| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஸுங்ககா⁴தகதா²வண்ணனா
Suṅkaghātakathāvaṇṇanā
113. ஸுங்ககா⁴தகதா²யங் ததோ ஹனந்தீதி ததோ நீஹரந்தா ஹனந்தி. தந்தி ஸுங்கட்டா²னங். யதோதி யதோ நீஹரியமானப⁴ண்ட³தோ. ராஜகந்தி ராஜாயத்தங். தம்பி ராஜாரஹமேவாதி ஆஹ ‘‘அயமேவத்தோ²’’தி. இதோதி இதோ ப⁴ண்ட³தோ. து³தியங் பாத³ங் அதிக்காமேதீதி எத்த² ‘‘பட²மங் பாத³ங் பரிச்சே²த³தோ ப³ஹி ட²பெத்வா து³தியே பாதே³ உத்³த⁴டமத்தே பாராஜிக’’ந்தி வத³ந்தி உத்³த⁴ரித்வா ப³ஹி அட்ட²பிதோபி ப³ஹி டி²தோயேவ நாம ஹோதீதி கத்வா. யத்த² யத்த² பத³வாரேன ஆபத்தி காரேதப்³பா³, தத்த² தத்த² ஸப்³ப³த்தா²பி ஏஸேவ நயோதி வத³ந்தி. ஸுங்ககா⁴ததோ ப³ஹி ப³ஹிஸுங்ககா⁴தங். அவஸ்ஸங் பதனகந்தி அவஸ்ஸங் ஸுங்ககா⁴ததோ ப³ஹி பதனகங். புப்³பே³ வுத்தனயேனேவாதி அவஸ்ஸங் பதனகே ஹத்த²தோ முத்தமத்தேதி வுத்தங் ஹோதி. வட்டந்தங் புன அந்தோ பவிஸதீதி மஹாஅட்ட²கதா²வசனஸ்ஸ குருந்தி³ஸங்கே²பட்ட²கதா²ஹி அதி⁴ப்பாயோ பகாஸிதோ. அந்தோ ட²த்வா ப³ஹி க³ச்ச²ந்தங் ரக்க²தீதி பி⁴க்கு²னோ பயோகே³ன க³மனவேக³ஸ்ஸ அந்தோயேவ வூபஸந்தத்தா. பரிவத்தெத்வா அப்³ப⁴ந்தரிமங் ப³ஹி ட²பேதீதி அப்³ப⁴ந்தரே டி²தங் புடகங் பரிவத்தெத்வா ப³ஹி ட²பேதி. எத்த² ச ‘‘அப்³ப⁴ந்தரிமே புடகே பூ⁴மிதோ மோசிதமத்தே பாராஜிக’’ந்தி வத³ந்தி.
113. Suṅkaghātakathāyaṃ tato hanantīti tato nīharantā hananti. Tanti suṅkaṭṭhānaṃ. Yatoti yato nīhariyamānabhaṇḍato. Rājakanti rājāyattaṃ. Tampi rājārahamevāti āha ‘‘ayamevattho’’ti. Itoti ito bhaṇḍato. Dutiyaṃ pādaṃ atikkāmetīti ettha ‘‘paṭhamaṃ pādaṃ paricchedato bahi ṭhapetvā dutiye pāde uddhaṭamatte pārājika’’nti vadanti uddharitvā bahi aṭṭhapitopi bahi ṭhitoyeva nāma hotīti katvā. Yattha yattha padavārena āpatti kāretabbā, tattha tattha sabbatthāpi eseva nayoti vadanti. Suṅkaghātato bahi bahisuṅkaghātaṃ. Avassaṃ patanakanti avassaṃ suṅkaghātato bahi patanakaṃ. Pubbe vuttanayenevāti avassaṃ patanake hatthato muttamatteti vuttaṃ hoti. Vaṭṭantaṃ puna anto pavisatīti mahāaṭṭhakathāvacanassa kurundisaṅkhepaṭṭhakathāhi adhippāyo pakāsito. Anto ṭhatvā bahi gacchantaṃ rakkhatīti bhikkhuno payogena gamanavegassa antoyeva vūpasantattā. Parivattetvā abbhantarimaṃ bahi ṭhapetīti abbhantare ṭhitaṃ puṭakaṃ parivattetvā bahi ṭhapeti. Ettha ca ‘‘abbhantarime puṭake bhūmito mocitamatte pārājika’’nti vadanti.
‘‘க³ச்ச²ந்தே யானே வா…பே॰… ட²பேதீதி ஸுங்ககா⁴தங் அபவிஸித்வா ப³ஹியேவ ட²பேதீ’’தி தீஸுபி க³ண்டி²பதே³ஸு வுத்தங் ஸுங்கட்டா²னஸ்ஸ ப³ஹி ட²பிதந்தி வக்க²மானத்தா. ஆசரியா பன ‘‘ஸுங்கட்டா²னஸ்ஸ ப³ஹி டி²த’’ந்தி பாட²ங் விகப்பெத்வா ‘‘பட²மங் அந்தோஸுங்ககா⁴தங் பவிட்டே²ஸுயேவ யானாதீ³ஸு ட²பிதங் பச்சா² யானேன ஸத்³தி⁴ங் நீஹடங் ஸுங்ககா⁴தஸ்ஸ ப³ஹி டி²தங், ந ச தேன நீத’’ந்தி அத்த²ங் வத³ந்தி. அயங் பன தேஸங் அதி⁴ப்பாயோ – ஸுங்கட்டா²னஸ்ஸ அந்தோ பவிட்ட²யானாதீ³ஸு ட²பிதேபி பி⁴க்கு²ஸ்ஸ பயோக³ங் வினா அஞ்ஞேன நீஹடத்தா நேவத்தி² பாராஜிகங், ‘‘அத்ர பவிட்ட²ஸ்ஸ ஸுங்கங் க³ண்ஹந்தூ’’தி வுத்தத்தா அஞ்ஞேன நீஹடஸ்ஸ ப³ஹி டி²தே ப⁴ண்ட³தெ³ய்யம்பி ந ஹோதீதி. அயமேவ ச நயோ ‘‘வட்டித்வா க³மிஸ்ஸதீதி வா அஞ்ஞோ நங் வட்டெஸ்ஸதீதி வா அந்தோ ட²பிதங் பச்சா² ஸயங் வா வட்டமானங் அஞ்ஞேன வா வட்டிதங் ப³ஹி க³ச்ச²தி, ரக்க²தியேவா’’தி இமினா வசனேன ஸமேதீதி யுத்ததரோ விய தி³ஸ்ஸதி. ஸுங்கட்டா²னஸ்ஸ அந்தோ பவிஸித்வா புன பச்சாக³ச்ச²தோபி தேன பஸ்ஸேன பரிச்சே²த³ங் அதிக்கமந்தஸ்ஸ யதி³ ததோபி க³ச்ச²ந்தானங் ஹத்த²தோ ஸுங்கங் க³ண்ஹந்தி, ஸீமாதிக்கமே பாராஜிகமேவ.
‘‘Gacchante yāne vā…pe… ṭhapetīti suṅkaghātaṃ apavisitvā bahiyeva ṭhapetī’’ti tīsupi gaṇṭhipadesu vuttaṃ suṅkaṭṭhānassa bahi ṭhapitanti vakkhamānattā. Ācariyā pana ‘‘suṅkaṭṭhānassa bahi ṭhita’’nti pāṭhaṃ vikappetvā ‘‘paṭhamaṃ antosuṅkaghātaṃ paviṭṭhesuyeva yānādīsu ṭhapitaṃ pacchā yānena saddhiṃ nīhaṭaṃ suṅkaghātassa bahi ṭhitaṃ, na ca tena nīta’’nti atthaṃ vadanti. Ayaṃ pana tesaṃ adhippāyo – suṅkaṭṭhānassa anto paviṭṭhayānādīsu ṭhapitepi bhikkhussa payogaṃ vinā aññena nīhaṭattā nevatthi pārājikaṃ, ‘‘atra paviṭṭhassa suṅkaṃ gaṇhantū’’ti vuttattā aññena nīhaṭassa bahi ṭhite bhaṇḍadeyyampi na hotīti. Ayameva ca nayo ‘‘vaṭṭitvā gamissatīti vā añño naṃ vaṭṭessatīti vā anto ṭhapitaṃ pacchā sayaṃ vā vaṭṭamānaṃ aññena vā vaṭṭitaṃ bahi gacchati, rakkhatiyevā’’ti iminā vacanena sametīti yuttataro viya dissati. Suṅkaṭṭhānassa anto pavisitvā puna paccāgacchatopi tena passena paricchedaṃ atikkamantassa yadi tatopi gacchantānaṃ hatthato suṅkaṃ gaṇhanti, sīmātikkame pārājikameva.
ஹத்தி²ஸுத்தாதீ³ஸூதி ஹத்தி²ஸிக்கா²தீ³ஸு. இமஸ்மிங் டா²னேதி யதா²வுத்தயானாதீ³ஹி வுத்தப்பகாரேன நீஹரணே. அனாபத்தீதி தத்த² ‘‘ஸஹத்தா²’’தி வசனதோ அஞ்ஞேன நீஹராபெந்தஸ்ஸ அனாபத்தி. இதா⁴தி இமஸ்மிங் அதி³ன்னாதா³னஸிக்கா²பதே³. தத்ராதி தஸ்மிங் ஏளகலோமஸிக்கா²பதே³. ஹொந்தீதி எத்த² இதி-ஸத்³தோ³ ஹேதுஅத்தோ², யஸ்மா ஏளகலோமானி நிஸ்ஸக்³கி³யானி ஹொந்தி, தஸ்மா பாசித்தியந்தி அத்தோ². இத⁴ அனாபத்தீதி இமஸ்மிங் ஸிக்கா²பதே³ அவஹாராபா⁴வா அனாபத்தி. உபசாரந்தி ஸுங்ககா⁴தபரிச்சே²த³தோ ப³ஹி ஸமந்தா த்³வின்னங் லெட்³டு³பாதானங் அப்³ப⁴ந்தரங் வதிஆஸன்னப்பதே³ஸஸங்கா²தங் உபசாரங். தாதி³ஸங் உபசாரங் ஓக்கமித்வா பரிஹரணே ஸாதீ³னவத்தா து³க்கடங் வுத்தங். எத்தா²தி ஸுங்ககா⁴தே. ‘‘த்³வீஹி லெட்³டு³பாதேஹீதி அயங் நியமோ ஆசரியபரம்பராப⁴தோ’’தி மஹாக³ண்டி²பதே³ வுத்தங்.
Hatthisuttādīsūti hatthisikkhādīsu. Imasmiṃ ṭhāneti yathāvuttayānādīhi vuttappakārena nīharaṇe. Anāpattīti tattha ‘‘sahatthā’’ti vacanato aññena nīharāpentassa anāpatti. Idhāti imasmiṃ adinnādānasikkhāpade. Tatrāti tasmiṃ eḷakalomasikkhāpade. Hontīti ettha iti-saddo hetuattho, yasmā eḷakalomāni nissaggiyāni honti, tasmā pācittiyanti attho. Idha anāpattīti imasmiṃ sikkhāpade avahārābhāvā anāpatti. Upacāranti suṅkaghātaparicchedato bahi samantā dvinnaṃ leḍḍupātānaṃ abbhantaraṃ vatiāsannappadesasaṅkhātaṃ upacāraṃ. Tādisaṃ upacāraṃ okkamitvā pariharaṇe sādīnavattā dukkaṭaṃ vuttaṃ. Etthāti suṅkaghāte. ‘‘Dvīhi leḍḍupātehīti ayaṃ niyamo ācariyaparamparābhato’’ti mahāgaṇṭhipade vuttaṃ.
ஸுங்ககா⁴தகதா²வண்ணனா நிட்டி²தா.
Suṅkaghātakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸுங்ககா⁴தகதா²வண்ணனா • Suṅkaghātakathāvaṇṇanā
