| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
7. සුපතිසුත්‌තවණ්‌ණනා
7. Supatisuttavaṇṇanā
143. උතුගාහාපනත්‌ථං ධොවිත්‌වා, න රජොජල්‌ලවික්‌ඛාලනත්‌ථං. තෙනාහ ‘‘බුද්‌ධානං පනා’’තිආදි. ධොතපාදකෙ ගෙහෙති ධොතපාදෙහි අක්‌කමිතබ්‌බකෙ. වත්‌තභෙදො නාම නත්‌ථි ධම්‌මස්‌සාමිභාවතො. වත්‌තසීසෙ ඨත්‌වා ධොවන්‌ති අඤ්‌ඤෙසං දිට්‌ඨානුගතිආපජ්‌ජනත්‌ථං. සොප්‌පපරිග්‌ගාහකෙනාති එත්‌ථ සොප්‌පං නාම නිද්‌දාය අන්‌තරන්‌තරා පවත්‌තකිරියමයචිත්‌තප්‌පවත්‌තිරහිතා නිරන්‌තරභවඞ්‌ගසන්‌තතීති තං සභාවතො පයොජනතො කාලපරිච්‌ඡෙදතො පරිග්‌ගාහකං උපරිනිද්‌දෙසසතිසම්‌පජඤ්‌ඤං සන්‌ධාය වුත්‌තං ‘‘සොප්‌පපරිග්‌ගාහකෙන සතිසම්‌පජඤ්‌ඤෙනා’’ති. කෙචි පන ‘‘නිද්‌දාසොප්‌පනා’’ති වදන්‌ති, තං භගවතො සොප්‌පං හීළෙන්‌තො වදති.
143.Utugāhāpanatthaṃdhovitvā, na rajojallavikkhālanatthaṃ. Tenāha ‘‘buddhānaṃ panā’’tiādi. Dhotapādake geheti dhotapādehi akkamitabbake. Vattabhedo nāma natthi dhammassāmibhāvato. Vattasīseṭhatvā dhovanti aññesaṃ diṭṭhānugatiāpajjanatthaṃ. Soppapariggāhakenāti ettha soppaṃ nāma niddāya antarantarā pavattakiriyamayacittappavattirahitā nirantarabhavaṅgasantatīti taṃ sabhāvato payojanato kālaparicchedato pariggāhakaṃ upariniddesasatisampajaññaṃ sandhāya vuttaṃ ‘‘soppapariggāhakena satisampajaññenā’’ti. Keci pana ‘‘niddāsoppanā’’ti vadanti, taṃ bhagavato soppaṃ hīḷento vadati.
කිං නූති එත්‌ථං කින්‌ති හෙතුනිස්‌සක්‌කෙ පච්‌චත්‌තවචනන්‌ති ආහ ‘‘කස්‌මා නු සුපසී’’ති? දුබ්‌භගො වුච්‌චති නිස්‌සිරිකො භින්‌නභගො, සො පන මතසදිසො විසඤ්‌ඤිසදිසො ච හොතීති ආහ ‘‘මතො විය විසඤ්‌ඤී විය චා’’ති.
Kiṃ nūti etthaṃ kinti hetunissakke paccattavacananti āha ‘‘kasmā nu supasī’’ti? Dubbhago vuccati nissiriko bhinnabhago, so pana matasadiso visaññisadiso ca hotīti āha ‘‘mato viya visaññī viya cā’’ti.
ආදිනාති ආදි-සද්‌දෙන ‘‘බාහිරස්‌ස උපාදාය අට්‌ඨාරසා’’තිආදිනා (විභ. 842) ආගතං තණ්‌හාකොට්‌ඨාසං සඞ්‌ගණ්‌හාති. තත්‌ථ තත්‌ථ විසත්‌තතායාති තම්‌මිං තස්‌මිං ආරම්‌මණෙ විසෙසතො ආසත්‌තභාවෙන. විසස්‌ස දුක්‌ඛනිබ්‌බත්‌තකකම්‌මස්‌ස හෙතුභාවතො විසමූලතා විසං වා දුක්‌ඛදුක්‌ඛාදිභූතවෙදනා මූලං එතස්‌සාති විසමූලා, තණ්‌හා. තස්‌ස රූපාදිකස්‌ස දුක්‌ඛස්‌ස පරිභොගො, න අමතස්‌සාති විසපරිභොගතා. කත්‌ථචි නෙතුන්‌ති කත්‌ථචි භවෙ සබ්‌බථා නෙතුං? පරික්‌ඛයාති සබ්‌බසො ඛීණත්‌තා. තුය්‌හං කිං එත්‌ථාති සබ්‌බුපධිපරික්‌ඛයා සුද්‌ධස්‌ස මම පටිපත්‌තියං තුය්‌හං කිං උජ්‌ඣායනං? කෙවලං විඝාතොයෙව තෙති දස්‌සෙති.
Ādināti ādi-saddena ‘‘bāhirassa upādāya aṭṭhārasā’’tiādinā (vibha. 842) āgataṃ taṇhākoṭṭhāsaṃ saṅgaṇhāti. Tattha tattha visattatāyāti tammiṃ tasmiṃ ārammaṇe visesato āsattabhāvena. Visassa dukkhanibbattakakammassa hetubhāvato visamūlatā visaṃ vā dukkhadukkhādibhūtavedanā mūlaṃ etassāti visamūlā, taṇhā. Tassa rūpādikassa dukkhassa paribhogo, na amatassāti visaparibhogatā. Katthaci netunti katthaci bhave sabbathā netuṃ? Parikkhayāti sabbaso khīṇattā. Tuyhaṃ kiṃ etthāti sabbupadhiparikkhayā suddhassa mama paṭipattiyaṃ tuyhaṃ kiṃ ujjhāyanaṃ? Kevalaṃ vighātoyeva teti dasseti.
සුපතිසුත්‌තවණ්‌ණනා නිට්‌ඨිතා.
Supatisuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. සුපතිසුත්‌තං • 7. Supatisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. සුපතිසුත්‌තවණ්‌ණනා • 7. Supatisuttavaṇṇanā
