| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸுங்ககா⁴தகதா²வண்ணனா
Suṅkaghātakathāvaṇṇanā
113. ஸுங்ககா⁴தகதா²யங் ஸுங்கங் யத்த² ராஜபுரிஸா ஹனந்தி அத³த³ந்தானங் ஸந்தகங் அச்சி²ந்தி³த்வாபி க³ண்ஹந்தி, தங் டா²னங் ஸுங்ககா⁴தந்தி ஏவம்பி அத்தோ² த³ட்ட²ப்³போ³. வுத்தமேவத்த²ங் பாகடங் காதுங் தஞ்ஹீதிஆதி³ வுத்தங். து³தியங் பாத³ங் அதிக்காமேதீதி எத்த² பட²மபாத³ங் பரிச்சே²த³தோ ப³ஹி ட²பெத்வா து³தியபாதே³ உத்³த⁴டமத்தே பாராஜிகங். உத்³த⁴ரித்வா ப³ஹி அட்ட²பிதேபி ப³ஹி டி²தோ ஏவ நாம ஹோதீதி கத்வா ஏவங் ஸப்³ப³த்த² பத³வாரேஸுபீதி த³ட்ட²ப்³ப³ங். பரிவத்தித்வா அப்³ப⁴ந்தரிமங் ப³ஹி ட²பேதி, பாராஜிகந்தி இத³ங் ஸயங் ப³ஹி ட²த்வா பட²மங் அப்³ப⁴ந்தரிமங் உக்கி²பித்வா வா ஸமகங் உக்கி²பித்வா வா பரிவத்தனங் ஸந்தா⁴ய வுத்தங். ப³ஹி ட²த்வா உக்கி²த்தமத்தே ஹி ஸப்³ப³ங் ப³ஹிக³தமேவ ஹோதீதி. ஸசே பன ஸோ ப³ஹி ட²த்வாபி பா³ஹிரபுடகங் பட²மங் அந்தோ ட²பெத்வா பச்சா² அப்³ப⁴ந்தரிமங் உக்கி²பித்வா ப³ஹி ட²பேதி, ததா³பி ஏகாப³த்³த⁴தாய அவிஜஹிதத்தா அவஹாரோ ந தி³ஸ்ஸதி. கேசி பன ‘‘பூ⁴மியங் பதித்வா வத்தந்தங் புன அந்தோ பவிஸதி, பாராஜிகமேவாதி (பாரா॰ அட்ட²॰ 1.113) வுத்தத்தா பா³ஹிரபுடகே அந்தோபவிட்டே²பி ப³ஹிக³தபா⁴வதோ ந முச்சதி, அந்தோக³தங் பன புடகங் பட²மங், பச்சா² ஏவ வா ப³ஹி ட²பிதமத்தே வா பாராஜிகமேவா’’தி வத³ந்தி, தங் ந யுத்தங். ப³ஹி பூ⁴மியங் பாதிதஸ்ஸ கேனசி ஸத்³தி⁴ங் ஏகாப³த்³த⁴தாய அபா⁴வேன அந்தோபவிட்டே²பி பாராஜிகமேவாதி வத்துங் யுத்தங், இத³ங் பன ஏகாப³த்³த⁴த்தா தேன ஸத்³தி⁴ங் ந ஸமேதி. தஸ்மா யதா² அந்தோபூ⁴மிக³தேன ஏகாப³த்³த⁴தா ந ஹோதி, ஏவங் உப⁴யஸ்ஸாபி ப³ஹிக³தபா⁴வே ஸாதி⁴தேயேவ அவஹாரோதி விஞ்ஞாயதி, வீமங்ஸித்வா க³ஹேதப்³ப³ங். யே பன பரிவத்தித்வாதி இமஸ்ஸ நிவத்தித்வாதி அத்த²ங் வத³ந்தி, தேஹி பன அப்³ப⁴ந்தரிமங் ப³ஹி ட²பேதீதி அயமத்தோ² க³ஹிதோ ஹோதீதி தத்த² ஸங்காயேவ நத்தி². ஏகாப³த்³த⁴ந்தி காஜகோடியங் ரஜ்ஜுயா ப³ந்த⁴னங் ஸந்தா⁴ய வுத்தங். அப³ந்தி⁴த்வா காஜகோடியங் ட²பிதமத்தமேவ ஹோதி, பாராஜிகந்தி ப³ஹி க³ஹிதகாஜகோடியங் ட²பிதங் யதி³ பாத³ங் அக்³க⁴தி, பாராஜிகமேவ, அந்தோட²பிதேன ஏகாப³த்³த⁴தாய அபா⁴வாதி அதி⁴ப்பாயோ. க³ச்ச²ந்தே யானே வா…பே॰… ட²பேதீதி ஸுங்ககா⁴தங் பவிஸித்வா அப்பவிஸித்வா வா ட²பேதி. ஸுங்கட்டா²னஸ்ஸ ப³ஹி டி²தந்தி யானாதீ³ஹி நீஹடத்தா ப³ஹி டி²தங். கேசி பன ‘‘ப³ஹி ட²பித’’ந்தி பாட²ங் விகப்பெத்வா ஸுங்கட்டா²னதோ புப்³பே³வ ப³ஹி ட²பிதந்தி அத்த²ங் வத³ந்தி, தங் ந ஸுந்த³ரங்; ஸுங்கட்டா²னே பவிஸித்வா யானே ட²பிதேபி பவத்தித்வா க³தே விய தோ³ஸாபா⁴வதோ. யோ பன ஸுங்கட்டா²னஸ்ஸ அந்தோவ பவிஸித்வா ‘‘ஸுங்கட்டா²ன’’ந்தி ஞத்வா தெ²ய்யசித்தேன ஆக³தமக்³கே³ன படினிவத்தித்வா க³ச்ச²தி, தஸ்ஸாபி யதி³ தேன தி³ஸாபா⁴கே³ன க³ச்ச²ந்தானம்பி ஹத்த²தோ ஸுங்கங் க³ண்ஹந்தி, பாராஜிகமேவ. இமஸ்மிங் டா²னேதி யானாதீ³ஹி நீஹரணே. தத்ராதி தஸ்மிங் ஏளகலோமஸிக்கா²பதே³ (பாரா॰ 571 ஆத³யோ).
113. Suṅkaghātakathāyaṃ suṅkaṃ yattha rājapurisā hananti adadantānaṃ santakaṃ acchinditvāpi gaṇhanti, taṃ ṭhānaṃ suṅkaghātanti evampi attho daṭṭhabbo. Vuttamevatthaṃ pākaṭaṃ kātuṃ tañhītiādi vuttaṃ. Dutiyaṃ pādaṃ atikkāmetīti ettha paṭhamapādaṃ paricchedato bahi ṭhapetvā dutiyapāde uddhaṭamatte pārājikaṃ. Uddharitvā bahi aṭṭhapitepi bahi ṭhito eva nāma hotīti katvā evaṃ sabbattha padavāresupīti daṭṭhabbaṃ. Parivattitvā abbhantarimaṃ bahi ṭhapeti, pārājikanti idaṃ sayaṃ bahi ṭhatvā paṭhamaṃ abbhantarimaṃ ukkhipitvā vā samakaṃ ukkhipitvā vā parivattanaṃ sandhāya vuttaṃ. Bahi ṭhatvā ukkhittamatte hi sabbaṃ bahigatameva hotīti. Sace pana so bahi ṭhatvāpi bāhirapuṭakaṃ paṭhamaṃ anto ṭhapetvā pacchā abbhantarimaṃ ukkhipitvā bahi ṭhapeti, tadāpi ekābaddhatāya avijahitattā avahāro na dissati. Keci pana ‘‘bhūmiyaṃ patitvā vattantaṃ puna anto pavisati, pārājikamevāti (pārā. aṭṭha. 1.113) vuttattā bāhirapuṭake antopaviṭṭhepi bahigatabhāvato na muccati, antogataṃ pana puṭakaṃ paṭhamaṃ, pacchā eva vā bahi ṭhapitamatte vā pārājikamevā’’ti vadanti, taṃ na yuttaṃ. Bahi bhūmiyaṃ pātitassa kenaci saddhiṃ ekābaddhatāya abhāvena antopaviṭṭhepi pārājikamevāti vattuṃ yuttaṃ, idaṃ pana ekābaddhattā tena saddhiṃ na sameti. Tasmā yathā antobhūmigatena ekābaddhatā na hoti, evaṃ ubhayassāpi bahigatabhāve sādhiteyeva avahāroti viññāyati, vīmaṃsitvā gahetabbaṃ. Ye pana parivattitvāti imassa nivattitvāti atthaṃ vadanti, tehi pana abbhantarimaṃ bahi ṭhapetīti ayamattho gahito hotīti tattha saṅkāyeva natthi. Ekābaddhanti kājakoṭiyaṃ rajjuyā bandhanaṃ sandhāya vuttaṃ. Abandhitvā kājakoṭiyaṃ ṭhapitamattameva hoti, pārājikanti bahi gahitakājakoṭiyaṃ ṭhapitaṃ yadi pādaṃ agghati, pārājikameva, antoṭhapitena ekābaddhatāya abhāvāti adhippāyo. Gacchante yāne vā…pe… ṭhapetīti suṅkaghātaṃ pavisitvā appavisitvā vā ṭhapeti. Suṅkaṭṭhānassa bahi ṭhitanti yānādīhi nīhaṭattā bahi ṭhitaṃ. Keci pana ‘‘bahi ṭhapita’’nti pāṭhaṃ vikappetvā suṅkaṭṭhānato pubbeva bahi ṭhapitanti atthaṃ vadanti, taṃ na sundaraṃ; suṅkaṭṭhāne pavisitvā yāne ṭhapitepi pavattitvā gate viya dosābhāvato. Yo pana suṅkaṭṭhānassa antova pavisitvā ‘‘suṅkaṭṭhāna’’nti ñatvā theyyacittena āgatamaggena paṭinivattitvā gacchati, tassāpi yadi tena disābhāgena gacchantānampi hatthato suṅkaṃ gaṇhanti, pārājikameva. Imasmiṃ ṭhāneti yānādīhi nīharaṇe. Tatrāti tasmiṃ eḷakalomasikkhāpade (pārā. 571 ādayo).
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸுங்ககா⁴தகதா²வண்ணனா • Suṅkaghātakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
