| Library / Tipiṭaka / తిపిటక • Tipiṭaka / కఙ్ఖావితరణీ-అభినవ-టీకా • Kaṅkhāvitaraṇī-abhinava-ṭīkā |
౩-౪. సుప్పటిచ్ఛన్నసిక్ఖాపదవణ్ణనా
3-4. Suppaṭicchannasikkhāpadavaṇṇanā
సుట్ఠు పటిచ్ఛన్నోతి జత్తుమ్పి ఉరమ్పి అవివరిత్వా పటిచ్ఛాదేతబ్బట్ఠానే పటిచ్ఛాదనేన పటిచ్ఛన్నో, న సీసపారుతో. తేనాహ ‘‘గణ్ఠికం పటిముఞ్చిత్వా’’తిఆది. తత్థ గణ్ఠికం పటిముఞ్చిత్వాతి గణ్ఠికం పాసకే పటిముఞ్చిత్వా. అన్తరఘరే వాతి గోచరగామే. ఏకదివసమ్పి వాసూపగతస్స సన్తికం యథాసుఖం గన్తుం వట్టతి, కో పన వాదో చతుప్పఞ్చాహం వాసమధిట్ఠాయ వసితభిక్ఖూనం సన్తికన్తి గణ్ఠిపదే లిఖితం.
Suṭṭhu paṭicchannoti jattumpi urampi avivaritvā paṭicchādetabbaṭṭhāne paṭicchādanena paṭicchanno, na sīsapāruto. Tenāha ‘‘gaṇṭhikaṃ paṭimuñcitvā’’tiādi. Tattha gaṇṭhikaṃ paṭimuñcitvāti gaṇṭhikaṃ pāsake paṭimuñcitvā. Antaraghare vāti gocaragāme. Ekadivasampi vāsūpagatassa santikaṃ yathāsukhaṃ gantuṃ vaṭṭati, ko pana vādo catuppañcāhaṃ vāsamadhiṭṭhāya vasitabhikkhūnaṃ santikanti gaṇṭhipade likhitaṃ.
వాసూపగతస్సాతి రత్తివాసత్థాయ ఉపగతస్స రత్తిభాగే వా దివసభాగే వా కాయం వివరిత్వా నిసీదతో అనాపత్తి.
Vāsūpagatassāti rattivāsatthāya upagatassa rattibhāge vā divasabhāge vā kāyaṃ vivaritvā nisīdato anāpatti.
సుప్పటిచ్ఛన్నసిక్ఖాపదవణ్ణనా నిట్ఠితా.
Suppaṭicchannasikkhāpadavaṇṇanā niṭṭhitā.
