| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၀. သုညကထာ
10. Suññakathā
၄၆. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ အထ ခော အာယသ္မာ အာနန္ဒော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အာယသ္မာ အာနန္ဒော ဘဂဝန္တံ ဧတဒဝောစ –
46. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘‘သုညော လောကော, သုညော လောကော’တိ, ဘန္တေ, ဝုစ္စတိ ။ ကိတ္တာဝတာ နု ခော, ဘန္တေ, ‘သုညော လောကော’တိ ဝုစ္စတီ’’တိ? ‘‘ယသ္မာ ခော, အာနန္ဒ, သုညံ အတ္တေန ဝာ အတ္တနိယေန ဝာ, တသ္မာ ‘သုညော လောကော’တိ ဝုစ္စတိ။ ကိဉ္စာနန္ဒ 1, သုညံ အတ္တေန ဝာ အတ္တနိယေန ဝာ? စက္ခု ခော, အာနန္ဒ, သုညံ အတ္တေန ဝာ အတ္တနိယေန ဝာ။ ရူပာ သုညာ အတ္တေန ဝာ အတ္တနိယေန ဝာ။ စက္ခုဝိညာဏံ သုညံ အတ္တေန ဝာ အတ္တနိယေန ဝာ။ စက္ခုသမ္ဖသ္သော သုညော အတ္တေန ဝာ အတ္တနိယေန ဝာ။ ယမ္ပိဒံ 2 စက္ခုသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ, တမ္ပိ သုညံ အတ္တေန ဝာ အတ္တနိယေန ဝာ။
‘‘‘Suñño loko, suñño loko’ti, bhante, vuccati . Kittāvatā nu kho, bhante, ‘suñño loko’ti vuccatī’’ti? ‘‘Yasmā kho, ānanda, suññaṃ attena vā attaniyena vā, tasmā ‘suñño loko’ti vuccati. Kiñcānanda 3, suññaṃ attena vā attaniyena vā? Cakkhu kho, ānanda, suññaṃ attena vā attaniyena vā. Rūpā suññā attena vā attaniyena vā. Cakkhuviññāṇaṃ suññaṃ attena vā attaniyena vā. Cakkhusamphasso suñño attena vā attaniyena vā. Yampidaṃ 4 cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi suññaṃ attena vā attaniyena vā.
‘‘သောတံ သုညံ။ပေ.။ သဒ္ဒာ သုညာ။ ဃာနံ သုညံ။ ဂန္ဓာ သုညာ။ ဇိဝ္ဟာ သုညာ။ ရသာ သုညာ။ ကာယော သုညော။ ဖောဋ္ဌဗ္ဗာ သုညာ။ မနော သုညော အတ္တေန ဝာ အတ္တနိယေန ဝာ။ ဓမ္မာ သုညာ အတ္တေန ဝာ အတ္တနိယေန ဝာ။ မနောဝိညာဏံ သုညံ အတ္တေန ဝာ အတ္တနိယေန ဝာ။ မနောသမ္ဖသ္သော သုညော အတ္တေန ဝာ အတ္တနိယေန ဝာ။ ယမ္ပိဒံ မနောသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ, တမ္ပိ သုညံ အတ္တေန ဝာ အတ္တနိယေန ဝာ။ ယသ္မာ ခော, အာနန္ဒ, သုညံ အတ္တေန ဝာ အတ္တနိယေန ဝာ တသ္မာ ‘သုညော လောကော’တိ ဝုစ္စတီ’’တိ။
‘‘Sotaṃ suññaṃ…pe… saddā suññā… ghānaṃ suññaṃ… gandhā suññā… jivhā suññā… rasā suññā… kāyo suñño… phoṭṭhabbā suññā… mano suñño attena vā attaniyena vā. Dhammā suññā attena vā attaniyena vā. Manoviññāṇaṃ suññaṃ attena vā attaniyena vā. Manosamphasso suñño attena vā attaniyena vā. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi suññaṃ attena vā attaniyena vā. Yasmā kho, ānanda, suññaṃ attena vā attaniyena vā tasmā ‘suñño loko’ti vuccatī’’ti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / သုညကထာဝဏ္ဏနာ • Suññakathāvaṇṇanā
