā, ‘‘kiṃ tuyhaṃ sabbaso vaṇitasarīrassa viya sakalaṃ kāyaṃ paṭicchādetvā bhikkhācaraṇena, nanu nāma kasivāṇijjādīhi jīvikā kappetabbā? Tāni ce kātuṃ na sakkosi, ghare ghare muttakarīsādīni nīharanto pacchā vatthusodhanena jīvāhī’’ti akkosi. So tena kammena niraye paccitvā tasseva kammassa vipākāvasesena manussalokepi bahūni jātisatāni pupphachaḍḍakakule nibbattitvā tathā jīvikaṃ kappesi. Imasmiñca buddhuppāde pupphachaḍḍakakule eva nibbatto ukkārasodhanakammena jīvikaṃ kappeti ghāsacchādanamattampi alabhanto.
ат̇а бхаг̇аваа бажчимаяаамз б̣уд̣̇д̇хаажин̣н̣ам̣ махаагарун̣аасамаабад̇д̇им̣ самаабаж̇ж̇ид̇ваа д̇ад̇о вудтааяа б̣уд̣̇д̇хажагкунаа логам̣ вологзнд̇о сунийд̇асса хад̣̇аяаб̣бханд̇арз гхадз бад̣̇ийбам̣ вияа баж̇ж̇аланд̇ам̣ арахад̇д̇уубаниссаяам̣ д̣̇исваа вибхаад̇ааяа рад̇д̇ияаа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа бхигкусан̇гхабаривуд̇о рааж̇аг̇ахам̣ бин̣д̣ааяа бавидто. яассам̣ вийт̇ияам̣ сунийд̇о уггаарасод̇ханагаммам̣ гарод̇и, д̇ам̣ вийт̇им̣ бадибаж̇ж̇и. сунийд̇оби д̇ад̇т̇а д̇ад̇т̇а вигхаасужжаарасан̇гаараад̣̇игам̣ раасим̣ гад̇ваа бидагзсу багкибид̇ваа гааж̇знаад̣̇ааяа барихаранд̇о бхигкусан̇гхабаривуд̇ам̣ сад̇т̇аарам̣ ааг̇ажчанд̇ам̣ д̣̇исваа саараж̇ж̇амаано самбхамаагулахад̣̇аяо г̇аманамаг̇г̇ам̣ нилийяаногаасан̃жа алабханд̇о гааж̇ам̣ бхид̇д̇ибассз табзд̇ваа згзна бассзна анубависанд̇о вияа бхид̇д̇им̣ аллийно бан̃ж̇алиго адтааси. ‘‘бхид̇д̇ичид̣̇д̣̇зна абаггамид̇угаамо ахосий’’д̇иби вад̣̇анд̇и.
Atha bhagavā pacchimayāme buddhāciṇṇaṃ mahākaruṇāsamāpattiṃ samāpajjitvā tato vuṭṭhāya buddhacakkhunā lokaṃ volokento sunītassa hadayabbhantare ghaṭe padīpaṃ viya pajjalantaṃ arahattūpanissayaṃ disvā vibhātāya rattiyā pubbaṇhasamayaṃ nivāsetvā pattacīvaramādāya bhikkhusaṅghaparivuto rājagahaṃ piṇḍāya paviṭṭho. Yassaṃ vīthiyaṃ sunīto ukkārasodhanakammaṃ karoti, taṃ vīthiṃ paṭipajji. Sunītopi tattha tattha vighāsuccārasaṅkārādikaṃ rāsiṃ katvā piṭakesu pakkhipitvā kājenādāya pariharanto bhikkhusaṅghaparivutaṃ satthāraṃ āgacchantaṃ disvā sārajjamāno sambhamākulahadayo gamanamaggaṃ nilīyanokāsañca alabhanto kājaṃ bhittipasse ṭhapetvā ekena passena anupavisanto viya bhittiṃ allīno pañjaliko aṭṭhāsi. ‘‘Bhittichiddena apakkamitukāmo ahosī’’tipi vadanti.
сад̇т̇аа д̇асса самийбам̣ бад̇ваа ‘‘аяам̣ ад̇д̇ано гусаламууласан̃жод̣̇ид̇ам̣ убаг̇ад̇ам̣ мам̣ саараж̇ж̇амаано ж̇аад̇ияаа гаммасса жа нихийнад̇ааяа саммукийбхаавамби лаж̇ж̇ад̇и, ханд̣̇асса взсаараж̇ж̇ам̣ уббаад̣̇зссаамий’’д̇и гаравийгаруд̇аман̃ж̇унаа сагаланаг̇араниннаад̣̇авара-г̇амбхийрзна б̣рахмассарзна ‘‘сунийд̇аа’’д̇и аалабид̇ваа ‘‘гим̣ имааяа д̣̇угкаж̇ийвигааяа баб̣б̣аж̇ид̇ум̣ сагкиссад̇ий’’д̇и ааха. сунийд̇о д̇зна сад̇т̇у важанзна амад̇зна вияа абхисид̇д̇о ул̣аарам̣ бийд̇исоманассам̣ бадисам̣взд̣̇знд̇о ‘‘бхаг̇аваа, сажз маад̣̇исааби ид̇ха баб̣б̣аж̇ж̇ам̣ лабханд̇и, гасмаахам̣ на баб̣б̣аж̇иссаами, баб̣б̣ааж̇зт̇а мам̣ бхаг̇аваа’’д̇и ааха . сад̇т̇аа ‘‘зхи, бхигкуу’’д̇и ааха. со д̇аавад̣̇зва зхибхигкубхаавзна баб̣б̣аж̇ж̇ам̣ убасамбад̣̇ан̃жа лабхид̇ваа ид̣̇д̇химаяабад̇д̇ажийварад̇харо вассасадтигад̇т̇зро вияа худ̇ваа сад̇т̇у санд̇игз адтааси. бхаг̇аваа д̇ам̣ вихаарам̣ нзд̇ваа гаммадтаанам̣ аажигки. со батамам̣ адта самаабад̇д̇ияо, бан̃жа жа абхин̃н̃ааяо ниб̣б̣ад̇д̇зд̇ваа вибассанам̣ вад̣дхзд̇ваа чал̣абхин̃н̃о ахоси. д̇ам̣ саггаад̣̇аяо д̣̇зваа б̣рахмаано жа убасан̇гамид̇ваа намассим̣су. д̇зна вуд̇д̇ам̣ –
Satthā tassa samīpaṃ patvā ‘‘ayaṃ attano kusalamūlasañcoditaṃ upagataṃ maṃ sārajjamāno jātiyā kammassa ca nihīnatāya sammukhībhāvampi lajjati, handassa vesārajjaṃ uppādessāmī’’ti karavīkarutamañjunā sakalanagaraninnādavara-gambhīrena brahmassarena ‘‘sunītā’’ti ālapitvā ‘‘kiṃ imāya dukkhajīvikāya pabbajituṃ sakkhissatī’’ti āha. Sunīto tena satthu vacanena amatena viya abhisitto uḷāraṃ pītisomanassaṃ paṭisaṃvedento ‘‘bhagavā, sace mādisāpi idha pabbajjaṃ labhanti, kasmāhaṃ na pabbajissāmi, pabbājetha maṃ bhagavā’’ti āha . Satthā ‘‘ehi, bhikkhū’’ti āha. So tāvadeva ehibhikkhubhāvena pabbajjaṃ upasampadañca labhitvā iddhimayapattacīvaradharo vassasaṭṭhikatthero viya hutvā satthu santike aṭṭhāsi. Bhagavā taṃ vihāraṃ netvā kammaṭṭhānaṃ ācikkhi. So paṭhamaṃ aṭṭha samāpattiyo, pañca ca abhiññāyo nibbattetvā vipassanaṃ vaḍḍhetvā chaḷabhiñño ahosi. Taṃ sakkādayo devā brahmāno ca upasaṅkamitvā namassiṃsu. Tena vuttaṃ –
‘‘д̇аа д̣̇звад̇аа сад̇д̇асад̇аа ул̣аараа, б̣рахмаа жа инд̣̇о убасан̇гамид̇ваа;
‘‘Tā devatā sattasatā uḷārā, brahmā ca indo upasaṅkamitvā;
ааж̇аанийяам̣ ж̇аад̇иж̇араабхибхууд̇ам̣, сунийд̇ам̣ намассанд̇и басаннажид̇д̇аа’’д̇иаад̣̇и.
Ājānīyaṃ jātijarābhibhūtaṃ, sunītaṃ namassanti pasannacittā’’tiādi.
бхаг̇аваа д̇ам̣язва д̣̇звасан̇гхабурагкад̇ам̣ д̣̇исваа сид̇ам̣ гад̇ваа басам̣санд̇о ‘‘д̇абзна б̣рахмажариязнаа’’д̇и г̇аат̇ааяа д̇хаммам̣ д̣̇зсзси. ат̇а нам̣ самб̣ахулаа бхигкуу сийханаад̣̇ам̣ над̣̇аабзд̇угаамаа, ‘‘аавусо сунийд̇а, гасмаа гулаа д̇вам̣ баб̣б̣аж̇ид̇о, гат̇ам̣ ваа баб̣б̣аж̇ид̇о, гат̇ан̃жа сажжаани бадивиж̇жхий’’д̇и бужчим̣су. со д̇ам̣ саб̣б̣ам̣ багаасзнд̇о –
Bhagavā taṃyeva devasaṅghapurakkhataṃ disvā sitaṃ katvā pasaṃsanto ‘‘tapena brahmacariyenā’’ti gāthāya dhammaṃ desesi. Atha naṃ sambahulā bhikkhū sīhanādaṃ nadāpetukāmā, ‘‘āvuso sunīta, kasmā kulā tvaṃ pabbajito, kathaṃ vā pabbajito, kathañca saccāni paṭivijjhī’’ti pucchiṃsu. So taṃ sabbaṃ pakāsento –
620.
620.
‘‘нийжз гуламхи ж̇аад̇охам̣, д̣̇алид̣̇д̣̇о аббабхож̇ано;
‘‘Nīce kulamhi jātohaṃ, daliddo appabhojano;
хийнагаммам̣ мамам̣ ааси, ахосим̣ бубпачад̣д̣аго.
Hīnakammaṃ mamaṃ āsi, ahosiṃ pupphachaḍḍako.
621.
621.
‘‘ж̇иг̇ужчид̇о мануссаанам̣, барибхууд̇о жа вамбхид̇о;
‘‘Jigucchito manussānaṃ, paribhūto ca vambhito;
нийжам̣ манам̣ гарид̇ваана, ванд̣̇иссам̣ б̣ахугам̣ ж̇анам̣.
Nīcaṃ manaṃ karitvāna, vandissaṃ bahukaṃ janaṃ.
622.
622.
‘‘ат̇ад̣̇д̣̇асаасим̣ самб̣уд̣̇д̇хам̣, бхигкусан̇гхабурагкад̇ам̣;
‘‘Athaddasāsiṃ sambuddhaṃ, bhikkhusaṅghapurakkhataṃ;
бависанд̇ам̣ махаавийрам̣, маг̇ад̇хаанам̣ буруд̇д̇амам̣.
Pavisantaṃ mahāvīraṃ, magadhānaṃ puruttamaṃ.
623.
623.
‘‘нигкибид̇ваана б̣яаабхан̇г̇им̣, ванд̣̇ид̇ум̣ убасан̇гамим̣;
‘‘Nikkhipitvāna byābhaṅgiṃ, vandituṃ upasaṅkamiṃ;
мамзва анугамбааяа, адтааси бурисуд̇д̇амо.
Mameva anukampāya, aṭṭhāsi purisuttamo.
624.
624.
‘‘ванд̣̇ид̇ваа сад̇т̇уно баад̣̇з, згаманд̇ам̣ тид̇о д̇ад̣̇аа;
‘‘Vanditvā satthuno pāde, ekamantaṃ ṭhito tadā;
баб̣б̣аж̇ж̇ам̣ ахамааяаажим̣, саб̣б̣асад̇д̇аанамуд̇д̇амам̣.
Pabbajjaṃ ahamāyāciṃ, sabbasattānamuttamaṃ.
625.
625.
‘‘д̇ад̇о гаарун̣иго сад̇т̇аа, саб̣б̣алогаанугамбаго;
‘‘Tato kāruṇiko satthā, sabbalokānukampako;
‘зхи бхигкуу’д̇и мам̣ ааха, саа мз аасуубасамбад̣̇аа.
‘Ehi bhikkhū’ti maṃ āha, sā me āsūpasampadā.
626. ‘‘сохам̣ зго аран̃н̃асмим̣, вихаранд̇о ад̇анд̣̇ид̇о.
626. ‘‘Sohaṃ eko araññasmiṃ, viharanto atandito.
агаасим̣ сад̇т̇у важанам̣, яат̇аа мам̣ овад̣̇ий ж̇ино.
Akāsiṃ satthu vacanaṃ, yathā maṃ ovadī jino.
627.
627.
‘‘рад̇д̇ияаа батамам̣ яаамам̣, буб̣б̣аж̇аад̇имануссарим̣;
‘‘Rattiyā paṭhamaṃ yāmaṃ, pubbajātimanussariṃ;
рад̇д̇ияаа маж̇жхимам̣ яаамам̣, д̣̇иб̣б̣ажагкум̣ висод̇хаяим̣;
Rattiyā majjhimaṃ yāmaṃ, dibbacakkhuṃ visodhayiṃ;
рад̇д̇ияаа бажчимз яаамз, д̇амоканд̇хам̣ бад̣̇аалаяим̣.
Rattiyā pacchime yāme, tamokhandhaṃ padālayiṃ.
628.
628.
‘‘д̇ад̇о рад̇яаавивасаанз, суурияуг̇г̇аманам̣ бад̇и; (ж̇аа. 1.11.79);
‘‘Tato ratyāvivasāne, sūriyuggamanaṃ pati; (Jā. 1.11.79);
инд̣̇о б̣рахмаа жа ааг̇анд̇ваа, мам̣ намассим̣су бан̃ж̇алий.
Indo brahmā ca āgantvā, maṃ namassiṃsu pañjalī.
629.
629.
‘‘намо д̇з бурисааж̇ан̃н̃а, намо д̇з бурисуд̇д̇ама;
‘‘Namo te purisājañña, namo te purisuttama;
яасса д̇з аасаваа кийн̣аа, д̣̇агкин̣зяяоси маариса.
Yassa te āsavā khīṇā, dakkhiṇeyyosi mārisa.
630.
630.
‘‘д̇ад̇о д̣̇исваана мам̣ сад̇т̇аа, д̣̇звасан̇гхабурагкад̇ам̣;
‘‘Tato disvāna maṃ satthā, devasaṅghapurakkhataṃ;
сид̇ам̣ баад̇угарид̇ваана, имамад̇т̇ам̣ абхаасат̇а.
Sitaṃ pātukaritvāna, imamatthaṃ abhāsatha.
631.
631.
‘‘д̇абзна б̣рахмажариязна, сам̣яамзна д̣̇амзна жа;
‘‘Tapena brahmacariyena, saṃyamena damena ca;
зд̇зна б̣раахман̣о ход̇и, зд̇ам̣ б̣раахман̣амуд̇д̇ама’’нд̇и. –
Etena brāhmaṇo hoti, etaṃ brāhmaṇamuttama’’nti. –
имаахи г̇аат̇аахи сийханаад̣̇ам̣ над̣̇и.
Imāhi gāthāhi sīhanādaṃ nadi.
д̇ад̇т̇а нийжзд̇и лаамагз саб̣б̣анихийнз. ужжанийжабхааво хи наама сад̇д̇аанам̣ убаад̣̇ааяубаад̣̇ааяа, аяам̣ бана саб̣б̣анихийнз буггусагулз уббаннад̇ам̣ д̣̇ассзнд̇о ‘‘нийжз гуламхи ж̇аад̇о’’д̇и ааха. д̇зна вуд̇д̇ам̣ – ‘‘нийжзд̇и лаамагз саб̣б̣анихийнз’’д̇и. д̣̇алид̣̇д̣̇од̇и д̣̇уг̇г̇ад̇о, д̣̇алид̣̇д̣̇ааби гзжи гад̣̇аажи гхаасажчаад̣̇анасса лаабхино, агасиравуд̇д̇ино хонд̇и, ахам̣ бана саб̣б̣агаалам̣ гасиравуд̇д̇ид̇ааяа хийно уд̣̇д̇ханам̣ убадтабид̇аугкалиго д̣̇ассанаяуд̇д̇ам̣ т̇звагамби абассим̣ язваад̇и д̣̇ассзнд̇о ‘‘аббабхож̇ано’’д̇и ааха. нийжагулигаа д̣̇алид̣̇д̣̇ааби гзжи анийжагаммааж̇ийваа хонд̇и, маяхам̣ бана на д̇ат̇аад̇и д̣̇ассзнд̇о ааха ‘‘хийнагаммам̣ мамам̣ аасий’’д̇и. гийд̣̇исанд̇и жз? ахосим̣ бубпачад̣д̣аго, хад̇т̇авигаласса хад̇т̇аваад̇и вияа убажааравасзнааяам̣ имасса саман̃н̃аа ахоси яад̣̇ид̣̇ам̣ ‘‘бубпачад̣д̣аго’’д̇и. милаад̇абубпасант̇араван̣н̣ад̇ааяа ваа уггаарабхуумияаа звам̣ вуд̇д̇о.
Tattha nīceti lāmake sabbanihīne. Uccanīcabhāvo hi nāma sattānaṃ upādāyupādāya, ayaṃ pana sabbanihīne pukkusakule uppannataṃ dassento ‘‘nīce kulamhi jāto’’ti āha. Tena vuttaṃ – ‘‘nīceti lāmake sabbanihīne’’ti. Daliddoti duggato, daliddāpi keci kadāci ghāsacchādanassa lābhino, akasiravuttino honti, ahaṃ pana sabbakālaṃ kasiravuttitāya hīno uddhanaṃ upaṭṭhapitaukkhaliko dassanayuttaṃ thevakampi apassiṃ yevāti dassento ‘‘appabhojano’’ti āha. Nīcakulikā daliddāpi keci anīcakammājīvā honti, mayhaṃ pana na tathāti dassento āha ‘‘hīnakammaṃ mamaṃ āsī’’ti. Kīdisanti ce? Ahosiṃ pupphachaḍḍako, hatthavikalassa hatthavāti viya upacāravasenāyaṃ imassa samaññā ahosi yadidaṃ ‘‘pupphachaḍḍako’’ti. Milātapupphasantharavaṇṇatāya vā ukkārabhūmiyā evaṃ vutto.
ж̇иг̇ужчид̇од̇и ж̇аад̇ияаа жзва гаммунаа жа хийл̣ид̇о. мануссаананд̇и мануссзхи. барибхууд̇од̇и аван̃н̃аад̇о. вамбхид̇од̇и кум̣сид̇о. нийжам̣ манам̣ гарид̇ваанаад̇и ан̃н̃з мануссз синзрум̣ вияа угкибид̇ваа д̇зсам̣ баад̣̇абам̣суд̇оби ад̇д̇аанам̣ нихийнам̣ гад̇ваа бавад̇д̇ияаа нийжам̣ нихийнам̣ манам̣ гад̇ваа. ванд̣̇иссам̣ б̣ахугам̣ ж̇ананд̇и бут̇умахааж̇анам̣ д̣̇идтад̣̇идтагаалз ванд̣̇им̣ сираси ан̃ж̇алим̣ гаронд̇о бан̣аамим̣.
Jigucchitoti jātiyā ceva kammunā ca hīḷito. Manussānanti manussehi. Paribhūtoti avaññāto. Vambhitoti khuṃsito. Nīcaṃ manaṃ karitvānāti aññe manusse sineruṃ viya ukkhipitvā tesaṃ pādapaṃsutopi attānaṃ nihīnaṃ katvā pavattiyā nīcaṃ nihīnaṃ manaṃ katvā. Vandissaṃbahukaṃ jananti puthumahājanaṃ diṭṭhadiṭṭhakāle vandiṃ sirasi añjaliṃ karonto paṇāmiṃ.
ат̇аад̇и ад̇хигааранд̇арад̣̇ийбанз нибаад̇о. ад̣̇д̣̇асаасинд̇и ад̣̇д̣̇агким̣. маг̇ад̇хаананд̇и маг̇ад̇хаа наама ж̇аанабад̣̇ино рааж̇агумаараа, д̇зсам̣ ниваасо згоби ж̇анабад̣̇о рул̣хияаа ‘‘маг̇ад̇хаана’’нд̇и вуд̇д̇о, маг̇ад̇хаж̇анабад̣̇ассаад̇и ад̇т̇о. буруд̇д̇аманд̇и уд̇д̇амам̣ наг̇арам̣.
Athāti adhikārantaradīpane nipāto. Addasāsinti addakkhiṃ. Magadhānanti magadhā nāma jānapadino rājakumārā, tesaṃ nivāso ekopi janapado ruḷhiyā ‘‘magadhāna’’nti vutto, magadhajanapadassāti attho. Puruttamanti uttamaṃ nagaraṃ.
б̣яаабхан̇г̇инд̇и гааж̇ам̣. баб̣б̣аж̇ж̇ам̣ ахамааяаажинд̇и, ‘‘сунийд̇а, баб̣б̣аж̇ид̇ум̣ сагкиссасий’’д̇и сад̇т̇аараа огаасз гад̇з ахам̣ баб̣б̣аж̇ж̇ам̣ аяаажим̣. аасуубасамбад̣̇аад̇и ‘‘зхи, бхигкуу’’д̇и сад̇т̇у важанамад̇д̇зна ааси убасамбад̣̇аа. яат̇аа мам̣ овад̣̇ийд̇и ‘‘звам̣ самат̇абуб̣б̣ан̇г̇амам̣ вибассанам̣ бхаавзхий’’д̇и яат̇аа мам̣ овад̣̇и, д̇ат̇аа сад̇т̇уно важанам̣ агаасим̣ бадибаж̇ж̇им̣. рад̇д̇ияаад̇иаад̣̇и д̇ассаа бадибад̇д̇ияаа расад̣̇ассанам̣. д̇ад̇т̇а буб̣б̣зниваасан̃аан̣ам̣ анааг̇ад̇ам̣сан̃аан̣ан̃жа б̣ахугижжанд̇и ‘‘батамам̣ яаамам̣ маж̇жхимам̣ яаама’’нд̇и ажжанд̇асам̣яог̇авасзна убаяог̇аважанам̣ вуд̇д̇ам̣. на д̇ат̇аа аасавагкаяан̃аан̣ам̣ згаабхисамаяавасзна бавад̇д̇анад̇од̇и ‘‘бажчимз яаамз’’д̇и бхуммавасзна вуд̇д̇анд̇и д̣̇адтаб̣б̣ам̣. инд̣̇од̇и сагго д̣̇зварааж̇аа. б̣рахмаад̇и махааб̣рахмаа. инд̣̇аб̣рахмаг̇г̇ахан̣зна ан̃н̃зсам̣ гаамад̣̇зваанам̣ б̣рахмуунан̃жа ааг̇аманам̣ вуд̇д̇амзваад̇и д̣̇адтаб̣б̣ам̣. уггадтанид̣̇д̣̇зсо хзса яат̇аа ‘‘рааж̇аа ааг̇ад̇о’’д̇и. намассим̣сууд̇и гааязна ваажааяа жа намаггаарам̣ агам̣су.
Byābhaṅginti kājaṃ. Pabbajjaṃ ahamāyācinti, ‘‘sunīta, pabbajituṃ sakkhissasī’’ti satthārā okāse kate ahaṃ pabbajjaṃ ayāciṃ. Āsūpasampadāti ‘‘ehi, bhikkhū’’ti satthu vacanamattena āsi upasampadā. Yathā maṃ ovadīti ‘‘evaṃ samathapubbaṅgamaṃ vipassanaṃ bhāvehī’’ti yathā maṃ ovadi, tathā satthuno vacanaṃ akāsiṃ paṭipajjiṃ. Rattiyātiādi tassā paṭipattiyā rasadassanaṃ. Tattha pubbenivāsañāṇaṃ anāgataṃsañāṇañca bahukiccanti ‘‘paṭhamaṃ yāmaṃmajjhimaṃ yāma’’nti accantasaṃyogavasena upayogavacanaṃ vuttaṃ. Na tathā āsavakkhayañāṇaṃ ekābhisamayavasena pavattanatoti ‘‘pacchime yāme’’ti bhummavasena vuttanti daṭṭhabbaṃ. Indoti sakko devarājā. Brahmāti mahābrahmā. Indabrahmaggahaṇena aññesaṃ kāmadevānaṃ brahmūnañca āgamanaṃ vuttamevāti daṭṭhabbaṃ. Ukkaṭṭhaniddeso hesa yathā ‘‘rājā āgato’’ti. Namassiṃsūti kāyena vācāya ca namakkāraṃ akaṃsu.
д̇ад̇т̇а гааязна гад̇ам̣ намаггаарам̣ д̣̇ассзнд̇о ‘‘бан̃ж̇алий’’д̇и вад̇ваа ваажааяа гад̇ам̣ д̣̇ассзд̇ум̣ ‘‘намо д̇з’’д̇иаад̣̇и вуд̇д̇ам̣. д̣̇звасан̇гхабурагкад̇анд̇и д̣̇зваг̇г̇ахан̣зна убабад̇д̇ид̣̇звабхаавад̇о б̣рахмааноби г̇ахид̇аа. сид̇ам̣ баад̇угарид̇ваанаад̇и ад̇д̇ано оваад̣̇асса махабпалад̇ам̣ д̣̇зваб̣рахмуунан̃жа г̇ун̣асамбад̇д̇им̣ ниссааяа сад̇т̇аа сид̇ам̣ баад̇ваагааси. баад̇угаронд̇о жа на ан̃н̃з вияа д̣̇анд̇з вид̣̇ам̣сзд̇и, мукаад̇хаанам̣ бана т̇огам̣ виварад̇и, д̇ад̇д̇агзна жа абхибхууд̇ад̣̇иб̣б̣апалигамуд̇д̇арасмияо авахасид̇ад̇аарагаасасимарийжияо сусуггад̣̇аатасамбхаваа гханарасмияо нигкамид̇ваа д̇игкад̇д̇ум̣ сад̇т̇у мукам̣ бад̣̇агкин̣ам̣ гаронд̇и, д̇ам̣ д̣̇исваа бажчад̇о г̇ажчанд̇ааби сад̇т̇аа сид̇ам̣ баад̇ваагаасийд̇и сан̃ж̇аананд̇и.
Tattha kāyena kataṃ namakkāraṃ dassento ‘‘pañjalī’’ti vatvā vācāya kataṃ dassetuṃ ‘‘namo te’’tiādi vuttaṃ. Devasaṅghapurakkhatanti devaggahaṇena upapattidevabhāvato brahmānopi gahitā. Sitaṃ pātukaritvānāti attano ovādassa mahapphalataṃ devabrahmūnañca guṇasampattiṃ nissāya satthā sitaṃ pātvākāsi. Pātukaronto ca na aññe viya dante vidaṃseti, mukhādhānaṃ pana thokaṃ vivarati, tattakena ca abhibhūtadibbaphalikamuttarasmiyo avahasitatārakāsasimarīciyo susukkadāṭhasambhavā ghanarasmiyo nikkhamitvā tikkhattuṃ satthu mukhaṃ padakkhiṇaṃ karonti, taṃ disvā pacchato gacchantāpi satthā sitaṃ pātvākāsīti sañjānanti.
д̇абзнаад̇и инд̣̇рияасам̣варзна, ‘‘д̇худ̇ад̇хаммасамаад̣̇аанзнаа’’д̇и гзжи. сам̣яамзнаад̇и сийлзна. д̣̇амзнаад̇и бан̃н̃ааяа. б̣рахмажариязнаад̇и авасидтасздтажарияааяа. зд̇знаад̇и яат̇аавуд̇д̇зна д̇абаад̣̇инаа. б̣раахман̣о ход̇и б̣аахид̇абаабабхаавад̇о. зд̇анд̇и д̇абаад̣̇и яат̇аавуд̇д̇ам̣. б̣раахман̣амуд̇д̇аманд̇и уд̇д̇амам̣ б̣раахман̣ам̣, б̣раахман̣зсу ваа уд̇д̇амам̣ саб̣б̣асздтам̣, ахууд̇и важанасзсо. б̣раахман̣анд̇и ваа б̣рахман̃н̃амааха, звам̣ уд̇д̇амам̣ б̣рахман̃н̃ам̣, на ж̇ажжаад̣̇ийд̇и ад̇хиббааяо. на хи ж̇аад̇игулабад̣̇зсаг̇од̇д̇асамбад̇д̇иаад̣̇аяо арияабхаавасса гааран̣ам̣, ад̇хисийласигкаад̣̇аяо зва бана гааран̣ам̣. д̇знааха –
Tapenāti indriyasaṃvarena, ‘‘dhutadhammasamādānenā’’ti keci. Saṃyamenāti sīlena. Damenāti paññāya. Brahmacariyenāti avasiṭṭhaseṭṭhacariyāya. Etenāti yathāvuttena tapādinā. Brāhmaṇo hoti bāhitapāpabhāvato. Etanti tapādi yathāvuttaṃ. Brāhmaṇamuttamanti uttamaṃ brāhmaṇaṃ, brāhmaṇesu vā uttamaṃ sabbaseṭṭhaṃ, ahūti vacanaseso. Brāhmaṇanti vā brahmaññamāha, evaṃ uttamaṃ brahmaññaṃ, na jaccādīti adhippāyo. Na hi jātikulapadesagottasampattiādayo ariyabhāvassa kāraṇaṃ, adhisīlasikkhādayo eva pana kāraṇaṃ. Tenāha –
‘‘яат̇аа сан̇гааратаанасмим̣, уж̇жхид̇асмим̣ махаабат̇з;
‘‘Yathā saṅkāraṭhānasmiṃ, ujjhitasmiṃ mahāpathe;
бад̣̇умам̣ д̇ад̇т̇а ж̇ааязт̇а, сужиг̇анд̇хам̣ манорамам̣.
Padumaṃ tattha jāyetha, sucigandhaṃ manoramaṃ.
‘‘звам̣ сан̇гаарабхууд̇зсу, анд̇хабхууд̇з бут̇уж̇ж̇анз;
‘‘Evaṃ saṅkārabhūtesu, andhabhūte puthujjane;
ад̇ирожад̇и бан̃н̃ааяа, саммаасамб̣уд̣̇д̇хасааваго’’д̇и. (д̇ха. ба. 58-59);
Atirocati paññāya, sammāsambuddhasāvako’’ti. (dha. pa. 58-59);
звам̣ т̇зро д̇зхи бхигкуухи бужчид̇амад̇т̇ам̣ имаахи г̇аат̇аахи виссаж̇ж̇знд̇о сийханаад̣̇ам̣ над̣̇ийд̇и.
Evaṃ thero tehi bhikkhūhi pucchitamatthaṃ imāhi gāthāhi vissajjento sīhanādaṃ nadīti.
сунийд̇ад̇т̇зраг̇аат̇ааван̣н̣анаа нидтид̇аа.
Sunītattheragāthāvaṇṇanā niṭṭhitā.
д̣̇ваад̣̇асаганибаад̇аван̣н̣анаа нидтид̇аа.
Dvādasakanipātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 2. сунийд̇ад̇т̇зраг̇аат̇аа • 2. Sunītattheragāthā
