| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೭. ಸುಪಾರಿಚರಿಯವಗ್ಗೋ
17. Supāricariyavaggo
೧. ಸುಪಾರಿಚರಿಯತ್ಥೇರಅಪದಾನವಣ್ಣನಾ
1. Supāricariyattheraapadānavaṇṇanā
ಪದುಮೋ ನಾಮ ನಾಮೇನಾತಿಆದಿಕಂ ಆಯಸ್ಮತೋ ಸುಪಾರಿಚರಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಮುನಿಪುಙ್ಗವೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಯಕ್ಖಯೋನಿಯಂ ನಿಬ್ಬತ್ತೋ ಹಿಮವತಿ ಯಕ್ಖಸಮಾಗಮಂ ಗತೋ ಭಗವತೋ ದೇವಯಕ್ಖಗನ್ಧಬ್ಬನಾಗಾನಂ ಧಮ್ಮದೇಸನಂ ಸುತ್ವಾ ಪಸನ್ನಮಾನಸೋ ಉಭೋ ಹತ್ಥೇ ಆಭುಜಿತ್ವಾ ಅಪ್ಫೋಟೇಸಿ ನಮಸ್ಸಿ ಚ। ಸೋ ತೇನ ಪುಞ್ಞೇನ ತತೋ ಚುತೋ ಉಪರಿ ದೇವಲೋಕೇ ಉಪ್ಪನ್ನೋ ತತ್ಥ ದಿಬ್ಬಸುಖಂ ಅನುಭವಿತ್ವಾ ಮನುಸ್ಸೇಸು ಚ ಚಕ್ಕವತಿಆದಿಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಗಹಪತಿಕುಲೇ ನಿಬ್ಬತ್ತೋ ಅಡ್ಢೋ ಮಹದ್ಧನೋ ಮಹಾಭೋಗೋ ರತನತ್ತಯೇ ಪಸನ್ನೋ ಸತ್ಥು ಧಮ್ಮದೇಸನಂ ಸುತ್ವಾ ಸದ್ಧಾಜಾತೋ ಪಬ್ಬಜಿತ್ವಾ ನಚಿರಸ್ಸೇವ ಅರಹತ್ತಂ ಪಾಪುಣಿ।
Padumonāma nāmenātiādikaṃ āyasmato supāricariyattherassa apadānaṃ. Ayampi purimamunipuṅgavesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle yakkhayoniyaṃ nibbatto himavati yakkhasamāgamaṃ gato bhagavato devayakkhagandhabbanāgānaṃ dhammadesanaṃ sutvā pasannamānaso ubho hatthe ābhujitvā apphoṭesi namassi ca. So tena puññena tato cuto upari devaloke uppanno tattha dibbasukhaṃ anubhavitvā manussesu ca cakkavatiādisampattiyo anubhavitvā imasmiṃ buddhuppāde sāvatthiyaṃ gahapatikule nibbatto aḍḍho mahaddhano mahābhogo ratanattaye pasanno satthu dhammadesanaṃ sutvā saddhājāto pabbajitvā nacirasseva arahattaṃ pāpuṇi.
೧. ಸೋ ಏಕದಿವಸಂ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪದುಮೋ ನಾಮ ನಾಮೇನಾತಿಆದಿಮಾಹ। ತತ್ಥ ಪದುಮೋತಿ ಯಸ್ಸ ಪಾದನಿಕ್ಖೇಪಸಮಯೇ ಪಥವಿಂ ಭಿನ್ದಿತ್ವಾ ಪದುಮಂ ಉಗ್ಗನ್ತ್ವಾ ಪಾದತಲಂ ಸಮ್ಪಟಿಚ್ಛತಿ, ತೇನ ಸಞ್ಞಾಣೇನ ಸೋ ಭಗವಾ ಪದುಮೋತಿ ಸಙ್ಖಂ ಗತೋ, ಇಧ ಪದುಮುತ್ತರೋ ಭಗವಾ ಅಧಿಪ್ಪೇತೋ। ಸೋ ಭಗವಾ ಪವನಾ ವಸನವಿಹಾರಾ ಅಭಿನಿಕ್ಖಮ್ಮ ವನಮಜ್ಝಂ ಪವಿಸಿತ್ವಾ ಧಮ್ಮಂ ದೇಸೇತೀತಿ ಸಮ್ಬನ್ಧೋ।
1. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumo nāma nāmenātiādimāha. Tattha padumoti yassa pādanikkhepasamaye pathaviṃ bhinditvā padumaṃ uggantvā pādatalaṃ sampaṭicchati, tena saññāṇena so bhagavā padumoti saṅkhaṃ gato, idha padumuttaro bhagavā adhippeto. So bhagavā pavanā vasanavihārā abhinikkhamma vanamajjhaṃ pavisitvā dhammaṃ desetīti sambandho.
ಯಕ್ಖಾನಂ ಸಮಯೋತಿ ದೇವಾನಂ ಸಮಾಗಮೋ ಆಸಿ ಅಹೋಸೀತಿ ಅತ್ಥೋ। ಅಜ್ಝಾಪೇಕ್ಖಿಂಸು ತಾವದೇತಿ ತಸ್ಮಿಂ ದೇಸನಾಕಾಲೇ ಅಧಿಅಪೇಕ್ಖಿಂಸು, ವಿಸೇಸೇನ ಪಸ್ಸನಸೀಲಾ ಅಹೇಸುನ್ತಿ ಅತ್ಥೋ। ಸೇಸಂ ಪಾಕಟಮೇವಾತಿ।
Yakkhānaṃ samayoti devānaṃ samāgamo āsi ahosīti attho. Ajjhāpekkhiṃsu tāvadeti tasmiṃ desanākāle adhiapekkhiṃsu, visesena passanasīlā ahesunti attho. Sesaṃ pākaṭamevāti.
ಸುಪಾರಿಚರಿಯತ್ಥೇರಅಪದಾನವಣ್ಣನಾ ಸಮತ್ತಾ।
Supāricariyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧. ಸುಪಾರಿಚರಿಯತ್ಥೇರಅಪದಾನಂ • 1. Supāricariyattheraapadānaṃ
