| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၃-၄. သုပ္ပဋိစ္ဆန္နသိက္ခာပဒဝဏ္ဏနာ
3-4. Suppaṭicchannasikkhāpadavaṇṇanā
သုဋ္ဌု ပဋိစ္ဆန္နောတိ ဇတ္တုမ္ပိ ဥရမ္ပိ အဝိဝရိတ္ဝာ ပဋိစ္ဆာဒေတဗ္ဗဋ္ဌာနေ ပဋိစ္ဆာဒနေန ပဋိစ္ဆန္နော, န သီသပာရုတော။ တေနာဟ ‘‘ဂဏ္ဌိကံ ပဋိမုဉ္စိတ္ဝာ’’တိအာဒိ။ တတ္ထ ဂဏ္ဌိကံ ပဋိမုဉ္စိတ္ဝာတိ ဂဏ္ဌိကံ ပာသကေ ပဋိမုဉ္စိတ္ဝာ။ အန္တရဃရေ ဝာတိ ဂောစရဂာမေ။ ဧကဒိဝသမ္ပိ ဝာသူပဂတသ္သ သန္တိကံ ယထာသုခံ ဂန္တုံ ဝဋ္ဋတိ, ကော ပန ဝာဒော စတုပ္ပဉ္စာဟံ ဝာသမဓိဋ္ဌာယ ဝသိတဘိက္ခူနံ သန္တိကန္တိ ဂဏ္ဌိပဒေ လိခိတံ။
Suṭṭhu paṭicchannoti jattumpi urampi avivaritvā paṭicchādetabbaṭṭhāne paṭicchādanena paṭicchanno, na sīsapāruto. Tenāha ‘‘gaṇṭhikaṃ paṭimuñcitvā’’tiādi. Tattha gaṇṭhikaṃ paṭimuñcitvāti gaṇṭhikaṃ pāsake paṭimuñcitvā. Antaraghare vāti gocaragāme. Ekadivasampi vāsūpagatassa santikaṃ yathāsukhaṃ gantuṃ vaṭṭati, ko pana vādo catuppañcāhaṃ vāsamadhiṭṭhāya vasitabhikkhūnaṃ santikanti gaṇṭhipade likhitaṃ.
ဝာသူပဂတသ္သာတိ ရတ္တိဝာသတ္ထာယ ဥပဂတသ္သ ရတ္တိဘာဂေ ဝာ ဒိဝသဘာဂေ ဝာ ကာယံ ဝိဝရိတ္ဝာ နိသီဒတော အနာပတ္တိ။
Vāsūpagatassāti rattivāsatthāya upagatassa rattibhāge vā divasabhāge vā kāyaṃ vivaritvā nisīdato anāpatti.
သုပ္ပဋိစ္ဆန္နသိက္ခာပဒဝဏ္ဏနာ နိဋ္ဌိတာ။
Suppaṭicchannasikkhāpadavaṇṇanā niṭṭhitā.
