| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
9. සුපණ්‌ණසංයුත්‌තවණ්‌ණනා
9. Supaṇṇasaṃyuttavaṇṇanā
392-437. පත්‌තානන්‌ති උභොසු පක්‌ඛෙසු පත්‌තානං. වණ්‌ණවන්‌තතායාති අතිසයෙන විචිත්‌තවණ්‌ණතාය. අතිසයත්‌ථො හි අයං වන්‌ත-සද්‌දො. පුරිමනයෙනාති නාගසංයුත්‌තෙ පඨමසුත්‌තෙ වුත්‌තනයෙන. උද්‌ධරන්‌තීති සමුද්‌දතො උද්‌ධරන්‌ති, පථවන්‌තරපබ්‌බතන්‌තරතො පන තෙසං උද්‌ධරණං දුක්‌කරමෙව. පණීතතරෙති බලෙන පණීතතරෙ, බලවන්‌තෙති අත්‌ථො. අනුද්‌ධරණීයනාගාති ආනුභාවමහන්‌තතාය ච වසනට්‌ඨානවිදුග්‌ගතාය ච උද්‌ධරිතුං අසක්‌කුණෙය්‍යා නාගා. තෙ ‘‘සත්‌තවිධා’’ති වත්‌වා සරූපතො වසනට්‌ඨානතො ච දස්‌සෙන්‌තො ‘‘කම්‌බලස්‌සතරා’’තිආදිමාහ. තත්‌ථ කම්‌බලස්‌සතරා ධතරට්‌ඨාති ඉමෙ ජාතිවසෙන වුත්‌තා. සත්‌තසීදන්‌තරවාසිනොති සත්‌තවිධසීදසමුද්‌දවාසිනො. පථවිට්‌ඨකාති පථවන්‌තරවාසිනො, තථා පබ්‌බතට්‌ඨකා. තෙ ච විමානවාසිනො. තෙ නාගෙ කොචි සුපණ්‌ණො උද්‌ධරිතුං න සක්‌කොතීති සම්‌බන්‌ධො. සෙසන්‌ති ‘‘කායෙන ද්‌වයකාරිනො’’තිආදීසු යං වත්‌තබ්‌බං, තං සබ්‌බං නාගසංයුත්‌තෙ වුත්‌තනයමෙව, තත්‌ථ ච වුත්‌තනයෙනෙව අත්‌ථො වෙදිතබ්‌බොති අධිප්‌පායො.
392-437.Pattānanti ubhosu pakkhesu pattānaṃ. Vaṇṇavantatāyāti atisayena vicittavaṇṇatāya. Atisayattho hi ayaṃ vanta-saddo. Purimanayenāti nāgasaṃyutte paṭhamasutte vuttanayena. Uddharantīti samuddato uddharanti, pathavantarapabbatantarato pana tesaṃ uddharaṇaṃ dukkarameva. Paṇītatareti balena paṇītatare, balavanteti attho. Anuddharaṇīyanāgāti ānubhāvamahantatāya ca vasanaṭṭhānaviduggatāya ca uddharituṃ asakkuṇeyyā nāgā. Te ‘‘sattavidhā’’ti vatvā sarūpato vasanaṭṭhānato ca dassento ‘‘kambalassatarā’’tiādimāha. Tattha kambalassatarā dhataraṭṭhāti ime jātivasena vuttā. Sattasīdantaravāsinoti sattavidhasīdasamuddavāsino. Pathaviṭṭhakāti pathavantaravāsino, tathā pabbataṭṭhakā. Te ca vimānavāsino. Te nāge koci supaṇṇo uddharituṃ na sakkotīti sambandho. Sesanti ‘‘kāyena dvayakārino’’tiādīsu yaṃ vattabbaṃ, taṃ sabbaṃ nāgasaṃyutte vuttanayameva, tattha ca vuttanayeneva attho veditabboti adhippāyo.
සුපණ්‌ණසංයුත්‌තවණ්‌ණනා නිට්‌ඨිතා.
Supaṇṇasaṃyuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
1. සුද්‌ධිකසුත්‌තං • 1. Suddhikasuttaṃ
2. හරන්‌තිසුත්‌තං • 2. Harantisuttaṃ
3. ද්‌වයකාරීසුත්‌තං • 3. Dvayakārīsuttaṃ
4-6. දුතියාදිද්‌වයකාරීසුත්‌තත්‌තිකං • 4-6. Dutiyādidvayakārīsuttattikaṃ
7-16. අණ්‌ඩජදානූපකාරසුත්‌තදසකං • 7-16. Aṇḍajadānūpakārasuttadasakaṃ
17-46. ජලාබුජාදිදානූපකාරසුත්‌තතිංසකං • 17-46. Jalābujādidānūpakārasuttatiṃsakaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. සුපණ්‌ණසංයුත්‌තවණ්‌ණනා • 9. Supaṇṇasaṃyuttavaṇṇanā
