| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. ஸுபதிஸுத்தவண்ணனா
7. Supatisuttavaṇṇanā
143. ஸத்தமே பாதே³ பக்கா²லெத்வாதி உதுகா³ஹாபனத்த²ங் தோ⁴வித்வா. பு³த்³தா⁴னங் பன ஸரீரே ரஜோஜல்லங் ந உபலிம்பதி, உத³கம்பி பொக்க²ரபத்தே பக்கி²த்தங் விய விவட்டித்வா க³ச்ச²தி. அபிச கோ² தோ⁴தபாத³கே கே³ஹே பாதே³ தோ⁴வித்வா பவிஸனங் பப்³ப³ஜிதானங் வத்தங். தத்த² பு³த்³தா⁴னங் வத்தபே⁴தோ³ நாம நத்தி², வத்தஸீஸே பன ட²த்வா தோ⁴வந்தி. ஸசே ஹி ததா²க³தோ நேவ ந்ஹாயெய்ய, ந பாதே³ தோ⁴வெய்ய, ‘‘நாயங் மனுஸ்ஸோ’’தி வதெ³ய்யுங். தஸ்மா மனுஸ்ஸகிரியங் அமுஞ்சந்தோ தோ⁴வதி. ஸதோ ஸம்பஜானோதி ஸொப்பபரிக்³கா³ஹகேன ஸதிஸம்பஜஞ்ஞேன ஸமன்னாக³தோ. உபஸங்கமீதி ஸமணோ கோ³தமோ ஸப்³ப³ரத்திங் அப்³போ⁴காஸே சங்கமித்வா க³ந்த⁴குடிங் பவிஸித்வா நித்³தா³யதி, அதிவிய ஸுக²ஸயிதோ ப⁴விஸ்ஸதி, க⁴ட்டயிஸ்ஸாமி நந்தி சிந்தெத்வா உபஸங்கமி.
143. Sattame pāde pakkhāletvāti utugāhāpanatthaṃ dhovitvā. Buddhānaṃ pana sarīre rajojallaṃ na upalimpati, udakampi pokkharapatte pakkhittaṃ viya vivaṭṭitvā gacchati. Apica kho dhotapādake gehe pāde dhovitvā pavisanaṃ pabbajitānaṃ vattaṃ. Tattha buddhānaṃ vattabhedo nāma natthi, vattasīse pana ṭhatvā dhovanti. Sace hi tathāgato neva nhāyeyya, na pāde dhoveyya, ‘‘nāyaṃ manusso’’ti vadeyyuṃ. Tasmā manussakiriyaṃ amuñcanto dhovati. Sato sampajānoti soppapariggāhakena satisampajaññena samannāgato. Upasaṅkamīti samaṇo gotamo sabbarattiṃ abbhokāse caṅkamitvā gandhakuṭiṃ pavisitvā niddāyati, ativiya sukhasayito bhavissati, ghaṭṭayissāmi nanti cintetvā upasaṅkami.
கிங் ஸொப்பஸீதி கிங் ஸுபஸி, கிங் ஸொப்பங் நாமித³ங் தவாதி வத³தி. கிங் நு ஸொப்பஸீதி கஸ்மா நு ஸுபஸி? து³ப்³ப⁴கோ³ வியாதி மதோ விய, விஸஞ்ஞீ விய ச. ஸுஞ்ஞமகா³ரந்தி ஸுஞ்ஞங் மே க⁴ரங் லத்³த⁴ந்தி ஸொப்பஸீதி வத³தி. ஸூரியே உக்³க³தேதி ஸூரியம்ஹி உட்டி²தே. இதா³னி ஹி அஞ்ஞே பி⁴க்கூ² ஸம்மஜ்ஜந்தி , பானீயங் உபட்ட²பெந்தி, பி⁴க்கா²சாரக³மனஸஜ்ஜா ப⁴வந்தி, த்வங் கஸ்மா ஸொப்பஸியேவ.
Kiṃ soppasīti kiṃ supasi, kiṃ soppaṃ nāmidaṃ tavāti vadati. Kiṃ nu soppasīti kasmā nu supasi? Dubbhago viyāti mato viya, visaññī viya ca. Suññamagāranti suññaṃ me gharaṃ laddhanti soppasīti vadati. Sūriye uggateti sūriyamhi uṭṭhite. Idāni hi aññe bhikkhū sammajjanti , pānīyaṃ upaṭṭhapenti, bhikkhācāragamanasajjā bhavanti, tvaṃ kasmā soppasiyeva.
ஜாலினீதி தயோ ப⁴வே அஜ்ஜொ²த்த²ரித்வா டி²தேன ‘‘அஜ்ஜ²த்திகஸ்ஸுபாதா³ய அட்டா²ரஸதண்ஹாவிசரிதானீ’’திஆதி³னா (விப⁴॰ 842) தேன தேன அத்தனோ கொட்டா²ஸபூ⁴தேன ஜாலேன ஜாலினீ. விஸத்திகாதி ரூபாதீ³ஸு தத்த² தத்த² விஸத்ததாய விஸமூலதாய விஸபரிபோ⁴க³தாய ச விஸத்திகா. குஹிஞ்சி நேதவேதி கத்த²சி நேதுங். ஸப்³பூ³பதி⁴ பரிக்க²யாதி ஸப்³பே³ஸங் க²ந்த⁴கிலேஸாபி⁴ஸங்கா²ரகாமகு³ணபே⁴தா³னங் உபதீ⁴னங் பரிக்க²யா. கிங் தவெத்த², மாராதி, மார, துய்ஹங் கிங் எத்த²? கஸ்மா த்வங் உண்ஹயாகு³யங் நிலீயிதுங் அஸக்கொந்தீ கு²த்³த³கமக்கி²கா விய அந்தந்தேனேவ உஜ்ஜா²யந்தோ ஆஹிண்ட³ஸீதி. ஸத்தமங்.
Jālinīti tayo bhave ajjhottharitvā ṭhitena ‘‘ajjhattikassupādāya aṭṭhārasataṇhāvicaritānī’’tiādinā (vibha. 842) tena tena attano koṭṭhāsabhūtena jālena jālinī. Visattikāti rūpādīsu tattha tattha visattatāya visamūlatāya visaparibhogatāya ca visattikā. Kuhiñci netaveti katthaci netuṃ. Sabbūpadhi parikkhayāti sabbesaṃ khandhakilesābhisaṅkhārakāmaguṇabhedānaṃ upadhīnaṃ parikkhayā. Kiṃ tavettha, mārāti, māra, tuyhaṃ kiṃ ettha? Kasmā tvaṃ uṇhayāguyaṃ nilīyituṃ asakkontī khuddakamakkhikā viya antanteneva ujjhāyanto āhiṇḍasīti. Sattamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. ஸுபதிஸுத்தங் • 7. Supatisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. ஸுபதிஸுத்தவண்ணனா • 7. Supatisuttavaṇṇanā
