| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. ஸுஞ்ஞதகதா²வண்ணனா
2. Suññatakathāvaṇṇanā
832. இதா³னி ஸுஞ்ஞதகதா² நாம ஹோதி. தத்த² ஸுஞ்ஞதாதி த்³வே ஸுஞ்ஞதா க²ந்தா⁴னஞ்ச அனத்தலக்க²ணங் நிப்³பா³னஞ்ச. தேஸு அனத்தலக்க²ணங் தாவ ஏகச்சங் ஏகேன பரியாயேன ஸியா ஸங்கா²ரக்க²ந்த⁴பரியாபன்னங், நிப்³பா³னங், அபரியாபன்னமேவ. இமங் பன விபா⁴க³ங் அக்³க³ஹெத்வா ‘‘ஸுஞ்ஞதா ஸங்கா²ரக்க²ந்த⁴பரியாபன்னா’’தி யேஸங் லத்³தி⁴, ஸெய்யதா²பி அந்த⁴கானங், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அனிமித்தந்தி ஸப்³ப³னிமித்தரஹிதங் நிப்³பா³னங். ‘‘அப்பணிஹிதோ’’திபி தஸ்ஸேவ நாமங். கஸ்மா பனேதங் ஆப⁴தந்தி? அவிப⁴ஜ்ஜவாதீ³வாதே³ தோ³ஸாரோபனத்த²ங். யஸ்ஸ ஹி அவிப⁴ஜித்வா ‘‘ஏகதே³ஸேனேவ ஸுஞ்ஞதா ஸங்கா²ரக்க²ந்த⁴பரியாபன்னா’’தி லத்³தி⁴, தஸ்ஸ நிப்³பா³னம்பி ஸங்கா²ரக்க²ந்த⁴பரியாபன்னந்தி ஆபஜ்ஜதி. இமஸ்ஸ தோ³ஸஸ்ஸாரோபனத்த²ங் ‘‘அனிமித்தங் அப்பணிஹித’’ந்தி ஆப⁴தங். இதரோ தஸ்ஸ பரியாபன்னபா⁴வங் அனிச்ச²ந்தோ படிக்கி²பதி. ஸங்கா²ரக்க²ந்தோ⁴ ந அனிச்சோதிஆதி³ நிப்³பா³னஸங்கா²தாய ஸுஞ்ஞதாய அனிச்சபா⁴வாபத்திதோ³ஸத³ஸ்ஸனத்த²ங் வுத்தங்.
832. Idāni suññatakathā nāma hoti. Tattha suññatāti dve suññatā khandhānañca anattalakkhaṇaṃ nibbānañca. Tesu anattalakkhaṇaṃ tāva ekaccaṃ ekena pariyāyena siyā saṅkhārakkhandhapariyāpannaṃ, nibbānaṃ, apariyāpannameva. Imaṃ pana vibhāgaṃ aggahetvā ‘‘suññatā saṅkhārakkhandhapariyāpannā’’ti yesaṃ laddhi, seyyathāpi andhakānaṃ, te sandhāya pucchā sakavādissa, paṭiññā itarassa. Animittanti sabbanimittarahitaṃ nibbānaṃ. ‘‘Appaṇihito’’tipi tasseva nāmaṃ. Kasmā panetaṃ ābhatanti? Avibhajjavādīvāde dosāropanatthaṃ. Yassa hi avibhajitvā ‘‘ekadeseneva suññatā saṅkhārakkhandhapariyāpannā’’ti laddhi, tassa nibbānampi saṅkhārakkhandhapariyāpannanti āpajjati. Imassa dosassāropanatthaṃ ‘‘animittaṃ appaṇihita’’nti ābhataṃ. Itaro tassa pariyāpannabhāvaṃ anicchanto paṭikkhipati. Saṅkhārakkhandho na aniccotiādi nibbānasaṅkhātāya suññatāya aniccabhāvāpattidosadassanatthaṃ vuttaṃ.
833. ஸங்கா²ரக்க²ந்த⁴ஸ்ஸ ஸுஞ்ஞதாதி ‘‘யதி³ அஞ்ஞஸ்ஸ க²ந்த⁴ஸ்ஸ ஸுஞ்ஞதா அஞ்ஞக்க²ந்த⁴பரியாபன்னா, ஸங்கா²ரக்க²ந்த⁴ஸுஞ்ஞதாயபி ஸேஸக்க²ந்த⁴பரியாபன்னாய ப⁴விதப்³ப³’’ந்தி சோத³னத்த²ங் வுத்தங். ஸங்கா²ரக்க²ந்த⁴ஸ்ஸ ஸுஞ்ஞதா ந வத்தப்³பா³திஆதி³ ‘‘யதி³ ஸங்கா²ரக்க²ந்த⁴ஸுஞ்ஞதா ஸேஸக்க²ந்த⁴பரியாபன்னா ந ஹோதி, ஸேஸக்க²ந்த⁴ஸுஞ்ஞதாபி ஸங்கா²ரக்க²ந்த⁴பரியாபன்னா ந ஹோதீ’’தி படிலோமத³ஸ்ஸனத்த²ங் வுத்தங்.
833. Saṅkhārakkhandhassa suññatāti ‘‘yadi aññassa khandhassa suññatā aññakkhandhapariyāpannā, saṅkhārakkhandhasuññatāyapi sesakkhandhapariyāpannāya bhavitabba’’nti codanatthaṃ vuttaṃ. Saṅkhārakkhandhassa suññatā na vattabbātiādi ‘‘yadi saṅkhārakkhandhasuññatā sesakkhandhapariyāpannā na hoti, sesakkhandhasuññatāpi saṅkhārakkhandhapariyāpannā na hotī’’ti paṭilomadassanatthaṃ vuttaṃ.
834. ஸுஞ்ஞமித³ங், பி⁴க்க²வே, ஸங்கா²ராதி ஸுத்தங் பரஸமயதோ ஆப⁴தங். தத்த² ஸங்கா²ராதி ‘‘ஸப்³பே³ ஸங்கா²ரா அனிச்சா’’தி ஆக³தட்டா²னே விய பஞ்சக்க²ந்தா⁴, தே ச அத்தத்தனியஸுஞ்ஞத்தா ஸுஞ்ஞதாதி ஸாஸனாவசரங் ஹோதி, ந விருஜ்ஜ²தி, தஸ்மா அனுஞ்ஞாதங். யஸ்மா பனேதங் ந ஸுஞ்ஞதாய ஸங்கா²ரக்க²ந்த⁴பரியாபன்னபா⁴வங் தீ³பேதி, தஸ்மா அஸாத⁴கந்தி.
834. Suññamidaṃ, bhikkhave, saṅkhārāti suttaṃ parasamayato ābhataṃ. Tattha saṅkhārāti ‘‘sabbe saṅkhārā aniccā’’ti āgataṭṭhāne viya pañcakkhandhā, te ca attattaniyasuññattā suññatāti sāsanāvacaraṃ hoti, na virujjhati, tasmā anuññātaṃ. Yasmā panetaṃ na suññatāya saṅkhārakkhandhapariyāpannabhāvaṃ dīpeti, tasmā asādhakanti.
ஸுஞ்ஞதகதா²வண்ணனா.
Suññatakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (187) 2. ஸுஞ்ஞதாகதா² • (187) 2. Suññatākathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. ஸுஞ்ஞதகதா²வண்ணனா • 2. Suññatakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. ஸுஞ்ஞதகதா²வண்ணனா • 2. Suññatakathāvaṇṇanā
