| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১৭. সুপারিচরিযৰগ্গো
17. Supāricariyavaggo
১. সুপারিচরিযত্থেরঅপদানৰণ্ণনা
1. Supāricariyattheraapadānavaṇṇanā
পদুমো নাম নামেনাতিআদিকং আযস্মতো সুপারিচরিযত্থেরস্স অপদানং। অযম্পি পুরিমমুনিপুঙ্গৰেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে যক্খযোনিযং নিব্বত্তো হিমৰতি যক্খসমাগমং গতো ভগৰতো দেৰযক্খগন্ধব্বনাগানং ধম্মদেসনং সুত্ৰা পসন্নমানসো উভো হত্থে আভুজিত্ৰা অপ্ফোটেসি নমস্সি চ। সো তেন পুঞ্ঞেন ততো চুতো উপরি দেৰলোকে উপ্পন্নো তত্থ দিব্বসুখং অনুভৰিত্ৰা মনুস্সেসু চ চক্কৰতিআদিসম্পত্তিযো অনুভৰিত্ৰা ইমস্মিং বুদ্ধুপ্পাদে সাৰত্থিযং গহপতিকুলে নিব্বত্তো অড্ঢো মহদ্ধনো মহাভোগো রতনত্তযে পসন্নো সত্থু ধম্মদেসনং সুত্ৰা সদ্ধাজাতো পব্বজিত্ৰা নচিরস্সেৰ অরহত্তং পাপুণি।
Padumonāma nāmenātiādikaṃ āyasmato supāricariyattherassa apadānaṃ. Ayampi purimamunipuṅgavesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle yakkhayoniyaṃ nibbatto himavati yakkhasamāgamaṃ gato bhagavato devayakkhagandhabbanāgānaṃ dhammadesanaṃ sutvā pasannamānaso ubho hatthe ābhujitvā apphoṭesi namassi ca. So tena puññena tato cuto upari devaloke uppanno tattha dibbasukhaṃ anubhavitvā manussesu ca cakkavatiādisampattiyo anubhavitvā imasmiṃ buddhuppāde sāvatthiyaṃ gahapatikule nibbatto aḍḍho mahaddhano mahābhogo ratanattaye pasanno satthu dhammadesanaṃ sutvā saddhājāto pabbajitvā nacirasseva arahattaṃ pāpuṇi.
১. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমো নাম নামেনাতিআদিমাহ। তত্থ পদুমোতি যস্স পাদনিক্খেপসমযে পথৰিং ভিন্দিত্ৰা পদুমং উগ্গন্ত্ৰা পাদতলং সম্পটিচ্ছতি, তেন সঞ্ঞাণেন সো ভগৰা পদুমোতি সঙ্খং গতো, ইধ পদুমুত্তরো ভগৰা অধিপ্পেতো। সো ভগৰা পৰনা ৰসনৰিহারা অভিনিক্খম্ম ৰনমজ্ঝং পৰিসিত্ৰা ধম্মং দেসেতীতি সম্বন্ধো।
1. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumo nāma nāmenātiādimāha. Tattha padumoti yassa pādanikkhepasamaye pathaviṃ bhinditvā padumaṃ uggantvā pādatalaṃ sampaṭicchati, tena saññāṇena so bhagavā padumoti saṅkhaṃ gato, idha padumuttaro bhagavā adhippeto. So bhagavā pavanā vasanavihārā abhinikkhamma vanamajjhaṃ pavisitvā dhammaṃ desetīti sambandho.
যক্খানং সমযোতি দেৰানং সমাগমো আসি অহোসীতি অত্থো। অজ্ঝাপেক্খিংসু তাৰদেতি তস্মিং দেসনাকালে অধিঅপেক্খিংসু, ৰিসেসেন পস্সনসীলা অহেসুন্তি অত্থো। সেসং পাকটমেৰাতি।
Yakkhānaṃ samayoti devānaṃ samāgamo āsi ahosīti attho. Ajjhāpekkhiṃsu tāvadeti tasmiṃ desanākāle adhiapekkhiṃsu, visesena passanasīlā ahesunti attho. Sesaṃ pākaṭamevāti.
সুপারিচরিযত্থেরঅপদানৰণ্ণনা সমত্তা।
Supāricariyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১. সুপারিচরিযত্থেরঅপদানং • 1. Supāricariyattheraapadānaṃ
