| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
17. ஸுபாரிசரியவக்³கோ³
17. Supāricariyavaggo
1. ஸுபாரிசரியத்தே²ரஅபதா³னவண்ணனா
1. Supāricariyattheraapadānavaṇṇanā
பது³மோ நாம நாமேனாதிஆதி³கங் ஆயஸ்மதோ ஸுபாரிசரியத்தே²ரஸ்ஸ அபதா³னங். அயம்பி புரிமமுனிபுங்க³வேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே யக்க²யோனியங் நிப்³ப³த்தோ ஹிமவதி யக்க²ஸமாக³மங் க³தோ ப⁴க³வதோ தே³வயக்க²க³ந்த⁴ப்³ப³னாகா³னங் த⁴ம்மதே³ஸனங் ஸுத்வா பஸன்னமானஸோ உபோ⁴ ஹத்தே² ஆபு⁴ஜித்வா அப்போ²டேஸி நமஸ்ஸி ச. ஸோ தேன புஞ்ஞேன ததோ சுதோ உபரி தே³வலோகே உப்பன்னோ தத்த² தி³ப்³ப³ஸுக²ங் அனுப⁴வித்வா மனுஸ்ஸேஸு ச சக்கவதிஆதி³ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் க³ஹபதிகுலே நிப்³ப³த்தோ அட்³டோ⁴ மஹத்³த⁴னோ மஹாபோ⁴கோ³ ரதனத்தயே பஸன்னோ ஸத்து² த⁴ம்மதே³ஸனங் ஸுத்வா ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹத்தங் பாபுணி.
Padumonāma nāmenātiādikaṃ āyasmato supāricariyattherassa apadānaṃ. Ayampi purimamunipuṅgavesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle yakkhayoniyaṃ nibbatto himavati yakkhasamāgamaṃ gato bhagavato devayakkhagandhabbanāgānaṃ dhammadesanaṃ sutvā pasannamānaso ubho hatthe ābhujitvā apphoṭesi namassi ca. So tena puññena tato cuto upari devaloke uppanno tattha dibbasukhaṃ anubhavitvā manussesu ca cakkavatiādisampattiyo anubhavitvā imasmiṃ buddhuppāde sāvatthiyaṃ gahapatikule nibbatto aḍḍho mahaddhano mahābhogo ratanattaye pasanno satthu dhammadesanaṃ sutvā saddhājāto pabbajitvā nacirasseva arahattaṃ pāpuṇi.
1. ஸோ ஏகதி³வஸங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³மோ நாம நாமேனாதிஆதி³மாஹ. தத்த² பது³மோதி யஸ்ஸ பாத³னிக்கே²பஸமயே பத²விங் பி⁴ந்தி³த்வா பது³மங் உக்³க³ந்த்வா பாத³தலங் ஸம்படிச்ச²தி, தேன ஸஞ்ஞாணேன ஸோ ப⁴க³வா பது³மோதி ஸங்க²ங் க³தோ, இத⁴ பது³முத்தரோ ப⁴க³வா அதி⁴ப்பேதோ. ஸோ ப⁴க³வா பவனா வஸனவிஹாரா அபி⁴னிக்க²ம்ம வனமஜ்ஜ²ங் பவிஸித்வா த⁴ம்மங் தே³ஸேதீதி ஸம்ப³ந்தோ⁴.
1. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumo nāma nāmenātiādimāha. Tattha padumoti yassa pādanikkhepasamaye pathaviṃ bhinditvā padumaṃ uggantvā pādatalaṃ sampaṭicchati, tena saññāṇena so bhagavā padumoti saṅkhaṃ gato, idha padumuttaro bhagavā adhippeto. So bhagavā pavanā vasanavihārā abhinikkhamma vanamajjhaṃ pavisitvā dhammaṃ desetīti sambandho.
யக்கா²னங் ஸமயோதி தே³வானங் ஸமாக³மோ ஆஸி அஹோஸீதி அத்தோ². அஜ்ஜா²பெக்கி²ங்ஸு தாவதே³தி தஸ்மிங் தே³ஸனாகாலே அதி⁴அபெக்கி²ங்ஸு, விஸேஸேன பஸ்ஸனஸீலா அஹேஸுந்தி அத்தோ². ஸேஸங் பாகடமேவாதி.
Yakkhānaṃ samayoti devānaṃ samāgamo āsi ahosīti attho. Ajjhāpekkhiṃsu tāvadeti tasmiṃ desanākāle adhiapekkhiṃsu, visesena passanasīlā ahesunti attho. Sesaṃ pākaṭamevāti.
ஸுபாரிசரியத்தே²ரஅபதா³னவண்ணனா ஸமத்தா.
Supāricariyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. ஸுபாரிசரியத்தே²ரஅபதா³னங் • 1. Supāricariyattheraapadānaṃ
