| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
10. ஸுஞ்ஞகதா²
10. Suññakathā
46. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச –
46. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘‘ஸுஞ்ஞோ லோகோ, ஸுஞ்ஞோ லோகோ’தி, ப⁴ந்தே, வுச்சதி . கித்தாவதா நு கோ², ப⁴ந்தே, ‘ஸுஞ்ஞோ லோகோ’தி வுச்சதீ’’தி? ‘‘யஸ்மா கோ², ஆனந்த³, ஸுஞ்ஞங் அத்தேன வா அத்தனியேன வா, தஸ்மா ‘ஸுஞ்ஞோ லோகோ’தி வுச்சதி. கிஞ்சானந்த³ 1, ஸுஞ்ஞங் அத்தேன வா அத்தனியேன வா? சக்கு² கோ², ஆனந்த³, ஸுஞ்ஞங் அத்தேன வா அத்தனியேன வா. ரூபா ஸுஞ்ஞா அத்தேன வா அத்தனியேன வா. சக்கு²விஞ்ஞாணங் ஸுஞ்ஞங் அத்தேன வா அத்தனியேன வா. சக்கு²ஸம்ப²ஸ்ஸோ ஸுஞ்ஞோ அத்தேன வா அத்தனியேன வா. யம்பித³ங் 2 சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா, தம்பி ஸுஞ்ஞங் அத்தேன வா அத்தனியேன வா.
‘‘‘Suñño loko, suñño loko’ti, bhante, vuccati . Kittāvatā nu kho, bhante, ‘suñño loko’ti vuccatī’’ti? ‘‘Yasmā kho, ānanda, suññaṃ attena vā attaniyena vā, tasmā ‘suñño loko’ti vuccati. Kiñcānanda 3, suññaṃ attena vā attaniyena vā? Cakkhu kho, ānanda, suññaṃ attena vā attaniyena vā. Rūpā suññā attena vā attaniyena vā. Cakkhuviññāṇaṃ suññaṃ attena vā attaniyena vā. Cakkhusamphasso suñño attena vā attaniyena vā. Yampidaṃ 4 cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi suññaṃ attena vā attaniyena vā.
‘‘ஸோதங் ஸுஞ்ஞங்…பே॰… ஸத்³தா³ ஸுஞ்ஞா… கா⁴னங் ஸுஞ்ஞங்… க³ந்தா⁴ ஸுஞ்ஞா… ஜிவ்ஹா ஸுஞ்ஞா… ரஸா ஸுஞ்ஞா… காயோ ஸுஞ்ஞோ… பொ²ட்ட²ப்³பா³ ஸுஞ்ஞா… மனோ ஸுஞ்ஞோ அத்தேன வா அத்தனியேன வா. த⁴ம்மா ஸுஞ்ஞா அத்தேன வா அத்தனியேன வா. மனோவிஞ்ஞாணங் ஸுஞ்ஞங் அத்தேன வா அத்தனியேன வா. மனோஸம்ப²ஸ்ஸோ ஸுஞ்ஞோ அத்தேன வா அத்தனியேன வா. யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா, தம்பி ஸுஞ்ஞங் அத்தேன வா அத்தனியேன வா. யஸ்மா கோ², ஆனந்த³, ஸுஞ்ஞங் அத்தேன வா அத்தனியேன வா தஸ்மா ‘ஸுஞ்ஞோ லோகோ’தி வுச்சதீ’’தி.
‘‘Sotaṃ suññaṃ…pe… saddā suññā… ghānaṃ suññaṃ… gandhā suññā… jivhā suññā… rasā suññā… kāyo suñño… phoṭṭhabbā suññā… mano suñño attena vā attaniyena vā. Dhammā suññā attena vā attaniyena vā. Manoviññāṇaṃ suññaṃ attena vā attaniyena vā. Manosamphasso suñño attena vā attaniyena vā. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi suññaṃ attena vā attaniyena vā. Yasmā kho, ānanda, suññaṃ attena vā attaniyena vā tasmā ‘suñño loko’ti vuccatī’’ti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / ஸுஞ்ஞகதா²வண்ணனா • Suññakathāvaṇṇanā
