| Library / Tipiṭaka / তিপিটক • Tipiṭaka / উদানপাল়ি • Udānapāḷi |
৮. সুপ্পৰাসাসুত্তং
8. Suppavāsāsuttaṃ
১৮. এৰং মে সুতং – একং সমযং ভগৰা কুণ্ডিকাযং 1 ৰিহরতি কুণ্ডধানৰনে 2। তেন খো পন সমযেন সুপ্পৰাসা কোলিযধীতা সত্ত ৰস্সানি গব্ভং ধারেতি। সত্তাহং মূল়্হগব্ভা সা দুক্খাহি তিব্বাহি খরাহি কটুকাহি ৰেদনাহি ফুট্ঠা তীহি ৰিতক্কেহি অধিৰাসেতি – ‘‘সম্মাসম্বুদ্ধো ৰত সো ভগৰা যো ইমস্স এৰরূপস্স দুক্খস্স পহানায ধম্মং দেসেতি; সুপ্পটিপন্নো ৰত তস্স ভগৰতো সাৰকসঙ্ঘো যো ইমস্স এৰরূপস্স দুক্খস্স পহানায পটিপন্নো; সুসুখং ৰত তং নিব্বানং যত্থিদং এৰরূপং দুক্খং ন সংৰিজ্জতী’’তি।
18. Evaṃ me sutaṃ – ekaṃ samayaṃ bhagavā kuṇḍikāyaṃ 3 viharati kuṇḍadhānavane 4. Tena kho pana samayena suppavāsā koliyadhītā satta vassāni gabbhaṃ dhāreti. Sattāhaṃ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti – ‘‘sammāsambuddho vata so bhagavā yo imassa evarūpassa dukkhassa pahānāya dhammaṃ deseti; suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno; susukhaṃ vata taṃ nibbānaṃ yatthidaṃ evarūpaṃ dukkhaṃ na saṃvijjatī’’ti.
অথ খো সুপ্পৰাসা কোলিযধীতা সামিকং আমন্তেসি – ‘‘এহি ত্ৰং, অয্যপুত্ত, যেন ভগৰা তেনুপসঙ্কম; উপসঙ্কমিত্ৰা মম ৰচনেন ভগৰতো পাদে সিরসা ৰন্দাহি; অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছ – ‘সুপ্পৰাসা, ভন্তে, কোলিযধীতা ভগৰতো পাদে সিরসা ৰন্দতি; অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’তি। এৰঞ্চ ৰদেহি – ‘সুপ্পৰাসা, ভন্তে, কোলিযধীতা সত্ত ৰস্সানি গব্ভং ধারেতি। সত্তাহং মূল়্হগব্ভা সা দুক্খাহি তিব্বাহি খরাহি কটুকাহি ৰেদনাহি ফুট্ঠা তীহি ৰিতক্কেহি অধিৰাসেতি – সম্মাসম্বুদ্ধো ৰত সো ভগৰা যো ইমস্স এৰরূপস্স দুক্খস্স পহানায ধম্মং দেসেতি; সুপ্পটিপন্নো ৰত তস্স ভগৰতো সাৰকসঙ্ঘো যো ইমস্স এৰরূপস্স দুক্খস্স পহানায পটিপন্নো; সুসুখং ৰত তং নিব্বানং যত্থিদং এৰরূপং দুক্খং ন সংৰিজ্জতী’’’তি।
Atha kho suppavāsā koliyadhītā sāmikaṃ āmantesi – ‘‘ehi tvaṃ, ayyaputta, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi; appābādhaṃ appātaṅkaṃ lahuṭṭhānaṃ balaṃ phāsuvihāraṃ puccha – ‘suppavāsā, bhante, koliyadhītā bhagavato pāde sirasā vandati; appābādhaṃ appātaṅkaṃ lahuṭṭhānaṃ balaṃ phāsuvihāraṃ pucchatī’ti. Evañca vadehi – ‘suppavāsā, bhante, koliyadhītā satta vassāni gabbhaṃ dhāreti. Sattāhaṃ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti – sammāsambuddho vata so bhagavā yo imassa evarūpassa dukkhassa pahānāya dhammaṃ deseti; suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno; susukhaṃ vata taṃ nibbānaṃ yatthidaṃ evarūpaṃ dukkhaṃ na saṃvijjatī’’’ti.
‘‘পরম’’ন্তি খো সো কোলিযপুত্তো সুপ্পৰাসায কোলিযধীতায পটিস্সুত্ৰা যেন ভগৰা তেনুপসঙ্কমি ; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো কোলিযপুত্তো ভগৰন্তং এতদৰোচ – ‘‘সুপ্পৰাসা, ভন্তে, কোলিযধীতা ভগৰতো পাদে সিরসা ৰন্দতি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতি; এৰঞ্চ ৰদেতি – ‘সুপ্পৰাসা, ভন্তে, কোলিযধীতা সত্ত ৰস্সানি গব্ভং ধারেতি। সত্তাহং মূল়্হগব্ভা সা দুক্খাহি তিব্বাহি খরাহি কটুকাহি ৰেদনাহি ফুট্ঠা তীহি ৰিতক্কেহি অধিৰাসেতি – সম্মাসম্বুদ্ধো ৰত সো ভগৰা যো ইমস্স এৰরূপস্স দুক্খস্স পহানায ধম্মং দেসেতি; সুপ্পটিপন্নো ৰত তস্স ভগৰতো সাৰকসঙ্ঘো যো ইমস্স এৰরূপস্স দুক্খস্স পহানায পটিপন্নো; সুসুখং ৰত নিব্বানং যত্থিদং এৰরূপং দুক্খং ন সংৰিজ্জতী’’’তি।
‘‘Parama’’nti kho so koliyaputto suppavāsāya koliyadhītāya paṭissutvā yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho koliyaputto bhagavantaṃ etadavoca – ‘‘suppavāsā, bhante, koliyadhītā bhagavato pāde sirasā vandati, appābādhaṃ appātaṅkaṃ lahuṭṭhānaṃ balaṃ phāsuvihāraṃ pucchati; evañca vadeti – ‘suppavāsā, bhante, koliyadhītā satta vassāni gabbhaṃ dhāreti. Sattāhaṃ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti – sammāsambuddho vata so bhagavā yo imassa evarūpassa dukkhassa pahānāya dhammaṃ deseti; suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno; susukhaṃ vata nibbānaṃ yatthidaṃ evarūpaṃ dukkhaṃ na saṃvijjatī’’’ti.
‘‘সুখিনী হোতু সুপ্পৰাসা কোলিযধীতা; অরোগা অরোগং পুত্তং ৰিজাযতূ’’তি। সহ ৰচনা চ পন ভগৰতো সুপ্পৰাসা কোলিযধীতা সুখিনী অরোগা অরোগং পুত্তং ৰিজাযি।
‘‘Sukhinī hotu suppavāsā koliyadhītā; arogā arogaṃ puttaṃ vijāyatū’’ti. Saha vacanā ca pana bhagavato suppavāsā koliyadhītā sukhinī arogā arogaṃ puttaṃ vijāyi.
‘‘এৰং, ভন্তে’’তি খো সো কোলিযপুত্তো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা যেন সকং ঘরং তেন পচ্চাযাসি। অদ্দসা খো সো কোলিযপুত্তো সুপ্পৰাসং কোলিযধীতরং সুখিনিং অরোগং অরোগং পুত্তং ৰিজাতং। দিস্ৰানস্স এতদহোসি – ‘‘অচ্ছরিযং ৰত, ভো, অব্ভুতং ৰত, ভো, তথাগতস্স মহিদ্ধিকতা মহানুভাৰতা, যত্র হি নামাযং সুপ্পৰাসা কোলিযধীতা সহ ৰচনা চ পন 5 ভগৰতো সুখিনী অরোগা অরোগং পুত্তং ৰিজাযিস্সতী’’তি! অত্তমনো পমুদিতো পীতিসোমনস্সজাতো অহোসি।
‘‘Evaṃ, bhante’’ti kho so koliyaputto bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā yena sakaṃ gharaṃ tena paccāyāsi. Addasā kho so koliyaputto suppavāsaṃ koliyadhītaraṃ sukhiniṃ arogaṃ arogaṃ puttaṃ vijātaṃ. Disvānassa etadahosi – ‘‘acchariyaṃ vata, bho, abbhutaṃ vata, bho, tathāgatassa mahiddhikatā mahānubhāvatā, yatra hi nāmāyaṃ suppavāsā koliyadhītā saha vacanā ca pana 6 bhagavato sukhinī arogā arogaṃ puttaṃ vijāyissatī’’ti! Attamano pamudito pītisomanassajāto ahosi.
অথ খো সুপ্পৰাসা কোলিযধীতা সামিকং আমন্তেসি – ‘‘এহি ত্ৰং, অয্যপুত্ত, যেন ভগৰা তেনুপসঙ্কম; উপসঙ্কমিত্ৰা মম ৰচনেন ভগৰতো পাদে সিরসা ৰন্দাহি – ‘সুপ্পৰাসা, ভন্তে, কোলিযধীতা ভগৰতো পাদে সিরসা ৰন্দতী’তি; এৰঞ্চ ৰদেহি – ‘সুপ্পৰাসা, ভন্তে, কোলিযধীতা সত্ত ৰস্সানি গব্ভং ধারেতি। সত্তাহং মূল়্হগব্ভা সা এতরহি সুখিনী অরোগা অরোগং পুত্তং ৰিজাতা। সা সত্তাহং বুদ্ধপ্পমুখং ভিক্খুসঙ্ঘং ভত্তেন নিমন্তেতি। অধিৰাসেতু কির, ভন্তে, ভগৰা সুপ্পৰাসায কোলিযধীতায সত্ত ভত্তানি সদ্ধিং ভিক্খুসঙ্ঘেনা’’’তি।
Atha kho suppavāsā koliyadhītā sāmikaṃ āmantesi – ‘‘ehi tvaṃ, ayyaputta, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi – ‘suppavāsā, bhante, koliyadhītā bhagavato pāde sirasā vandatī’ti; evañca vadehi – ‘suppavāsā, bhante, koliyadhītā satta vassāni gabbhaṃ dhāreti. Sattāhaṃ mūḷhagabbhā sā etarahi sukhinī arogā arogaṃ puttaṃ vijātā. Sā sattāhaṃ buddhappamukhaṃ bhikkhusaṅghaṃ bhattena nimanteti. Adhivāsetu kira, bhante, bhagavā suppavāsāya koliyadhītāya satta bhattāni saddhiṃ bhikkhusaṅghenā’’’ti.
‘‘পরম’’ন্তি খো সো কোলিযপুত্তো সুপ্পৰাসায কোলিযধীতায পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো সো কোলিযপুত্তো ভগৰন্তং এতদৰোচ –
‘‘Parama’’nti kho so koliyaputto suppavāsāya koliyadhītāya paṭissutvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so koliyaputto bhagavantaṃ etadavoca –
‘‘সুপ্পৰাসা , ভন্তে, কোলিযধীতা ভগৰতো পাদে সিরসা ৰন্দতি; এৰঞ্চ ৰদেতি – ‘সুপ্পৰাসা, ভন্তে, কোলিযধীতা সত্ত ৰস্সানি গব্ভং ধারেতি। সত্তাহং মূল়্হগব্ভা সা এতরহি সুখিনী অরোগা অরোগং পুত্তং ৰিজাতা। সা সত্তাহং বুদ্ধপ্পমুখং ভিক্খুসঙ্ঘং ভত্তেন নিমন্তেতি। অধিৰাসেতু কির, ভন্তে, ভগৰা সুপ্পৰাসায কোলিযধীতায সত্ত ভত্তানি সদ্ধিং ভিক্খুসঙ্ঘেনা’’’তি।
‘‘Suppavāsā , bhante, koliyadhītā bhagavato pāde sirasā vandati; evañca vadeti – ‘suppavāsā, bhante, koliyadhītā satta vassāni gabbhaṃ dhāreti. Sattāhaṃ mūḷhagabbhā sā etarahi sukhinī arogā arogaṃ puttaṃ vijātā. Sā sattāhaṃ buddhappamukhaṃ bhikkhusaṅghaṃ bhattena nimanteti. Adhivāsetu kira, bhante, bhagavā suppavāsāya koliyadhītāya satta bhattāni saddhiṃ bhikkhusaṅghenā’’’ti.
তেন খো পন সমযেন অঞ্ঞতরেন উপাসকেন বুদ্ধপ্পমুখো ভিক্খুসঙ্ঘো স্ৰাতনায ভত্তেন নিমন্তিতো হোতি। সো চ উপাসকো আযস্মতো মহামোগ্গল্লানস্স 7 উপট্ঠাকো হোতি। অথ খো ভগৰা আযস্মন্তং মহামোগ্গল্লানং আমন্তেসি – ‘‘এহি ত্ৰং, মোগ্গল্লান, যেন সো উপাসকো তেনুপসঙ্কম ; উপসঙ্কমিত্ৰা তং উপাসকং এৰং ৰদেহি – ‘সুপ্পৰাসা, আৰুসো, কোলিযধীতা সত্ত ৰস্সানি গব্ভং ধারেসি। সত্তাহং মূল়্হগব্ভা সা এতরহি সুখিনী অরোগা অরোগং পুত্তং ৰিজাতা। সা সত্তাহং বুদ্ধপ্পমুখং ভিক্খুসঙ্ঘং ভত্তেন নিমন্তেতি। করোতু সুপ্পৰাসা কোলিযধীতা সত্ত ভত্তানি, পচ্ছা ত্ৰং করিস্সসী’তি 8। তুয্হেসো উপট্ঠাকো’’তি।
Tena kho pana samayena aññatarena upāsakena buddhappamukho bhikkhusaṅgho svātanāya bhattena nimantito hoti. So ca upāsako āyasmato mahāmoggallānassa 9 upaṭṭhāko hoti. Atha kho bhagavā āyasmantaṃ mahāmoggallānaṃ āmantesi – ‘‘ehi tvaṃ, moggallāna, yena so upāsako tenupasaṅkama ; upasaṅkamitvā taṃ upāsakaṃ evaṃ vadehi – ‘suppavāsā, āvuso, koliyadhītā satta vassāni gabbhaṃ dhāresi. Sattāhaṃ mūḷhagabbhā sā etarahi sukhinī arogā arogaṃ puttaṃ vijātā. Sā sattāhaṃ buddhappamukhaṃ bhikkhusaṅghaṃ bhattena nimanteti. Karotu suppavāsā koliyadhītā satta bhattāni, pacchā tvaṃ karissasī’ti 10. Tuyheso upaṭṭhāko’’ti.
‘‘এৰং, ভন্তে’’তি খো আযস্মা মহামোগ্গল্লানো ভগৰতো পটিস্সুত্ৰা যেন সো উপাসকো তেনুপসঙ্কমি; উপসঙ্কমিত্ৰা তং উপাসকং এতদৰোচ – ‘‘সুপ্পৰাসা, আৰুসো, কোলিযধীতা সত্ত ৰস্সানি গব্ভং ধারেতি। সত্তাহং মূল়্হগব্ভা সা এতরহি সুখিনী অরোগা অরোগং পুত্তং ৰিজাতা। সা সত্তাহং বুদ্ধপ্পমুখং ভিক্খুসঙ্ঘং ভত্তেন নিমন্তেতি। করোতু সুপ্পৰাসা কোলিযধীতা সত্ত ভত্তানি, পচ্ছা ত্ৰং করিস্সসী’’তি।
‘‘Evaṃ, bhante’’ti kho āyasmā mahāmoggallāno bhagavato paṭissutvā yena so upāsako tenupasaṅkami; upasaṅkamitvā taṃ upāsakaṃ etadavoca – ‘‘suppavāsā, āvuso, koliyadhītā satta vassāni gabbhaṃ dhāreti. Sattāhaṃ mūḷhagabbhā sā etarahi sukhinī arogā arogaṃ puttaṃ vijātā. Sā sattāhaṃ buddhappamukhaṃ bhikkhusaṅghaṃ bhattena nimanteti. Karotu suppavāsā koliyadhītā satta bhattāni, pacchā tvaṃ karissasī’’ti.
‘‘সচে মে, ভন্তে, অয্যো মহামোগ্গল্লানো তিণ্ণং ধম্মানং পাটিভোগো – ভোগানঞ্চ জীৰিতস্স চ সদ্ধায চ, করোতু সুপ্পৰাসা কোলিযধীতা সত্ত ভত্তানি, পচ্ছাহং করিস্সামী’’তি। ‘‘দ্ৰিন্নং খো তে অহং 11, আৰুসো, ধম্মানং পাটিভোগো – ভোগানঞ্চ জীৰিতস্স চ। সদ্ধায পন ত্ৰংযেৰ পাটিভোগো’’তি।
‘‘Sace me, bhante, ayyo mahāmoggallāno tiṇṇaṃ dhammānaṃ pāṭibhogo – bhogānañca jīvitassa ca saddhāya ca, karotu suppavāsā koliyadhītā satta bhattāni, pacchāhaṃ karissāmī’’ti. ‘‘Dvinnaṃ kho te ahaṃ 12, āvuso, dhammānaṃ pāṭibhogo – bhogānañca jīvitassa ca. Saddhāya pana tvaṃyeva pāṭibhogo’’ti.
‘‘সচে মে, ভন্তে, অয্যো মহামোগ্গল্লানো দ্ৰিন্নং ধম্মানং পাটিভোগো – ভোগানঞ্চ জীৰিতস্স চ, করোতু সুপ্পৰাসা কোলিযধীতা সত্ত ভত্তানি, পচ্ছাহং করিস্সামী’’তি।
‘‘Sace me, bhante, ayyo mahāmoggallāno dvinnaṃ dhammānaṃ pāṭibhogo – bhogānañca jīvitassa ca, karotu suppavāsā koliyadhītā satta bhattāni, pacchāhaṃ karissāmī’’ti.
অথ খো আযস্মা মহামোগ্গল্লানো তং উপাসকং সঞ্ঞাপেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘সঞ্ঞত্তো 13, ভন্তে, সো উপাসকো মযা; করোতু সুপ্পৰাসা কোলিযধীতা সত্ত ভত্তানি, পচ্ছা সো করিস্সতী’’তি।
Atha kho āyasmā mahāmoggallāno taṃ upāsakaṃ saññāpetvā yena bhagavā tenupasaṅkami; upasaṅkamitvā bhagavantaṃ etadavoca – ‘‘saññatto 14, bhante, so upāsako mayā; karotu suppavāsā koliyadhītā satta bhattāni, pacchā so karissatī’’ti.
অথ খো সুপ্পৰাসা কোলিযধীতা সত্তাহং বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি, তঞ্চ দারকং ভগৰন্তং ৰন্দাপেসি সব্বঞ্চ ভিক্খুসঙ্ঘং।
Atha kho suppavāsā koliyadhītā sattāhaṃ buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappesi sampavāresi, tañca dārakaṃ bhagavantaṃ vandāpesi sabbañca bhikkhusaṅghaṃ.
অথ খো আযস্মা সারিপুত্তো তং দারকং এতদৰোচ – ‘‘কচ্চি তে, দারক, খমনীযং, কচ্চি যাপনীযং, কচ্চি ন কিঞ্চি দুক্খ’’ন্তি? ‘‘কুতো মে, ভন্তে সারিপুত্ত, খমনীযং, কুতো যাপনীযং! সত্ত মে ৰস্সানি লোহিতকুম্ভিযং ৰুত্তানী’’তি।
Atha kho āyasmā sāriputto taṃ dārakaṃ etadavoca – ‘‘kacci te, dāraka, khamanīyaṃ, kacci yāpanīyaṃ, kacci na kiñci dukkha’’nti? ‘‘Kuto me, bhante sāriputta, khamanīyaṃ, kuto yāpanīyaṃ! Satta me vassāni lohitakumbhiyaṃ vuttānī’’ti.
অথ খো সুপ্পৰাসা কোলিযধীতা – ‘‘পুত্তো মে ধম্মসেনাপতিনা সদ্ধিং মন্তেতী’’তি অত্তমনা পমুদিতা পীতিসোমনস্সজাতা অহোসি। অথ খো ভগৰা (সুপ্পৰাসং কোলীযধীতরং অত্তমনং পমুদিতং পীতিসোমনস্সজাতং ৰিদিত্ৰা 15) 16 সুপ্পৰাসং কোলিযধীতরং এতদৰোচ – ‘‘ইচ্ছেয্যাসি ত্ৰং, সুপ্পৰাসে, অঞ্ঞম্পি এৰরূপং পুত্ত’’ন্তি? ‘‘ইচ্ছেয্যামহং, ভগৰা, অঞ্ঞানিপি এৰরূপানি সত্ত পুত্তানী’’তি ।
Atha kho suppavāsā koliyadhītā – ‘‘putto me dhammasenāpatinā saddhiṃ mantetī’’ti attamanā pamuditā pītisomanassajātā ahosi. Atha kho bhagavā (suppavāsaṃ kolīyadhītaraṃ attamanaṃ pamuditaṃ pītisomanassajātaṃ viditvā 17) 18 suppavāsaṃ koliyadhītaraṃ etadavoca – ‘‘iccheyyāsi tvaṃ, suppavāse, aññampi evarūpaṃ putta’’nti? ‘‘Iccheyyāmahaṃ, bhagavā, aññānipi evarūpāni satta puttānī’’ti .
অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘অসাতং সাতরূপেন, পিযরূপেন অপ্পিযং।
‘‘Asātaṃ sātarūpena, piyarūpena appiyaṃ;
দুক্খং সুখস্স রূপেন, পমত্তমতিৰত্ততী’’তি॥ অট্ঠমং।
Dukkhaṃ sukhassa rūpena, pamattamativattatī’’ti. aṭṭhamaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / উদান-অট্ঠকথা • Udāna-aṭṭhakathā / ৮. সুপ্পৰাসাসুত্তৰণ্ণনা • 8. Suppavāsāsuttavaṇṇanā
