| Library / Tipiṭaka / තිපිටක • Tipiṭaka / අපදානපාළි • Apadānapāḷi |
17. සුපාරිචරියවග්‌ගො
17. Supāricariyavaggo
1. සුපාරිචරියත්‌ථෙරඅපදානං
1. Supāricariyattheraapadānaṃ
1.
1.
‘‘පදුමො නාම නාමෙන, ද්‌විපදින්‌දො නරාසභො;
‘‘Padumo nāma nāmena, dvipadindo narāsabho;
පවනා අභිනික්‌ඛම්‌ම, ධම්‌මං දෙසෙති චක්‌ඛුමා.
Pavanā abhinikkhamma, dhammaṃ deseti cakkhumā.
2.
2.
‘‘යක්‌ඛානං සමයො ආසි, අවිදූරෙ මහෙසිනො;
‘‘Yakkhānaṃ samayo āsi, avidūre mahesino;
යෙන කිච්‌චෙන සම්‌පත්‌තා, අජ්‌ඣාපෙක්‌ඛිංසු තාවදෙ.
Yena kiccena sampattā, ajjhāpekkhiṃsu tāvade.
3.
3.
‘‘බුද්‌ධස්‌ස ගිරමඤ්‌ඤාය, අමතස්‌ස ච දෙසනං;
‘‘Buddhassa giramaññāya, amatassa ca desanaṃ;
පසන්‌නචිත්‌තො සුමනො, අප්‌ඵොටෙත්‌වා උපට්‌ඨහිං.
Pasannacitto sumano, apphoṭetvā upaṭṭhahiṃ.
4.
4.
‘‘සුචිණ්‌ණස්‌ස ඵලං පස්‌ස, උපට්‌ඨානස්‌ස සත්‌ථුනො;
‘‘Suciṇṇassa phalaṃ passa, upaṭṭhānassa satthuno;
තිංසකප්‌පසහස්‌සෙසු, දුග්‌ගතිං නුපපජ්‌ජහං.
Tiṃsakappasahassesu, duggatiṃ nupapajjahaṃ.
5.
5.
‘‘ඌනතිංසෙ කප්‌පසතෙ, සමලඞ්‌කතනාමකො;
‘‘Ūnatiṃse kappasate, samalaṅkatanāmako;
සත්‌තරතනසම්‌පන්‌නො, චක්‌කවත්‌තී මහබ්‌බලො.
Sattaratanasampanno, cakkavattī mahabbalo.
6.
6.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං ආයස්‌මා සුපාරිචරියො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā supāricariyo thero imā gāthāyo abhāsitthāti.
සුපාරිචරියත්‌ථෙරස්‌සාපදානං පඨමං.
Supāricariyattherassāpadānaṃ paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / අපදාන-අට්‌ඨකථා • Apadāna-aṭṭhakathā / 1. සුපාරිචරියත්‌ථෙරඅපදානවණ්‌ණනා • 1. Supāricariyattheraapadānavaṇṇanā
