| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
২. সুঞ্ঞতকথাৰণ্ণনা
2. Suññatakathāvaṇṇanā
৮৩২. ইদানি সুঞ্ঞতকথা নাম হোতি। তত্থ সুঞ্ঞতাতি দ্ৰে সুঞ্ঞতা খন্ধানঞ্চ অনত্তলক্খণং নিব্বানঞ্চ। তেসু অনত্তলক্খণং তাৰ একচ্চং একেন পরিযাযেন সিযা সঙ্খারক্খন্ধপরিযাপন্নং, নিব্বানং, অপরিযাপন্নমেৰ। ইমং পন ৰিভাগং অগ্গহেত্ৰা ‘‘সুঞ্ঞতা সঙ্খারক্খন্ধপরিযাপন্না’’তি যেসং লদ্ধি, সেয্যথাপি অন্ধকানং, তে সন্ধায পুচ্ছা সকৰাদিস্স, পটিঞ্ঞা ইতরস্স। অনিমিত্তন্তি সব্বনিমিত্তরহিতং নিব্বানং। ‘‘অপ্পণিহিতো’’তিপি তস্সেৰ নামং। কস্মা পনেতং আভতন্তি? অৰিভজ্জৰাদীৰাদে দোসারোপনত্থং। যস্স হি অৰিভজিত্ৰা ‘‘একদেসেনেৰ সুঞ্ঞতা সঙ্খারক্খন্ধপরিযাপন্না’’তি লদ্ধি, তস্স নিব্বানম্পি সঙ্খারক্খন্ধপরিযাপন্নন্তি আপজ্জতি। ইমস্স দোসস্সারোপনত্থং ‘‘অনিমিত্তং অপ্পণিহিত’’ন্তি আভতং। ইতরো তস্স পরিযাপন্নভাৰং অনিচ্ছন্তো পটিক্খিপতি। সঙ্খারক্খন্ধো ন অনিচ্চোতিআদি নিব্বানসঙ্খাতায সুঞ্ঞতায অনিচ্চভাৰাপত্তিদোসদস্সনত্থং ৰুত্তং।
832. Idāni suññatakathā nāma hoti. Tattha suññatāti dve suññatā khandhānañca anattalakkhaṇaṃ nibbānañca. Tesu anattalakkhaṇaṃ tāva ekaccaṃ ekena pariyāyena siyā saṅkhārakkhandhapariyāpannaṃ, nibbānaṃ, apariyāpannameva. Imaṃ pana vibhāgaṃ aggahetvā ‘‘suññatā saṅkhārakkhandhapariyāpannā’’ti yesaṃ laddhi, seyyathāpi andhakānaṃ, te sandhāya pucchā sakavādissa, paṭiññā itarassa. Animittanti sabbanimittarahitaṃ nibbānaṃ. ‘‘Appaṇihito’’tipi tasseva nāmaṃ. Kasmā panetaṃ ābhatanti? Avibhajjavādīvāde dosāropanatthaṃ. Yassa hi avibhajitvā ‘‘ekadeseneva suññatā saṅkhārakkhandhapariyāpannā’’ti laddhi, tassa nibbānampi saṅkhārakkhandhapariyāpannanti āpajjati. Imassa dosassāropanatthaṃ ‘‘animittaṃ appaṇihita’’nti ābhataṃ. Itaro tassa pariyāpannabhāvaṃ anicchanto paṭikkhipati. Saṅkhārakkhandho na aniccotiādi nibbānasaṅkhātāya suññatāya aniccabhāvāpattidosadassanatthaṃ vuttaṃ.
৮৩৩. সঙ্খারক্খন্ধস্স সুঞ্ঞতাতি ‘‘যদি অঞ্ঞস্স খন্ধস্স সুঞ্ঞতা অঞ্ঞক্খন্ধপরিযাপন্না, সঙ্খারক্খন্ধসুঞ্ঞতাযপি সেসক্খন্ধপরিযাপন্নায ভৰিতব্ব’’ন্তি চোদনত্থং ৰুত্তং। সঙ্খারক্খন্ধস্স সুঞ্ঞতা ন ৰত্তব্বাতিআদি ‘‘যদি সঙ্খারক্খন্ধসুঞ্ঞতা সেসক্খন্ধপরিযাপন্না ন হোতি, সেসক্খন্ধসুঞ্ঞতাপি সঙ্খারক্খন্ধপরিযাপন্না ন হোতী’’তি পটিলোমদস্সনত্থং ৰুত্তং।
833. Saṅkhārakkhandhassa suññatāti ‘‘yadi aññassa khandhassa suññatā aññakkhandhapariyāpannā, saṅkhārakkhandhasuññatāyapi sesakkhandhapariyāpannāya bhavitabba’’nti codanatthaṃ vuttaṃ. Saṅkhārakkhandhassa suññatā na vattabbātiādi ‘‘yadi saṅkhārakkhandhasuññatā sesakkhandhapariyāpannā na hoti, sesakkhandhasuññatāpi saṅkhārakkhandhapariyāpannā na hotī’’ti paṭilomadassanatthaṃ vuttaṃ.
৮৩৪. সুঞ্ঞমিদং, ভিক্খৰে, সঙ্খারাতি সুত্তং পরসমযতো আভতং। তত্থ সঙ্খারাতি ‘‘সব্বে সঙ্খারা অনিচ্চা’’তি আগতট্ঠানে ৰিয পঞ্চক্খন্ধা, তে চ অত্তত্তনিযসুঞ্ঞত্তা সুঞ্ঞতাতি সাসনাৰচরং হোতি, ন ৰিরুজ্ঝতি, তস্মা অনুঞ্ঞাতং। যস্মা পনেতং ন সুঞ্ঞতায সঙ্খারক্খন্ধপরিযাপন্নভাৰং দীপেতি, তস্মা অসাধকন্তি।
834. Suññamidaṃ, bhikkhave, saṅkhārāti suttaṃ parasamayato ābhataṃ. Tattha saṅkhārāti ‘‘sabbe saṅkhārā aniccā’’ti āgataṭṭhāne viya pañcakkhandhā, te ca attattaniyasuññattā suññatāti sāsanāvacaraṃ hoti, na virujjhati, tasmā anuññātaṃ. Yasmā panetaṃ na suññatāya saṅkhārakkhandhapariyāpannabhāvaṃ dīpeti, tasmā asādhakanti.
সুঞ্ঞতকথাৰণ্ণনা।
Suññatakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৮৭) ২. সুঞ্ঞতাকথা • (187) 2. Suññatākathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ২. সুঞ্ঞতকথাৰণ্ণনা • 2. Suññatakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ২. সুঞ্ঞতকথাৰণ্ণনা • 2. Suññatakathāvaṇṇanā
