| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
17. සුපාරිචරියවග්‌ගො
17. Supāricariyavaggo
1. සුපාරිචරියත්‌ථෙරඅපදානවණ්‌ණනා
1. Supāricariyattheraapadānavaṇṇanā
පදුමො නාම නාමෙනාතිආදිකං ආයස්‌මතො සුපාරිචරියත්‌ථෙරස්‌ස අපදානං. අයම්‌පි පුරිමමුනිපුඞ්‌ගවෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො පදුමුත්‌තරස්‌ස භගවතො කාලෙ යක්‌ඛයොනියං නිබ්‌බත්‌තො හිමවති යක්‌ඛසමාගමං ගතො භගවතො දෙවයක්‌ඛගන්‌ධබ්‌බනාගානං ධම්‌මදෙසනං සුත්‌වා පසන්‌නමානසො උභො හත්‌ථෙ ආභුජිත්‌වා අප්‌ඵොටෙසි නමස්‌සි ච. සො තෙන පුඤ්‌ඤෙන තතො චුතො උපරි දෙවලොකෙ උප්‌පන්‌නො තත්‌ථ දිබ්‌බසුඛං අනුභවිත්‌වා මනුස්‌සෙසු ච චක්‌කවතිආදිසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ සාවත්‌ථියං ගහපතිකුලෙ නිබ්‌බත්‌තො අඩ්‌ඪො මහද්‌ධනො මහාභොගො රතනත්‌තයෙ පසන්‌නො සත්‌ථු ධම්‌මදෙසනං සුත්‌වා සද්‌ධාජාතො පබ්‌බජිත්‌වා නචිරස්‌සෙව අරහත්‌තං පාපුණි.
Padumonāma nāmenātiādikaṃ āyasmato supāricariyattherassa apadānaṃ. Ayampi purimamunipuṅgavesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle yakkhayoniyaṃ nibbatto himavati yakkhasamāgamaṃ gato bhagavato devayakkhagandhabbanāgānaṃ dhammadesanaṃ sutvā pasannamānaso ubho hatthe ābhujitvā apphoṭesi namassi ca. So tena puññena tato cuto upari devaloke uppanno tattha dibbasukhaṃ anubhavitvā manussesu ca cakkavatiādisampattiyo anubhavitvā imasmiṃ buddhuppāde sāvatthiyaṃ gahapatikule nibbatto aḍḍho mahaddhano mahābhogo ratanattaye pasanno satthu dhammadesanaṃ sutvā saddhājāto pabbajitvā nacirasseva arahattaṃ pāpuṇi.
1. සො එකදිවසං අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො පදුමො නාම නාමෙනාතිආදිමාහ. තත්‌ථ පදුමොති යස්‌ස පාදනික්‌ඛෙපසමයෙ පථවිං භින්‌දිත්‌වා පදුමං උග්‌ගන්‌ත්‌වා පාදතලං සම්‌පටිච්‌ඡති, තෙන සඤ්‌ඤාණෙන සො භගවා පදුමොති සඞ්‌ඛං ගතො, ඉධ පදුමුත්‌තරො භගවා අධිප්‌පෙතො. සො භගවා පවනා වසනවිහාරා අභිනික්‌ඛම්‌ම වනමජ්‌ඣං පවිසිත්‌වා ධම්‌මං දෙසෙතීති සම්‌බන්‌ධො.
1. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumo nāma nāmenātiādimāha. Tattha padumoti yassa pādanikkhepasamaye pathaviṃ bhinditvā padumaṃ uggantvā pādatalaṃ sampaṭicchati, tena saññāṇena so bhagavā padumoti saṅkhaṃ gato, idha padumuttaro bhagavā adhippeto. So bhagavā pavanā vasanavihārā abhinikkhamma vanamajjhaṃ pavisitvā dhammaṃ desetīti sambandho.
යක්‌ඛානං සමයොති දෙවානං සමාගමො ආසි අහොසීති අත්‌ථො. අජ්‌ඣාපෙක්‌ඛිංසු තාවදෙති තස්‌මිං දෙසනාකාලෙ අධිඅපෙක්‌ඛිංසු, විසෙසෙන පස්‌සනසීලා අහෙසුන්‌ති අත්‌ථො. සෙසං පාකටමෙවාති.
Yakkhānaṃ samayoti devānaṃ samāgamo āsi ahosīti attho. Ajjhāpekkhiṃsu tāvadeti tasmiṃ desanākāle adhiapekkhiṃsu, visesena passanasīlā ahesunti attho. Sesaṃ pākaṭamevāti.
සුපාරිචරියත්‌ථෙරඅපදානවණ්‌ණනා සමත්‌තා.
Supāricariyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 1. සුපාරිචරියත්‌ථෙරඅපදානං • 1. Supāricariyattheraapadānaṃ
