| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
সুঞ্ঞতৰারো
Suññatavāro
১২১-১৪৫. ইদানি তস্মিং খো পন সমযে ধম্মা হোন্তীতি সুঞ্ঞতৰারো আরদ্ধো। সো উদ্দেসনিদ্দেসৰসেন দ্ৰিধা ৰৰত্থিতো। তত্থ উদ্দেসৰারে ‘ধম্মা হোন্তী’তি ইমিনা সদ্ধিং চতুৰীসতি কোট্ঠাসা হোন্তি। সব্বকোট্ঠাসেসু চ ‘চত্তারো দ্ৰে তযো’তি গণনপরিচ্ছেদো ন ৰুত্তো। কস্মা? সঙ্গহৰারে পরিচ্ছিন্নত্তা। তত্থ পরিচ্ছিন্নধম্মাযেৰ হি ইধাপি ৰুত্তা। ন হেত্থ সত্তো ৰা ভাৰো ৰা অত্তা ৰা উপলব্ভতি। ধম্মাৰ এতে ধম্মমত্তা অসারা অপরিণাযকাতি ইমিস্সা সুঞ্ঞতায দীপনত্থং ৰুত্তা। তস্মা এৰমেত্থ অত্থো ৰেদিতব্বো – যস্মিং সমযে কামাৰচরং পঠমং মহাকুসলচিত্তং উপ্পজ্জতি, তস্মিং সমযে চিত্তঙ্গৰসেন উপ্পন্না অতিরেকপণ্ণাসধম্মা সভাৰট্ঠেন ধম্মা এৰ হোন্তি। ন অঞ্ঞো কোচি সত্তো ৰা ভাৰো ৰা পোসো ৰা পুগ্গলো ৰা হোতীতি। তথা রাসট্ঠেন খন্ধাৰ হোন্তীতি। এৰং পুরিমনযেনেৰ সব্বপদেসু অত্থযোজনা ৰেদিতব্বা। যস্মা পন ঝানতো অঞ্ঞং ঝানঙ্গং, মগ্গতো ৰা অঞ্ঞং মগ্গঙ্গং নত্থি, তস্মা ইধ ‘ঝানং হোতি, মগ্গো হোতি’ ইচ্চেৰ ৰুত্তং। উপনিজ্ঝাযনট্ঠেন হি ঝানমেৰ হেত্ৰট্ঠেন মগ্গোৰ হোতি। ন অঞ্ঞো কোচি সত্তো ৰা ভাৰো ৰাতি। এৰং সব্বপদেসু অত্থযোজনা কাতব্বা। নিদ্দেসৰারো উত্তানত্থোযেৰাতি।
121-145. Idāni tasmiṃ kho pana samaye dhammā hontīti suññatavāro āraddho. So uddesaniddesavasena dvidhā vavatthito. Tattha uddesavāre ‘dhammā hontī’ti iminā saddhiṃ catuvīsati koṭṭhāsā honti. Sabbakoṭṭhāsesu ca ‘cattāro dve tayo’ti gaṇanaparicchedo na vutto. Kasmā? Saṅgahavāre paricchinnattā. Tattha paricchinnadhammāyeva hi idhāpi vuttā. Na hettha satto vā bhāvo vā attā vā upalabbhati. Dhammāva ete dhammamattā asārā apariṇāyakāti imissā suññatāya dīpanatthaṃ vuttā. Tasmā evamettha attho veditabbo – yasmiṃ samaye kāmāvacaraṃ paṭhamaṃ mahākusalacittaṃ uppajjati, tasmiṃ samaye cittaṅgavasena uppannā atirekapaṇṇāsadhammā sabhāvaṭṭhena dhammā eva honti. Na añño koci satto vā bhāvo vā poso vā puggalo vā hotīti. Tathā rāsaṭṭhena khandhāva hontīti. Evaṃ purimanayeneva sabbapadesu atthayojanā veditabbā. Yasmā pana jhānato aññaṃ jhānaṅgaṃ, maggato vā aññaṃ maggaṅgaṃ natthi, tasmā idha ‘jhānaṃ hoti, maggo hoti’ icceva vuttaṃ. Upanijjhāyanaṭṭhena hi jhānameva hetvaṭṭhena maggova hoti. Na añño koci satto vā bhāvo vāti. Evaṃ sabbapadesu atthayojanā kātabbā. Niddesavāro uttānatthoyevāti.
সুঞ্ঞতৰারো নিট্ঠিতো।
Suññatavāro niṭṭhito.
নিট্ঠিতা চ তীহি মহাৰারেহি মণ্ডেত্ৰা নিদ্দিট্ঠস্স
Niṭṭhitā ca tīhi mahāvārehi maṇḍetvā niddiṭṭhassa
পঠমচিত্তস্স অত্থৰণ্ণনা।
Paṭhamacittassa atthavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / কামাৰচরকুসলং • Kāmāvacarakusalaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / সুঞ্ঞতৰারৰণ্ণনা • Suññatavāravaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / সুঞ্ঞতৰারাদিৰণ্ণনা • Suññatavārādivaṇṇanā
