| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๑๗. สุปาริจริยวโคฺค
17. Supāricariyavaggo
๑. สุปาริจริยเตฺถรอปทานํ
1. Supāricariyattheraapadānaṃ
๑.
1.
‘‘ปทุโม นาม นาเมน, ทฺวิปทิโนฺท นราสโภ;
‘‘Padumo nāma nāmena, dvipadindo narāsabho;
ปวนา อภินิกฺขมฺม, ธมฺมํ เทเสติ จกฺขุมาฯ
Pavanā abhinikkhamma, dhammaṃ deseti cakkhumā.
๒.
2.
‘‘ยกฺขานํ สมโย อาสิ, อวิทูเร มเหสิโน;
‘‘Yakkhānaṃ samayo āsi, avidūre mahesino;
เยน กิเจฺจน สมฺปตฺตา, อชฺฌาเปกฺขิํสุ ตาวเทฯ
Yena kiccena sampattā, ajjhāpekkhiṃsu tāvade.
๓.
3.
‘‘พุทฺธสฺส คิรมญฺญาย, อมตสฺส จ เทสนํ;
‘‘Buddhassa giramaññāya, amatassa ca desanaṃ;
ปสนฺนจิโตฺต สุมโน, อโปฺผเฎตฺวา อุปฎฺฐหิํฯ
Pasannacitto sumano, apphoṭetvā upaṭṭhahiṃ.
๔.
4.
‘‘สุจิณฺณสฺส ผลํ ปสฺส, อุปฎฺฐานสฺส สตฺถุโน;
‘‘Suciṇṇassa phalaṃ passa, upaṭṭhānassa satthuno;
ติํสกปฺปสหเสฺสสุ, ทุคฺคติํ นุปปชฺชหํฯ
Tiṃsakappasahassesu, duggatiṃ nupapajjahaṃ.
๕.
5.
‘‘อูนติํเส กปฺปสเต, สมลงฺกตนามโก;
‘‘Ūnatiṃse kappasate, samalaṅkatanāmako;
สตฺตรตนสมฺปโนฺน, จกฺกวตฺตี มหพฺพโลฯ
Sattaratanasampanno, cakkavattī mahabbalo.
๖.
6.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา สุปาริจริโย เถโร อิมา คาถาโย อภาสิตฺถาติฯ
Itthaṃ sudaṃ āyasmā supāricariyo thero imā gāthāyo abhāsitthāti.
สุปาริจริยเตฺถรสฺสาปทานํ ปฐมํฯ
Supāricariyattherassāpadānaṃ paṭhamaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑. สุปาริจริยเตฺถรอปทานวณฺณนา • 1. Supāricariyattheraapadānavaṇṇanā
